Daniɛli 6 - Bibeli do fee

¹ Ŋɔi Dariusi inɛi Mɛɛdiu í ba bommau si adɔ̃ kita do minjisiaɛ.

Mbɛɛi Daniɛli ŋa à lea cɛkũm

² Dariusi í yɔɔ iyi si bommau, á sĩa a ce ikpɛ̃i ilɛu ikɔ cĩɔ do kɔnfia nɔ a jilɛ akawe ŋa si aŋa fei.

³ Nɔ í jilɛ nŋa inɛ ngbo mɛɛta. Daniɛli í wa si inɔi inɛ ngbo mɛɛta ŋau, nɔ nŋui aa ya na a sisia yaase bɛi wũai ilɛu fei wa nɛ ku ba inɛ kãma ku maà kɔ̀ ku sã iyi í nɛ ku jɛ ti ilaaluu.

⁴ Daniɛli takaɛ í re inɛ ngbo minji iyi ihɔ̃ ŋau do akawei kukpɛ̃i ilɛ ŋau, domi hunde iyi í wa siɛu í nya ikã, nɔ ilaaluu wa lasabu nŋu ku na ku jilɔɔ ku jɛ inɛ ngbo si ilɛu fei.

⁵ Ŋɔi inɛ ngbo minji iyi ihɔ̃ ŋau do akawei kukpɛ̃i ilɛ ŋau à dɛ bɛi aa ce a yɛ taalei Daniɛli si wũaai ilɛu ku ce. Amma a kù ba nkãma si bii aa yɛò taaleɛ. A kù ba kuraraɛ kãma iyi aa fɔ, domi kuceɛ í to ku jɔ̀ a naanɛɛ mam mam. I kaa yɛ atafii ku ce siɛ hee má jɛ kurara gɔ.

⁶ Ŋɔi inɛ ŋau à ni, a kaa ka ba nkãma si bii aa ka yɛò taalei Daniɛli, í gbe ka dɛdɛ baa ide akã gɔ si woodai Ilaaɔ̃ Lafɛ̃ɛɛi.

⁷ Ŋɔi inɛ ngbo minji ŋau do akawei kukpɛ̃i ilɛ ŋau à bɔ bi ilaaluu nɔ à sɔ̃ɔ à ni, ilaalu Dariusi, hunde sisɔ kú jɛ ti awɔ ilaalu hee do ajɔ fei.

⁸ Inɛ ngbo ŋa iyi à wa si bommai ilɛu, do akawe ŋa do ilu ilɛ ŋau à ce kutɔtɔɔ. Si kutɔtɔɔ nŋau, ikɔ iyi à waa bi a naɛ wee. À yɔɔi iyi zakai ajɔ kuntaa, ì nɛ i jilɛ woodai iyi á ganji inɛ gɔ ku tɔɔ inɛ mmu gɔ walakɔ iwɛ̃ gɔ bii kù jɛ awɔ. Nɔ si afei ajɔ kuntaau bɛ, inɛ baa yooma iyi wa ce kutɔɔ do irii iwɛ̃ gɔ, walakɔ do irii inɛ mmu gɔ, bii kù jɛ do irii awɔ ilaalu, a so lafɛ̃ɛ a sɔsiɛ si inɔ isa bii muusu nla ŋa à wau.

⁹ Bɛbɛi ilaalu, jilɛ woodau nɔ i dasi nyindaɛ ku ba ku jɛ ti inɛi Mɛɛdi ŋa do ti inɛi Pɛɛsi ŋa iyi ci ya nɛ inɛ gɔ ku kpaasi ngɔgɔu.

¹⁰ Ŋɔi ilaalu Dariusi í jilɛ woodau, nɔ í dasi nyindaɛu.

