Daniɛli 3 - Bibeli do fee

Wooda iyi à na si gãmɛi iwɛ̃ ku tɔɔ

¹ Ilaalu Nebukanɛsaa í jɔ̀ à yɔ wura à cea do iwɛ̃ gɔ. Kugbokaɛ í wɛɛi agbãawɔ kita, kucĩɛ mɔ agbãawɔ mɛɛfa. Nɔ í jɔ̀ à koo à gũu si lɔɔmai Dura si kukpɛ̃i ilɛi Babilɔniu.

² Ŋɔi ilaalu Nebukanɛsaa í ni à kpe inɛ ngboi ilɛ ŋau wa, do woo gbã ilɛ ŋau, do ilu ilɛ ŋa, do woo na ikɔ ŋa, do woo singa fia ŋa, do woo mà asaiya ŋa, do woo kiiti nla ŋau, do inɛ ŋa iyi à jɛ inɛ ngboi kukpɛ̃i ilɛ ŋau fei. Í ni inɛ ŋau a tɔtɔɔ wai ku ba a naa a ce jingaui kucĩi iwɛ̃ iyi à ce do wura iyi nŋu í jɔ̀ à koo à gũu.

³ Ŋɔi akawe nla ŋau bɛ fei à koo à tɔtɔɔ, nɔ à koo à leekĩ si wajui iwɛ̃u ku ba a ce jingaui kucĩɛ.

⁴ Ŋɔi inɛ iyi í jɛ inɛ ngboi bukiu í dede í dɔ̃ anu do gbugbã í ni, wooda iyi à waa na iŋɛ zamaau fei, do dimi fei, do fee ikã ikã ŋau fei wee.

⁵ Waati iyi aa gbɔ anu ku dɔ̃i kuu ŋa fei, do ti yee, do ti gitaa, do ti mɔɔlɔ, do ti kundigi hee do ti jĩnɛi iri ku kɔ̃ ikã ikã fei, aa sɛɛbata ŋai i tɔɔ iwɛ̃ iyi à ce do wura iyi ilaalu Nebukanɛsaa í jɔ̀ à gũu.

⁶ Inɛ baa yooma iyi í kɔ̀ ku sɛɛbata ku tɔɔɛ fei, aa sooi tengi bɛ gbakã a sɔsiɛ si inɔ bii ina nla nla gɔ wa jo.

⁷ Na nŋu, waati iyi inɛ ŋa à gbɔ anu ku dɔ̃i kuu, do ti yee, do ti gitaa, do ti mɔɔlɔ, do ti kundigi hee do ti jĩnɛi iri ku kɔ̃ ikã ikã ŋau bɛ fei, zamaau fei, do dimi fei, do fee ikã ikã ŋau fei, à ya sɛɛbata a tɔɔ mii iyi à ce do wura iyi ilaalu í jɔ̀ à gũui.

Kpaasii Daniɛli ŋa à leekĩ dim dim do Ilaaɔ̃

⁸ Ŋɔi gbakã inɛi Kaladee gɔ ŋa à na à waa yɛ taalei Zuifu ŋa.

⁹ À koo à sɔ̃ ilaalu Nebukanɛsaa à ni, hunde sisɔ kú jɛ titɛɛ ilaalu.

¹⁰ Nɔ à mɔsi do ide nŋa má à ni, ilaalu, ì na wooda ì ni, inɛ baa yooma iyi í gbɔ anu ku dɔ̃i kuu, do ti yee, do ti gitaa, do ti mɔɔlɔ, do ti kundigi hee do ti jĩnɛi iri ku kɔ̃ ikã ikãu fei, í nɛ ku sɛɛbatai ku tɔɔ mii iyi à ce do wurau,

¹¹ nɔ inɛ baa yooma iyi í kɔ̀ ku sɛɛbata ku tɔɔɛ fei, aa sooi a sɔsiɛ si inɔ bii ina nla nla gɔ wa jou.

¹² To, Zuifu ŋa iyi ì so inɛ ngbo ku jɛi kukpɛ̃i ilɛi Babilɔni ì daa si awɔ ŋau, Sadaaki do Mesaaki do Abɛdi-Nego, a kù saalu woodaɛu. À kɔ̀ ku tɔɔ iwɛ̃ɛ ŋau, nɔ a kù tɔɔ mii iyi ì ce do wura ì jɔ̀ à gũu.

