Wooda ku kɔsi 10 - Bibeli do fee

Aɔ̃ Lafɛ̃ɛ í cea zamaaɛu suuru

¹ Ŋɔi Moizi í ba inɛi Izirɛli ŋau ide ku fɔ í ni, Aɔ̃ Lafɛ̃ɛ í nam wooda í ni, gbe kuta minji bɛi ti tako ŋau, nɔ i gũ antaii iri kutau i naa wa bi tom, nɔ i ce kpakoi jĩi.

² Si kuta ŋau bɛi an kɔ ide ŋa iyi à tako à wa si kuta sinte ŋa iyi ì lɛgɛu, nɔ i dasi ŋa si kpakou.

³ Ŋɔi ǹ ce kpakou do jĩi ndii akasia. Ǹ gbe kuta ŋaui bɛi kuta minjii sinte ŋau, nɔ ǹ gũ iri kutau do kuta minji ŋau si awɔ.

⁴ Ŋɔi Aɔ̃ Lafɛ̃ɛ í kɔ ide ŋa iyi à tako à wa si kuta sinte ŋau, waatɔ wooda mɛɛwa ŋa iyi í na ŋɛ hai si iri kutau hai si aninii inau ajɔ iyi ì tɔtɔɔ ŋa. Si anyiɛ í bɛi í nam kuta titɔ̃ minji ŋa iyi ǹ gbeu.

⁵ Ŋɔi ǹ sinda ǹ kita wa hai iri kutau nɔ ǹ so kuta ŋau ǹ dasi kpako iyi ǹ ceu nɔ à wa bɛ si bɛi Aɔ̃ Lafɛ̃ɛ í tako í sɔ̃m nɔu.

⁶ Inɛi Izirɛli ŋau à dede hai Berɔti-Beni-Yaakãa à nɛ ikpa Mɔsera. Tengi bɛi Arɔ̃ɔ í ku nɔ tengi bɛ mɔi à suu, nɔ Eleazaa amaɛui í tɛkɛ siɛ í jɛ woo wee.

⁷ Hai bɛ nɔ inɛi Izirɛli ŋau à nɛ Gudugoda, nɔ hai bɛ má à nɛ Yotibata ikpa bii ido ŋa à wa bututuu.

⁸ Si waati bɛɛbɛ, Aɔ̃ Lafɛ̃ɛ í nya dimii Levii ŋau ikã nɔ í jilɛ nŋa icɛ ŋa. Aŋai aa ya maa so kpakoi akabuuu, aŋai aa ya wa bi Aɔ̃ Lafɛ̃ɛ a maa ceaa icɛ, nɔ aŋai aa ya weea inɛ ŋa do iriɛ, nɔ icɛ ŋau bɛ, icɛ nŋai hee ku baa nnyi.

⁹ Na nŋu bɛi í jɔ̀ dimii inɛi Levii ŋa a kù ba ikpɛ̃ si kukpɛ̃i ilɛu bɛi dimi iyi ihɔ̃ ŋa. Tubui inɛ nŋu ŋaui í jɛ Aɔ̃ Lafɛ̃ɛ ku cea icɛ si bɛi Aɔ̃ Lafɛ̃ɛ nŋɛ takaɛ í sɔ̃ ŋa.

¹⁰ Nɔ dasã ciiji do idũ ciijii ǹ ce si antaii iri kutau bɛi ǹ tako ǹ ceu. Waati bɛɛbɛ ŋɔi Aɔ̃ Lafɛ̃ɛ í nyi í gbɔ kutɔɔm má, nɔ í jɛsi nŋu ku maà kpa ŋɛ má.

¹¹ Aɔ̃ Lafɛ̃ɛ í sɔ̃m í ni, dede i koo i cuaa inɛ ŋau i jɛ inɛ ngbo nŋa, nɔ a koo a gba ilɛ iyi ǹ cea bala nŋa ŋa kuwãɛ do kugbasi ǹ ni an mu nŋa a buba si ku jɛ tu nŋau.

Woodai kubi do ti jirima

¹² To, nsɛi iŋɛ inɛi Izirɛli ŋa, mii iyi Aɔ̃ Lafɛ̃ɛ wa cɔ si ŋɛi í jɛ, i jirimaɛ, nɔ i too idɔɔbiɛ ŋa, nɔ i buu ŋa, nɔ i ceaa icɛ do idɔ nŋɛ fei do lasabu nŋɛ fei.

¹³ Wa bi i ceò wooda ikã ikãɛ ŋa iyi ǹ wa n sɔ̃ ŋɛ nnyiu ihɛ̃ icɛ ŋai na ididɔ̃ nŋɛ.

¹⁴ Aɔ̃ Lafɛ̃ɛ nŋɛi í nɛ lele do mii iyi í wa si fei, nɔ nŋui í nɛ ilɛ do mii iyi í wa si ilɛu fei.

¹⁵ Tako wo bala nŋɛ ŋa aŋa akãi Aɔ̃ Lafɛ̃ɛ í bi nɔ í na ŋa araɛ. Si anyi nŋa, iŋɛ iyi ì jɛ tɔku nŋa ŋai í bi nɔ í cica ŋɛ hai si inɔi dimi iyi à gbe ŋau fei si bɛi iŋɛ taka nŋɛ ì waa yɔɔ nnyi ŋa.

¹⁶ Debɛi i na Aɔ̃ Lafɛ̃ɛ idɔ nŋɛ mam mam ŋa, nɔ i maà kɔ̀ ide si wajuɛ má ŋa,

¹⁷ domi ntɔ ntɔ, nŋui í jɛ Aɔ̃ Lafɛ̃ɛ iyi í nɛ gbugbã í re iwɛ̃ ŋa fei, nɔ nŋui í jɛ Lafɛ̃ɛi lafɛ̃ɛ ŋa, nŋui í la, í nɛ gbugbã nɔ nŋui inɛ ŋa à nɛ a ce njoɛ. Bi tɛɛ, inɛ gɔ kù re inɛ gɔ, nɔ ci ya gba amua iyi kù jɛ dee dee.

¹⁸ Nŋui í ya kɔ̀ò kɔyɔ ŋa do abo jaaɔ̃ ŋa dee dee si bɛi í jɔ. Í bi inɛ njoo ŋa nɔ í ya mu nŋa sɔnda do ibɔ ŋa.

¹⁹ Debɛi iŋɛ mɔ, i bi inɛ njoo ŋa, domi bɛɛbɛi iŋɛ mɔ ì tako ì jɛ inɛ njoo ŋa wo si ilɛi Ezibiti.

²⁰ I jirima Aɔ̃ Lafɛ̃ɛ nŋɛ nɔ i ya ceaa icɛ ŋa. Nŋui aa bi ŋa nɔ i ya ce kugbasi do iriɛ ŋa.

²¹ Nŋui ì nɛ ku saabu ŋa. Nŋu akãi í jɛ Aɔ̃ Lafɛ̃ɛ nŋɛ, nɔ nŋui í kɔ̃ icɛ jiida ŋau si ŋɛ do icɛ ku nɛ njo ŋa iyi ì yɛ do iju nŋɛ ŋau.

²² Bala nŋɛ ŋau a kù re aŋa kitaò fɛɛwa waati iyi à to ilɛi Ezibiti, amma nsɛi, Aɔ̃ Lafɛ̃ɛ nŋɛ í jɔ̀ iŋɛ ì kpɔ bɛi leleaɔ̃ ŋa.