Daniɛli 2 - Bibeli do fee

Ala sintei Nebukanɛsaa

¹ Nebukanɛsaa í ce ala si adɔ̃ minjisiai bomma ku jɛɛ. Alau í jɔ̀ í biti ntɔ ntɔ hee njoo í nya siɛ.

² Ŋɔi ilaalu í ni a kpe woo mà ŋa wa do woo ce alisi ŋa do woo ce dobu dobu ŋa do inɛi Kaladee ŋa ku ba a naa a sisiaa yaasei alaɛ ŋau. Ŋɔi inɛ ŋau à naa à na à leekĩ si wajuɛ.

³ Ŋɔi ilaaluu í sɔ̃ ŋa í ni, alai ǹ ce, nɔ alau í jɔ̀ ǹ biti ntɔ ntɔ. Na nŋu, ǹ wa n bi i sisiim yaasei alau ŋa.

⁴ Ŋɔi inɛi Kaladee ŋau à jɛaa do feei Arameɛ̃ɛ à ni, hunde sisɔ kú jɛ titɛɛ awɔ ilaalu. Sɔ̃ awa woo ce icɛɛ ŋau alaɛu wa ka gbɔ, nɔ ka sisiɛ yaaseɛ.

⁵ Ŋɔi í jɛa inɛi Kaladee ŋau í ni, mii iyi ǹ dasi idɔ n ce wee. Bii i kù jɔ̀ n kù mà yaasei alam nɔu ŋa an jɔ̀ a gagaga ŋɛi, nɔ kpasɛ̃ nŋɛ ŋa a baa a kpɔò bɛi iri ankitã.

⁶ Amma bii ì sɔ̃m alam nɔu, nɔ ì tusɛɛm yaaseɛ ŋa, aa ba amani ŋa do amua ŋa do bɛɛrɛ nla nla hai bi tom ŋa. Iŋɛ de i sisiim alau do yaaseɛ wa ŋa.

⁷ Ŋɔi à jɛ isɛ gbeejisia má à ni, ilaalu, sɔ̃ awa woo ce icɛɛ ŋau alaɛu wa ka gbɔ, nɔ ka sisiɛ yaaseɛ.

⁸ Ŋɔi ilaaluu í nyi í sisi í fɔ má í ni, ntɔ ntɔ, ǹ mà iyi ì waa bi i ba i ya waati ŋai si na iyi í jɔ̀ ì gbɔ mii iyi ǹ dasi idɔ n ce ŋa.

⁹ Ǹ mà iyi ì tã sɔɔlu i sɔɔm ibo ŋai do ide ŋa iyi aa dasi inɛ ku nyɔ hee waatiu ku maa kpaasi. Ntɔ ntɔ, bii i kù jɔ̀ n kù mà yaasei alam nɔu ŋa, ijuukpã dimi akãi á ba iŋɛ fei. To, i sɔ̃m ala iyi ǹ ceu wa ŋa ku ba n mà iyi aa yɔkɔ i tusɛɛm yaaseɛ ŋa.

¹⁰ Ŋɔi inɛi Kaladee ŋau à nyi à jɛaa ilaaluu má à ni, ilaalu, inɛ kãma kù wa si ilɛ ihɛ̃ iyi á yɔkɔ ku ce mii iyi ì waa beeu bɛ. Na ŋɔi í jɔ̀ ilaalu baa akã, baa bii í jɛ í la, walakɔ í jɛ ilu gbugbãi, kù bee woo ce alisi gɔ mii dimi bɛɛbɛ, hee má jɛ woo ce dobu dobu gɔ.

¹¹ Ilaalu, mii iyi ì waa beeu bɛ, í gaabu ntɔ ntɔ. Inɛ kãma kaa yɔkɔ ku jɛɛ ideu bɛ, í gbe iwɛ̃ ŋa aŋa akã, amma wee ngu ŋa a kù wa si inɔi inɛi andunya ŋa ihɛ̃.

¹² Ŋɔi idɔi ilaalu í kɔ̃ ntɔ ntɔ, nɔ í na wooda í ni a kpa woo mà ŋa iyi à wa si ilɛi Babilɔni ŋau fei.

