Daniɛli 5 - Bibeli do fee

Jingaui ilaalu Bɛlisasaa

¹ Ajɔ nŋu gɔ, ilaalu Bɛlisasaa í nya jingau nla nla ti akawe nlaɛ ŋa. Akawe ŋau à wɛɛi aŋa dubu. Ŋɔi si wajui inɛ dubu ŋau, í lɔsi atɛ̃ vɛ̃ɛ ku mɔ.

² Waati iyi atɛ̃u í na í lɔ siɛ, ŋɔi í na wooda í ni a naaò kɔɔfu ŋa iyi à ce do wura ŋau wa do iyi à ce do isɔ fũfũ ŋa iyi Nebukanɛsaa baaɛ í so wa hai Zeruzalɛmu hai inɔ kpasɛ̃i Ilaaɔ̃u. Í ni a so ŋa wai ku ba nŋu do akawe nlaɛ ŋau do aboɛ ŋa do aboɛ mmuɛ gɔ ŋa má a mɔò atɛ̃.

³ Ŋɔi à fitaò kɔɔfu ŋa iyi à so wa hai Zeruzalɛmu hai si kpasɛ̃i Ilaaɔ̃u wa, nɔ ilaaluu do akawe nlaɛ ŋau do aboɛ ŋa do aboɛ mmuɛ gɔ ŋa má à mɔò atɛ̃.

⁴ Ŋɔi à mɔ atɛ̃ vɛ̃ɛu, nɔ à wasi ku saabu iwɛ̃ ŋa iyi à ce do wura ŋau do iyi à ce do isɔ fũfũ ŋau do ti isɔ nkpa ŋau do isɔ alala ŋau do iyi à ce do jĩi ŋa do ti kuta ŋau.

⁵ Waati bɛɛbɛ, ŋɔi awɔi amanɛ í faata si ŋa wa. Awɔ iyi í faata wau, amaawɔɛ ŋau à wasi ku kɔ si tengii bi ku lesi fitila ŋau, do si idĩ fũfũi kabai bommau. Ŋɔi ilaaluu í yɛ awɔ iyi wa kɔu.

⁶ Nɔ gbakã wajuɛ í kpaasi, nɔ zigiida í jɔ̀ lasabuɛ ŋa í fɔtɔtɔ. Ikɔ̃i bũuɛ ŋa mɔ à sesi, nɔ ilugũɛ ŋa mɔ à waa cã si njɛ.

⁷ Ŋɔi í dɔ̃ anu do gbugbã, nɔ í na wooda í ni a kpea nŋu woo ce dobu dobu ŋau wa do inɛi Kaladee ŋau do woo mà yaasei leleaɔ̃ ŋau. [Waati iyi woo mà ŋau à to wa,] nɔ í sɔ̃ ŋa í ni, inɛ baa yooma iyi í yɔkɔ í cio kukɔu ihɛ̃, nɔ í tusɛɛm yaaseɛ, ibɔ kusĩa ŋai an daa si, nɔ n daa si sabai wura si kɔ̃ɔɛ, nɔ inya mɛɛtasia si bommau, titɛɛi á jɛ.

⁸ Ŋɔi woo mà ŋau fei à lɔ wa, amma a kù yɔkɔ a kù cio kukɔu hee má jɛ a tusɛɛa ilaaluu yaaseɛ.

⁹ Ŋɔi ideu í da zigii ilaalu Bɛlisasaa ntɔ ntɔ hee wajuɛ í kpaasi í kɔ̃ɔsi má, nɔ akawe nlaɛ ŋau fei à wɛɛò biti.

Daniɛli í tusɛ ide iyi à kɔ si idĩu

¹⁰ Iyei ilaaluu í gbɔ anu ku dɔ̃i amaɛ do ti akawe nlaɛ ŋau. Ŋɔi í lɔ wa ile bii à waa ce jingauu nɔ í ni, hunde sisɔ kú jɛ ti ilaalu hee do ajɔ fei. Maà jɔ̀ lasabuɛ ŋau ku da zigiɛ, nɔ i maà jɔ̀ wajuɛ ku kpaasi.

¹¹ Inɛ gɔ í wa si bommaɛ ihɛ̃ iyi í nɛ iwɛ̃ jiida ŋa. Waati iyi baaɛ í wɛɛ si hunde, bi lafɛ̃ɛi à ba inya kumá do kumà, do laakai iyi í jɛ dimi akã do ti iwɛ̃ jiida ŋa. Na ŋɔi í jɔ̀ baaɛ ilaalu Nebukanɛsaa í soo í jɛ inɛ ngboi woo ce alisi ŋa do woo ce dobu dobu ŋa do inɛi Kaladee ŋa do inɛ ŋa iyi à ya mà yaasei leleaɔ̃ ŋa.

¹² Daniɛliu, hunde iyi í nɛ, í nya ikã. Í mà mii fei ku kiiti nɔ í nɛ kumà. Í mà yaasei ala ŋa mɔ ku tusɛ, nɔ í ya gbɔ yaasei mii ŋa iyi à gaabu fei. Nɔ í ya ba iwɔi ide kugaabu ŋa fei. Daniɛli nŋu iyi baaɛ í sɔ Bɛlitasaau, jɔ̀ a kpoo ku naa wa. [Bii í to wa,] á sisiɛ mii iyi à kɔ si idĩu bɛ.

¹³ Ŋɔi à gbã Daniɛli à naaɛ wa si wajui ilaalu. Nɔ ilaaluu í bee Daniɛli í ni, awɔi ì jɛ Daniɛli inɛ akãi inɛ ŋa iyi ilaalu baam í mu wa hai ilɛi Zudaau?

