Daniɛli 10 - Bibeli do fee

Kuyɛ mɛɛtasia

¹ Si bomma ku jɛi Sirusi ilaalui Pɛɛsi, si adɔ̃ mɛɛtasiaɛ, Ilaaɔ̃ í ba Daniɛli nŋu iyi à ya kpe Bɛlitasaau ide ku fɔ. Ideu ntɔi, igũ nla nlai á wɛɛ. Ŋɔi í lasabu si ideu, nɔ í gbɔ yaaseɛ.

² Waati bɛɛbɛ, amu Daniɛli ǹ too si yaase bɛi à ya ce bukii ikui azuma mɛɛta mam mam.

³ Ǹ ci ya jɛ sɔnda jiida kãma. Iŋa ci ya lɔ gɛlɛm hee má jɛ vɛ̃ɛ. Nɔ n ci ya n fãsi aram tuae hee azuma mɛɛtau í koo í kɔ̃ò.

⁴ Si ajɔ kɔnfia do mɛɛsiai cukpa sinteu, ǹ wa itĩi ido nla gɔ iyi à ya kpe Tigure.

⁵ Ŋɔi ǹ wu iju ǹ cɔ ilu, nɔ ǹ yɛ inɛ gɔ wa dasi jĩnɛ gɔ iyi à ce do acɔ ku nɛ sisima, nɔ wa dĩ santiiki iyi à ce do wura alala si kpakaɛ.

⁶ Araɛ í yɛi bɛi kuta ku nɛ bɛɛrɛ gɔ, nɔ wajuɛ wa daanai bɛi kuŋɔi ijĩ. Ijuɛ ŋa à yɛi bɛi amɛi ina. Ikpaɛ ŋa do bancakaɛ ŋa mɔ à yɛi bɛi isɔ nkpa iyi à yɔrɔɛ wa daana. Nɔ imuɛ mɔ wa dɔ̃i bɛi wakatai amanɛ ŋa.

⁷ Amu Daniɛli, amu akãi ǹ ce kuyɛu. Inɛ ŋa iyi à wa bi tom ŋau a kù yɛ nkãma. Amma zigi nŋa í da ntɔ ntɔ hee à sa à koo à manji.

⁸ Ŋɔi ǹ gbem bɛ amu akãm, nɔ ǹ yɛ kuyɛ nla nlau hee gbugbãm í kaye, nɔ wajum fei í kpaasi, nɔ n kù nɛ gbugbã kãma gɔ má.

⁹ Ŋɔi ǹ wa n gbɔ ide ku fɔi inɛɛu. Nɔ si bɛi ǹ wa n gbɔ ide ku fɔɛu, ǹ sũ ǹ sɛɛbata hee ilɛ n kù mà mii iyi wa ce má.

¹⁰ Ŋɔi awɔ gɔ í naa í lum í jɔ̀ ǹ dede ǹ gulɛ ǹ tɛ awɔ ilɛ.

¹¹ Si anyiɛ, nɔ í sɔ̃m í ni, Daniɛli, awɔ iyi Ilaaɔ̃ í bi, gbɔ ide ŋa iyi an sɔ̃ɛ, nɔ i leekĩ tengi bii ì wau bɛ, domi nsɛiu ihɛ̃ bi titɛɛi à bɛm wa. Waati iyi í sɔ̃m ideu bɛɛbɛ, ŋɔi ǹ dede ǹ leekĩ ǹ wa n yayaò.

¹² Ŋɔi í sɔ̃m í ni, Daniɛli, maà jɔ̀ njo ku muɛ. Hai ajɔ sinte iyi ì dasi idɔ awɔ i gbɔ yaasei mii iyi wa ce, nɔ ì kaye araɛ si wajui Ilaaɔ̃ Lafɛ̃ɛɛ, Ilaaɔ̃ í gbɔ ideɛ ŋau, nɔ na irii ideɛ ŋaui ǹ naa.

¹³ Amma amaleka iyi í jɛ woo degbei bommai Pɛɛsiu í bam do ijai ajɔ kɔnfia do akã. Ŋɔi Misɛli inɛ akãi inɛ ngboi amaleka ŋau í naa í sobim, nɔ ǹ gbe bi ilaalui Pɛɛsi ŋau bɛ.

¹⁴ Bɛbɛi, ǹ naa ku sɔ̃ɛ mii iyi á na ku ba zamaaɛ ŋai bii í kɔ̃ɔsi, domi kuyɛ mmu gɔ í wɛɛ iyi wa naa má na ajɔ ŋau bɛ.

¹⁵ Si waati iyi wa sɔ̃m ideu, ǹ kɔmba iri ilɛi, nɔ ǹ coko.

¹⁶ Ŋɔi inɛ gɔ iyi í jɔ amanɛ í naa í lu gɛlɛm. Ŋɔi ǹ cĩ gɛlɛ nɔ ǹ sɔ̃ inɛ iyi wa leekĩ si wajum nɔu ǹ ni, Lafɛ̃ɛm, na kuyɛu, ara kuro í naa sim nɔ ǹ kua gbugbã.

¹⁷ Do yaase bɛirei amu woo ce icɛɛ an ce n yɔkɔ n baɛ ide ku fɔ, awɔ Lafɛ̃ɛm. Bɛbɛi, gbugbã kãma kù wɛɛm má, nɔ ami wa gaiziam.

¹⁸ Ŋɔi inɛ iyi í yɛ bɛi amanɛu í nyi í lum má nɔ í jɔ̀ ǹ ba gbugbã má.

¹⁹ Si anyii nŋu, nɔ í sɔ̃m í ni, maà jɔ̀ njo ku muɛ awɔ iyi Ilaaɔ̃ í bi. Wɛɛò laakai ku sũ. Dasi gbugbã, dasi gbugbã. Si bɛi wa bam ide ku fɔu, ǹ ba gbugbã nɔ ǹ ni, fɔ ide Lafɛ̃ɛm, domi ì jɔ̀ ǹ ba gbugbã.

^20-21 Ŋɔi í beem í ni, ì mà mii iyi í jɔ̀ ǹ naa bi tɛɛ? Ǹ naa ku sɔ̃ɛ bɛi tia si bii à kɔ ntɔu wa dɔ̃i. Do nŋu fei, an nyi n ce igũ mái do amaleka iyi í jɛ woo degbei Pɛɛsiu. Waati iyi an nɛ ikpa bɛ, amaleka iyi í jɛ woo degbe ilɛi Gɛrɛsiu á to wa. Nɔ inɛ kãma ci ya sobim si mbɛɛ minji ŋau bɛ ku ba ku ja, í gbe Misɛli woo degbe inɛi Izirɛli ŋa nŋu akã.