¹³ Ŋɔi ide iyi ilaalu í jilɛu í fangaa bii fei. Inɛ ŋau, à nɛ a kpa ŋai. Ŋɔi à waa dɛdɛ Daniɛli do kpaasiɛ ŋau mɔ ku ba a kpa ŋa.

Ilaaɔ̃ í sisia Daniɛli yaasei alai ilaaluu

¹⁴ Ŋɔi Daniɛli í ba Ariɔku inɛ ngboi woo degbe kpasɛ̃i ilaaluu ide ku fɔ do kumà ku ce do laakai jiida. Waati iyi wa baa ide ku fɔu, waati bɛɛbɛi í fita wa bɔ woo mài Babilɔni ŋau ku kpa.

¹⁵ Daniɛli í beeɛ í ni, na mii í ce ilaalu í jilɛ ijuukpã kulele hee bɛɛbɛ. Ŋɔi Ariɔku í sisia Daniɛli yaase bɛi ideu í nɛ.

¹⁶ Ŋɔi Daniɛli í dede í bɔ bi ilaaluu nɔ í tɔɔɛ í ni ku muaa nŋu waati si bii nŋu á naa ku sisiaa yaasei alaɛu.

¹⁷ Si anyii nŋu, nɔ Daniɛli í sinda í nyi kpasɛ̃ í koo í sisiaa Hanania do Mikaɛli do Azaria kpaasiɛ ŋau yaasei ideu

¹⁸ ku ba a tɔɔ araarei Ilaaɔ̃ Lafɛ̃ɛi lele si gãmɛi asiii alau bɛ, ku ba a maà a na a ce nfei nŋu Daniɛli do kpaasiɛ ŋa do woo mài Babilɔni ŋa iyi à gbe ŋau.

¹⁹ Ŋɔi Ilaaɔ̃ í sɔ̃ Daniɛli yaasei alau si kuyɛ iyi í ce idũ. Ŋɔi Daniɛli í saabu Ilaaɔ̃ Lafɛ̃ɛi leleu.

²⁰ Nɔ í ni, ka maa saabu Ilaaɔ̃ waati kãma fei. Bi titɛɛi laakai jiida do gbugbã fei à wa.

²¹ Nŋui í ya kpaasi waati ŋa do mii ŋa iyi à waa ce fei. Nŋui í ya kɛkɛ ilaalu ŋa, nɔ nŋui í ya nyi ku jilɛ ŋa má. Nŋui í ya muaa ilu laakai ŋa laakai jiida, nɔ nŋui í ya jɔ̀ ilu bisi ŋa a ba kumà.

²² Nŋui í ya sisia inɛ mii iyi í jĩisa nɔ wa manji. Nŋui í mà mii iyi í wa si ilu kuku, nɔ bi titɛɛi inya kumá í wa.

²³ Aɔ̃ Lafɛ̃ɛi balam ŋa, ǹ saabuɛi nɔ ǹ wa n cĩɛ na laakai jiida do gbugbã iyi ì muum, domi awɔi ì jɔ̀ ǹ mà yaasei mii iyi à tɔɔɛu. Ntɔ ntɔ, awɔi ì jɔ̀ à gbɔ yaasei mii iyi wa da zigii ilaaluu.

²⁴ Si anyii nŋu, Daniɛli í dede í bɔ bi Ariɔku, inɛ iyi ilaalu í na wooda í ni ku kpa woo mài Babilɔni ŋau, Daniɛli í bɛi í ni ku maà saasa ku kpa woo mài Babilɔni ŋau. Í sɔ̃ inɛɛu í ni, gbã i bɔɔm bi ilaaluu, amu an tusɛaa yaasei alaɛu.

²⁵ Ŋɔi Ariɔku í gbã Daniɛli gbãa gbãa í bɔòɛ bi ilaaluu nɔ í sɔ̃ɔ í ni, si inɔi inɛ ŋa iyi à mu wa hai ilɛi Zudaau, ǹ ba inɛ iyi á yɔkɔ ku tusɛ yaasei alaɛu.

Mii iyi í jɔ iwɛ̃ gɔ iyi à gbe nɔ kutɛɛ ŋa a kù nɛ gbugbã

²⁶ Ŋɔi ilaaluu í bee Daniɛli nŋu iyi à ya nyi a kpe Bɛlitasaa máu í ni, aa yɔkɔ i sisi ala iyi ǹ ceu nɔ i tusɛɛm yaaseɛ?