¹⁴ Ǹ gbɔ à ni iwɛ̃ jiida gɔ ŋa à wa siɛ, nɔ bi titɛɛi à ya ba inya kumá ŋa do kumà do laakai iyi í wɛɛ dimi ikã.

¹⁵ Nsɛi wee ǹ jɔ̀ à naaò woo ce alisi ŋa wa ihɛ̃ do woo ce dobu dobu ŋa ku ba a ciom mii iyi à kɔ si idĩu ihɛ̃, nɔ a tusɛɛm ku ba n gbɔ yaaseɛ, amma a kù yɔkɔ a kù tusɛɛm yaasei ide ŋau.

¹⁶ Nɔ ǹ gbɔ à ni ì ya gbɔ yaasei mii ŋa iyi à gaabu fei nɔ ì ya ba iwɔi ide kugaabu ŋa mɔ fei. To, nsɛi bii í jɛ aa yɔkɔ i ciom kukɔu ihɛ̃ nɔ i tusɛɛm yaaseɛ, aa daɛ si ibɔ kusĩa ŋa, nɔ a daɛ si sabai wura si kɔ̃ɔ, nɔ si bommai ilɛu, inya mɛɛtasiau, titɛɛi á jɛ.

¹⁷ Ŋɔi Daniɛli í jɛa ilaaluu í ni, mu amua ŋau ndɛɛ, walakɔ i na inɛ mmu gɔ ŋa. Amu de an cioɛ kukɔu, nɔ n tusɛɛ yaaseɛ.

¹⁸ [Ŋɔi Daniɛli í sɔ̃ɔ í ni,] ilaalu, Ilaaɔ̃ iyi í wa hee leleu í jɔ̀ Nebukanɛsaa baaɛu í jɛ ilaalu nla nla. Í nɛ amboe nɔ í nɛ bɛɛrɛ nla nla.

¹⁹ Na saabui kula iyi í jɔ̀ í lau, inɛi andunya ŋa fei, do dimi fei, do fee ikã ikã fei à waa ce njoɛ, nɔ à ya maa yaya si wajuɛi. Inɛ iyi í bii í ya kpa, nɔ inɛ iyi í bi mɔi í ya jɔ̀. Inɛ iyi í bii í ya so lele, nɔ inɛ iyi í bii í ya kaye.

²⁰ Amma waati iyi í naa í dedeò faau nɔ í lele idɔɛ hee í baa í nɛ yaako ntɔ ntɔ si idɔɛu, à kɛkɛɛ hai si kitãi bommaɛu nɔ í kua bɛɛrɛɛu mɔ.

²¹ Waati bɛɛbɛi à leleɛ hai si inɔi amanɛ ŋa, nɔ lasabuɛ í baa í yɛ bɛi ti mɛɛmu ŋa, nɔ í na í koo í nɛ bi kuwaɛi si inɔi sɛnga ŋa. Fɔfɔi à ya naa ku maa ŋɔ bɛi kɛtɛ ŋa, nɔ araɛ í ya le ikpãi hee í koo í to waati iyi í mà iyi Ilaaɔ̃ iyi í wa leleui í jɛ inɛ ngboi bommai amanɛ ŋa, nɔ inɛ iyi í bii í ya jilɛ ku jɛ ilaalu.

²² Nɔ awɔ Bɛlisasaa amaɛ i kù jɛ ku kaye araɛ baa do iyi ì mà ide ŋau bɛ fei.

²³ Ì waa ce itĩ ku yikai si gãmɛi Ilaaɔ̃ Lafɛ̃ɛi leleu. Kɔɔfuɛ ŋa iyi à wa inɔ kpasɛ̃i awɔ takaɛu, ì jɔ̀ à koo à so ŋa wa, nɔ ì mɔò atɛ̃ vɛ̃ɛ awɔ do inɛ ngbo ŋa iyi à wa bi tɛɛ, do aboɛ ŋa do aboɛ mmuɛ gɔ ŋa má. Ì kɔ̃ iri ì saabu iwɛ̃ɛ ŋa iyi ì ce do isɔ fũfũ do iyi ì ce do wura do isɔ nkpa do isɔ alala do jĩi do kuta. Mii ŋau bɛ kãma nŋa kù waa yɛ ilu, a kù waa gbɔ ide nɔ a kù nɛ kumà kãma. Nɔ Ilaaɔ̃ nŋu iyi amiɛ fei í wa si awɔ gbugbã nlaɛ, nɔ nŋui wa gbãɛ, i kù mà bɛɛrɛɛ.

²⁴ Na ŋɔi í ce í jɔ̀ awɔu bɛ í naa í ce kukɔ ŋa iyi ì yɛu bɛ.

²⁵ À kɔɔi à ni, MƐNE, MƐNE, TEKƐLI, PAASINI.

²⁶ Yaasei ide ŋau wee. MƐNEU bɛ, doa ku cei. Ilaaɔ̃ í ce doai hai si adɔ̃ iyi ì jɛ bomma, nɔ í leekĩɛ.

²⁷ TEKƐLIU mɔi í jɛ kuwoi mii gɔ ku wã. Ì yɛi bɛi mii iyi à wã kuwoɛ si kiloo, nɔ à ba wee kuwoɛ í gaizia.

²⁸ PAASINIU bɛ mɔi í jɛ mii gɔ iyi à kpɛ̃. Aa kpɛ̃a inɛi Mɛɛdi ŋa do inɛi Pɛɛsi ŋa bommaɛui.

²⁹ Ŋɔi gbakã Bɛlisasaa í ni a daa Daniɛli si ibɔ kusĩau, nɔ a daa si sabai wura, nɔ a naa inya mɛɛtasiai bommai ilɛu.

³⁰ Si idũ akãu bɛ mɔi à kpa Bɛlisasaa ilaalui inɛi Kaladee ŋau.