Daniɛli 4 - Bibeli do fee

¹ Amu Nebukanɛsaa, ǹ wɛɛm nii wo si inɔ kpasɛ̃m do laakai ku sũ, nɔ ǹ wɛɛò inɔ didɔ̃ si inɔ kabai bommam.

² Idũ ajɔ nŋu gɔ, ǹ wa n sũ si daayim, ŋɔi ǹ ce ala hee í da zigim. Ntɔ ntɔ, lasabu ŋa iyi í naa sim si antaii daayim nɔu, do kuyɛ ŋa iyi ǹ ceu, í jɔ̀ zigim í da jiida jiida.

³ Ǹ na woodai ǹ ni a jɔ̀ woo mài Babilɔni ŋau fei a naa wa bi titom ku ba a tusɛɛm yaasei ala iyi ǹ ceu ihɛ̃.

⁴ Ŋɔi woo ce alisi ŋa do woo ce dobu dobu ŋa do inɛi Kaladee ŋa do woo mà yaasei leleaɔ̃ ŋa, aŋa fei à tɔtɔɔ wa, nɔ ǹ sisi nŋa alam nɔu. Amma a kù yɔkɔ a kù tusɛɛm yaaseɛ.

⁵ Hee do ankãanyii Daniɛli nŋu iyi à ya nyi a kpe Bɛlitasaa má si yaasei kukpei iwɛ̃m í na í naa bi titom. Daniɛliu inɛ nŋu njɛ í nɛ iwɛ̃ jiida ŋa. Ŋɔi ǹ sisiaa alau.

⁶ Ŋɔi ǹ sɔ̃ɔ ǹ ni, Bɛlitasaa awɔ inɛ ngboi woo ce alisi ŋau, ǹ mà iyi iwɛ̃ jiida ŋa à wa siɛ. Idei asii kãma kaa muɛ biti. Na nŋu, tusɛɛm yaasei ala iyi ǹ ceu bɛ wa.

⁷ Waati iyi ǹ wa n sũ si antaii daayim, mii iyi ǹ yɛ wee. Ǹ yɛ jĩi nla nla gɔ wa leekĩ si aninii ilɛ.

⁸ Jĩi nɔu í la wa kooi nɔ í nɛ gbugbã. Kugbokaɛ wa bɔi hee lelei Aɔ̃, nɔ inɛi andunya ŋa fei, à waa yɔɔi.

⁹ Jĩi nɔu, wuaɛ ŋa à sĩa, nɔ isoɛ ŋa à kpɔ bɛi inɛ fei á ba iyi á jɛ. Si abɛɛ bɛi mɛɛmui sako ŋa à ya sũ, nɔ si amaawɔɛ ŋaui yɛi ŋa à ya de. Mii ilu hunde fei, bi tɛɛ bɛi à ya ba sɔnda nŋa.

¹⁰ Mii iyi ǹ nyi ǹ yɛ waati iyi ǹ wa n sũ si antaii daayim má wee. Ǹ yɛ amalekai Ilaaɔ̃ gɔ iyi í jɛ woo degbei andunya í kita wa hai lelei Aɔ̃.

¹¹ Amalekau í wasi ku dɔ̃ anu do gbugbã wa ni, i da jĩi nɔu bɛ nɔ i kɔta amaawɔɛ ŋa. I wɔ wuaɛ ŋau nɔ i fangaa isoɛ ŋau ŋa. Mɛɛmui sako ŋau a sa hai si abɛɛ, nɔ yɛi ŋau mɔ a fo hai si amaawɔɛ ŋau a nɛ.

¹² Amma i jɔ̀ icuɛu do icãɛ ŋau si aninii fɔfɔ ŋa inɔ sako bɛ. I dĩ isɔ wɛwɛɛ do isɔ nkpa i kaakoò icuu ŋa. Nɔ ikpãi lele ku jɔ̀ icuu ku cɔ̀, nɔ fɔfɔ iyi á dedeu ku jɛ sɔndaɛ bɛi mɛɛmu ŋa.

¹³ Lasabui amanɛ ku jɛɛu á kpaasii, nɔ idɔi mɛɛmui á sãasi. Nɔ bɛɛbɛi á maa wɛɛ hee adɔ̃ mɛɛje.

¹⁴ Idei ijuukpã iyi à fɔ à jilɛu bɛ, amalekai Ilaaɔ̃ ŋa, aŋa iyi à jɛ woo degbe andunyau, aŋai à jɔ̀ à gbɔɔ. Do yaase bɛɛbɛ, ilu hunde baa yooma fei á mà iyi Ilaaɔ̃ nŋu iyi í wa hee lelei í jɛ lafɛ̃ɛi bommai amanɛ ŋa. Nɔ inɛ iyi í bii í ya na. Nɔ á yɔkɔ ku soo mɔm ku na baa inɛ iyi inɛ ŋa a kù waa saalu.

