Wooda ku kɔsi 12 - Bibeli do fee

Moizi wa ba inɛi Izirɛli ŋa ide ku fɔ

¹ Moizi í nyi í ba zamaau ide ku fɔ má í ni, wooda ikã ikã ŋa iyi aa jirima nɔ i maa ceò icɛ ŋa wee waati iyi ì wɛɛ si hunde ŋa fei si ilɛ iyi Aɔ̃ Lafɛ̃ɛi bala nŋɛ ŋa á mu nŋɛu.

Inya bi kutɔɔ akãi

² I lɛgɛ inya bii dimi ŋa iyi aa lele ŋau fei à ya tɔɔ iwɛ̃ nŋa ŋau, hai inya ŋa iyi à wa si iri kuta kugboka ŋau, do si geete ŋau, do kɔkɔi jĩi tũtũ fei.

³ I kɛkɛ bi kuwee nŋa ŋau, i lɛgɛ kuta iyi à mau, i kɛkɛ jĩi ndii iwɛ̃ nŋa ŋa iyi à ya kpe Aserau nɔ i dasi ina i joo ŋa ŋa ku ba a maà ye gigii iri nŋa ŋa si inya ŋau má.

⁴ Bii ì waa tɔɔ Aɔ̃ Lafɛ̃ɛ nŋɛ, i maà ce bɛi inɛi ilɛ ŋau bɛ à ya ce ŋa.

⁵ Tengi bii nŋu takaɛ í cica iriɛ ku maa wa si inɔi dimi nŋɛ ŋau fei, bɛi aa koo i tɔɔɛ ŋa.

⁶ Tengi bɛi aa ya koo ce kuwee nŋɛ iyi à ya jo si ina fei sãa sãau, do kuwee mmuɛ ŋa, do amuai amaajɛ nŋɛ ŋa akã si mɛɛwa fei, do amuai mii sinte nŋɛ ŋau, do amua iyi aa ce i kɔ̃ò kuwã iyi ì ce ŋa, do amuai idɔɔbi nŋɛ ŋa, do amuai mɛɛmu iyi à bí sinte si gaa nŋɛ ŋa, hai kɛtɛ nŋɛ ŋa, do angudã nŋɛ ŋa, do iwo nŋɛ ŋa.

⁷ Tengi bɛi aa jɛ ŋa si wajui Aɔ̃ Lafɛ̃ɛ, iŋɛ do nyaanze nŋɛ ŋa, nɔ aa wɛɛò inɔ didɔ̃ ŋa si na iyi í jɔ̀ Aɔ̃ Lafɛ̃ɛ á wee nŋɛ si wũa nŋɛ ŋa fei.

⁸ I kaa ya tɔɔ Aɔ̃ Lafɛ̃ɛ bɛi awa à waa ce nnyiu ihɛ̃ má ŋa, tengi bii inɛ fei wa ceɛi bɛi í sĩaa si,

⁹ domi i kù to si ilɛ iyi Aɔ̃ Lafɛ̃ɛ nŋɛ á mu ŋɛ ku jɛ tu ŋɛu titã ŋa hee ì wɛɛò laakai ku sũ ŋa.

¹⁰ Amma aa koo i kua idoi Zuudɛ̃ɛu ŋai nɔ i buba si ilɛ iyi Aɔ̃ Lafɛ̃ɛ í mu nŋɛu, si anyiɛ nɔ ku mu nŋɛ kusĩmi waati iyi á nya ŋɛ hai si awɔi mbɛɛ ŋa iyi à kaako ŋɛ ŋau, nɔ ku jɔ̀ i buba do laakai ku sũ ŋa.

¹¹ Aɔ̃ Lafɛ̃ɛ nŋɛ á cica inya bii iriɛ á wai, nɔ tengi bɛi aa ya koo i ceaa kuwee iyi ǹ sɔ̃ ŋɛ ŋau fei ŋa. Kuwee ŋa iyi à ya jo si ina fei sãa sãau, do kuwee mmuɛ ŋa, do akã si mɛɛwa fei, do amuai mii sinte ŋau do amua ŋa iyi ì dasi idɔ i ce ŋa do iyi aa ce i kɔ̃ò kuwã ŋa iyi ì ceaa ŋau fei ŋa.

