Daniɛli 9 - Bibeli do fee

Kutɔɔi Daniɛli

^1-2 Dariusi ama inɛmɔkɔi Ɛkusɛɛsi si dimii inɛi Mɛɛdi ŋai í na í jɛ ilaalui inɛi Kaladee ŋa waatɔ inɛi Babilɔni ŋa. Si adɔ̃ sinte iyi í jɛ bommau, amu Daniɛli ǹ cĩ tia kumá ŋau ǹ cɔ. Waati bɛɛbɛi ǹ gbɔ yaasei ide ŋa iyi Aɔ̃ Lafɛ̃ɛ í sɔ̃ walii Zeremiu. Idei adɔ̃ kitaò fɛɛwa si bii Zeruzalɛmu á na ku kpɔò bommai wa fãa.

³ Ŋɔi ǹ lɔsi kutɔɔ ku ce do anu ku dĩ. Ǹ dasi jĩnɛ ŋa iyi inɛ ŋa à ya dasi bii iku í ce, nɔ ǹ kosi irim ilulu. Si anyii nŋu, nɔ ǹ sinda si Ilaaɔ̃ Lafɛ̃ɛ ǹ wasi ku tɔɔɛ.

⁴ Amu Daniɛli, si kutɔɔm nɔu, ǹ wa n tɔɔ Aɔ̃ Lafɛ̃ɛ ku cea inɛm ŋau suurui kurara nŋa ŋai. Si kutɔɔm nɔu ǹ ni, Lafɛ̃ɛ Ilaaɔ̃, awɔ iyi ì la nɔ ì to njo, nɔ ì ya kɔ̃ akabuuɛ, dee dee ku jɛɛ í ya wa si gãmɛi inɛ ŋa iyi à biɛ nɔ à waa jirima woodaɛ ŋa.

⁵ Awa à kua woodaɛ ŋa, à ce dulum nɔ à baa à jɛ ilu taale ŋa. À dedeò ide ku kɔ̀ siɛ, nɔ à sinda à toa ideɛ do woodaɛ ŋa anyi.

⁶ A kù de itĩ si idei walii woo ce icɛɛ ŋa, aŋa iyi ì sɔ̃ ideɛ nɔ ì jɔ̀ à sɔ̃ ilaalu nwa ŋa do inɛ ngbo nwa ŋa do bala nwa ŋa hee do zamaai ilɛu fei.

⁷ Aɔ̃ Lafɛ̃ɛ, awɔ ì jɛ dee dee, nɔ anyɔi í jɛ ti awa. Ntɔ ntɔ nnyiu ihɛ̃, hai inɛi Zeruzalɛmu ŋa hee do inɛi bommai Zudaa ŋau fei, à wa si anyɔ nla nla. Nɔ bɛɛbɛ mɔi hee do inɛi Izirɛli ŋau fei, hai inɛ ŋa iyi à wa amɛɛ hee do inɛ ŋa iyi à wa hee jĩijĩ ŋau fei. Awɔi ì lele ŋa ì jɔ̀ à koo à wa si ilɛ mmu ŋa bii fei si na iyi í jɔ̀ à ce dulum bi tɛɛ.

⁸ Ntɔ ntɔ, Aɔ̃ Lafɛ̃ɛ, awai à nɛ anyɔ, do ilaalu nwa ŋa, do inɛ ngbo nwa ŋa, do bala nwa ŋa si na iyi í jɔ̀ à ce dulum bi titɛɛ.

⁹ Ilaaɔ̃ Lafɛ̃ɛ nwa, awɔi ì ya ce araare do suuru, domi awa à ce ide ku kɔ̀ si wajuɛ.

¹⁰ A kù de itĩ a kù gbɔ idei awɔ Aɔ̃ Lafɛ̃ɛ nwa ku ba ka too si woodaɛ ŋa iyi ì jɔ̀ walii woo ce icɛɛ ŋau à sɔ̃ wa.

¹¹ Inɛi Izirɛli ŋau fei à gbea woodaɛ ŋa nɔ à jĩò ŋa a kù de si itĩ. Na ŋɔi í jɔ̀ ikpe í cuku si wa na idei kugbasi ŋa iyi à kɔ si woodai Moizi woo ce icɛɛ, domi à ce dulum nii bi awɔ Ilaaɔ̃.

¹² Ide iyi ì fɔ si gãmɛ nwa do si gãmɛi inɛ ngbo ŋa iyi à gbã wau, ì jɔ̀ í ce. Ì jɔ̀ laalɔ nla nla iyi a kù yɛ dimiɛ ajɔ kãma si andunyau ihɛ̃ í naa si Zeruzalɛmu.

¹³ Laalɔu bɛ fei í naa si wai si bɛi à kɔɔ dee dee si woodai Moizi, nɔ awa a kù dɛdɛ bɛi aa ka ce ka sũ laakaii awɔ Aɔ̃ Lafɛ̃ɛ nwa. A kù fũsi laalɔ ku ce nwa ŋau awɔ, nɔ a kù dɛdɛ bɛi aa ka ce ka gbɔ yaasei ntɔ iyi wa naa hai bi tɛɛ.

¹⁴ Awɔ Aɔ̃ Lafɛ̃ɛ ì waa ce laakaii, nɔ ì jɔ̀ laalɔu í naa si wa, domi awɔ Aɔ̃ Lafɛ̃ɛ nwa ì jɛ dee dee si icɛɛ ŋa iyi wa ce fei, nɔ awa a kù de itĩ a kù gbɔ ideɛ.