¹⁵ Si anyiɛ nɔ Nebukanɛsaa í ni, to, ala iyi ǹ ce mbɛ amu ilaalu Nebukanɛsaa. Awɔ Bɛlitasaa, tusɛɛm yaasei alam nɔu bɛ wa, domi woo nɛ kumà ŋa iyi à wa si bommam ŋau kãma nŋa kaa yɔkɔ ku tusɛɛm yaaseɛ. Amma awɔ, aa yɔkɔ, domi iwɛ̃ jiida ŋa à wa siɛ.

Daniɛli í tusɛa ilaalu alaɛ

¹⁶ Ŋɔi Daniɛli nŋu iyi à ya nyi a kpe Bɛlitasaa máu í biti titã si waati keeke, nɔ zigiɛ í da ntɔ ntɔ. Nɔ ilaalu í so ide má í ni, Bɛlitasaa, maà jɔ̀ alau do kutusɛɛ ku da zigiɛ. Ŋɔi Bɛlitasaa í jɛ í ni, ilaalu lafɛ̃ɛm, í nɛ alau ihɛ̃ kú jɛ ti inɛ ŋa iyi à céɛi, nɔ kutusɛɛ kú jɛ ti mbɛɛɛ ŋa.

¹⁷ Ì yɛ jĩi nla nla gɔ iyi í na í nɛ gbugbã ntɔ ntɔ. Jĩi nɔu í gboka hee wa bɔ ku lu lelei Aɔ̃, nɔ inɛi andunya ŋa fei à ba à waa yɔɔ.

¹⁸ Jĩi nɔu bɛ iyi í nɛ wua kusĩa ŋau bɛ, nɔ í nɛ iso nkpɔ nkpɔ ŋa iyi inɛ fei á ba ku jɛu, jĩi iyi mɛɛmui sako ŋa à ya maa sũ abɛɛ, nɔ yɛi ŋa à ce bi kuwa nŋa si amaawɔɛ ŋau,

¹⁹ awɔ ilaalu mbɛ. Awɔ iyi ì na ì la nɔ ì nɛ gbugbã, nɔ kulaɛu wa bɔ ku lu lelei Aɔ̃, awɔi gbugbãɛ í bɔ hee si kɔɔ ŋa si andunyau.

²⁰ Si anyii nŋu ilaalu, ì nyi ì yɛ amalekai Ilaaɔ̃ iyi í jɛ woo degbei andunyau má wa kita wa hai lelei Aɔ̃, nɔ í ni, i da jĩi nɔu bɛ i kɛkɛɛ ŋa. Amma i jɔ̀ icuɛu ku gbe si ilɛ bɛ do icãɛ ŋau ŋa si inɔ fɔfɔ ŋa inɔ sako bɛ. I kaakoɛ do sesee ŋa do isɔ nkpa ŋa, nɔ ikpã ku ya naa hai lelei Aɔ̃ ku jɔ̀ ku cɔ̀, nɔ fɔfɔ iyi á dedeu ku jɛ sɔndaɛ bɛi mɛɛmui sako ŋa adɔ̃ mɛɛje.

²¹ Ilaalu lafɛ̃ɛm, Ilaaɔ̃ iyi í wa leleu í nɛ lasabu iyi í ce í jilɛi na iriɛ. Lasabuu wee.

²² Aa leleɛi hai si inɔi amanɛ ŋa, nɔ aa koo i wai si inɔi mɛɛmui sako ŋa. Fɔfɔi aa ya maa jɛ bɛi kɛtɛ ŋa. Ikpãi á ya maa tontoo siɛ wa hai lele, nɔ bɛɛbɛi aa maa wɛɛ hee ku bɔ adɔ̃ mɛɛje. Bii adɔ̃ mɛɛjeu bɛ í koo í tã, aa mà iyi Ilaaɔ̃ iyi í wa leleui í jɛ Lafɛ̃ɛi bommai amanɛ ŋa, nɔ bommau nŋui í ya na inɛ iyi í bi.

²³ Wooda iyi wa ni a jɔ̀ icui jĩi nɔu do icãɛ ŋau, yaaseɛi í jɛ iyi bommau á wɛɛi kú maa jɛ titɛɛ waati iyi aa na i mà iyi Ilaaɔ̃ iyi í wa leleui í jɛ Lafɛ̃ɛi inɛ fei.

