Wooda ku kɔsi 15 - Bibeli do fee

Idei gbese ŋa ku kpa si adɔ̃ mɛɛje do mɛɛje fei

¹ Si adɔ̃ mɛɛje do mɛɛje fei aa ya kpaa ilu gbese nŋɛ ŋau gbese nŋɛ iyi à waa mui.

² Yaase bɛi aa ceò woodau icɛ ŋa wee. Bii à fɔ idei gbese ŋa iyi inɛ ŋa à waa mu ku kpa na bɛɛrɛi Aɔ̃ Lafɛ̃ɛ, inɛ ŋa iyi à wɛ̃a inɛ nŋa ŋa fia fei, a kù nɛ a bee ŋa fiau má, nɔ a kù nɛ a tilasi ŋa a sã fiau má.

³ Aa yɔkɔ i tilasi inɛi ilɛ mmu gɔ iyi í wa bi tu ŋɛ ku sã, amma ti inɛ iyi í jɛ inɛi ilɛ nŋɛ i kù nɛ ku gbaɛ má ŋa.

⁴ Nɔ mɔm, kù nɛ ilu are ŋa a wa inɔ nŋɛ, domi Aɔ̃ Lafɛ̃ɛ á wee nŋɛ ku jɔ̀ i kɔ̃ò amani ŋa si ilɛ iyi í mu nŋɛ i buba si ŋau.

⁵ Mii iyi í wa bɛ nŋu akãi í jɛ i ya maa jirima woodaɛ ŋa, nɔ i ya maa ceò ikɔɛ ŋa iyi ǹ wa n sɔ̃ ŋɛ nnyiu ihɛ̃ icɛ ŋa.

⁶ Waati iyi Aɔ̃ Lafɛ̃ɛ nŋɛ á na ku jɔ̀ i kɔ̃ò amani ŋa si bɛi nŋu takaɛ í ce kuwãɛ tãu, inɛ kãma nŋɛ kaa nɛ bukaatai fia ku wɛ̃ má, iŋɛ mɔm nii aa ya na i maa wɛ̃a inɛi ilɛ mmu ŋau do nkpɔ. Nɔ aa kãmia inɛi ilɛ mmu ŋau ŋai, nɔ kãma nŋa kaa kãmia ŋɛ.

⁷ Bii í nɔ í jɛ ilu are gɔ í wa si akãi ilu nŋɛ gɔ si ilɛ iyi Aɔ̃ Lafɛ̃ɛ í mu nŋɛu, i maà ti i cĩmboa idɔ nŋɛ i kɔ̀ ku wɛ̃a fia ŋa.

⁸ Ì nɛ i wɛ̃a ŋa mɔm nii do inɔ akã zaka bɛi í nɛ bukaataɛ.

⁹ Amma i ce laakai i maà ti i jɔ̀ lasabu laalɔ ku naa nŋɛ si idɔ nɔ i ni ŋa, adɔ̃ mɛɛjesiau í maai ku to wa, adɔ̃i gbese ŋa ku sindou. Na nŋu, i maà kɔ̀ inɛ nŋɛ gɔ iyi í jɛ ilu are ngɔgɔ iyi wa bi si ŋɛ. Bii ì nɔ ì kɔ̀ɔ ŋa, lafɛ̃ɛ á yɛ taale nŋɛ si wajui Aɔ̃ Lafɛ̃ɛ, nɔ i baa i jɛ ilu taale ŋa.

¹⁰ I wɛ̃a ŋa nɔ ku jɛ mɔm do inɔ akã. Na jiida ku jɛ nŋɛu bɛ, Aɔ̃ Lafɛ̃ɛ á wee nŋɛ si mii fei.

¹¹ Waati kãma fei ilu are ŋa a kaa ya kua si ilɛ nŋɛ, na ŋɔi í jɔ̀ ǹ wa n sɔ̃ ŋɛ ǹ ni i ya cea ilu are inɛ nŋɛ ŋa iyi à jɛ inɛi ilɛ nŋɛ ŋau jiida ŋa.

