Wooda ku kɔsi 1 - Bibeli do fee

Moizi wa ba inɛi Izirɛli ŋa ide ku fɔ

¹ Tiau ihɛ̃ wa sisi nwa ide ŋa iyi Moizi í sɔ̃ inɛi Izirɛli ŋau fei do icei idoi Zuudɛ̃ɛu ikpa nunui daakɔ, si gbaa iyi í wa si lɔɔmau kɔkɔi Sufu si aninii Parãa do Tofɛli do Labãa do Haserɔti do Di-Zahabu.

² Hai iri kutai Ɔrɛbu isɛɛnɛi ajɔ maatakãi inɛ í ya ce bii í too kpãa ku bɔ ilɛi iri kutai Seiiu ku bɛi ku to Kadɛsi-Baanea.

³ Si anyii kufita nŋa hai ilɛi Ezibiti, adɔ̃ ciijii í ce si cukpa maatakãsiaɛ ajɔ sintei cukpaui Moizi í sisia inɛi Izirɛli ŋau ide iyi Aɔ̃ Lafɛ̃ɛ í tako í sɔ̃ɔ wo fei.

⁴ Ideu ihɛ̃ í cei si anyii iyi Moizi í jɛ Sioni ilaalui inɛi Amɔre ŋa iyi í wa Hɛsebɔ̃ɔu do Ɔgu ilaalui Basãa iyi í wa Asitarɔti si inyai Edereiu igũ mbɛ.

⁵ Do ikpa nunui daakɔi idoi Zuudɛ̃ɛu, si ilɛi Moabu, Moizi í sinti ku kɔ inɛ ŋa si woodai Aɔ̃ Lafɛ̃ɛ. Ide ŋa iyi í fɔ wee.

Aɔ̃ Lafɛ̃ɛ í na inɛi Izirɛli ŋau woodai kunɛ

⁶ Waati iyi à wa iri kutai Ɔrɛbuu, Aɔ̃ Lafɛ̃ɛ nwa í ba wa ide ku fɔ. Í ni, ì kpɛ bi isɛi iri kutau ihɛ̃ ŋa ntɔ ntɔ.

⁷ I dede i dasi kpãa bɛbɛi ŋa i bɔ ilɛi iri kuta tengi bii inɛi Amɔre ŋa à wau, do ilɛi inɛi Kanaã ŋa iyi à wa kɔkɔ nŋau, hai lɔɔmai Zuudɛ̃ɛu do ilɛi iri kuta ŋau, do inya bii ilɛ í munga anuu, do ilɛi Negɛbu do ilɛ iyi í wa itĩ tenku hee ku bɔ iri kutai Libãa ŋau, nɔ ku baa hee Efarata ido nlau.

⁸ I cɔ ŋa, ǹ jilɛ nŋɛ ilɛu si waju nŋɛ, i koo i gba ilɛu i buba si ŋa. Ntɔ ntɔ, ilɛu, amu Aɔ̃ Lafɛ̃ɛ ǹ fɔ do kugbasi ǹ ni an muaa bala nŋɛ ŋa, Aburahamu do Izaaki do Zakɔbu, do ama nŋa ŋa hee do tɔku nŋa ŋau fei.

Moizi í jilɛ woo kiiti ŋa

⁹ Si waatiu bɛi amu Moizi ǹ sɔ̃ ŋɛ ǹ ni, n kù bi amu akã n jɛ woo cua nŋɛ má.

¹⁰ Aɔ̃ Lafɛ̃ɛ nŋɛ í jɔ̀ akpɔ nŋɛ í kɔ̃ɔsi, nɔ nnyi kukpɔ nŋɛ í to baa leleaɔ̃ ŋa.

¹¹ Aɔ̃ Lafɛ̃ɛi baa nŋɛ ŋa ku sisi ku kɔ̃ɔsi kukpɔ nŋɛ má ikɔ dubu nɔ ku wee nŋɛ bɛi í tako í ce kuwãɛ wo.

¹² Amma i jɔ̀ i mà ŋa iyi amu akã n kaa n yɔkɔ n so aso nŋɛ, nɔ n maa n wũa nŋɛ idei njɛ hai gbɔsi nŋɛ ŋa.

¹³ Na nŋu, i cica ilu laakai ŋa hai si dimi ikã ikãu fei, do ilu bisi ŋa iyi ì mà í ce ncɛɛ ŋa nɔ n jilɛ ŋa a jɛ ilu iri nŋɛ ŋa.

¹⁴ Nɔ ì jɛɛm ŋa ì ni, bɛɛbɛ í sĩa.