À dasi Daniɛli si inɔ isai muusu nla ŋau

¹¹ Waati iyi Daniɛli í gbɔ iyi à jilɛ wooda dimi bɛɛbɛ hee ilaalu í dasi nyindaɛ, ŋɔi í dede í bɔ kpasɛ̃ í koo í lɔ ilaawaɛ si antaii ile kukpɛkɛ. Ileu í nɛ fɛrɛnti ŋa, nɔ fɛrɛnti ŋau fei wa cĩi nɔ à waa cɔ ikpa ilui Zeruzalɛmu. Ŋɔi í gulɛ wa ce kutɔɔ nɔ wa saabu Ilaaɔ̃ Lafɛ̃ɛɛ si bɛi í tako í nɛ dɔ̃ɔnɛi ku ceɛ ajɔ akã fei fii mɛɛtau.

¹² Ŋɔi gbakã mbɛɛ ŋau à kanju wa nɔ à naa à ba Daniɛli í wasi ku ce kutɔɔ wa kpe Ilaaɔ̃ Lafɛ̃ɛɛ.

¹³ Ŋɔi à koo à ba ilaaluu nɔ à beeɛ à ni, n jɔ ì jilɛ wooda gɔ nɔ ì dasi nyindaɛ ì ni si afei ajɔ kuntaau ihɛ̃, inɛ baa yooma iyi í tɔɔ iwɛ̃ gɔ, walakɔ inɛ mmu gɔ, bii kù jɛ awɔ ilaalu, aa so lafɛ̃ɛi a sɔsi inɔ isa bii muusu nla ŋau à wa mɛɛ. Ŋɔi ilaaluu í jɛ í ni, kãm kãm bɛɛbɛi, nɔ woodau ti inɛi Mɛɛdi ŋai do ti inɛi Pɛɛsi ŋa iyi ci ya nɛ inɛ gɔ ku kpaasi ngɔgɔ.

¹⁴ Nɔ à so ide má si wajui ilaaluu à ni, Daniɛli inɛ akãi inɛ ŋa iyi à mu wa hai ilɛi Zudaau kù saaluɛ hee má jɛ ku saalu wooda iyi ì jilɛ nɔ ì dasi nyindaɛu. Í ya maa ce kutɔɔɛi, ajɔ akã fei fii mɛɛta.

¹⁵ Iyi ilaaluu í gbɔ ideu bɛɛbɛ, inɔɛ í fɔ ntɔ ntɔ. Ŋɔi í dasi idɔ nŋu ku faaba Daniɛli, nɔ í wasi kookaaiɛ ku ce hee alɛ í koo í lɛò.

¹⁶ Ŋɔi mbɛɛi Daniɛli ŋau à kanju à nyi bi ilaaluu má nɔ à sɔ̃ɔ à ni, ilaalu, í jɔ ì mà iyi woodai inɛi Mɛɛdi ŋa do ti inɛi Pɛɛsi ŋau í ni, wooda iyi à jilɛ do ide iyi ilaalu takaɛ í jilɛ nɔ í dasi nyindaɛ, kù nɛ ku kpaasi ya.

¹⁷ Ŋɔi ilaaluu í na wooda í ni a naaò Daniɛli wa nɔ a sɔsiɛ si inɔ isa bii muusu nla ŋau à wa. Si anyiɛ nɔ í sɔ̃ Daniɛli í ni, Daniɛli, Ilaaɔ̃ Lafɛ̃ɛɛ iyi ì waa tɔɔ dee deeu, ku faabaɛ.

¹⁸ Ŋɔi à koo à so kuta nla nla gɔ wa à naa à cĩmboò andɛi isau. Nɔ ilaaluu í dasi nyindai nŋu takaɛ do ti akawe nlaɛ ŋau. Do yaase bɛɛbɛ, inɛ kãma kaa yɔkɔ ku kpaasi ngɔgɔ si gãmɛi mii iyi í nɛ ku ba Daniɛli.

