Wooda ku kɔsi 14 - Bibeli do fee

Dedemba iyi í jɛ ti iku iyi à ganji

¹ Iŋɛ amai Aɔ̃ Lafɛ̃ɛ nŋɛi ì jɛ ŋa. I maà ti i bu ara nŋɛ do ngɔgɔ má ŋa, nɔ i maà wa ntoi iri iyi í wa do ikpa ikpo nŋɛ na irii iku gɔ.

² Iŋɛi ì jɛ zamaa iyi Aɔ̃ Lafɛ̃ɛ nŋɛ í nya ikã ku ba i jɛ titɛɛ ŋa. Iŋɛi í cica si inɔi zamaa iyi í wa si andunya ihɛ̃ fei.

Iŋa iyi ì nɛ i ŋɔ do iyi i kù nɛ i ŋɔ ŋa

³ I maà ti i jɛ sɔnda gɔ iyi Aɔ̃ Lafɛ̃ɛ wa cɔ mii riisi ŋa.

⁴ Mɛɛmu ŋa iyi aa yɔkɔ i ŋɔ ŋa wee. Kɛtɛ do angudã, do iwo,

⁵ do kulu do angbãi, do mmuɛ gɔ iyi í jɔ angbãi, do mmuɛ gɔ má iyi í jɔ iwo ido, do gobi do ayɔ do iwo ido.

⁶ Aa yɔkɔ i ŋɔ mɛɛmu ŋa iyi à nɛ kɔwe ku nɛ afã do iyi à ya naa a kpɔ mii iyi à jɛ a teese a ŋɔɔ fei.

⁷ Amma mɛɛmu ŋa iyi à nɛ kɔwe ku nɛ afã nɔ à ya kpɔ mii iyi à jɛ a teese a ŋɔɔ iyi i kù nɛ i ŋɔ ŋa wee. Kpookpo do tabe do mɛɛmui sako gɔ iyi kugbokaɛ í yɛ bɛi tabe. Inɛ nŋu ŋau à ya kpɔ mii iyi à jɛ a teese a ŋɔɔ amma a kù nɛ kɔwe ku nɛ afã ŋa. Mɛɛmu iyi bɛ ŋa a kù maaju.

⁸ Bɛɛbɛ mɔi i maà ya ŋɔ iŋai kusɔɔ ŋa, domi í nɛ kɔwe ku nɛ afã ŋa amma ci ya kpɔ ijɛ iyi í jɛ wa ku teese ku ŋɔɔ. I maà ŋɔ iŋai mɛɛmu ŋau bɛ, nɔ i maà lu baa iku nŋa ŋa.

⁹ Si inɔi mɛɛmui inɔ inyi ŋau mɔ, iyi à nɛ afa ŋa do kpaka ŋaui aa yɔkɔ i ŋɔ ŋa.

¹⁰ Amma i kù nɛ kpãai i ŋɔ iyi a kù nɛ afa ŋau do iyi a kù nɛ kpaka ŋau ŋa. I jilɛ inɛ nŋu ŋau si mɛɛmu ŋa iyi a kù maaju ŋa.

¹¹ Aa yɔkɔ i ŋɔ yɛi ŋa iyi à maaju ŋa.

¹² Amma iyi i kù nɛ i ŋɔ ŋa wee. Kungbã do yɛi ku cɔcɔ inyi dimi minji gɔ ŋa,

¹³ do yembeeku do yɛi mmuɛ gɔ iyi í jɔ yembeeku do katɔ do yɛi mmuɛ ŋa iyi à yɛ bɛɛbɛ fei,

¹⁴ do gaagoã hee do dimi mmuɛ ŋa iyi à yɛ bɛɛbɛ fei,

¹⁵ do taataa do gbĩgbĩ, do kelenkelen do katɔ do yɛi ŋa iyi à yɛ bɛɛbɛ fei,

¹⁶ do gɔgɔ ŋa iyi à jɔ gbĩgbĩ, do yɛi fũfũ gɔ, do yɛi gɔ ŋa iyi à ye kpe efɛɛ,

¹⁷ do yɛi gɛlɛ sisɔ gɔ, do yɛi mmuɛ gɔ iyi í jɔ gbĩgbĩ, do yɛi ku cɔcɔ inyi mmuɛ ŋa má,

¹⁸ do kɔɔkɔɔti, do bukaabo do iyi í yɛ bɛɛbɛ fei, do gugbãdale do adã ŋa.

