Daniɛli 12 - Bibeli do fee

Waatii wahala do ku jĩ wa hai si iku

¹ Ŋɔi amalekau í bam ide ku fɔ má í ni, si waatiu bɛi Misɛli inɛ ngboi amaleka ŋau á faata wa, nŋu iyi í jɛ inɛ iyi á kɔ̀ò zamaaɛu. Waatiu, waatii wahalai á jɛ iyi a kù yɛ dimiɛ bii kãma hee ku naa si waatiu bɛ. Si waatiu bɛ, inɛɛ ŋa iyi à kɔ iri nŋa si tiai kuwɛɛu fei, aa ba a fita si.

² Inɛ ŋa mɔ iyi à wa inɔ balɛ, nkpɔ nŋa á jĩ wa. Inɛ gɔ ŋa aa jĩi nɔ a ba kuwɛɛ hai tã. Inɛ gɔ ŋa mɔ aa jĩi nɔ a wa si anyɔ do si laalɔ iyi kù nɛ kɔɔ.

³ Inɛ ŋa iyi à jɛ ilu laakai ŋa aa maa daanai bɛi inya kumái lelei Aɔ̃. Aŋa iyi aa nyisi inɛ ŋa yaase bɛi aa jɛò dee dee bi Ilaaɔ̃, aa maa daanai waati kãma fei bɛi leleaɔ̃ ŋa.

⁴ Awɔ Daniɛli, mu ide ŋau ihɛ̃ si asii. Maà jɔ̀ inɛ ŋa a mà ide ŋa iyi à wa si tiau ihɛ̃ hee koo toò waatii ankãanyiu. Waati bɛɛbɛ, inɛ nkpɔ nkpɔi á cioɛ, nɔ kumà nŋa á la ku kɔ̃ɔsi.

Waatii iri ku kpau á maa wɛɛi si asii

⁵ Ŋɔi amu Daniɛli ǹ wa n cɔ ilu má, nɔ ǹ yɛ inɛmɔkɔ minji gɔ ŋa à waa leekĩ ice do icei idou.

⁶ Ŋɔi inɛ akãi inɛ ŋau í bee inɛ iyi wa dasi jĩnɛ iyi à ce do acɔ ku nɛ sisima iyi wa leekĩ si antaii inyiu í ni, hee waati yoomai mii iyi kù nɛ dɔ̃ɔnɛi ku ceu bɛ á leekĩ ya.

⁷ Ŋɔi inɛ iyi wa dasi jĩnɛ iyi à ce do acɔ ku nɛ sisimau í wu awɔ minjiɛ ŋau fei ikpa lelei Aɔ̃, nɔ í gbasi do irii inɛ iyi í wɛɛ hee do ajɔ feiu í ni, kukpɛi mii ŋau bɛ á cei zakai adɔ̃ mɛɛta do bubu. Nɔ á koo á leekĩi waati iyi gbugbãi inɛi Ilaaɔ̃ ŋau á kpa iri fei mam mam.

⁸ Ǹ gbɔ ideu, amma n kù gbɔ yaaseɛ. Nɔ ǹ ni, Lafɛ̃ɛm, bɛirei iri ku kpai mii ŋau bɛ á jɛ.

⁹ Nɔ í jɛɛm í ni, Daniɛli, koo nɛ. Ideu á maa wɛɛi si asii titã hee koo toò waatii iri ku kpau.

¹⁰ Ilaaɔ̃ á jɔ̀ inɛ nkpɔ nkpɔ ku maajui hee a fũuta, nɔ wahala ku wɛ ŋa. Woo ce laalɔ ŋa aa maa ce laalɔi, nɔ a kaa yɔkɔ a gbɔ yaasei nkãma. Amma ilu laakai ŋa aa gbɔ yaasei mii ŋa iyi wa ce.

¹¹ Hai waati si bii aa ganji inɛ ŋa a cea Ilaaɔ̃ kuweei ajɔ fei ku ba a jilɛ mii laalɔ iyi á ce asɔɔi mii ŋa si tengi bi ku ce kuweeu, ajɔ dubu do cĩɔ minji do cinɛò fɛɛwai (1.290) á ce.

¹² Ilu inɔ didɔ̃i inɛ iyi á maa degbe nɔ ku to hee ajɔ dubu do cĩɔ mɛɛta do kuntaa do miiu (1.335).

¹³ Awɔ Daniɛli, ce isɛɛnɛɛ i bɔò hee kɔɔ, aa ba kusĩmi nɔ aa dede i gba ribaɛ si kɔɔi waati ŋau.