²⁴ Na nŋu, ǹ wa n tɔɔɛi i jɛsi ikɔm ilaalu lafɛ̃ɛm i fũsi dulum dɛɛ ŋau awɔ nɔ i ce iyi í jɛ dee dee. Ce araarei ilu are ŋa nɔ i teese laalɔ ŋa iyi ì ceu. Do yaase bɛɛbɛ, á yɔkɔ ku jɛ laakai ku sũɛ á mɔsi.

Alau í ce

²⁵ Ide ŋa iyi Daniɛli í sɔ̃ ilaalu Nebukanɛsaau, fei ndɛɛ í na í baa.

²⁶ Si waatii iri ku kpai adɔ̃ akã, ŋɔi ilaalu í dede wa dabii si antaii sikifai kabai bommai ilɛi Babilɔniu.

²⁷ Nɔ í fɔ wa ni, iluu ihɛ̃ ilu nla iyi ǹ ma si ilɛi Babilɔnii kú jɛ bi kuwai kabai bommam. Ǹ maai na saabui gbugbã nlam ku ba n nyisi zaka bɛi kulai bɛɛrɛm í to.

²⁸ Si waati iyi ilaaluu wa fɔ ide ŋau bɛ gbakã, si waati nŋu bɛ mɔi imui ide ku fɔ gɔ í kita wa hai lelei Aɔ̃. Ide ku fɔu wa ni, Nebukanɛsaa ilaalu, awɔi à waa ba ide ku fɔ bɛ. À gba bommaɛu siɛ mbɛ.

²⁹ Aa leleɛ i fitai hai si inɔi amanɛ ŋa i koo i maa wa si inɔi mɛɛmui sako ŋa, nɔ fɔfɔi aa ya maa ŋɔ bɛi kɛtɛ ŋa. Nɔ bɛɛbɛi aa maa wɛɛ hee ku bɔ adɔ̃ mɛɛje, hee koo to bii aa mà iyi Ilaaɔ̃ iyi í wa leleui í jɛ Lafɛ̃ɛi bommai amanɛ ŋa, nɔ inɛ iyi í bii í ya na.

³⁰ Nɔ tengi bɛ gbakã, bɛɛbɛi ideu í ce. À leleɛi í fita hai si inɔi amanɛ ŋa, nɔ fɔfɔi í ya maa ŋɔ bɛi kɛtɛ ŋa. Ikpã í ya naai hai lele ku jɔ̀ araɛ kú cɔ̀. Iriɛ í wu nto ŋai bɛi ntoi kungbã. Nɔ cikãawɔɛ do cikãasɛɛ ŋa mɔ à sɔi bɛi ti yɛi ŋa.

Iri ku bai Nebukanɛsaa

³¹ Si iri ku kpai adɔ̃ mɛɛjeu, ŋɔi amu Nebukanɛsaa ǹ wu iju ikpa lelei Aɔ̃, nɔ laakai jiida í baa sim. Ŋɔi ǹ saabu Ilaaɔ̃ nŋu iyi í wa hee lele nɔ kuwɛɛɛ kù nɛ kɔɔu. Ǹ wa n cũu, nɔ ǹ lɔsi ku fɔ idei bɛɛrɛɛ. Ntɔ ntɔ gbugbãi bommaɛ kù nɛ kɔɔ. Nŋui í jɛ ilaalu, nɔ bommaɛ á maa wɛɛi hee do ajɔ fei.

³² Baa do iyi inɛi andunya ŋa à kpɔ fei, a kù to nkãma si wajuɛ. Hunde ŋa iyi à wa lele hee do amanɛ ŋa iyi à wa si ilɛ ihɛ̃, bɛi í bii í ya ce nŋa. Inɛ kãma kù wɛɛ iyi á jɛ ku kɔ̀ ide si wajuɛ, nɔ inɛ kãma kaa jɛ ku beeɛ ku ni, mii ì waa ce bɛ.

³³ Waati bɛɛbɛi laakai jiidam í baa, nɔ bɛɛrɛi bommam do kusĩaɛ fei í baa má. Woo ce icɛm ŋa do akawe nlam ŋau, aŋa fei à waa saasaò kubaam wa. Ŋɔi à sindom si bommam nɔu má, nɔ bɛɛrɛm í la í re baa ti takou má.

³⁴ Na ŋɔi í jɔ̀ nsɛi bɛbɛi, amu Nebukanɛsaa ǹ wa n cĩ ilaalu iyi í wa lelei Aɔ̃u, ǹ wa n fɔ kulaɛ, nɔ ǹ mà bɛɛrɛɛ. Mii iyi wa ce waati kãma fei, í ya cooi si ntɔ nɔ í ya jɛ dee deei. Nɔ si gbugbãɛ, inɛ ŋa iyi à waa nɛ do faau, á yɔkɔ ku kaye gbugbã nŋa.