Wooda ku kɔsi 19 - Bibeli do fee

Ilu bi ku manji ŋau

¹ Waati iyi Aɔ̃ Lafɛ̃ɛ í na í kpa inɛ ŋa iyi à wa si ilɛ iyi á na ŋɛu, waati iyi ì na ì lele inɛi ilɛ ŋau, nɔ ì buba si ilu nŋa do si kpasɛ̃ nŋa ŋau,

² aa nya ilu mɛɛta ikã ŋai hai si ilu ŋa iyi à wa si ilɛ iyi Aɔ̃ Lafɛ̃ɛ í mu nŋɛu.

³ Aa nya kpãa ŋai, nɔ i kpɛ̃ ilɛu ŋa ikɔ mɛɛta. Bɛɛbɛi aa ce ŋa ku ba inɛ gɔ iyi í kpa inɛ ku sa koo manji bɛ.

⁴ Inɛ iyi í kpa amanɛ nɔ kù jɛ do idɔɔbiɛ, nɔ baa hai tako mɔ wo kù cé inɛ iyi í kpau, lafɛ̃ɛ á yɔkɔ koo manji si akãi ilu ŋau bɛ ku ba ku saò hundeɛ.

⁵ Á yɔkɔ ku jɛ inɛ gɔ í bɔ jĩi ku da inɔ sako nŋu do kpaasiɛ, nɔ waati iyi í so dagba wa da jĩi gɔ, isɔi dagbau ku nya hai si aroɛ koo mu kpaasiɛu nɔ ku kpaa, inɛ iyi wa mu dagba isɔu í bɛi í nyau á sai koo manji si akãi ilu ŋau bɛ ku ba ku saò hundeɛ,

⁶ ku ba inɛ iyi í nɛ ku jaa ikuu, si idɔɔkɔ̃ɛ, ku maà na ku lele inɛ iyi wa mu dagbau ku baa bii í jɛ isɛɛnɛ sisɔi í nɛ ku ce, nɔ ku cã ku kpaa. Wee ntɔ ntɔ kù nɛ ku kpa inɛɛu domi aŋaò a kù tako a kù jɛ mbɛɛ wo.

⁷ Na ŋɔi í jɔ̀ ǹ na ŋɛ wooda ǹ ni i nya ilu mɛɛta ikã ŋa a jɛ ilu bi ku manji.

^8-9 Bii ì waa ceò wooda ŋa iyi ǹ wa n na ŋɛ nnyiu ihɛ̃ icɛ ŋa, bii ì bi Aɔ̃ Lafɛ̃ɛ nŋɛ, nɔ ì waa ce idɔɔbiɛ waati kãma fei ŋa, ajɔ akã á na ku jɔ̀ ilɛ nŋɛu ku la ku kɔ̃ɔsi. Nɔ á na ŋɛ ilɛ iyi í wã ku mua bala nŋɛ ŋau fei. Si anyiɛ, nɔ i kɔ̃ɔsi ilu mɛɛta má ŋa iyi aa jɛ ilu bi ku manji si mɛɛtai tako ŋau.

¹⁰ Do yaase bɛɛbɛi si ilɛ iyi Aɔ̃ Lafɛ̃ɛ nŋɛ á mu nŋɛu, inɛ iyi kù ce taale kaa ku. Bii kù nɔ kù jɛ bɛɛbɛ, inɛ iyi í ku, idei iri nŋɛi á jɛ.

¹¹ Amma bii í jɛ inɛ í cé inɛ gɔ hee í koo í siaa, nɔ í cã í kpaa, í bɛi í sa í koo í manji si akãi ilu ŋau bɛ,

¹² inɛ ngboi iluɛ ŋau aa bɛ inɛ ŋa a koo a muu wai, nɔ a na a daa inɛ iyi á jaa ikuu si awɔ ku ba ku kpaa.

¹³ Inɛ kãma kaa ce araareɛ. Do yaase bɛɛbɛi aa nyaò laalɔu hai si inɛi Izirɛli ŋa, nɔ kuwɛɛ nŋɛ ku baa ku sĩa.

Kɔɔi ilɛ ŋau

¹⁴ Waati iyi aa koo i buba si ilɛ iyi Aɔ̃ Lafɛ̃ɛ á mu nŋɛu, aa nyisi inɛ fei tengi bii á jɛ kɔɔi tubu iyi á ba si ikpɛ̃i ilɛui. Waati bɛɛbɛ, inɛ kãma ku maà kua kɔɔi titɛɛ ku lɔ si ti inɛi kɔkɔɛ.

Sɛɛda ŋa

¹⁵ Sɛɛda ku jɛi inɛ akã kù to ku jɔ̀ a yɛ taalei inɛ gɔ iyi à waa sɔ iriɛ si idei laalɔ gɔ, walakɔ si idei dulum ikã ikã baa yooma fei. A kaa jɛsi ideu bii amanɛ minji walakɔ mɛɛta kù jɛ sɛɛdaɛ.

¹⁶ Bii inɛ gɔ í dede wa má inɛ mmu gɔ ide í ni í ce laalɔ gɔ,

¹⁷ aŋa minji iyi à waa jã njɛ ideu fei aa koo a leekĩi si wajui Aɔ̃ Lafɛ̃ɛ, do si wajui woo wee do woo kiiti ŋa iyi à waa ce icɛ si waatiu bɛ.

¹⁸ Woo kiiti ŋau aa teese a wusɛ ideu ku ce ncɛɛi a cɔ. Bii í jɛ si kuwusɛ nŋa a yɔɔ iyi wa má kpaasiɛu ideui,

¹⁹ ijuukpã iyi wa bi a nyisi kpaasiɛu, ijuukpãui á baa ku cuku si irii nŋu takaɛ. Do yaase bɛɛbɛi aa nyaò laalɔu bɛ hai si anini nŋɛ.

²⁰ Bii inɛ ŋa iyi à gbe ŋau mɔ à gbɔ, zigi nŋa á da, nɔ a kaa ce laalɔ dimi bɛɛbɛ si anini nŋɛ má.

²¹ Nɔ i maà ce araarei inɛ laalɔ dimi bɛɛbɛ kãma ŋa. Inɛ iyi í kpa inɛ gɔ, aa kpa nŋu mɔi, inɛ iyi í nya ijui inɛ gɔ, aa nya ti nŋu mɔi, inɛ iyi í cɛ inyíi inɛ gɔ, aa cɛ ti nŋu mɔi, inɛ iyi í cɛ awɔi inɛ gɔ, aa cɛ ti nŋu mɔi, inɛ iyi í cɛ kutɛi inɛ gɔ, aa cɛ ti nŋu mɔi.