²⁷ Ŋɔi Daniɛli í jɛaa í ni, yaasei idei asii iyi ì waa beeu bɛ, ilu laakai ŋa, do woo ce dobu dobu ŋa, do woo ce alisi ŋa, do woo mà yaasei leleaɔ̃ ŋa, kãma nŋa kaa yɔkɔ ku tusɛɛ yaaseɛ.

²⁸ Amma lelei Aɔ̃, Ilaaɔ̃ í wa bɛ. Nŋui í ya fɔ yaasei asii ŋa, nɔ nŋui í jɔ̀ Nebukanɛsaa í mà mii ŋa iyi á na ku ce do waju. To, mii iyi ì yɛ si waati iyi ì waa sĩ njoou wee.

²⁹ Ilaalu lafɛ̃ɛ, si waati iyi ì waa sũ, ì ce lasabu ŋa si gãmɛi mii ŋa iyi á na ku ce do waju. Nɔ inɛ iyi í jɛ woo fɔ asii ŋau í jɔ̀ ì mà mii iyi á na ku ce.

³⁰ Bii í sɔ̃ amu yaasei alau, kù jɛ si na iyi í jɔ̀ laakaii amu í re ti inɛ ŋa iyi à wɛɛ si hunde fei, amma na i ba inɛ iyi á tusɛɛ yaaseɛi nɔ i mà mii iyi í jɔ̀ zigiɛ wa da.

³¹ Ilaalu, mii iyi ì yɛ wee. Mii nla nla gɔ iyi à gbei ì yɛ wa leekĩ si wajuɛ. Mii nɔu wa daana ntɔ ntɔ hee wa mu ijuɛ, nɔ í nɛ zigiida.

³² Irii mii iyi à gbeu, à cooi do wura alala. À ce gɛndɛɛ do ikpaɛ ŋa mɔi do isɔ nkpa. Inɔɛ do itãɛ ŋa mɔ, do isɔ nkpa.

³³ À ce bancakaɛ ŋai do isɔ ŋa. Kutɛɛ ŋa mɔ, à ce bii gɔ ŋai do isɔ ŋa, bii gɔ ŋa mɔ do amà.

³⁴ Ŋɔi ì waa cɔ mii iyi à gbeu hee í koo í to waati iyi kuta gɔ í ga wa nɔ kù jɛ awɔi amanɛi í gaa wa. Kuta iyi í ga wau í naa í cã kutɛi mii iyi à gbe iyi bii gɔɛ ŋa í jɛ isɔ, nɔ bii gɔ ŋa mɔ í jɛ do amàu í lɛgɛ ŋa í nya fufuɛ.

³⁵ Ŋɔi anu akã, isɔu do amàu do isɔ nkpau do isɔ fũfũu do wurau, fei ndɛɛ í baa í ce fufu, hee fufu iyi wa ce í soo wa nɛò bɛi fɔfɔ ŋa iyi fufu í ya so ku maa nɛò waati iyi à waa fɛ amaajɛ ŋa hee inɛ kaa yɛ baa tuubaɛ mɔm. Amma kuta iyi í naa í lɛgɛ mii iyi à gbeu, í baa í ce iri kuta nla nla, nɔ í gba andunyau fei.

³⁶ Ala iyi awɔ ilaalu ì ceu mbɛ. Bɛbɛi, aa ka tusɛ yaaseɛ wa.

³⁷ Ilaalu, awɔi ì la ì re ilaalu ŋa fei. Ilaaɔ̃ Lafɛ̃ɛi leleui í jɔ̀ ì jɛ bomma, nɔ í muuɛ gbugbã do bɛɛrɛ.

³⁸ Nŋui í so amanɛ ŋa do mɛɛmui sako ŋa do yɛi ŋa í daaɛ si awɔ ku ba aŋa fei à maa sũɛ iri ilɛ tengi bii à wa fei. Awɔi ì jɛ iri iyi à ce do wura alalau.

³⁹ Si anyiɛ, bomma mmu gɔ á naa iyi kaa toɛ do gbugbã. Si anyiɛ, bomma mɛɛtasia gɔ á naa, nŋui á jɛ bɛi isɔ nkpau, nɔ á fangaai si andunya fei.

