Daniɛli 8 - Bibeli do fee

Kuyɛ minjisia - angudã kombo do iwo kombo

¹ Si adɔ̃ mɛɛtasiai bomma ku jɛi ilaalu Bɛlisasaa, amu Daniɛli ǹ ce kuyɛ gɔ si anyii iyi ǹ tako ǹ yɛu.

² Si kuyɛu, mii iyi ǹ yɛ wee. Ǹ yɔɔ iyi ǹ wa Suze ilu nlai ku kpɛ̃i ilɛi Elamu iyi í wa itĩi ido gɔ iyi à ya kpe Ulai.

³ Waati iyi ǹ wa n cɔ ilu, ǹ yɛ angudã kombo gɔ wa leekĩ itĩi idou. Angudãu í nɛ ngo nla nla minji. Amma iyi í na í fita do ankãanyiui í la í re inɛ ihɔ̃u.

⁴ Ŋɔi ǹ yɛ angudãu wa cã ngoɛ ŋa do ikpa nunui alɛ, nɔ wa cã ngoɛ ŋau má do ikpa awɔ njɛi kpãai inunu, si anyiɛ, nɔ wa cã ngoɛ ŋau má do ikpa awɔ cangai kpãai inunu. Mɛɛmu kãma kaa jɛ ku kɔ̀ ide si wajuɛ, nɔ inɛ kãma kaa yɔkɔ ku faaba inɛ gɔ hai si awɔ gbugbãɛ. Mii iyi í bii í ya ce, nɔ gbugbãɛ í la wa kɔ̃ɔsi.

⁵ Waati iyi ǹ wasi ku lasabu si mii iyi ǹ wa n yɛu, iwo kombo gɔ í faata wa hai ikpa nunui alɛ. Iwo kombou í koo í dabii si ilɛu fei, nɔ kù yɛ kɔɔɛ. Ngo iyi iwo kombou í nɛ si afei ijuɛ ŋa í to njo.

⁶ Ŋɔi í nɛ wa bɔ bi angudã kombo iyi í nɛ ngo minji iyi ǹ yɛ wa leekĩ kɔkɔi itĩi idou. Í sɛi wa koo siɛi do gbugbã nla nlaɛ.

⁷ Iyi ǹ wa n cɔɔ, ǹ ba wee í nɛ í bɔ kɔkɔi angudã kombou nɔ idɔɛ í kɔ̃ siɛ. Ŋɔi í cã angudã kombou í cɛ ngo minjiɛ ŋau, angudãu kù yɔkɔ kù kɔ̀ ide kãma si wajuɛ. Ŋɔi í cãa í nyɔɔ ilɛ bɛ í jojo siɛ, nɔ inɛ kãma kù yɔkɔ kù faaba angudã kombou.

⁸ Iwo kombou í na í la ntɔ ntɔ, amma waati iyi í na í nɛ gbugbã bɛɛbɛ, ngoɛ í cɛ. Ŋɔi ngo ku nɛ gbugbã mɛɛ gɔ ŋa à fita si agbɛɛ à waa cɔ hai do ikpa bii fufui gonta mɛɛi lele ŋau à waa naa.

⁹ Hai si akã nŋai ngo keeke gɔ í fita wa, nɔ í la wa koo do ikpa awɔ cangai kpãai inunu, nɔ wa bɔ ikpa nunui daakɔ, nɔ í nyi wa nɛ ikpa ilɛ iyi í sĩa í reu má.

¹⁰ Nɔ í dedeò ide ku kɔ̀ si gãmɛi inɛi lelei Aɔ̃ ŋau. Í cã inɛ gɔ ŋa í nyɔ ŋa wa ilɛ do leleaɔ̃ gɔ ŋa, nɔ í tɛɛsɛ ŋa bugu bugu.

¹¹ Ngou bɛi í ya baò baa inɛ ngboi inɛ ŋa iyi à wa lelei Aɔ̃ ŋau ija. Í ya ganji kuwee iyi à nɛ a ya ceaa ajɔ feiu, nɔ í ya riisi ile kumáɛu.

¹² Do kuce laalɔɛ ŋau, í ya jɔ̀ kuweei ajɔ feiu ku bɛjɛi do gbugbãɛ iyi í nɛ. Nɔ do yaase bɛɛbɛi í ya kɛkɛò inɛi lele ŋau mɔ. Í ya jɔ̀ naanɛ iyi í jɛ ntɔ ku ce nfei, nɔ mii iyi í bi ku ce fei, í ya cooi.

