Wooda ku kɔsi 22 - Bibeli do fee

I ya jirima amanii inɛ mmu

¹ Bii ì yɛ kɛtɛi inɛ gɔ walakɔ angudãɛ í nyɔ, maà sinda i toaa anyi i jɔ̀ɔ ku nɛ̀. Gbãa i baa inɛɛu wa.

² Bii í jɛ ilu mɛɛmuu kù wa amɛɛ, bii í nɔ í jɛ i kù mà inɛ iyi í nɔɔ mɔi, aa gbã mɛɛmuu i baaò wa ideɛi hee ilu mɛɛmuu ku naa ku yɔɔ, nɔ i sindoa.

³ Bii í nɔ í jɛ gbankɛlɛi inɛ gɔ mɔi, bɛɛbɛi aa cea nŋu mɔ. Bii í nɔ í jɛ ibɔ ŋa mɔi, bɛɛbɛi aa ce. Mii ndii inɛ gɔ iyi í nyɔ, bii ì tasiɛ fei, bɛɛbɛi aa cea. Kù sĩa i nɛ i jɔ̀ɔ.

⁴ Bii ì nɔ ì yɛ gbankɛlɛi inɛ gɔ walakɔ kɛtɛɛ í cuku si kpãa, maà ti i fũa inɛɛu si awɔ nŋu akã, í sĩa i baa ku dede.

Woodai mii ikã ikã iyi à kɔ

⁵ Inaabo kù nɛ ku dasi jĩnɛi inɛmɔkɔ, nɔ inɛmɔkɔ mɔ kù nɛ ku dasi jĩnɛi inaabo ŋa. Inɛ iyi wa ce mii dimi bɛɛbɛ fei, mii laalɔi wa ce bi Aɔ̃ Lafɛ̃ɛ nŋɛ.

⁶ Bii ì waa nɛ̀ si kpãa, nɔ ì yɛ antɛi yɛi si amaawɔi jĩi walakɔ si ilɛ do amaɛ ŋa walakɔ do njɛɛ ŋa, bii iyeu wa wɔɔba si amu ŋau walakɔ si njɛɛ ŋau, i kù nɛ i nya iyeu do amaɛ ŋau fei.

⁷ Aa jɔ̀ iyeu ku nɛ̀i nɔ i mu amu ŋau ku ba i jɛ ilu inɔ didɔ̃, nɔ hundeɛ ku sɔ.

⁸ Bii ì ma ile titɔ̃ aa ma idĩi i kaakoò sɛɛi ileu ku ba ku maà na ku jɛ idei iriɛ bii inɛ gɔ í na í nya í cuku wa hai si sɛɛi ileɛu í kpa araɛ.

⁹ I maà gbɛ̃ mii mmu ŋa si ilɛi jĩi ndii rezɛ̃ɛ nŋɛ ŋa. Bii ì ce bɛɛbɛ ŋa, amaajɛ ŋa iyi aa da si bɛ ŋa fei, ti Aɔ̃ Lafɛ̃ɛi á jɛ.

¹⁰ I maà tɔtɔɔ kɛtɛ do gbankɛlɛ i maa faò ilɛ ŋa.

¹¹ I maà ti i dasi jĩnɛ iyi à wɔ̃ acɔɛ do ikũ ikã ikã minji ŋa.

¹² Acɔ iyi í jɛ acɔ ku biiɛ, aa dasi booda yaba yabai si itĩ mɛɛ ŋau fei.

Idei njɛ hai gbɔa si gãmɛi inaabo gɔ

¹³ Bii í jɛ inɛmɔkɔ gɔ í so abo hee aŋaò à tɔtɔɔ, nɔ do ankãanyi kù na kù buu má,

¹⁴ nɔ wa fɔaa ide sãmi ŋa wa bɛjɛò iriɛ wa ni, abou ihɛ̃ waati iyi ǹ soo, iyi ǹ sũòɛ n kù baa.

¹⁵ Waati bɛɛbɛ, baai inaabou do iyeɛ aa so nyinda iyi wa nyisi iyi inɛɛu í ba inaaboui a kooò bi inɛ ngboi ilu ŋau bi andɛ koofai iluu.