¹² Tengi bɛi aa wɛɛò inɔ didɔ̃ ŋa si wajui Aɔ̃ Lafɛ̃ɛ, iŋɛ do ama inɛmɔkɔ nŋɛ ŋa do ama inaabo nŋɛ ŋa do woo ce icɛ inɛmɔkɔ nŋɛ ŋa do woo ce icɛ inaabo nŋɛ ŋau, do inɛi Levii ŋa iyi aa wa si ilu nŋɛ ŋau, domi inɛi Levii kãma kaa nɛ ikpɛ̃ si tubu nŋɛ ŋau.

¹³ I ce laakai i maà ya ce kuwee nŋɛ iyi à ya jo si ina fei sãa sãau si inya iyi ì yɛ fei ŋa.

¹⁴ Amma aa ya ce kuwee nŋɛ ŋa iyi à ya jo si ina fei sãa sãaui si akãi inya bii Aɔ̃ Lafɛ̃ɛ á cica si dimi nŋɛ ŋau. Tengi bɛ nŋu akãi aa ce mii ŋa iyi ǹ wa n sɔ̃ ŋɛ ŋau fei ŋa.

¹⁵ Nŋu de waati iyi ì bi fei aa yɔkɔ i kpa mɛɛmu akã i ŋɔ tengi bii ì wa ŋa na kuwee iyi Aɔ̃ Lafɛ̃ɛ á wee nŋɛ. Inɛ iyi í maaju do inɛ iyi kù maaju fei á yɔkɔ ku ŋɔ iŋau bɛi ì ya ŋɔ iŋai angbãi walakɔ iŋai kulu ŋa.

¹⁶ Iŋɛ de i maà ya jɛ njɛu, i ya dikãɛ ilɛ bɛi inyi ŋa.

¹⁷ I kù nɛ kpãai i jɛ akã si mɛɛwa fei iyi ì nya hai si bilee nŋɛ ŋa iyi á jɛ ti Aɔ̃ Lafɛ̃ɛ si ilu nŋɛ ŋa do ti vɛ̃ɛ nŋɛ ŋa do ti ikpoi olivi nŋɛ ŋa hee má jɛ ti mɛɛmu iyi à bí sinte si gaa nŋɛ ŋa, hai kɛtɛ nŋɛ ŋa do angudã nŋɛ ŋa do iwo nŋɛ ŋa do amuai idɔɔbi nŋɛ ŋa do iyi aa ce ku ba i kɔ̃ò kuwã nŋɛ gɔ do amuai amaajɛ sinte nŋɛ ŋa.

¹⁸ Bii aa yɔkɔ i jɔɔ ŋa nŋu akãi í jɛ si wajui Aɔ̃ Lafɛ̃ɛ. Tengi bii Aɔ̃ Lafɛ̃ɛ á cica, tengi bɛi aa jɔɔ ŋa iŋɛ do ama inɛmɔkɔ nŋɛ ŋa do ama inaabo nŋɛ ŋa do woo ce icɛ inɛmɔkɔ nŋɛ ŋa do woo ce icɛ inaabo nŋɛ ŋa, do inɛi Levii iyi í wa inɔ kpasɛ̃ nŋɛ. Tengi bii Aɔ̃ Lafɛ̃ɛ á cicau bɛ, tengi bɛi aa kpɛ̃ inɔ didɔ̃ nŋɛ do amani iyi ì nɛ fei ŋa.

¹⁹ I ce laakai i maà ti i fũsi inɛi Levii gɔ iyi í wa bi tu ŋɛ awɔ ŋa si kuwɛɛ nŋɛ si ilɛu.

²⁰ Waati iyi Aɔ̃ Lafɛ̃ɛ nŋɛ á na ku kɔ̃ɔsi kucĩi ilɛ nŋɛu si bɛi í tako í ce nŋɛ kuwãɛ wo, bii kɔdɛɛi iŋa ku ŋɔ í na í naa si ŋɛ, nɔ ì ni ì waa bi iŋa ku ŋɔ ŋa, aa ba iŋa i ŋɔ ŋa hee kɔdɛɛ nŋɛ ku sũ.