¹³ Ŋɔi ǹ gbɔ amaleka gɔ wa fɔ ide, nɔ amaleka mmuɛ gɔ wa ba inɛ iyi wa fɔ ideu ide ku fɔ wa ni, idei kuweei ajɔ fei iyi kuyɛu ihɛ̃ wa sɔ̃ wau bɛ, hee waati yoomai á kpɛ ku to ya. Aa na a leekĩɛ mbɛ? Kuce laalɔ ŋa iyi wa ce nfei mii feiu ihɛ̃, hee waati yoomai á koo leekĩ. Hee waati yoomai wahalai ile kumáu do ijuukpãi inɛi lelei Aɔ̃ ŋau á leekĩ.

¹⁴ Ŋɔi amaleka sinteu í jɛaa í ni, í gbe hee bii alɛ do daakɔ dubu minji do cĩɔ mɛɛta í lɔ titã (2.300), si anyiɛ a bɛi a lɔsi ile kumáu ku loo má.

Kutusɛi kuyɛ minjisiau

¹⁵ Si waati iyi amu Daniɛli ǹ wa n cɔ kuyɛu nɔ ǹ wa n dɛdɛ n gbɔ yaaseɛ, waati bɛɛbɛi inɛ gɔ iyi í yɛ bɛi inɛmɔkɔ kaasãanɛ gɔ í faata wa í naa í leekĩ si wajum.

¹⁶ Ŋɔi ǹ wa n gbɔ imui amanɛ gɔ wa hai si aninii idoi Ulaiu wa ni, Gabiɛli, tusɛaa inɛ bɛ yaasei kuyɛu.

¹⁷ Ŋɔi í naa kɔkɔi tengi bii ǹ wau. Waati iyi wa naa, zigim í dai ntɔ ntɔ nɔ ǹ sɛɛbata si wajuɛ. Ŋɔi í sɔ̃m í ni, awɔ amanɛ, gbɔ yaasei kuyɛu ihɛ̃. Kuyɛu ihɛ̃, idei waatii iri ku kpai andunyai wa fãa.

¹⁸ Si waati iyi Gabiɛli wa bam ideu ku fɔ, ǹ wa n sɛɛbata bɛ n kù mà mii iyi wa ce má. Ŋɔi í lum nɔ í dedem í leekĩm tengi bii ǹ wau.

¹⁹ Nɔ í sɔ̃m í ni, an jɔ̀ i mà mii iyi á na ku ce si waati iyi idɔɔkɔ̃u á to kɔɔ, domi waatii iri ku kpa í wɛɛ iyi à jilɛ.

²⁰ Angudã kombo iyi ì yɛ í nɛ ngo minjiu bɛ, ilaalui Mɛɛdi do ti Pɛɛsi mbɛ.

²¹ Iwo kombo ku nɛ ntou bɛ mɔ, ilaalui Gɛrɛsi mbɛ. Ngo nla nla iyi í wa si afei ijuɛu mɔ, ilaalu sinteu mbɛ.

²² Mɛɛ ŋa iyi à fita si agbɛi iyi í cɛu bɛ mɔ, bomma mɛɛ gɔ ŋai iyi aa na a dede hai si bommau bɛ, amma gbugbã nŋa kaa too.

²³ Si iri ku kpai bomma ŋau bɛ, waati iyi dulum dii ilu dulum ŋau á kɔ̃, waati bɛɛbɛi ilaalu ilu faau gɔ iyi á mà inɛ ŋa ku zamba, á faata wa.

²⁴ Gbugbãɛ á la ku maa kooi, amma kaa jɛ hai si nŋu takaɛi gbugbãu wa naa. Á ce nfei mii ŋai do gbugbã nla nla. Mii iyi í dasi idɔ nŋu ku ce fei, á cooi. Á kpa ilu gbugbã ŋa, nɔ bɛɛbɛ mɔi á kpa inɛi Ilaaɔ̃ ŋau mɔ.

²⁵ Do saabui bisiɛi á ya ba ku zambaò inɛ ŋa. Faaui á waa si idɔ, nɔ si waati iyi laakai ku sũ í wɛɛ ntɔ ntɔ, waati bɛɛbɛi á ce nfei zamaa nkpɔ nkpɔ. Á dedeò ija si gãmɛi ilaalui ilaalu ŋa. Amma ilaalui ilaalu ŋau á lɛgɛɛi, nɔ kaa jɛ do sobii inɛ kãma.

²⁶ Ntɔ ntɔ, iyi í jɛ yaasei mii iyi ì yɛ mbɛ si gãmɛi alɛ ŋa do daakɔ ŋau. Amma, maà fɔ idei kuyɛu ihɛ̃ nsɛi titã, domi ide ŋa iyi kuyɛu wa fãa, á kpɛ ku bɛi ku ce.

²⁷ Ŋɔi amu Daniɛli, ǹ kua gbugbã ajɔ nkpɔ nkpɔ nɔ ǹ ce bɔ̃ɔ. Si anyiɛ, nɔ ǹ dede ǹ wa n cea ilaalu wũaɛ ŋa. Ǹ cukui hee ilɛ na kuyɛu, domi n kù gbɔ yaaseɛ.