¹⁹ Si anyii nŋu, nɔ ilaaluu í sinda í nyi kabaɛ. Idũ ajɔ nŋu, kù jɛ nkãma nɔ kù jɔ̀ abo mmu ŋa iyi í nɛu kãma nŋa kú naa bi tɛɛ, nɔ kù sĩ njoo.

Daniɛli í fita baani hai si inɔ isa bii muusu nla ŋa à wau

²⁰ Hai amɛɛjuumá daadaakɔ gbakã, ilaalu í dede. Nɔ wa ce saasa ku ba ku bɔ bi isa bii muusu nla ŋa à wau.

²¹ Waati iyi wa maai si anui isau, ŋɔi í wasi Daniɛli ku kpe do imui inɔ kufɔ. Nɔ í bee Daniɛli í ni, Daniɛli woo ce icɛi Ilaaɔ̃ ilu hunde, Ilaaɔ̃ Lafɛ̃ɛɛ iyi ì waa cea icɛ do himmau, í yɔkɔ í faabaɛ hai si gɛlɛi muusu nla ŋau?

²² Ŋɔi Daniɛli í jɛa ilaaluu í ni, hunde sisɔ kú jɛ ti awɔ ilaalu hee do ajɔ fei.

²³ Ilaaɔ̃ Lafɛ̃ɛm í bɛ amalekaɛ wa í na í cĩmbo gɛlɛi muusu nla ŋau. Muusu nla ŋau a kù ceem laalɔ kãma, si na iyi í jɔ̀ n kù nɛ taale kãma si wajui Ilaaɔ̃, nɔ n kù nɛ taale kãma si wajui awɔ takaɛ mɔ.

²⁴ Ŋɔi do inɔ didɔ̃ nla nla, ilaalu í na wooda í ni a nya Daniɛli wa hai si inɔ isau. Ŋɔi à nya Daniɛli wa hai si inɔ isau, nɔ nkãma kù coo si na iyi í jɔ̀ í dasi naanɛɛ si Ilaaɔ̃ Lafɛ̃ɛɛ.

²⁵ Ŋɔi ilaalu í na wooda í ni a gbã inɛ ŋa iyi à yɛ taalei Daniɛli ŋau a naaò ŋa wa nɔ a sɔsi ŋa si inɔ isa bii muusu nla ŋau à wau, aŋa do ama nŋa ŋa do abo nŋa ŋa. [Waati iyi à so inɛ ŋau à waa dasi ŋa,] hai a kù to baa inɔ isau mɔm nii muusu nla ŋau à zoo si ŋa wa nɔ à lɛgɛ kũkũ nŋa ŋa fei.

²⁶ Si anyiɛ, ilaalu Dariusi í kɔa zamaau fei, do dimi fei, do fee ŋa iyi à wa si andunyau fei. Nɔ í ni, laakai ku sũ nla nla ku wɛɛ do iŋɛ.

²⁷ Si anyii nŋu, nɔ Dariusi í ni má, wooda iyi ǹ wa n jilɛ wee. Si bommam nɔu, inɛ fei í nɛ ku mà bɛɛrɛi Ilaaɔ̃ Lafɛ̃ɛi Daniɛlii nɔ ku ya maa jirimaɛ, domi nŋui í jɛ Ilaaɔ̃ iyi í wɛɛ nɔ á maa wɛɛi hee do ajɔ fei. A kaa ce nfei bommaɛ ajɔ kãma, nɔ gbugbãɛu á maa wɛɛi kaa nɛ kɔɔ.

²⁸ Nŋui í ya nya inɛ, nɔ nŋui í ya faabaɛ. Nŋui í ya ce nyinda ŋa do maamaake ŋa ikpa lelei Aɔ̃ do si ilɛ. Nŋui í nya Daniɛli hai si gbugbãi muusu nla ŋau.

²⁹ Hee do ankãanyi, Daniɛliu í na í ba inya nla nla si bommai Dariusi do si bommai Sirusi ilaalui Pɛɛsiu.