Wooda ku kɔsi 17 - Bibeli do fee

¹ I maà ya cea Aɔ̃ Lafɛ̃ɛ nŋɛ kuwee do kɛtɛ walakɔ do angudã walakɔ do iwo gɔ iyi í nɛ leebu ŋa, domi Aɔ̃ Lafɛ̃ɛ í cé mii dimi bɛɛbɛ.

² Á yɔkɔ ku jɛ ajɔ gɔ si akãi ilu ŋa iyi Aɔ̃ Lafɛ̃ɛ í mu nŋɛu, inɛmɔkɔ walakɔ inaabo gɔ í cea Aɔ̃ Lafɛ̃ɛ mii iyi kù dɔ̃aa si nɔ í bɛjɛ akabuu iyi í wa si gãmɛi aŋaò,

³ í koo wa tɔɔ iwɛ̃ ŋa, wa gulɛ si waju nŋa, wa tɔɔ inunu do cukpa do leleaɔ̃ ŋa fei. Aɔ̃ Lafɛ̃ɛ wee kù bɛi kù bi bɛɛbɛ.

⁴ Bii ì na ì waa gbɔ ide dimi bɛɛbɛ ŋa, i teese i bee kusĩa i ba i mà yaaseɛ ŋa. Bii ì gbɔ yaaseɛ ŋa, nɔ ntɔ ntɔ ide laalɔu bɛ í cei si ilɛi Izirɛli,

⁵ aa gbã inɛ laalɔu ŋai, bii inɛmɔkɔi walakɔ bii inaabo mɔi, i bɔòɛ anu koofai iluu nɔ i taa kuta i kpaa ŋa.

⁶ Amma a kaa yɔkɔ a yɛ taalei inɛ a kpaa, bii amanɛ minji walakɔ mɛɛta kù jɛ sɛɛdai laalɔ iyi lafɛ̃ɛ í ce, domi sɛɛdai amanɛ akã kaa jɔ̀ a kpa inɛ gɔ.

⁷ Nɔ inɛ ŋa iyi à jɛ sɛɛda ŋau, aŋai aa tako a taa kuta, si anyi nŋa, zamaau mɔ ku bɛi ku taa. Do yaase bɛɛbɛi aa nyaò laalɔu hai si anini nŋɛ.

Ide kugaabu ŋa iyi aa kiiti si ile kumáu

⁸ Bii í jɛ ile bi ku ce kiiti gɔ í mɔngɔ idei inɛ iyi í kpa kpaasiɛ gɔ ku wũaa, walakɔ bii inɛ gɔ í mɛɛ kpaasiɛ, walakɔ bii í jɛ idei njɛ hai gbɔa gɔi, tengi bii Aɔ̃ Lafɛ̃ɛ á cicau, bɛi aa bɔò ideu ŋa.

⁹ Bi inɛi Levii ŋa iyi à jɛ woo wee ŋaui aa bɔ ŋa do bi inɛ ŋa iyi à waa ce icɛi kiitiu si waati nŋu bɛ. Aŋai aa sisia ideu, nɔ aŋai aa sɔ̃ ŋɛ ijuukpã iyi aa nyisi lafɛ̃ɛ.

¹⁰ Ide iyi inɛ ŋa iyi à wa afeu bɛ aa sɔ̃ ŋɛ, nŋui aa ceò icɛ ŋa. Bɛi à fɔ fei, bɛɛbɛi aa ce ŋa.

¹¹ Nɔ wooda ŋa iyi aa na do ijuukpã ŋa iyi aa ni a nyisi lafɛ̃ɛ, nŋui aa ceò icɛ ŋa. I maà kua wooda ŋau baa keeke ŋa.

¹² Bii í jɛ ilu faau gɔ í kɔ̀ ku ceò idei woo weei ile kumái Aɔ̃ Lafɛ̃ɛu icɛ, walakɔ bii í kɔ̀ ku saalu idei woo kiitiu, aa kpa lafɛ̃ɛi. Do yaase bɛɛbɛi aa nyaò laalɔ ku ce hai si inɛi Izirɛli ŋa.

¹³ Ntɔ ntɔ inɛ iyi í gbɔ baaui ideu fei á maa ce njoi, nɔ ilu faau kãma kaa jɛ ku ce bɛɛbɛ má.

Wooda ŋa iyi à jɛ ti ilaalu

¹⁴ Waati iyi aa na i lɔ si ilɛ iyi Aɔ̃ Lafɛ̃ɛ nŋɛ á mu nŋɛu, waati iyi aa gbaa i buba si ŋau, iŋɛ mɔ aa bi i nɛ ilaalu bɛi inɛi ilɛ ŋa iyi à kaako ŋɛ ŋau ŋa.

¹⁵ Na nŋu, inɛ iyi Aɔ̃ Lafɛ̃ɛ takaɛ á cica nŋɛ, nŋui aa so ŋa. Amma inɛi Izirɛlii á jɛ. I maà ti i jɔ̀ inɛ njoo ku jɛ ilaalu nŋɛ, si bɛi kù jɛ inɛ nŋɛ.

¹⁶ Inɛ iyi á jɛ ilaalu nŋɛ, kù sĩa ku nɛ acĩ bututu, nɔ kù sĩa ku bɛ inɛ ŋa a koo a raa wa hai ilɛi Ezibiti, domi Aɔ̃ Lafɛ̃ɛ í ni i kaa nyi si ilɛu bɛ má ŋa.

¹⁷ Nɔ kù sĩa lafɛ̃ɛ ku nɛ abo bututu, domi inɛ nŋu bɛ á yɔkɔ ku na ku sindaɛ hai bi Aɔ̃ Lafɛ̃ɛ. Nɔ kù sĩa lafɛ̃ɛ ku jɛ ilu isɔ fũfũ nkpɔ nkpɔ do wura ŋa.

¹⁸ Waati iyi ilaaluu á na ku buba si kitãi bommau, á jɔ̀ a kɔa wooda iyi inɛi Levii woo wee ŋau à ya maa muui.

¹⁹ Á maa mu tiaui nɔ ku ya maa cioɛ ajɔ fei si kuwɛɛɛ ku ba ku kɔkɔ Aɔ̃ Lafɛ̃ɛ ku jirima nɔ ku maa ceò wooda ikã ikãɛ ŋau fei icɛ.

²⁰ Inɛ nŋu bɛi á jɔ̀ kaa ya so araɛ lele si inɔi inɛɛ ŋau nɔ á jɔ̀ kaa kua wooda ŋau má baa keeke. Nɔ nŋu do tɔkuɛ ŋau aa kpɛ si bommau ntɔ ntɔ si inɔi inɛi Izirɛli ŋau.