Wooda ku kɔsi 13 - Bibeli do fee

¹ I ya jirima ide ŋa iyi ǹ wa n sɔ̃ ŋɛ ŋau fei nɔ i ceò fei ndɛɛ icɛ ŋa. I maà kɔ̃ɔsi nkãma, nɔ i maà kaye nkãma ŋa.

Mii iyi á jɛ ijuukpãi woo tɔɔ iwɛ̃ ŋa si inɔi inɛi Izirɛli ŋau

² Bii walii gɔ walakɔ woo ce kuyɛ gɔ si ala í na í dede si anini nŋɛ, nɔ í sɔ̃ ŋɛ idei nyinda gɔ iyi á na ku ce, walakɔ maamaake gɔ,

³ bii idei nyinda iyi í sɔ̃ ŋɛ walakɔ maamaakeu í na í kɔ̃ nɔ í sɔ̃ ŋɛ í ni, ka bɔ iwɛ̃ ŋa ku tɔɔ,

⁴ i ce laakai i maà ceò idei waliiu bɛ walakɔ woo ce kuyɛ si alau bɛ icɛ ŋa, domi Aɔ̃ Lafɛ̃ɛ nŋɛi wa cɔ laakai nŋɛ bɛ, ku ba ku cɔ mà ì bi nŋu ŋa do idɔ nŋɛ fei, do lasabu nŋɛ fei.

⁵ Aɔ̃ Lafɛ̃ɛ nŋɛ nŋu akãi aa tɔɔ ŋa, nɔ i mà bɛɛrɛɛ ŋa, nɔ i jirima woodaɛ ŋa, nɔ i jirima ideɛ ŋa. I jɔ̀ i nɛ kubiɛ, nɔ i maa ceaa icɛ ŋa.

⁶ Waliiu walakɔ woo ce kuyɛ si ala dimi bɛɛbɛ, aa kpaai, domi ide ku kɔ̀i í dedeò bɛ si gãmɛi Aɔ̃ Lafɛ̃ɛ nŋɛ iyi í nya ŋɛ wa hai ilɛi Ezibiti bii ì waa jɛ aru ŋau, nɔ wa bi ku sinda ŋɛ hai si kpãa iyi Aɔ̃ Lafɛ̃ɛ nŋɛ í nyisi ŋɛu. Aa kpaa ŋai i ba i nyaò laalɔ iyi í wa anini nŋɛu.

⁷ Á yɔkɔ ku jɛ ajɔ akã inɛ gɔ nŋɛ á yɛ igbãɛ walakɔ ifɔɛ walakɔ ama inɛmɔkɔɛ walakɔ ama inaaboɛ walakɔ aboɛ walakɔ kpaasi jiidaɛ, í naa í kpoo si asii í ni, ka koo kaa gulɛa iwɛ̃ ŋa. Iwɛ̃ ŋau bɛ, baa bala nŋɛ ŋa a kù mà ŋa hee má jɛ iŋɛ taka nŋɛ.

⁸ Iwɛ̃i inɛ ŋa iyi à kaako ŋɛ ŋaui, iyi à wa kɔkɔ nŋɛ ŋa walakɔ iyi à jĩò ŋɛ ŋau, iyi à wa hee kɔɔi ilɛ ihɛ̃ hee ku bɔ ikpa ihɔ̃u.

⁹ I maà ti i jɛ nŋa si ŋa, nɔ i maà gbɔ ide nŋa ŋa. Inɛ dimi bɛɛbɛ ŋa i maà ce araare nŋa ŋa, nɔ i maà jɔ̀ a fita si ijuukpãu ŋa, nɔ i maà singa lafɛ̃ɛ ŋa.

¹⁰ Aa kpa lafɛ̃ɛ ŋai. Inɛ iyi inɛɛu wa dɛ ku dasi kpãai banlalau, lafɛ̃ɛi á tako ku maa taa kuta, nɔ zamaau fei ku bɛi ku taa kuta ku kpaa.

¹¹ Aa ta lafɛ̃ɛ kuta i kpaa ŋai si bɛi wa dɛ ku sinda inɛ akã nŋɛ gɔ hai si awɔi Aɔ̃ Lafɛ̃ɛ nŋɛ iyi í nya ŋɛ wa hai ilɛi Ezibiti bii ì tako ì waa jɛ aru ŋa wo.

¹² Bɛɛbɛi aa cea lafɛ̃ɛ ku ba inɛi Izirɛli fei ku gbɔ nɔ njo ku mu ŋa ku ba laalɔ dimi bɛɛbɛ ku maà ce si anini nŋa má.

¹³ Ajɔ akã á yɔkɔ ku jɛ ì gbɔ ŋa iyi si akãi ilu ŋa iyi Aɔ̃ Lafɛ̃ɛ í mu nŋɛ i buba si ŋau,

¹⁴ inɛ laalɔ gɔ ŋa hai si inɔ nŋɛ à tale si inɛ nŋɛ gɔ ŋa iwɛ̃ ŋa iyi a kù mà ku tɔɔ.

¹⁵ Bii ì gbɔ bɛɛbɛ, aa ce kudɛdɛɛ ŋai i cɔ, aa maa bee ŋai do laakai. Bii ì yɔɔ ŋa iyi ntɔi, bii bɛɛbɛi ideu í ce, bii laalɔu bɛ í cei do ntɔ,

¹⁶ aa kpa inɛi ilu bɛ ŋau do taakuba ŋai. Aa ce nfe nŋai mam mam hee do mii iyi í wa bɛ fei. Nɔ aa kpa hee do mɛɛmu nŋa ŋa mɔi do taakuba.

¹⁷ Aa tɔtɔɔ amani ŋa iyi ì ba ŋaui si bantumai iluu, nɔ i jo iluu fei mam mam do amani ŋa iyi ì ba bɛ ŋau fei na bɛɛrɛi Aɔ̃ Lafɛ̃ɛ nŋɛ. Iluu bommai á baa ku jɛ, nɔ a kaa teese a maa má pai.

¹⁸ Mii iyi à ni i kpa ŋau, kãmaɛ ku maà lu awɔ nŋɛ ku ba idɔɔkɔ̃i Aɔ̃ Lafɛ̃ɛu ku sũ, nɔ ku ce araare nŋɛ ku ce nŋɛ didɔ̃, nɔ ku jɔ̀ i kpɔ ŋa bɛi í cea bala nŋɛ ŋau kuwãɛu.

¹⁹ Amma í gbe bii ì waa gbɔ idei Aɔ̃ Lafɛ̃ɛ nŋɛ, nɔ ì waa jirima woodaɛ ŋa iyi ǹ wa n sɔ̃ ŋɛ nnyiu ihɛ̃ fei ŋa, nɔ i maa ce isɛɛnɛ nŋɛ dee dee si wajuɛ ŋa.