Daniɛli 7 - Bibeli do fee

Kuyɛ sinte iyi Daniɛli í ce - mɛɛmu mɛɛ ŋa

¹ Si adɔ̃ sintei bommai ku jɛi Bɛlisasaa ilaalui Babilɔni, Daniɛli í ce ala nɔ í yɛ mii nkpɔ nkpɔ. Wa sũi si daayiɛ í bɛi í ce kuyɛu. Si anyiɛ í bɛi í kɔ ala iyi í ceu. Ideu wee.

² Daniɛli í ni, si kuyɛ iyi ǹ ce idũu, ǹ yɛ fufu wa naa hai bii fei wa yaga tenku nlau.

³ Ŋɔi mɛɛmu nla mɛɛ gɔ ŋa à fita wa hai si inɔ tenkuu, nɔ kãma nŋa kù jɔ kpaasi.

⁴ Sinteu í yɛi bɛi muusu nla nɔ í nɛ ikpa ŋa bɛi ti kungbã. Ŋɔi ǹ wa n cɔɔ, nɔ ǹ ba wee à nya ikpaɛ ŋau. Nɔ à wuu hai ilɛ à leekĩɛ si kutɛɛ ŋa bɛi amanɛ, nɔ à daa si lasabui amanɛ.

⁵ Si anyii nŋu, nɔ ǹ yɛ mɛɛmu minjisiau mɔ. Inɛ nŋu í jɔ mɛɛmu kugaabu gɔ iyi í yɛ bɛi mbo, nɔ í dede í leekĩ si cingaa akã, nɔ wa mu kũkũi kpakpaa cingaa mɛɛta si gɛlɛɛ si afei inyíɛ ŋa, nɔ à sɔ̃ɔ à waa ni, dede i ŋɔ iŋa nkpɔ nkpɔ.

⁶ Si anyii nŋu, ǹ yɛ mmuɛ gɔ má iyi í yɛ bɛi muãa, nɔ nŋu mɔ í nɛ ikpai yɛi mɛɛ si anyiɛ. Mɛɛmuu í nɛ iri mɛɛ nɔ í ba gbugbã iyi á kãmia andunyau.

⁷ Si anyiɛ, si kuyɛ ŋa iyi ǹ ce idũu, ǹ yɛ mɛɛmu mɛɛsia kugaabu gɔ iyi á mu inɛ njo, nɔ gbugbãɛ í ce dimi ikã ntɔ ntɔ. Inyíɛ ŋa do isɔi à coo nla nla. Í ya ŋɔ inɛi nɔ ku ga mii iyi í ba fei. Mii iyi kù waa ŋɔ, í ya tɛɛsɛɛi do kutɛɛ ŋa kú lɛgɛɛ. Inɛ nŋu í nya ikã do mɛɛmu sinte mɛɛta ŋau, nɔ í nɛ ngo mɛɛwa.

⁸ Ŋɔi ǹ wa n cɔ ngo ŋau, nɔ ǹ ba wee gɔgɔ iyi í kere í re ŋa í fita wa má, nɔ ngo mɛɛta sinte ŋa iyi à wa bɛ ŋau à tu. Nɔ ngou í nɛ iju ŋa bɛi amanɛ, nɔ í nɛ gɛlɛ iyi wa fɔò idei faau ŋa.

Kiitii Ilaaɔ̃

⁹ Ŋɔi ǹ kɔ̀ ǹ wa n mɔsi do ilu ku cɔm nɔu, nɔ ǹ ba wee à jilɛ kitã ŋa iyi à jɛ ti bommau, nɔ mɔkɔ ngbo gɔ í buba si. Mɔkɔ iyi í buba si kitãu, ibɔɛ í fũutai pai pai bɛi iwu, nɔ ntoi iriɛ mɔ í fũutai bɛi ikũ ku ce acɔ. Kitãi bommaɛ iyi wa daanau, í nɛ kutɛ ŋa iyi à waa daana bɛi amɛi ina.

¹⁰ Ina iyi í yɛ bɛi inyii ido, í faata wa nɔ wa cã si wajui mɔkɔ ngbou. Amanɛ dubu nkpɔ nkpɔi wa ceaa icɛ. Amanɛ dubu mɛɛwa ikɔ dubu mɛɛwai wa leekĩ si wajuɛ. Inɛ ngbo woo kiiti ŋa à waa buba bɛ, nɔ à cĩ tia ŋa.

¹¹ Ŋɔi ǹ kɔ̀ ǹ mɔsi n wa n cɔ ngo keekeu na idei faau ŋa iyi í wasi ku fɔu. Amma si kucɔm nɔu ǹ na ǹ ba wee à kpa mɛɛmuu, nɔ à soo à dasi ina í jo.

¹² Nɔ gbugbãi mɛɛmu iyi ihɔ̃ ŋau mɔ í kpa iri, amma do nŋu fei aa yɔkɔ a maa wɛɛ si hunde hee koo toò waati iyi à jɔ̀ nŋau.

¹³ Si kuyɛm ŋa iyi ǹ ce idũu, ǹ ba wee si kudũi ijĩ wa hai lelei Aɔ̃ inɛ gɔ iyi í jɔ amanɛ í nɛ wa naa bi mɔkɔ ngbou, nɔ à gbã à naaɛ wa bi tɛɛ.