¹³ Ŋɔi idɔi Nebukanɛsaa í kɔ̃ ntɔ ntɔ, nɔ í na wooda í ni a naaò Sadaaki do Mesaaki do Abɛdi-Nego wa. Nɔ à gbã ŋa à kooò ŋa bi ilaaluu.

¹⁴ Ŋɔi ilaalu Nebukanɛsaa í bee ŋa í ni, Sadaaki, Mesaaki, Abɛdi-Nego, ntɔi ì kɔ̀ ku tɔɔ iwɛ̃m ŋau nɔ ì kɔ̀ ku sɛɛbata ku tɔɔ iwɛ̃ iyi ǹ jɔ̀ à ce do wura ǹ jɔ̀ à gũu ŋa?

¹⁵ Bɛbɛi i jɔ̀ i wɛɛò sɔɔlu ŋa. Waati iyi aa na i gbɔ anu ku dɔ̃i kuu ŋa, do ti yee, do ti gitaa, to ti mɔɔlɔ, do ti kundigi, hee do jĩnɛi iri ku kɔ̃ dimi ikã ikã ŋa iyi à gbe ŋau fei, i sɛɛbata i tɔɔ iwɛ̃ iyi ǹ jɔ̀ à ce do wurau ŋa. Bii ì kɔ̀ ku tɔɔɛ ŋa, tengi bɛ gbakã, aa so ŋɛi a sɔsi ŋɛ si inɔ ina nla nlau. Nɔ waati bɛɛbɛ, iwɛ̃ yoomai á yɔkɔ ku nya ŋɛ hai si awɔm.

¹⁶ Ŋɔi Sadaaki do Mesaaki do Abɛdi-Nego à jɛa ilaalu Nebukanɛsaa à ni, a kù nɛ bukaatai ka jɛɛ ide kãma.

¹⁷ Ilaaɔ̃ Lafɛ̃ɛ nwa iyi à waa tɔɔ á yɔkɔ ku faaba wa, nɔ ku nya wa hai si ina nla nlau do hai si awɔɛ awɔ ilaalu.

¹⁸ Nɔ baa bii kù jɛ bɛɛbɛ mɔi, ilaalu, jɔ̀ i mà iyi a kaa ka tɔɔ iwɛ̃ɛ pai, nɔ a kaa ka sɛɛbataa iwɛ̃ɛ iyi ì jɔ̀ à ce do wura à koo à gũu bɛ.

¹⁹ Ŋɔi idɔi Nebukanɛsaa í kɔ̃ ntɔ ntɔ si Sadaaki do Mesaaki do Abɛdi-Nego. Nɔ í na wooda í ni si inya bii ina nla nla í ya wau, a dasi ina a gbãaɛ ku re zaka bɛi à tako à nɛ dɔ̃ɔnɛu ikɔ mɛɛje.

²⁰ Si anyii nŋu, si inɔi soogeɛ ŋa, í na sooge ŋa iyi à nɛ gbugbã à re kpaasi ŋau wooda í ni a dĩ Sadaaki do Mesaaki do Abɛdi-Nego, nɔ a so a sɔsi ŋa si inɔ bii ina nla nla wa jou.

²¹ Ŋɔi à dĩ ŋa, aŋa fei à waa dasi ibɔ nŋa ŋa do ibɔ sisɔ nŋa ŋa, do wondo nŋa ŋa, do fula nŋa ŋa, do jĩnɛ mmu ŋa iyi à waa dasiu fei, à bɛi à so ŋa à sɔsi inɔ ina nla nlau.

²² Si bɛi ilaaluu í na wooda do kugaabu hee í caa, inau í la si inyaui ntɔ ntɔ hee amɛɛ í kpa inɛ ŋa iyi à so Sadaaki do Mesaaki do Abɛdi-Nego à sɔsi bɛu.

²³ Nɔ inɛ mɛɛta ŋau, Sadaaki do Mesaaki do Abɛdi-Nego à koo à cuku si inɔ ina nla nlau do kudĩ nŋa ŋau.

Inɛ mɛɛta ŋau à ba faaba hai si inɔ ina nla nlau

²⁴ Ŋɔi gbakã ilaalu Nebukanɛsaa í dede anu akã do zigiida, nɔ í bee akaweɛ ŋa í ni, kù jɛ amanɛ mɛɛtai à dĩ à so à sɔsi inɔ inau? Nɔ aŋa mɔ à jɛaa à ni, oo ilaalu, ntɔ ntɔ bɛɛbɛi.

