Wooda ku kɔsi 11 - Bibeli do fee

Gigi ku yei mii iyi Aɔ̃ Lafɛ̃ɛ í cea inɛi Izirɛli ŋa

¹ Ŋɔi Moizi í sɔ̃ inɛi Izirɛli ŋau í ni, i bi Aɔ̃ Lafɛ̃ɛ nŋɛ nɔ i ya maa jirima ideɛ ŋa do woodaɛ ŋa do ikɔɛ ŋa waati kãma fei.

² Nnyiu ihɛ̃ kù jɛ ama nŋɛ ŋai ǹ wa n fãa, aŋa iyi iju nŋa kù yɛ hee a mà do yaase bɛi Aɔ̃ Lafɛ̃ɛ nŋɛ í kɔ ŋɛ nɔ í nyisi ŋɛ gbugbãɛ. Amma iŋɛ taka nŋɛi ǹ wa n fãa, iŋɛ iyi ì yɛ kulai Aɔ̃ Lafɛ̃ɛ do gbugbãɛ,

³ do maamaakeɛ ŋa do mii ŋa iyi í ce ilɛi Ezibiti si gãmɛi Faraɔ̃ ilaalui Ezibitiu do si inɛi ilɛi Ezibiti ŋau fei.

⁴ I ye gigii mii iyi í cea soogei Ezibiti ŋau do acĩ nŋa ŋa do sarɛtii igũ nŋa ŋa, yaase bɛi í jɔ̀ inyii Tenkui Njeeu í jɛ ŋa waati iyi à waa lele ŋɛ wa nɔ í kpa iri nŋa hee do ajɔ fei.

⁵ Nɔ i ye gigii mii iyi í ce nŋɛ si gbaau hee ì toò wa inyau ihɛ̃ ŋa,

⁶ nɔ i ye gigii mii iyi í cea Datãa do Abiramu ŋa amai Eliabu inɛi dimii Rubɛ̃ɛ ŋau, aŋa iyi ilɛ í la nɔ í mi ŋa aŋa do inɛi kpasɛ̃ nŋa ŋa do ilei acɔ nŋa ŋa, do inɛ ŋa iyi à too ŋa ŋa si inɔi inɛi Izirɛli ŋau fei.

⁷ Ntɔ ntɔ ijui iŋɛ fei í yɛ mii nla nla ŋa iyi Aɔ̃ Lafɛ̃ɛ í ceu.

⁸ Na nŋu, i jirima wooda ŋa iyi ǹ wa n na ŋɛ nnyiu ihɛ̃ fei ku ba i nɛ gbugbã i gbaò ilɛ iyi aa koo i buba si ku jɛ tu ŋɛu,

⁹ nɔ hunde nŋɛ ku sɔ si ilɛ iyi Aɔ̃ Lafɛ̃ɛ í ce kuwãɛ do kugbasi í ni nŋu á mua bala nŋɛ ŋa do tɔku nŋa ŋau, ilɛ bii amɔ do nyikɔ̃ wa kɔ̃u.

Ilɛ iyi Aɔ̃ Lafɛ̃ɛ wa kuukuba

¹⁰ Ilɛ iyi aa na i koo i buba si ŋau kù yɛ bɛi ilɛi Ezibiti hai bii ì fita wa ŋa, tengi bii ì ya maa muaa amaajɛ nŋɛ ŋa iyi ì gbɛ̃ si iko nŋɛ ŋau inyi bɛi lambo ku mungau bii à ya lɔ ifɔ ŋa.

¹¹ Amma ilɛ bii aa koo i buba ŋau, ilɛ ku nɛ iri kuta do lɔɔma ŋai, nɔ ijĩ í ya wɔ bɛ.

¹² Ilɛu ilɛ gɔi iyi Aɔ̃ Lafɛ̃ɛ nŋɛ wa kuukuba, nɔ bɛi ijuɛ í ya wa waati kãma fei hai sinte hee ku bɔ iri ku kpai adɔ̃.

¹³ Bii ì jirima wooda ŋa iyi ǹ wa n na ŋɛ nnyi ŋa, bii ì bi Aɔ̃ Lafɛ̃ɛ nŋɛ, nɔ ì waa ceaa icɛ ŋa do idɔ nŋɛ fei do lasabu nŋɛ fei,

¹⁴ á jɔ̀ ijĩ ku maa naa si ilɛ nŋɛ ŋa dee dee si bɛi í jɔ hai jɛadɔ̃ hee ku bɔ sɔnkpasa ku ba amaajɛ nŋɛ ŋa a ce jiida, hai bilee nŋɛ ŋa do vɛ̃ɛ nŋɛ ŋa do ikpo nŋɛ ŋa.

¹⁵ Nɔ á jɔ̀ fɔfɔ ŋa a fita iyi mɛɛmu nŋɛ ŋau aa ba a jɛ, nɔ iŋɛ mɔ aa ba sɔnda i jɛ i yo ŋa.

¹⁶ Na nŋu, i ce laakai i maà jɔ̀ i na i kita hai si kpãa jiidau ŋa, nɔ i gulɛ i maa tɔɔ iwɛ̃ gɔ má ŋa.