¹⁴ Inɛ iyi à naaò wau, à naa gbugbã do bɛɛrɛ do yiikoi ilaalu. Nɔ zamaa fei do dimi fei do fee fei à lɔsi icɛ ku ceaa. Gbugbãɛ á maa wɛɛi hee do ajɔ fei, kaa nɛ kɔɔ, nɔ bommaɛ kaa cuku pai.

Kutusɛi ala sinteu

¹⁵ Ŋɔi amu Daniɛli, ideu í mum biti hee si lɛlɛi idɔm ntɔ ntɔ. Mii iyi ǹ yɛu, í mum njo ntɔ ntɔ.

¹⁶ Ŋɔi ǹ bɔ kɔkɔi inɛ akãi inɛ ŋa iyi à wa bɛ, nɔ ǹ beeɛ iyi í jɛ yaase ntɔ ntɔi mii iyi ǹ yɛu bɛ. Ŋɔi í sɔ̃m, nɔ í tusɛɛm yaaseɛ.

¹⁷ Í ni, mɛɛmu nla mɛɛ ŋau bɛ, ilaalu mɛɛ mbɛ iyi aa na a naa si ilɛ.

¹⁸ Amma si anyi nŋa, inɛ ŋa iyi à jɛ ti Aɔ̃ Lafɛ̃ɛi leleu, aŋai aa gba bommau. Bommau, tu ŋai á jɛ hee do ajɔ fei.

¹⁹ Si anyiɛ, ŋɔi ǹ bi n mà yaasei mɛɛmu mɛɛsia iyi í nya ikã do iyi ihɔ̃ ŋau dee dee. Inɛ nŋu mɛɛmu kugaabu gɔi ntɔ ntɔ. Inyíi isɔ ŋai í nɛ, nɔ isɔ nkpai í jɛ cikãasɛɛ ŋa. Í ya ŋɔ mii iyi í bai nɔ ku gaa. Mii iyi kù waa ŋɔ, í ya tɛɛsɛɛi do kutɛɛ ŋa kú lɛgɛɛ.

²⁰ Nɔ ǹ bee inɛɛu iyi í jɛ yaasei ngo mɛɛwa ŋa iyi mɛɛmuu í nɛ si iriɛu mɔ. Nɔ ǹ beeɛ iyi í jɛ yaasei ngo keeke iyi í na í fitau má nɔ í jɔ̀ mɛɛta gɔ ŋa à nya à cukuu. Inɛ nŋu í nɛ iju nɔ í nɛ gɛlɛ iyi í wasi ku fɔò idei faau, nɔ í jɔ bɛi inɛ nŋu í nɛ gbugbã í re iyi ihɔ̃ ŋau.

²¹ Ŋɔi ǹ wa n cɔ ngou, nɔ ǹ ba wee wa ba inɛi Ilaaɔ̃ ŋau igũ ku ce hee wa bi ku kãmia ŋa.

²² Amma mɔkɔ ngbou njɛi í naa í nyaa inɛi Ilaaɔ̃ ŋau asaiya hee í koo í to waati iyi inɛi Ilaaɔ̃ ŋau à ba bommau.

²³ Ŋɔi inɛɛu í sɔ̃m í ni, mɛɛmu mɛɛsiau bɛ, bomma mɛɛsia iyi á naa si ilɛ mbɛ, nɔ inɛ nŋu á nya ikãi do bomma mmu ŋa iyi à gbe si ilɛ ihɛ̃ fei. Bomma inɛ nŋu, mii iyi í wa si andunyau fei, á jɔɔi. Á tɛɛsɛ mii feii ku lɛgɛ ŋa do kutɛɛ, nɔ ku ga ŋa.

²⁴ Ngo mɛɛwa ŋau bɛ, ilaalu mɛɛwa mbɛ. Aŋai aa na a jɛ ilaalu akã akã si bommau. Ilaalu maatakãsia gɔ á na ku naa. Inɛ nŋu á nya ikã do inɛ ihɔ̃ ŋau. Nŋui á na ku gba bommau, nɔ ku kɛkɛ ilaalu mɛɛta iyi ihɔ̃ ŋau.

²⁵ Inɛ nŋui á na ku maa fɔaa Ilaaɔ̃ iyi í wa leleu ide sãmi ŋa, nɔ ku jɔ̀ inɛ ŋa iyi à jɛ inɛɛ ŋau a ba wahala. Á nɛ lasabui nŋu ku kpaasi waati ŋa do wooda ŋa, nɔ a so inɛi Ilaaɔ̃ ŋau a daa si awɔ zakai adɔ̃ mɛɛta do bubu.

²⁶ Si anyii nŋu, kiiti á to wa, nɔ waati bɛɛbɛi aa gba gbugbãi bommau siɛ hee do ajɔ fei.

²⁷ Waati bɛɛbɛ, hai bommau do gbugbãɛ do kulai bomma ŋa iyi à wa si andunyau fei, ti inɛi Ilaaɔ̃ ŋaui á jɛ. Bommau á maa wɛɛi hee do ajɔ fei, nɔ ilu gbugbã ŋau fei aa gbɔ ideɛi nɔ a maa cea icɛ.

²⁸ Kɔɔi ideui ihɛ̃ bɛ. Amu Daniɛli ideu í mum njo ntɔ ntɔ hee do si lasabum ŋa fei. Ideu í jɔ̀ wajum fei í baa í kpaasi, nɔ ǹ wasi ku lasabu si fei ndɛɛ si idɔm.