Ara ku nɛi aru ŋa

¹² Bii í jɛ inɛi ilɛ nŋɛ gɔ inɛi Ebɛɛ, inaabo walakɔ inɛmɔkɔ í naa í ta araɛ bi tu ŋɛ í jɛ aru nŋɛ, adɔ̃ mɛɛfai á ce nŋɛ icɛ. Si adɔ̃ mɛɛjesiaɛ aa jɔ̀ ku nɛ araɛ ŋai.

¹³ Amma i kaa jɔ̀ɔ ku nɛ̀ awɔ ngbɛ ŋa.

¹⁴ Aa cea amua ŋai hai si mii jiida ŋa iyi Aɔ̃ Lafɛ̃ɛ nŋɛ í mu nŋɛ si jiida ku jɛɛ fei. Hai angudã nŋɛ ŋa do iwo nŋɛ ŋa do amaajɛ nŋɛ ŋa do isoi jĩi ndu ŋɛ ŋa.

¹⁵ I ye gigii iyi iŋɛ mɔ ì tako ì jɛ aru wo si ilɛi Ezibiti, nɔ Aɔ̃ Lafɛ̃ɛ í ya ŋɛ í jɔ̀ ì nɛ ara nŋɛ ŋa. Na ŋɔi í jɔ̀ ǹ wa n na ŋɛ woodau ihɛ̃ nnyi ŋa.

¹⁶ Bii inɛ iyi í jɛ aru nŋɛu í ni nŋu kù waa bi ku fita hai bi tu ŋɛ, si na iyi í jɔ̀ nŋu í bi iŋɛ do inɛi kpasɛ̃ nŋɛ ŋa nɔ í yɔɔ iyi nŋu wa gbɔ ididɔ̃ bi tu ŋɛ,

¹⁷ aa dɛdɛ afa ku gbe anui nɔ i mu itĩɛ i mási gamboi kpasɛ̃ nŋɛ nɔ i luu ŋa. Si bɛɛbɛ aru nŋɛi á maa jɛ hee do ajɔ fei. Baa bii í jɛ inaaboi, bɛɛbɛi aa ceaa ŋa.

¹⁸ I maà ti i na i maa cã ara má bii ì jɔ̀ aru gɔ í nɛ araɛ ŋa, domi icɛ iyi í ce nŋɛ zakai adɔ̃ mɛɛfau bɛ í re baa fiai icɛi amanɛ minji, nɔ Aɔ̃ Lafɛ̃ɛi á wee nŋɛ si mii iyi ì waa ce fei ŋa.

Ama sinte iyi mɛɛmu ŋa à bí

¹⁹ Ama kɛtɛ kombo sinte iyi kɛtɛ nŋɛ ŋau à bí do iyi angudã nŋɛ ŋa à bí do iyi iwo nŋɛ ŋa à bí fei, ti Aɔ̃ Lafɛ̃ɛ nŋɛi á jɛ. Debɛi kɛtɛ kombo iyi à bí sinte, i maà ceòɛ icɛ ŋa. Nɔ ama angudã iyi à bí sinte, i maà ja ntoɛ ŋa.

²⁰ Adɔ̃ fei, aa ya ŋɔ ŋa ŋai iŋɛ do inɛi kpasɛ̃ nŋɛ ŋa tengi bii Aɔ̃ Lafɛ̃ɛ í cicau.

²¹ Amma mɛɛmu gɔ iyi í nɛ leebu, iyi wa sukutɛ, iyi kù waa yɛ ilu, walakɔ dimii leebu iyi í jɛ fei, i maà ya ceaò Aɔ̃ Lafɛ̃ɛ kuwee ŋa.

²² Inɔ ilu nŋɛi aa ya ŋɔɔ ŋa. Inɛ iyi kù maaju do inɛ iyi í maaju fei í nɛ kpãa ku ŋɔi bɛi ì ya ŋɔ iŋai angbãi walakɔ iŋai kulu ŋa.

²³ Iŋɛ de i maà jɛ njɛu, i dikãɛ ilɛ ŋa bɛi inyi.