¹⁶ Baai abou á sɔ̃ inɛ ngbo ŋaui ku ni, amui ǹ mua mɔkɔu ihɛ̃ ama inaabom, amma wee nsɛi kù na kù waa buu má,

¹⁷ nɔ wa yɛ taaleɛ í ni waati iyi nŋu í sũòɛ nŋu kù baa. Nɔ nyindau ihɛ̃ wee wa nyisi iyi í baa. Nɔ waati bɛɛbɛ baau ku nya acɔi daayiu wa do njɛu ku nyisi inɛ ngbo ŋau.

¹⁸ Inɛ ngbo ŋau, aŋai aa mu inɛɛu bɛbɛi nɔ a nyisiɛ ijuukpã iyi í jɔ.

¹⁹ Inɛ ngbo ŋau aa yɛ taaleɛi nɔ a jɔ̀ ku sã isɔ fũfũ kpɛkɛlɛ cĩɔ iyi aa na baai ama inaabou si na iyi í jɔ̀ í bɛjɛ irii ama mudɛ̃ɛi Izirɛli iyi kù mà mɔkɔu. Si anyiɛ ama inaabou, aboɛi á jɛ, wooda kãma kù wɛɛa iyi á leleɛò bii nŋu takaɛ í wɛɛ si hunde.

²⁰ Amma bii í jɛ ideu ntɔi, bii í jɛ inɛ gɔ í dasi ama inaabou acɔ tãi,

²¹ aa fitaò ama inaabou anu koofai baaɛi nɔ inɛi ilu ŋau a taa kuta a kpaa si na iyi í jɔ̀ í ce ide sãmi si ilɛi Izirɛli, í bɛjɛ araɛ si inɔ kpasɛ̃i baaɛ. Do yaase bɛɛbɛi aa nyaò laalɔu bɛ hai si anini nŋɛ.

²² Bii à mu inɛ gɔ tengi bii wa sũò aboi kpaasiɛ gɔ, aŋa minji fei aa kpa ŋai, waatɔ inɛ iyi wa sũò abou do abou takaɛ fei. Do yaase bɛɛbɛi aa nyaò laalɔu bɛ hai si aninii inɛi Izirɛli ŋa.

²³ Bii í jɛ ama mudɛ̃ɛ gɔ iyi kù mà mɔkɔ í nɛ awaasũ, nɔ nŋu do inɛmɔkɔ mmu gɔ à ko inɔ ilu, nɔ í sũòɛ,

²⁴ aa gbã aŋa minjiu feii a bɔò ŋa anu koofai iluu nɔ a ta ŋa kuta a kpa ŋa. Aa kpa ama inaaboui si na iyi í jɔ̀ kù dɔ̃ anu si inɔ iluu, inɛmɔkɔu mɔ si na iyi í jɔ̀ í bɛjɛ aboi kpaasiɛ. Do yaase bɛɛbɛi aa nyaò laalɔu bɛ hai si anini nŋɛ.

²⁵ Amma bii í jɛ inɔ sakoi inɛɛu í ko mudɛ̃ɛi kpaasiɛu í bɛi í bataɛ í sũòɛ, inɛmɔkɔu nŋu akãi aa kpa.

²⁶ A kaa cea ama mudɛ̃ɛu ide kãma, kù ce taale iyi í to a kpaa. Inɛ nŋu bɛ í yɛi bɛi inɛmɔkɔ iyi í lɔ si kpaasiɛ í cã í kpaa.

²⁷ Si bɛi inɔ sakoi aŋaò à ko, baa bii wa dɔ̃ anu wa tɔɔ faaba, inɛ kãma kù wa bɛ iyi á faabaɛ.

²⁸ Bii inɛ gɔ í ko mudɛ̃ɛ gɔ iyi kù nɛ mɔkɔ titã, nɔ í tilasiɛ í sũòɛ, bii à mu ŋa do,

²⁹ inɛɛu á sãa baai mudɛ̃ɛu isɔ fũfũ kpɛkɛlɛ ciitaai, nɔ si anyiɛ á sooi ku jɛ aboɛ si na iyi í jɔ̀ í dasiɛ acɔ. Nɔ kù nɛ kpãa kãma iyi á leleɛò má si kuwɛɛɛ fei.