¹⁵ Nɔ ǹ so inɛ ngbo ŋa hai si dimi ŋau, inɛ ŋa iyi à jɛ ilu laakai ŋa nɔ inɛ ŋa à mà ŋa, ǹ jilɛ inɛ gɔ ŋa a jɛ inɛ ngboi amanɛ dubu, inɛ gɔ ŋa mɔ inɛ ngboi cĩɔ, inɛ gɔ ŋa mɔ inɛ ngboi ciitaa, inɛ gɔ ŋa mɔ inɛ ngboi mɛɛwa. Nɔ ǹ na aŋa fei gbugbãi a maa gbãò dimi nŋɛ ŋau.

¹⁶ Si waati akãu bɛ mɔi ǹ na woo kiiti nŋɛ ŋa wooda ǹ ni, i ya de itĩ si inɛ nŋɛ ŋau nɔ i gbɔ ide nŋa ŋa dee dee, bii í jɛ ilu ide ŋa aŋa duusɔ̃ɔi walakɔ bii í jɛ do inɛ njoo gɔi.

¹⁷ Si kiiti nŋɛ, i maà ya cɔ ijui inɛ ŋa. I ya gbɔ idei ilu gbugbã do hai nɛ gbugbã fei ŋa. I maà ce njoi inɛ kãma ŋa, domi ì nɛ i ya kiiti ŋai do irii Aɔ̃ Lafɛ̃ɛ. Nɔ bii ì kòò ide iyi í gaabu í caa ŋa, i ya naaò wa bi tom ŋa n ba n gbɔ.

¹⁸ Bɛɛbɛi an sisi nŋɛ yaase bɛi ì nɛ ku ce ŋa fei si waati nŋuu.

Wooda ku kuai inɛi Izirɛli ŋa kɔkɔi ilɛ iyi à ce nŋa kuwãɛu

¹⁹ Si anyiɛ à nɛ hai Ɔrɛbu, nɔ à dabii si gbaa nla nla iyi ì yɛ ŋa nɔ í nɛ zigiidau. Kpãai iri kutai inɛi Amɔre ŋaui à too si bɛi Aɔ̃ Lafɛ̃ɛ nwa í sɔ̃ wau, nɔ à bɔ Kadɛsi-Baanea.

²⁰ Nɔ ǹ sɔ̃ ŋɛ ǹ ni, ì to iri kutai inɛi Amɔre ŋau mbɛ ŋa, bii Aɔ̃ Lafɛ̃ɛ nwa í mu nwau.

²¹ I cɔ ŋa, Aɔ̃ Lafɛ̃ɛ nŋɛ í tɛ ilɛu si waju nŋɛ. I koo i gba ilɛu si bɛi Aɔ̃ Lafɛ̃ɛi bala nŋɛ ŋau í sɔ̃ ŋɛ. I dasi wɔɔkɔ, nɔ i maà ce njo ŋa.

²² Nɔ iŋɛ fei ì naa ì sɔ̃m ì ni, ka bɛ inɛ gɔ ŋa a koo a cɔ yaasei ilɛu wa, nɔ a na a sisi nwa yaasei kpãa iyi aa ka too ka kooò do ilu ŋa iyi aa ka kãsi.

²³ Lasabuu í sĩaam si, nɔ ǹ so amanɛ maateeji si inɔ nŋɛ, si dimi akã fei amanɛ akã.

²⁴ Ŋɔi à nɛ à kua iri kutau nɔ à to hee lɔɔmai Ɛsekɔlu iyi à koo à cɔ yaaseɛu.

²⁵ Nɔ à ka isoi jĩi ndii ilɛu wa à naa à nyisi wa, nɔ à sisi nwa yaasei inyau à ni, ilɛ jiidai Aɔ̃ Lafɛ̃ɛ nwa í mu nwa.

²⁶ Amma wee i kù waa bi ku koo ŋa, nɔ ì waa kua wooda iyi Aɔ̃ Lafɛ̃ɛ nŋɛ í na ŋɛ.

²⁷ Nɔ ì wa si ilei acɔ nŋɛ ŋa ì wasi ku gbagba ŋa ì waa ni, si na iyi í jɔ̀ Aɔ̃ Lafɛ̃ɛ í cé wa, ŋɔi í jɔ̀ í nya wa wa hai ilɛi Ezibiti ku ba ku so wa ku daa inɛi Amɔre ŋa si awɔ nɔ a kpa wa.

²⁸ Na mii aa ka koo bɛ, kpaasi nwa ŋau à jɔ̀ à kua gbugbã tã, domi à sɔ̃ wa à ni, inɛ ŋau à la à re wa, nɔ à re wa do kugboka má. Ilu nla nla ku nɛ gbugbã ŋai nɔ à nɛ bindi ŋa iyi kugboka nŋa í bɔ hee lelei Aɔ̃, nɔ à yɛ hee do dimii Anaku ŋa bɛ fei.