²⁵ Nɔ ilaaluu í nyi í ni má, to wee nsɛi amanɛ mɛɛi ǹ wa n yɛ si inɔ inau bɛ mɛɛ, aŋa fei à waa nɛ nŋa nkãma kù waa dĩ ŋa, nɔ inɛ mɛɛsiau í jɔ inɛi lelei Aɔ̃ gɔ.

²⁶ Si anyii nŋu, ilaalu Nebukanɛsaa í nɛ í bɔ kɔkɔi andɛ bii à dasi ina nla nlau nɔ í ni, Sadaaki, Mesaaki do Abɛdi-Nego, iŋɛ woo ce icɛi Ilaaɔ̃ iyi í wa leleu, i fita i naa wa. Ŋɔi Sadaaki do Mesaaki do Abɛdi-Nego ŋa à fita wa hai si inɔ inau.

²⁷ Ŋɔi inɛ ngboi ilɛ ŋau, do inɛ ngboi kukpɛ̃i ilɛ ŋau, do ilu ilɛ ŋau, do woo na ilaalu ikɔ ŋau, à koo à tɔtɔɔ à cɔ inɛ mɛɛta ŋau, nɔ à ba wee inau ku cea arai inɛ ŋau nkãma. À ba wee inau kù jo ntoi irii inɛ ŋau, nɔ kù cea ibɔ nŋa ŋa mɔ nkãma, nɔ inunui ina kãma kù wa si ŋa.

²⁸ Ŋɔi Nebukanɛsaa í ni, ka saabu Ilaaɔ̃ Lafɛ̃ɛi Sadaaki, do Mesaaki do Abɛdi-Nego iyi í bɛ inɛ gɔ wa í naa í faaba woo ce icɛɛ ŋa, domi à dasiɛ naanɛ, nɔ à kɔ̀ ku jirima woodai amu ilaalu, nɔ à jɛsi aŋa a ba ijuukpã do iyi aŋa aa koo a tɔɔ iwɛ̃ gɔ nɔ a fũsi Ilaaɔ̃ Lafɛ̃ɛ nŋa awɔ.

²⁹ Nsɛi bɛbɛi, wooda iyi ǹ wa n na wee. Woodau í kã inɛ baa yooma fei, do zamaa fei, do inɛi ilɛ ŋa fei do fee dimi ikã ikã ŋa fei. Inɛ iyi á fɔ ide ku maa yaako Ilaaɔ̃ Lafɛ̃ɛi Sadaaki do Mesaaki do Abɛdi-Nego bɛbɛi, aa bububu lafɛ̃ɛi nɔ a lɛgɛ ileɛ ku baa ku ce timtim, domi iwɛ̃ gɔ kù wɛɛ iyi á yɔkɔ ku faaba inɛ bɛi nŋu má.

³⁰ Si anyii nŋu, ilaaluu í jɔ̀ icɛi Sadaaki do Mesaaki do Abɛdi-Nego í gũ lele í kɔ̃ɔsi. Í so ŋai í jilɛ ŋa si inya ilu bɛɛrɛ ŋa si ilɛi Babilɔni.

Ala minjisiai Nebukanɛsaa

³¹ Ilaalu Nebukanɛsaa í ba inɛ ŋa iyi à wa si andunyau fei ide ku fɔ. Hai zamaau fei do inɛi ilɛ ŋa fei do fee dimi ikã ikã ŋau fei. Í ni, laakai ku sũ nla nla ku wɛɛ do iŋɛ.

³² Nɔ í nyi í mɔsi má í ni, ǹ yɛ iyi á sĩam si n jɔ̀ inɛ ŋa a mà nyinda ŋa do maamaake ŋa iyi Aɔ̃ Lafɛ̃ɛi lele í ceem.

³³ Ntɔ ntɔ, mii ŋa iyi í ceu, maamaake nla nla ŋai, nɔ à nɛ gbugbã jiida jiida. Bommai Ilaaɔ̃u bɛ á maa wɛɛi hee do ajɔ fei, nɔ gbugbãi bommaɛu á mɔsi ku maa kooi hee do ajɔ fei.