Wooda ku kɔsi 21 - Bibeli do fee

Bii à kpa inɛ gɔ nɔ a kù mà inɛ iyi í kpaa

¹ Bii í jɛ si ilɛ iyi Aɔ̃ Lafɛ̃ɛ í mu nŋɛu, à yɛ ikui inɛ gɔ si sako gɔ, nɔ a kù mà inɛ iyi í kpaa,

² inɛ ngbo nŋɛ ŋau do woo kiiti nŋɛ ŋau aa koo a wã hai bii ikuu í wai hee ku bɔ ilu ŋa iyi à wa amɛɛ bɛ.

³ Bii à yɛ ilu iyi í wa kɔkɔi tengi bii inɛɛu í kuu, inɛ ngboi ilu bɛ ŋau aa mu kɛtɛ zãu iyi a kù dĩa zuugu a kù ceò icɛ kãma titãi,

⁴ a gbãa a bɔòɛ bi acãi inyi iyi ci ya gbɛ ajɔ gɔ, nɔ ku jɛ inya gɔ iyi a ci ya ce si iko hee má jɛ a gbɛ̃ si ngɔgɔ, tengi bɛi aa lɛgɛ kpakɔi kɛtɛu.

⁵ Waati bɛɛbɛ tɔkui Levii woo wee ŋaui aa sɛkɛɛ wa aŋa iyi Aɔ̃ Lafɛ̃ɛ nŋɛ í cica a ceaa icɛ, nɔ a ya weea inɛ ŋa do iriɛu, domi aŋai à nɛ kpãa a wũaa idei kakɔɔ ŋa do idei inɛ ŋa iyi à mɛɛ njɛ.

⁶ Andi inɛ ngboi ilu bɛ ŋa iyi à ce amɛɛ do bii ikuu í wau fei, aa wɔɔ awɔ nŋai si kɛtɛ zãu iyi à lɛgɛ kpakɔɛ si acãi inyiu,

⁷ nɔ a maa ni, kù jɛ awai a kpa inɛɛu ihɛ̃, a kù nɔ a kù mà mii iyi í coo.

⁸ Aɔ̃ Lafɛ̃ɛ, cea inɛi Izirɛli zamaaɛ ŋa iyi ì yau suuru. Maà yɛ taalei inɛi Izirɛli ŋa si ikui inɛ iyi kù ce taale kãmau bɛ. Nɔ Aɔ̃ Lafɛ̃ɛ á ce nŋa suurui, kaa yɛ taale nŋa má.

⁹ Do yaase bɛɛbɛi aa ce iyi á dɔ̃a Aɔ̃ Lafɛ̃ɛ si ŋa, nɔ kaa yɛ taale nŋɛ si gãmɛi ikui inɛ iyi kù ce taale kãmau.

Abɔdɔ̃ ku ce do inaabo iyi à mu si igũ

¹⁰ Bii ì bɔ igũ ku ce bi mbɛɛ nŋɛ ŋa, bii Aɔ̃ Lafɛ̃ɛ í jɔ̀ ì jɛ ŋa igũ, nɔ ì mu ŋa aru ŋa,

¹¹ á yɔkɔ ku jɛ inɛ gɔ nŋɛ gɔ í yɛ inaabo gɔ si inɔi aru ŋau bɛ iyi í sĩaa si jiida jiida, nɔ wa bi ku soo ku jɛ aboɛ.

¹² Lafɛ̃ɛ á gbãai ku baaɛ wa inɔ kpasɛ̃ɛ. Nɔ abou ku ja ntoi iriɛ, nɔ ku re cikãawɔɛ ŋa,

¹³ nɔ ku kpaasi jĩnɛ iyi wa dasi waati iyi à muu ku dasi mmuɛ, nɔ ku maa wa kpasɛ̃i inɛɛu ku maa kpata akũi baaɛ do ti iyeɛ cukpa akã. Si anyii nŋu, lafɛ̃ɛ ku bɛi ku soo mam mam ku jɛ aboɛ.

¹⁴ Bii kù na kù buu má, á jɔ̀ɔi ku nɛɛ bii í bi, kaa yɔkɔ ku taa ku gba fia, walakɔ ku cea bɛi aru, si na iyi í jɔ̀ í tilasiɛ í jɔ̀ í jɛ aboɛ.

Ikpɛ̃ ŋa iyi à jɛ ti ama yemma

¹⁵ Bii inɛ gɔ í nɛ abo minji nɔ í bi inɛ akã í re inɛ akã, bii í nɛ amu ŋa, nɔ ama yemmaui í jɛ amai abo iyi kù biu,

¹⁶ bii í na wa kpɛ̃a amaɛ ŋau tubuɛ ŋa, kaa so amai abo iyi í biu ku jilɔɔ si agbɛi ama yemmau.

¹⁷ Baa bii bɛirei, abo iyi kù biu amaɛi í jɛ yemmau, nɔ si amaniɛ ŋa iyi wa kpɛ̃ nŋau, nŋui á ba zaka bɛi wa kpɛ̃a amu ŋau ikɔ minji, domi nŋui í jɛ ama sinteɛ, nɔ nŋui í nɛ kpãai ku ba ikpɛ̃ iyi á jɛ ti yemma.

Ama iyi kù waa saalu baaɛ ŋa

¹⁸ Bii inɛ gɔ í nɛ ama iyi ci ya jirima inɛ, nɔ í donda inɛ, nɔ kù waa saalu ide ku fɔi baaɛ hee má jɛ ti iyeɛ, nɔ baa bii à kpãa iju ci ya jirima ŋa,

¹⁹ iyeò baa ŋau aa sooi a bɔòɛ bi inɛ ngboi ilu ŋau bi ku ce kiitii ilu bii à wau.

²⁰ Nɔ a sɔ̃ inɛ ngbo ŋau a ni, ama nwa wee ci ya jirima inɛ, í donda inɛ, nɔ ci ya saalu ide nwa. Nɔ si anyiɛ, í ya maa ce daa sãmi ŋa nɔ í jɛ woo mɔ atɛ̃ yaamɔ.

²¹ Inɛi ilu ŋau fei aa taa kutai a kpaa. Do yaase bɛɛbɛi aa nyaò laalɔu bɛ hai si anini nŋɛ, ku ba inɛi Izirɛli iyi í gbɔ baauɛ fei njo ku muu.

Iku iyi à bagãm

²² Bii à kpa amanɛ iyi kuraraɛ í to a kpaa, nɔ à koo à kɔaɛ si lelei jĩi,

²³ ikuɛu kù nɛ kpãai ku sũ si antaii jĩi nɔu, ajɔ nŋu bɛ gbakã aa suui, domi inɛ iyi à bagãm do yaase bɛɛbɛ, Aɔ̃ Lafɛ̃ɛ í ceekpeɛi, nɔ kù sĩa i riisi ilɛ iyi Aɔ̃ Lafɛ̃ɛ nŋɛ í mu nŋɛ í jɛ tubu nŋɛu.