⁴⁰ Si anyii nŋu, bomma mɛɛsia gɔ á naa, nɔ á nɛ gbugbãi bɛi isɔ. Do yaase bɛi isɔ í ya cuku si mii ku lɛgɛɛ ku nya fufu fei, do yaase bɛɛbɛi bommau mɔ á lɛgɛ bomma ŋa iyi à cuaa wau ku nya fufu nŋa.

⁴¹ Nɔ do yaase bɛi ì yɛ kutɛɛ do amaasɛɛ, gɔgɔ ŋa à jɛ do amà, nɔ gɔgɔ ŋa mɔ à jɛ do isɔu, bɛɛbɛi bommau bɛ mɔ á na ku kpɛ̃, amma ngɔgɔ á gbeaa iyi á jɛ gbugbãi isɔ, domi ì waa yɔɔ iyi isɔu í yɔgɛɛ do amài.

⁴² Amma si bɛi amaasɛ ŋau bii gɔ ŋa à jɛ do isɔ, nɔ bii gɔ ŋa à jɛ do amà, iyi bɛ wa nyisi iyi cingaa akãi bommau á nɛ gbugbãi, nɔ cingaa iyi ihɔ̃ ku kua gbugbã.

⁴³ Iyi bɛ í nyi wa nyisi mái iyi ilaalu ŋa aa ya gbɔsi njɛi si tuubai abɔdɔ̃ ŋa, amma akabuu nŋa ŋa kaa ya nɛ gbugbã bɛi isɔ do amà a kaa yɔkɔ a dĩ si njɛ.

⁴⁴ Si waatii ilaalu ŋau bɛ, Ilaaɔ̃ Lafɛ̃ɛi lele á jilɛ bomma gɔ iyi kaa ce nfe ajɔ kãma, nɔ kaa jɛ arui dimi mmu kãma gɔ má. Bommau á lɛgɛ bomma ŋa iyi à cuaa wa ŋau feii, nɔ ku kpa irii kuwɛɛ nŋa. Bommau á maa wɛɛi hee do ajɔ fei.

⁴⁵ Ide nŋui kuta iyi ì yɛ í ga wa hai si iri kuta iyi kù jɛ awɔi amanɛi í gaa wau wa fɔ. Kutau í cuku wai ku na ku lɛgɛ isɔu, do isɔ nkpau, do amàu, do isɔ fũfũu, do wurau ku nya fufu nŋa. Do yaase bɛɛbɛi Ilaaɔ̃ nla í bi ku jɔ̀ i mà mii iyi á na ku ce do waju. Alaɛu, kuyɛ gɔi iyi í jɛ ntɔ, nɔ kutusɛɛu mɔ, inɛ í nɛ ku dasi naanɛi.

⁴⁶ Ŋɔi ilaalu Nebukanɛsaa í sɛɛbata hee ilɛ si wajui Daniɛli, nɔ í ni a cea nŋu kuwee ŋa nɔ a joa tuae ku dɔ̃ inunu ŋa nŋu ku saabuò Daniɛli.

⁴⁷ Ŋɔi ilaaluu í sɔ̃ Daniɛli má í ni, ntɔ ntɔ, Aɔ̃ Lafɛ̃ɛ nŋɛ í re iwɛ̃ ŋa fei. Nŋui í jɛ Lafɛ̃ɛi ilaalu ŋa, nɔ nŋu akãi í ya jɔ̀ inɛ ku gbɔ yaasei asii ŋa, domi ì yɔkɔ ì tusɛɛm yaasei idei asiiu ihɛ̃.

⁴⁸ Si anyiɛ, ilaaluu í so Daniɛli lele, nɔ í ceaa amuai amani nkpɔ nkpɔ. Nɔ í so ilɛi Babilɔniu í naa ku jɛ inɛ ngboɛ, nɔ í soo kú jɛ inɛ ngbo iyi í wa antaii woo mài Babilɔni ŋau fei.

⁴⁹ Ŋɔi Daniɛli í tɔɔ ilaalu í ni ku na Sadaaki do Mesaaki do Abɛdi-Nego ŋa inɛ ngbo ku jɛ si kukpɛ̃i ilɛi Babilɔniu bii gɔ ŋa. Daniɛli inɛ nŋu í wa bi ilaaluu.