Wooda ku kɔsi 18 - Bibeli do fee

Mii iyi í jɛ ikpɛ̃i inɛi Levii ŋa

¹ Inɛi Levii woo wee ŋau do inɛ ŋa iyi à gbe si dimii Levii ŋau fei a kaa ba ikpɛ̃ gɔ hee má jɛ tubu do inɛi Izirɛli ŋau. Kuwee ŋa iyi à ya jo si ina iyi aa naa Aɔ̃ Lafɛ̃ɛ waui á jɛ tu ŋa.

² A kaa ba ikpɛ̃ do inɛi Izirɛli ŋau domi Aɔ̃ Lafɛ̃ɛ ku cea icɛi á jɛ ikpɛ̃ iyi aa ba si bɛi nŋu takaɛ í tako í sɔ̃ ŋa wo.

³ Mii iyi à jɛ ikpɛ̃ iyi zamaau á na woo wee ŋau wee. Kuwee iyi inɛ ŋa aa naa Aɔ̃ Lafɛ̃ɛ wau, bii í jɛ kɛtɛi walakɔ angudã walakɔ iwo, ikpaɛ do kɛkɛlɛ ŋau do caakau, aŋai aa nɔɔ.

⁴ Amaajɛ sintei iko nŋɛ ŋau, aŋai aa nɔɔ. Hai bilee nŋɛ ŋa do vɛ̃ɛ nŋɛ ŋa do ikpo nŋɛ ŋa hee ku koo do ntoi angudã sinte nŋɛ ŋa iyi aa ja ŋau ŋa,

⁵ domi aŋai Aɔ̃ Lafɛ̃ɛ í cica si dimi ŋau fei a cea nŋu icɛ do tɔku nŋa ŋa hee do ajɔ fei.

⁶ Bii inɛi Levii gɔ í dede hai ilu bii í wa si ilɛi Izirɛliu do idɔɔbiɛ, nɔ í koo í wa tengi bii Aɔ̃ Lafɛ̃ɛ í cicau,

⁷ tengi bɛ má á yɔkɔ ku cea Aɔ̃ Lafɛ̃ɛ icɛ bɛi inɛɛ ŋa iyi à waa ce icɛ si ile kumáu fei.

⁸ Á nɛ kpãai ku ba sɔndai bɛi inɛ iyi ihɔ̃ ŋau mɔ. Nɔ inɛ nŋu kù wa baai amani ŋa iyi à jɛ ti baaɛ iyi í tau.

Walii ilu ibo ŋau do walii ntɔ ŋa

⁹ Waati iyi aa na i lɔ si ilɛ iyi Aɔ̃ Lafɛ̃ɛ nŋɛ á mu nŋɛu, i maà ti i na i maa too si kuce laalɔi inɛ ŋa iyi à wa bɛ si nsɛi ŋau ŋa.

¹⁰ Si inɔ nŋɛ inɛ kãma ku maà so ama inɛmɔkɔɛ walakɔ ama inaaboɛ ku ceò kuwee iyi à ya jo si ina fei sãa sãa, nɔ woo ce alisi kãma, walakɔ woo mà yaasei leleaɔ̃ ŋa, walakɔ inɛ iyi í ya ce kuyɛ, walakɔ woo ce dobu dobu ŋa a maà wa si inɔ nŋɛ.

¹¹ Nɔ inɛ kãma ku maà na ku wa inɔ nŋɛ iyi á ya ce kɔ̃ɔtɛ̃, walakɔ ku ya ba hundei iku ŋa ide ku fɔ, walakɔ ku ya bɔ kubee bi woo ba hundei iku ŋa ide ku fɔ.

¹² Inɛ iyi wa ce mii ŋau bɛ fei, bi Aɔ̃ Lafɛ̃ɛ inɛ laalɔi. Nɔ na laalɔ dimi bɛɛbɛ ŋai í jɔ̀ Aɔ̃ Lafɛ̃ɛ á lele inɛi ilɛ bɛ ŋau hai si waju nŋɛ.

¹³ Na nŋu, i leekĩ dee dee do Aɔ̃ Lafɛ̃ɛ nŋɛ.

¹⁴ Inɛ ŋa iyi aa koo i lele ŋau, ikɔi woo ce dobu dobu do woo ce alisi ŋai à ya maa gbɔ. Amma iŋɛ, Aɔ̃ Lafɛ̃ɛ í ganji i maa ce bɛɛbɛ ŋa.

¹⁵ Aɔ̃ Lafɛ̃ɛ nŋɛ á jɔ̀ walii gɔ ku dede si anini nŋɛ hai si inɔi inɛ nŋɛ ŋau. Waliiu á yɛi bɛi amu, i ya gbɔ ideɛ ŋa.

¹⁶ Mii iyi ì tɔɔ Aɔ̃ Lafɛ̃ɛ ajɔ iyi ì tɔtɔɔ bi iri kutai Ɔrɛbuu ŋa mbɛ. Ì ni ŋa i kù bi Aɔ̃ Lafɛ̃ɛ nŋɛ ku ba ŋɛ ide ku fɔ gɛlɛò gɛlɛ má hee má jɛ i yɛ ina dimi bɛɛbɛ má, ku ba i maà na i ku ŋa.

¹⁷ Ŋɔi Aɔ̃ Lafɛ̃ɛ í sɔ̃m í ni, bɛi inɛ ŋau à fɔ í sĩa.

¹⁸ An jɔ̀ walii gɔ ku dede si aninii nŋa bɛi awɔ, an daa idem ŋa si gɛlɛɛ, nɔ ide iyi ǹ sɔ̃ɔ fei nŋui á ya sɔ̃ ŋa.

¹⁹ Nɔ bii inɛ gɔ í kɔ̀ ku gbɔ idem ŋau iyi wa fɔ do irim nɔu, amu takam nii an kpã lafɛ̃ɛ iju.

²⁰ Amma walii ilu faau iyi wa fɔ ide do irim, bii wa fɔ ide ŋa iyi n kù ni ku fɔ, walakɔ bii wa fɔ ide do irii iwɛ̃ ŋa, walii inɛ bɛ aa kpaai.

²¹ Á yɔkɔ ku jɛ aa fɔ si idɔ nŋɛ i ni ŋa, bɛirei aa ka ce ka mà ide iyi kù jɛ Aɔ̃ Lafɛ̃ɛi í fɔɔ.

²² Bii í jɛ ide iyi walii gɔ í fɔ do irii Aɔ̃ Lafɛ̃ɛ, ideu kù ce, ideu bɛ kù jɛ Aɔ̃ Lafɛ̃ɛi í fɔɔ. Waliiu de í fɔ ndɛɛi si faauɛ, i maà ce njoɛ ŋa.