¹⁵ Ilaaɔ̃ Lafɛ̃ɛ nwa, awɔi ì nya inɛɛ ŋa wa hai ilɛi Ezibiti do awɔ gbugbãɛ nɔ ì nya iri, amma nsɛi awa à kua woodaɛ ŋa nɔ à baa à jɛ ilu taale ŋa.

¹⁶ Lafɛ̃ɛ, teese i nyisi wa jiida ku jɛɛ ŋau má. Jɔ̀ idɔɔkɔ̃ nla nlaɛ si gãmɛi Zeruzalɛmu iluɛ iyi í jɛ iri kuta kumáɛu ku sũ. Na dulum du wa ŋa do ti bala nwa ŋau, ilɛ ŋa iyi à kaako wa ŋau à waa bu Zeruzalɛmu do inɛɛ ŋa.

¹⁷ Na nŋu nsɛi Ilaaɔ̃ Lafɛ̃ɛ nwa, gbɔ kutɔɔm do mii ŋa iyi ǹ wa n tɔɔɛ ntɔ ntɔ amu woo ce icɛɛ. Na saabui irii awɔ takaɛ, cɔ ile kumáɛ iyi wa ce asɔɔu do jiida ku jɛ.

¹⁸ Ilaaɔ̃ Lafɛ̃ɛm, sotĩ nɔ i gbɔ. Cĩ ijuɛ ŋa nɔ i cɔ inya nwa ŋa iyi à lɛgɛ ŋau, do ilu iyi í jɛ titɛɛu. Ntɔ ntɔ, kù jɛ si na iyi í jɔ̀ mii iyi à ce í jɛ dee deei í jɔ̀ à waa tɔɔɛ. À waa tɔɔɛi na araare nla nlaɛ.

¹⁹ Lafɛ̃ɛ, gbɔ, Lafɛ̃ɛ, ce suuru. Lafɛ̃ɛ, sotĩ i gbɔ. Ce ngɔgɔ nɔ i maà jɔ̀ ku kpɛ na irii awɔ takaɛ. Ntɔ ntɔ, iluu ihɛ̃ do zamaaɛ fei, awɔi ì nɔɔ.

Walii si gãmɛi waati kitaò fɛɛwa ŋa

²⁰ Ŋɔi ǹ mɔsi do kutɔɔ ku ce, nɔ ǹ wa n ce tuubai dulum dom ŋa do ti inɛi Izirɛli zamaam ŋau, nɔ ǹ wa n tɔɔ Aɔ̃ Lafɛ̃ɛm nii ntɔ ntɔ na iri kuta kumáu.

²¹ Waati iyi ǹ wa n ce kutɔɔu, amaleka Gabiɛli iyi ǹ tako ǹ yɛ si kuyɛm nɔu í fo í sɛkɛɛ sim wa anu akã si waati iyi à waa ce kuwee iyi í jɛ ti alɛu.

²² Ŋɔi í bam ide ku fɔ í sɔ̃m í ni, Daniɛli, bɛbɛi ǹ naai ku ba n máɛ inya si lasabuɛ.

²³ Waati iyi ì sinti kutɔɔ ku ce, ide ku fɔ gɔ í naa hai bi Ilaaɔ̃. Na ŋɔi í jɔ̀ ǹ naa ku ba i gbɔ yaaseɛ, domi ntɔ ntɔ Ilaaɔ̃ í biɛ. Gbɔ yaasei ide iyi an sɔ̃ɛ ku ba i gbɔ yaasei mii iyi ì yɛu.

²⁴ Adɔ̃ kitaò fɛɛwa ikɔ mɛɛjei à daa zamaaɛ do ilu kumáɛu ku ba a kpa irii wooda ku kua do dulum ŋau. Aa kpa kurara mɔi nɔ a naaò dee dee ku jɛ wa hee do ajɔ fei ku ba kuyɛ do idei walii ŋau a kɔ̃, nɔ a nya ile iyi í re do kumáu ikã.

²⁵ Na nŋu, iyi ì nɛ i mà nɔ i gbɔ yaaseɛ wee. Ajɔ nŋu ì gbɔ laabaau gɔ iyi wa fɔ idei kubaai aru ŋa do idei Zeruzalɛmu ku teese ku ma. To, hai waati bɛɛbɛ hee ku naa si inɛ ngbo iyi Ilaaɔ̃ í cicau, adɔ̃ mɛɛje ikɔ mɛɛje mbɛ. Si adɔ̃ mɛɛje ikɔ kita do minjii aa teese a ma iluu do bindi ku nɛ gbugbã ŋau, amma waatiu á jɛ waati kugaabu ŋa.

²⁶ Si anyii adɔ̃ mɛɛje ikɔ kita do minjiu, aa kpa inɛ gɔ iyi à nya ikã, nɔ inɛ gɔ kaa kɔòɛ. Inɛ ngbo gɔ mɔ á na ku naa do soogeɛ ŋa ku ce nfei iluu do ile kumáu. Idɔɔkɔ̃i Ilaaɔ̃ de á na ku naa si inɛ ngbou ku ce nfeɛ. Amma á maa ce igũi hee ku maa ku, nɔ á ce nfei mii ŋai bɛi à tako à fɔ à jilɔɔu.

²⁷ Si waatii ankãanyii adɔ̃ mɛɛjeu, á dĩ akabuu do inɛ nkpɔ nkpɔ. Nɔ si anyii adɔ̃ mɛɛta do bubu, á jɔ̀ a leekĩ kuwee do amua ŋa ku ceu. Woo ce laalɔu, á ce laalɔ sãmiɛ ŋai anu akã hee nŋu takaɛ koo kpaò iri si bɛi à fɔ à jilɔɔ.