¹⁹ Andi kokoo wɛwɛɛ iyi à nɛ ikpa ku fo ŋau fei, kãma nŋa kù maaju, i maà ya ŋɔ ŋa ŋa.

²⁰ Amma kokoo wɛwɛɛ ŋa iyi à maaju ŋau fei, aa yɔkɔ i ŋɔ ŋa ŋa.

²¹ I maà ya ŋɔ mɛɛmu iyi í ku do araɛ ŋa. I ya muaa inɛi ilɛ mmu gɔ iyi í wa kpasɛ̃ nŋɛ ku ŋɔ, walakɔ i taa inɛi ilɛ mmu gɔ, domi Aɔ̃ Lafɛ̃ɛ nŋɛ í cica ŋɛi ku ba i nya ikã ŋa, nɔ i jɛ zamaaɛ ŋa. I maà ya tɛkɛ ama iwo si amɔi iyeɛ ŋa.

Wooda ŋa iyi í jɛ ti akã si mɛɛwa fei

²² Adɔ̃ fei si amaajɛi iko nŋɛ ŋa iyi ì da, aa ya nya akã ŋai si mɛɛwa fei.

²³ Aa bɔ ŋai si kpasɛ̃i Aɔ̃ Lafɛ̃ɛ nŋɛ tengi bii nŋu takaɛ í cica iriɛ ku maa wa. Bɛi aa jɛ akã iyi ì nya si mɛɛwa fei hai si bilee nŋɛ ŋa, do si vɛ̃ɛ nŋɛ ŋa do si ikpoi olivi nŋɛ ŋa, do ti ama sintei mɛɛmu gaa nŋɛ ŋa, hai kɛtɛ nŋɛ ŋa do angudã nŋɛ ŋa do iwo nŋɛ ŋa. Do yaase bɛɛbɛi aa dɛdɛ i mà bɛɛrɛi Aɔ̃ Lafɛ̃ɛ nŋɛ ŋa hee do ajɔ fei.

²⁴ Waati iyi Aɔ̃ Lafɛ̃ɛ á wee nŋɛ ku jɔ̀ i ba amaajɛ nkpɔ nkpɔ ŋa, á yɔkɔ ku jɛ i kaa yɔkɔ i so akã iyi ì nya ŋa si mɛɛwa fei i naaò wa tengi bii Aɔ̃ Lafɛ̃ɛ í cica iriɛ ku maa wau si na iyi í jɔ̀ inyau á jĩò ŋɛ ku caa.

²⁵ Bii bɛɛbɛi aa kpaasi akã iyi ì nya si mɛɛwa feiu ŋai ku baa ku jɛ fia, nɔ i naaò fiau wa ŋa tengi bii Aɔ̃ Lafɛ̃ɛ í cicau.

²⁶ Bii ì to bɛ ŋa, do fiaui aa raò mii iyi ì bi fei ŋa, hai kɛtɛ ŋa do angudã ŋa do iwo ŋa do vɛ̃ɛ do atɛ̃ ku lele ŋa, andi mii iyi á na ŋɛ inɔ didɔ̃ fei i jɔɔ tengi bɛ, nɔ iŋɛ do nyaanze nŋɛ ŋa fei i wɛɛò inɔ didɔ̃ ŋa.

²⁷ Nɔ i maà ti i gbɛjɛ inɛi Levii ŋa iyi à wa inɔ ilu nŋɛ, domi a kù nɛ baa si nkãma nŋɛ hee má jɛ si tubu nŋɛ.

²⁸ Si adɔ̃ mɛɛta do adɔ̃ mɛɛta fei, akã iyi ì nya si mɛɛwa fei hai si amaajɛ nŋɛ ŋa si adɔ̃u bɛ, aa jilɔɔ ŋai si ilu nŋɛ.

²⁹ Nɔ inɛi Levii ŋa iyi a kù nɛ ikpɛ̃ gɔ si tubu nŋɛ do inɛi ilɛ mmu ŋa do kɔyɔ ŋa do inaabo jaaɔ̃ ŋa iyi à wa inɔ ilu nŋɛ, aa ya ba a jɛ hee a yo ku ba Aɔ̃ Lafɛ̃ɛ ku wee nŋɛ si icɛ nŋɛ ŋa iyi ì waa ce fei ŋa.