¹⁷ Bii ì ce bɛɛbɛ ŋa idɔi Aɔ̃ Lafɛ̃ɛ á kɔ̃ si ŋɛi nɔ á cĩmbo lelei ku ba ijĩ ku maà naa má, nɔ amaajɛi ilɛ ŋa a kaa ce má, nɔ iŋɛ fei aa kui gbãa gbãa si ilɛ jiida iyi Aɔ̃ Lafɛ̃ɛ í mu nŋɛu.

¹⁸ Ide ŋa iyi ǹ wa n sɔ̃ ŋɛu ihɛ̃, i muu si idɔ nŋɛ do si lasabu nŋɛ, nɔ i ya dĩ ŋa si awɔ nŋɛ ku jɛ bɛi nyinda, nɔ ku ya wa si ikpo nŋɛ ŋa si aninii iju nŋɛ ŋa.

¹⁹ Aa kɔ ama nŋɛ ŋa si ŋai, nɔ bii ì wa ide aa ya fɔi, bii ì waa bɔ ilu nɔ i ya fɔ, bii ì waa sũ walakɔ bii ì waa dede ŋa.

²⁰ Aa kɔɔi si jĩi ndii gamboi ile nŋɛ ŋa do si ti gamboi anu koofai ilu nŋɛ ŋa.

²¹ Bii ì ce bɛɛbɛ ŋa, hunde nŋɛ do ti ama nŋɛ ŋau á sɔi si ilɛ iyi Aɔ̃ Lafɛ̃ɛ í ce kuwãɛ do kugbasi í ni nŋu á mua bala nŋɛ ŋau. Aa jɛ kuwɛɛ i kpɛ si ŋai zaka bɛi kukpɛi lelei Aɔ̃ do ilɛ í to.

²² Ntɔ ntɔ, bii ì waa jirima wooda ŋa iyi ǹ na ŋɛu fei ŋa, nɔ ì waa ceò ŋa icɛ ŋa nɔ ì bi Aɔ̃ Lafɛ̃ɛ nŋɛ nɔ ì waa nɛ si kpãaɛ fei ŋa, nɔ ì naa ara nŋɛ,

²³ nŋui á lele inɛi ilɛ ŋau bɛ fei hai si waju nŋɛ, nɔ ku jɔ̀ i jɛ ilɛ nla ŋa iyi à re ŋɛò gbugbã ŋau igũ ŋa.

²⁴ Tengi bii ì dasi kutɛ ŋa fei, tu ŋɛi á jɛ. Kɔɔ nŋɛ á wai hai bi gbaau hee ku bɔ iri kutai Libãa ŋa, do hai bi idoi Efaratau hee ku bɔ bi tenkuu do ikpa nunui alɛ.

²⁵ Nɔ inɛ kãma kaa yɔkɔ ku leekĩ si waju nŋɛ. Aɔ̃ Lafɛ̃ɛ nŋɛi á jɔ̀ inɛ ŋa a ya ce njo nŋɛ tengi bii ì waa bɔ ŋa fei si ilɛu bɛi nŋu takaɛ í sɔ̃ ŋɛu.

²⁶ Nnyi, kuwee do ikpei ǹ jilɛ si waju nŋɛ.

²⁷ Aa ba kuwee ŋa bii ì waa jirima woodai Aɔ̃ Lafɛ̃ɛ nŋɛ iyi ǹ wa n sɔ̃ ŋɛ nnyiu ihɛ̃.

²⁸ Ikpe mɔi á nɔ ku jɛ tu ŋɛ bii i kù waa jirima woodai Aɔ̃ Lafɛ̃ɛ nŋɛ do bii ì sinda ì jɔ̀ kpãa iyi ǹ nyisi ŋɛ nnyiu ihɛ̃ nɔ ì koo ì waa tɔɔ iwɛ̃ ŋa.

²⁹ Waati iyi Aɔ̃ Lafɛ̃ɛ nŋɛ á jɔ̀ i lɔ si ilɛ bii aa koo i buba si ŋa ku jɛ tu ŋɛu, aa fɔ idei kuwee ŋai si antaii iri kutai Garizimu, nɔ i fɔ idei ikpe ŋa si antaii iri kutai Ebali.

³⁰ Iri kuta ŋau ihɛ̃, do alalai idoi Zuudɛ̃ɛ ikpa icei kpãai nunui alɛui à wa, si ilɛi inɛi Kanaã ŋa iyi à wa si lɔɔmai Zuudɛ̃ɛu. Iri kuta ŋau à wai kɔkɔi jĩi nla ŋa iyi à ya kpe Mɔre do wajui Giligali.

³¹ Aa kua idoi Zuudɛ̃ɛu ŋai i bɛi i lɔ si ilɛ iyi Aɔ̃ Lafɛ̃ɛ nŋɛ á mu nŋɛu. Ilɛu á jɛ tu ŋɛi nɔ i buba si ŋa.

³² Na nŋu i ce laakai ŋa ku ba i ceò wooda ŋa do asaiya ŋa iyi ǹ wa n na ŋɛ nnyiu ihɛ̃ icɛ ŋa.