²⁹ Ǹ sɔ̃ ŋɛ ǹ ni, i maà jɔ̀ zigi nŋɛ ku da nɔ i maà ce njo nŋa ŋa.

³⁰ Aɔ̃ Lafɛ̃ɛ nŋɛ, nŋui á maa cuaa nŋɛ, nŋu takaɛi á ja nŋɛ si bɛi í ce nŋɛ si ilɛi Ezibiti tã nɔ iju nŋɛ í yɔɔ,

³¹ si anyiɛ nɔ ì yɛ bɛi Aɔ̃ Lafɛ̃ɛ í so ŋɛ si gbaa bɛi inɛ í ya so amaɛ si isɛɛnɛ iyi ì ce wa hee ì toò wa inyau ihɛ̃ ŋa.

³² Nɔ do nŋu fei i kù dasi Aɔ̃ Lafɛ̃ɛ nŋɛ naanɛ ŋa,

³³ nŋu iyi wa cua nŋɛ si isɛɛnɛ nŋɛ ku ba ku dɛdɛ nŋɛ bi ku sɔ. Idũ, nŋui í ya má nŋɛ inya i ba i yɛ bii í sĩa i too ŋa. Dasã mɔ, í ya maa cua nŋɛi si kudũi ijĩ.

³⁴ Aɔ̃ Lafɛ̃ɛ í gbɔ ide ku fɔ nŋɛ, ŋɔi idɔɛ í kɔ̃ nɔ í fɔ do kugbasi í ni,

³⁵ baa akãi inɛ laalɔi nsɛi ŋau ihɛ̃ kaa yɛ ilɛ jiida iyi ǹ cea bala nŋa ŋau kuwãɛ má,

³⁶ í gbe Kalɛbu amai Yɛfune. Nŋu do amaɛ ŋai an mua ilɛ iyi í koo í cɔu, domi í jɛ dee dee si gãmɛi amu Aɔ̃ Lafɛ̃ɛ.

³⁷ Idɔi Aɔ̃ Lafɛ̃ɛ í kɔ̃ si amu mɔ na iri nŋɛ nɔ í ni, baa awɔ takaɛ mɔ i kaa lɔ si ilɛu má.

³⁸ Zozue amai Nunu woo ce icɛɛu njɛi á lɔ si. Teese i muaa gbugbã, domi nŋui á lɔò inɛi Izirɛli ŋau si ilɛu ku jɔ̀ ku jɛ tu ŋa.

³⁹ Nɔ ama nŋɛ ŋa iyi ì ni aa na a jɛ arui inɛ ŋau, ama nŋɛ ŋa iyi a kù mà jiida nnyi hee má jɛ laalɔ, aŋai aa lɔ si ilɛu, aŋai an mua nɔ tu ŋai á jɛ.

⁴⁰ Amma iŋɛ, i sinda i nɛ ikpa gbaau si suusuui Tenkui Njeeu.

⁴¹ Nɔ ì jɛɛm ŋa ì ni, à ce dulum bi Aɔ̃ Lafɛ̃ɛ, aa ka koo káa ce igũu si bɛi Aɔ̃ Lafɛ̃ɛ nwa í sɔ̃ wau. Nɔ iŋɛ fei ì dĩ jĩnɛi igũ nŋɛ ŋa si gbankili, nɔ ì waa tamaa bɛi iri kutau ku gũ á faala ŋai.

⁴² Nɔ Aɔ̃ Lafɛ̃ɛ í sɔ̃m í ni, sɔ̃ ŋa i ni amu Aɔ̃ Lafɛ̃ɛ ǹ ni, i maà bɔ iri kutau ku gũ, domi n kù wa si anini nŋɛ, i maà jɔ̀ mbɛɛ nŋɛ ŋa a kpa ŋɛ.

⁴³ Amu Moizi ǹ ba ŋɛ ide ku fɔ, amma i kù gbɔ ŋa, ì kua woodai Aɔ̃ Lafɛ̃ɛ ŋa, nɔ ì lele idɔ nŋɛ ì koo ì gũ iri kutau ŋa.

⁴⁴ Nɔ inɛi Amɔre ŋa iyi à wa si iri kuta ŋau à kita si ilɛi Seii, nɔ à bii si ŋɛ wa bɛi nyikɔ̃ ŋa à lele ŋɛ wa hee Ɔɔma à fangaa ŋɛ.

⁴⁵ Iyi ì baa ŋa, ì naa ì waa weeweea ŋa si wajui Aɔ̃ Lafɛ̃ɛ, amma kù gbɔ nŋɛ, kù dasi ide nŋɛ laakai mɔm.

⁴⁶ Nɔ ì kpɛ Kadɛsi-Baanea ŋa jiida jiida.