²¹ Bii í jɛ inya bii Aɔ̃ Lafɛ̃ɛ á cica iriɛ ku wa bɛu í jĩò inɛ gɔ nŋɛ, lafɛ̃ɛ á yɔkɔ ku kpa kɛtɛ akã si kɛtɛ gaaɛ walakɔ angudã akã walakɔ iwo akã si bɛi ǹ tako ǹ sɔ̃ ŋɛu, nɔ ku ŋɔ ndɛɛ si iluɛ bɛ zaka bɛi í bi fei.

²² Aa ŋɔɔi bɛi à ya ŋɔ iŋai angbãi do iŋai kulu. Inɛ iyi í maaju do inɛ iyi kù maaju fei, aŋa fei aa yɔkɔ a ŋɔ.

²³ Amma i ce laakai ntɔ ntɔ, i maà ya jɛ njɛ ŋa, domi njɛi í jɛ kuwɛɛ. Debɛi i maà tɔtɔɔ mii iyi í jɛ kuwɛɛu do iŋau i ŋɔɔ ŋa.

²⁴ Amma i ya dikãɛ ilɛ ŋa bɛi inyi i maà ya ŋɔɔ ŋa.

²⁵ I maà ya ŋɔɔ ŋa, ku ba i jɛ ilu inɔ didɔ̃ ŋa, iŋɛ do tɔku nŋɛ ŋau, domi mii iyi á dɔ̃a Aɔ̃ Lafɛ̃ɛ sii ì waa ce ŋa bɛ.

²⁶ Amma mii ŋa iyi ì waa bi i nya ikã walakɔ amua gɔ iyi ì waa bi i ce i kɔ̃ò kuwã gɔ, aa kooò ŋai tengi bii Aɔ̃ Lafɛ̃ɛ á cicau.

²⁷ Bii í nɔ í jɛ kuwee iyi à ya jo si ina fei sãa sãai, iŋau do njɛu fei, si bi ku ce kuweei Aɔ̃ Lafɛ̃ɛui aa kosi. Ti kuweei anu akãu mɔ, aa nikã njɛui si bi ku ce kuweeu, nɔ i ŋɔ iŋau ndu ŋɛ.

²⁸ I de itĩ i gbɔ ŋa nɔ i ceò ide ŋa iyi ǹ wa n sɔ̃ ŋɛ ŋau ihɛ̃ fei icɛ ŋa, ku ba i jɛ ilu inɔ didɔ̃ ŋa iŋɛ do tɔku nŋɛ ŋa hee do ajɔ fei, nɔ i maa ce jiida do mii iyi á dɔ̃a Aɔ̃ Lafɛ̃ɛ nŋɛ si.

I ce laakai do iwɛ̃i inɛi Kanaã ŋau ŋa

²⁹ Waati iyi Aɔ̃ Lafɛ̃ɛ í kpa inɛi ilɛ ŋa iyi aa koo i lele ŋau, waati iyi ì lele ŋa ŋa, nɔ ì buba si ilɛ nŋau,

³⁰ i ce laakai i maà ti i na i maa sisi ŋa hee i dasi cɛkũm du ŋa ŋau si anyii iyi à kpa ŋa hai si waju nŋɛ ŋau. I ce laakai i maà ti i dɛdɛ i mà iwɛ̃ nŋa ŋa nɔ i maa ni ŋa, bɛirei inɛi ilɛ ŋau ihɛ̃ à ya tɔɔ iwɛ̃ nŋa ŋa. Awa mɔ à bi ka ce bɛi aŋa.

³¹ I maà ce bɛɛbɛ si wajui Aɔ̃ Lafɛ̃ɛ nŋɛ, domi inɛi ilɛ ŋau à ya gulɛ a maa tɔɔ iwɛ̃ nŋa ŋau a maa ceò laalɔ ikã ikã baa yooma fei iyi Aɔ̃ Lafɛ̃ɛ í cé. À ya so hee do ama inɛmɔkɔ nŋa ŋa do ama inaabo nŋa ŋau a jo ŋa a ceaò iwɛ̃ nŋa ŋau kuwee.