Wooda ku kɔsi 2 - Bibeli do fee

¹ Si anyiɛ ŋɔi à sinda à waa nɛ ikpa gbaau. Kpãai Tenkui Njeeui à mu si bɛi Aɔ̃ Lafɛ̃ɛ í tako í sɔ̃m nɔu. Nɔ à kpɛ si iri kutai Seii ŋau ku too.

Ilɛi Edɔmu ku kua do ti Moabu do ti Amɔɔ

² Ajɔ nŋu gɔ Aɔ̃ Lafɛ̃ɛ í sɔ̃m í ni,

³ ì kpɛ si iri kutau ihɛ̃ ku kaako ŋa. Bɛbɛi i sinda i nɛ ikpa awɔ njɛi kpãai inunu ŋa.

⁴ Wooda ŋa iyi ì nɛ i na inɛ ŋau wee. Aa kua ilɛi nyaanze nŋɛ ŋa dimii Esau ŋa iyi à wa Seiiui. Inɛ ŋau aa maa ce njo nŋɛ, amma i ce laakai,

⁵ i maà ba ŋa do ija ŋa. Ntɔ ntɔ n kaa n mu nŋɛ baa bi ku lesi isɛ si ilɛ nŋa, domi iri kutai Seiiu, dimii Esau ŋai ǹ mua.

⁶ Baa sɔnda iyi aa jɛ bi tu ŋa bɛ ŋa, aa ra ŋai, nɔ hee do inyi iyi aa mɔ ŋa fei aa ra ŋai.

⁷ Ntɔ ntɔ Aɔ̃ Lafɛ̃ɛ nŋɛ í wee nŋɛ si icɛi awɔ nŋɛ fei, nɔ í mà isɛɛnɛ nŋɛ si gbaa nlau ihɛ̃. Adɔ̃ ciijii ihɛ̃ bɛbɛi iyi Aɔ̃ Lafɛ̃ɛ nŋɛ í wɛɛ do iŋɛ nɔ i kù kua nkãma ŋa.

⁸ Nɔ waati iyi à koo à waa lɔ, à jĩò ilɛi nyaanze nwa dimii Esau ŋa iyi à wa Seiiu, nɔ à jĩò kpãa iyi í wa lɔɔmai Elati do ti Ɛsiɔ̃-Gebɛɛ, nɔ à sinda à mu kpãa iyi í nɛ ikpa gbaai Moabuu.

⁹ Nɔ Aɔ̃ Lafɛ̃ɛ í sɔ̃m í ni, i maà dɛ anui inɛi Moabu ŋau ŋa, i maà ba ŋa igũ ku ce ŋa, domi n kaa n na ŋɛ nkãma si ilɛ nŋa iyi á jɛ ikpɛ̃ nŋɛ. Tɔkui Lɔtu ŋai ǹ na ilɛi Aa ku jɛ ikpɛ̃ nŋa.

¹⁰ Hai tako wo ilɛi Aau inɛi Emi ŋai à buba si. Inɛ gɔ ŋai iyi à nɛ gbugbã, à kpɔ, nɔ à ce kaasãanɛ bɛi dimii Anaku ŋa.

¹¹ Inɛ gɔ ŋa à jilɛ aŋa mɔi bɛi inɛi Refa ŋa, do bɛi dimii Anaku ŋa. Inɛi Moabu ŋa mɔ à ya maa kpe ŋa inɛi Emi ŋa.

¹² Tako wo inɛi Hɔɔ ŋai à wa si ilɛi Seiiu, dimii Esau ŋa à bɛi à koo à lele ŋa, à kpa ŋa à bɛi à buba si ilɛu ndu ŋa. Bɛɛbɛi inɛi Izirɛli ŋau mɔ à ce à bɛi à baò ilɛ iyi Aɔ̃ Lafɛ̃ɛ í mu nŋau.

¹³ Nɔ Aɔ̃ Lafɛ̃ɛ í na wooda í ni, bɛbɛi i dede i kua acãi inyii Zerɛdiu ŋa. Nɔ à dede à kua acãi inyii Zerɛdiu.

¹⁴ Isɛɛnɛ iyi à ce hai Kadɛsi-Baanea ku bɔ Zerɛdi bii à kuau í wɛɛi adɔ̃ kuntaa do mɛɛjɔ, hee inɛ ŋa iyi à to igũ ku ce ŋau fei à kpa iri hai si asɔu si bɛi Aɔ̃ Lafɛ̃ɛ í tako í fɔ do kugbasiu.

¹⁵ Aɔ̃ Lafɛ̃ɛ í jɔ̀ awɔ gbugbãɛ í naa si ŋa ku ba ku ce nfe nŋa mam mam hai si asɔu.

¹⁶ Waati iyi inɛ ŋa iyi à to igũ ku ce ŋau fei à ku,

¹⁷ ŋɔi Aɔ̃ Lafɛ̃ɛ í sɔ̃m í ni,

¹⁸ nnyi aa lɔ si kɔɔi ilɛi inɛi Moabu ŋau nɔ i kua ilɛi inɛi Aa ŋa,

¹⁹ hee i tosi ilɛi inɛi Amɔɔ ŋau. Amma i maà dɛ anu nŋa ŋa, nɔ i maà ba ŋa igũ ku ce ŋa, domi amu Aɔ̃ Lafɛ̃ɛ n kaa n na ŋɛ nkãma si ilɛi inɛi Amɔɔ ŋa iyi á jɛ ikpɛ̃ nŋɛ. Tɔkui Lɔtu ŋai ǹ na ilɛu ku jɛ ikpɛ̃ nŋa.

