Wooda ku kɔsi 20 - Bibeli do fee

Wooda ŋa iyi à jɛ ti igũ

¹ Bii ì bɔ igũ bi mbɛɛ nŋɛ ŋa, nɔ ì yɛ acĩ ŋa do sarɛtii isɔ ŋa, nɔ zamaai inɛ ŋau í re zamaa nŋɛ, i maà ce njo nŋa ŋa, domi Aɔ̃ Lafɛ̃ɛ nŋɛ iyi í nya ŋɛ wa hai ilɛi Ezibiti í wɛɛ do iŋɛ.

² Waati iyi igũu wa bi ku sinti, woo weeu á sɛkɛɛ wai si wajui woo ce igũ ŋau nɔ ku sɔ̃ ŋa

³ ku ni, iŋɛ inɛi Izirɛli ŋau i sotĩ i gbɔ ŋa, iŋɛ do mbɛɛ nŋɛ ŋau aa ce igũ nnyi ŋa, i maà jɔ̀ zigi nŋɛ ku da ŋa, i jɔ̀ idɔ nŋɛ akã, nɔ i maà ce njo ŋa i maa yaya si waju nŋa ŋa.

⁴ Ntɔ ntɔ Aɔ̃ Lafɛ̃ɛ í wɛɛ do iŋɛ nɔ nŋui á ja nŋɛ ku ba ku faaba ŋɛ.

⁵ Si anyiɛ, inɛ ngboi sooge ŋau aa sɔ̃ sooge ŋaui a ni, yooi í ma ile titɔ̃ nɔ kù ba kù sũ si titã. Lafɛ̃ɛ ku sinda ku nyi ide, domi á yɔkɔ ku jɛ aa na a kpaa nɔ ileu ku baa ku jɛ ti inɛ mmu gɔ.

⁶ Bii í nɔ í jɛ inɛ gɔ í wa ihɛ̃ iyi í nɛ ikoi jĩi ndii rezɛ̃ɛ, nɔ kù ba kù ka si isoi rezɛ̃ɛ baa gbakã akã titã, lafɛ̃ɛ ku sinda ku nyi, domi á yɔkɔ ku jɛ á na ku ku si igũu nɔ inɛ mmu gɔi á na ku ka isoi rezɛ̃ɛu ndɛɛ.

⁷ Inɛ gɔ í wa ihɛ̃ iyi à muaa mudɛ̃ɛ nɔ kù gba abɔdɔ̃ titã? Bii inɛ dimi bɛɛbɛ í wa ihɛ̃, lafɛ̃ɛ ku sinda ku nyi ide, bii kù jɛ bɛɛbɛ á yɔkɔ ku jɛ aa na a kpaa si igũu nɔ inɛ mmu gɔ ku so mudɛ̃ɛu ku gba ndɛɛ abɔdɔ̃.

⁸ Inɛ ngboi sooge ŋau aa nyi a ni má, bii í jɛ inɛ gɔ í wa si inɔ nŋɛ ihɛ̃ iyi njo wa muu nɔ laakaiɛ kù jɛ akã, lafɛ̃ɛ ku sinda ku nyi ide na ku maà fɔ inɔi kpaasi ŋa iyi à gbe.

⁹ Bii inɛ ngboi sooge ŋau à sɔ̃ inɛ ŋau ide ŋau à tã, aa cica inɛ ŋa iyi aa jɛ inɛ ngboi wuaa ikã ikãi sooge ŋaui.

¹⁰ Ilu iyi ì koo si igũ ŋa, bii ì to titã, i tɔɔ inɛ ŋau a na ara nŋa do laakai ku sũ.

¹¹ Bii à jɛsi, nɔ à cĩ nŋɛ gamboi iluu, aa sũ nŋɛ iri ilɛi nɔ a jɛsi icɛi tilasi iyi aa dasi ŋa fei ŋa.

¹² Amma bii a kù jɛsi, bii í jɛ igũui à bi, aa bu iluu koe ŋai.

¹³ Nɔ si anyiɛ waati iyi Aɔ̃ Lafɛ̃ɛ nŋɛ á dasi ŋa si awɔ gbugbã nŋɛ, aa kpa inɛmɔkɔ ŋau feii,

¹⁴ amma aa jɔ̀ inaabo ŋaui do amu ŋau do mɛɛmu ŋau do mii iyi í wa si inɔ iluu fei. Amanii mbɛɛ nŋɛ ŋau fei tu ŋɛi á baa ku jɛ, domi Aɔ̃ Lafɛ̃ɛi á mu nŋɛ.

¹⁵ Ilu ŋa iyi à jĩò ŋɛ, iyi a kù jɛ inɛi ilɛ bii aa buba ŋau fei, bɛɛbɛi aa ce nŋa ŋa.

¹⁶ Amma si ilui inɛ ŋa iyi Aɔ̃ Lafɛ̃ɛ á mu nŋɛ ilɛ nŋa ku jɛ tubu nŋɛu, i maà jɔ̀ nkãma bɛ ŋa iyi wa mi si hunde.

¹⁷ Aa kpa inɛ ŋau fei sãa sãa ŋai. Hai inɛi Hɛti ŋau do inɛi Amɔre ŋau do inɛi Kanaã ŋau do inɛi Ferɛzi ŋau do inɛi Hɛvi ŋau do inɛi Zebusi ŋa si bɛi Aɔ̃ Lafɛ̃ɛ nŋɛ í sɔ̃ ŋɛ,

¹⁸ ku ba a maà na a jɔ̀ i too si kuce laalɔ iyi à ya maa cea iwɛ̃ nŋa ŋau, nɔ i maà na i ce dulum bi Aɔ̃ Lafɛ̃ɛ nŋɛ ŋa.

¹⁹ Bii ì koo ì bu ilu gɔ koe, nɔ ì kpɛ bɛ ŋa ku ba i jɛ ŋa igũ, i maà ti i kpa jĩi ku so iso ŋa iyi à wa bɛ ŋau ŋa. Aa yɔkɔ i jɛ isoi jĩi ŋau, amma i maà kpa baa akã ŋa, domi jĩi kù jɛ amanɛ iyi inɛ á bɔ igũ siɛ.

²⁰ Amma aa yɔkɔ i da jĩi iyi ì mà ci ya so iso iyi amanɛ á jɛ ŋa, ku ba ku sobi ŋɛ i ceò mii iyi á gɛɛò inɛi ilu ŋa iyi à waa ce igũ do iŋɛ hee i koo i kãmia ŋa ŋa.