²⁰ Inyau mɔm à jilɔɔ si iyi inɛi Refaimu ŋai à nɛ tengi bɛ. Hai tako mɔ wo, inɛi Refaimu ŋai à wa si ilɛu. Aŋai inɛi Amɔɔ ŋa à ya maa kpe inɛi Zamuzumu ŋa.

²¹ Inɛ ŋau ilu gbugbã ŋai, à kpɔ, nɔ à ce kaasãanɛ bɛi dimii Anaku ŋa. Aɔ̃ Lafɛ̃ɛ í jɔ̀ inɛi Amɔɔ ŋau à ce nfe nŋa, nɔ à buba si agbɛ nŋau.

²² Bɛɛbɛi Aɔ̃ Lafɛ̃ɛ í cea dimii Esau ŋa iyi à wa Seiiu waati iyi í ce nfei inɛi Hɔɔ ŋau hai si waju nŋa. À lele ŋa nɔ à buba si agbɛ nŋau hee do nnyi fei.

²³ Inɛi Avi ŋa mɔ iyi à tako à wa ilɛɛkoi ilɛi Gaza ŋau, inɛ ŋa iyi à naa hai Kafitɔɔ ŋau à ce nfe nŋa nɔ à buba si agbɛ nŋa.

²⁴ Si anyiɛ nɔ Aɔ̃ Lafɛ̃ɛ í na wooda má í ni, i dede i dasi kpãa má ŋa, nɔ i kua acãi inyii Aanɔɔu ŋa. Amu Aɔ̃ Lafɛ̃ɛ ǹ da nŋɛ Sioni ilaalui Hɛsebɔ̃ɔ inɛi Amɔreu si awɔ nŋu do ilɛɛ fei. I sinti ilɛu ku gba nɔ i ce igũ ŋa.

²⁵ Hai nnyi an ce bɛi inɛ ŋa aa ce a maa wɛɛò zigiida do njo na iri nŋɛ si andunyau ihɛ̃ fei. Hai à gbɔ baau nŋɛ gbakã aa ya maa yayai do njo.

À gba bommai Sioni

²⁶ Hai bi gbaai Kedemɔtii amu Moizi ǹ bɛ inɛ gɔ ŋa bi Sioni ilaalui Hɛsebɔ̃ɔu do idei laakai ku sũ ŋa, ǹ ni a koo a sɔ̃ɔ a ni,

²⁷ jɔ̀ ka too ilɛɛ ka kua. Kpãa nlaui aa ka too, a kaa ka yaa do awɔ njɛ hee má jɛ do canga.

²⁸ Sɔnda do inyi iyi aa ka nɛ bukaataɛ fei, aa ka sãɛ fiai. Jɔ̀ ka kua ilɛɛ sɛ̃ɛ ka lɔ.

²⁹ Dimii Esau ŋa iyi à wa Seiiu do inɛi Moabu ŋa mɔ iyi à wa Aau à jɛ nwa si à jɔ̀ à kua. Awɔ mɔ jɛ nwa si hee kaa kuaò idoi Zuudɛ̃ɛu, nɔ ka lɔ si ilɛ iyi Aɔ̃ Lafɛ̃ɛ nwa í mu nwau.

³⁰ Amma Sioni ilaalui Hɛsebɔ̃ɔu kù bi ka too ilɛi nŋu ka kua, domi Aɔ̃ Lafɛ̃ɛ kù jɔ̀ idɔɛ ku rɔ, í gbe í jɔ̀ í lele idɔ ku ba ku soo ku da nwa si awɔ bɛi à waa yɔɔ nnyiu ihɛ̃.

³¹ Ŋɔi Aɔ̃ Lafɛ̃ɛ í sɔ̃m í ni, cɔ, hai nnyi wee ǹ wa n daɛ Sioni do ilɛɛ fei si awɔ. Hai nnyi, i sinti ilɛu ku gba hai bɛ ŋa.

³² Ŋɔi Sioni í fita í naa ku ko nwa nŋu do inɛɛ ŋa fei ku ba a ce igũ do awa ilui Yahasi.

³³ Ŋɔi Aɔ̃ Lafɛ̃ɛ nwa í soo í da nwa si awɔ, nɔ à jɔɔ igũ nŋu do amaɛ ŋa do zamaaɛ ŋau fei.

³⁴ Ŋɔi à gba iluɛ ŋau fei à lɛgɛ ŋa mam mam. À kpa inɛmɔkɔ do inaabo do ama keeke nŋa ŋa, a kù jɔ̀ baa inɛ akã ku fita si.

³⁵ Mii iyi à jɔ̀aa ara nwa nŋu akã si igũ iyi à jɛu, nŋui í jɛ mɛɛmu ŋa do amani ŋa iyi à ba si ilu ŋa iyi à gba ŋau.

³⁶ Hai Aroɛɛ iyi í wa itĩi acãi inyii Aanɔɔu, do ilu iyi í wa si lɔɔmau hee ku bɔ Galaadi, ilu kãma kù nɛ gbugbã iyi á yɔkɔ ku kɔ̀ ide si waju nwa. Aɔ̃ Lafɛ̃ɛ nwa í da nwa aŋa fei si awɔ.

³⁷ Amma a kù lu ilɛi inɛi Amɔɔ ŋa, do ilɛ ŋa iyi à wa bi acãi inyii Yabɔkuu, do ilu ŋa iyi à wa si iri kutau, do inya ŋa iyi Aɔ̃ Lafɛ̃ɛ í ni ka jɔ̀u fei.