Daniɛli 1 - Bibeli do fee

Daniɛli do kpaasiɛ ŋa à wa Babilɔni

¹ Si adɔ̃ mɛɛtasiai bomma ku jɛi Zoakimu ilaalui Zudaa, Nebukanɛsaa ilaalui Babilɔni í naa igũ si ilui Zeruzalɛmu nɔ í buu koe.

² Ŋɔi Aɔ̃ Lafɛ̃ɛ í so Zoakimu ilaalui Zudaau í daa si awɔ, nɔ í jɔ̀ í so mbɔi jĩnɛ ŋa iyi à jɛ ti kpasɛ̃i Ilaaɔ̃u mɔ í nɛò. Nebukanɛsaa í mu ŋai í nɛò ŋa Babilɔni. Nɔ jĩnɛ ŋa iyi í so ŋau mɔ, í koo í dasi ŋai tengi bii amani ŋa à wa si inɔ ilei iwɛ̃ɛ ŋau.

³ Ŋɔi Nebukanɛsaa í na Asepenazi inɛ ngboi akawe nlaɛ ŋa wooda í ni a naaò inɛi Izirɛli ŋa iyi à jɛ tɔkui kpasɛ̃i ilaalu ŋau wa walakɔ inɛ ŋa iyi à wa si kpasɛ̃i ilu bɛɛrɛ ŋau.

⁴ Inɛ ŋa iyi í ni a naaò wa ŋau, awaasũ ŋa iyi a kù nɛ leebu si ara nŋa ŋai aa jɛ, nɔ a jɛ mɔkɔ kusĩa ŋa, nɔ a jɛ inɛ ŋa iyi à kɔ̃ò laakai, nɔ a jɛ inɛ ŋa iyi à nɛ kumà nɔ à nɛ bisi, ku ba a ya yɔkɔ a maa ce icɛ inɔ kabai ilaalu, nɔ a kɔ ŋa si feei inɛi Kaladee ŋa ku fɔ. Aa kɔ ŋa si kukɔɛ do kukaɛ feii.

⁵ Ilaaluui í jilɛ nŋa gũai sɔnda bɛi aa ya na ŋa si ajɔ akã fei si sɔnda ŋa iyi à ya jilɛaa nŋu takaɛu, do si atɛ̃ vɛ̃ɛ iyi nŋu takaɛ í ya mɔu. Nɔ bɛi í fɔ si gãmɛ nŋau, í bi nŋu ku ce nŋa bɛɛbɛi zakai adɔ̃ mɛɛta. Bii kɔɔi adɔ̃ mɛɛtau í to, a bɛi a naaò ŋa wa bi tɛɛ.

⁶ Si dimii inɛi Zudaa ŋau, inɛ ŋa iyi à cica wee. Daniɛli do Hanania do Mikaɛli do Azaria.

⁷ Ŋɔi inɛ ngboi akawe nla ŋau í na ŋa iri titɔ̃ mmuɛ ŋa. Ti Daniɛlii í jɛ Bɛlitasaa, Hanania mɔi í jɛ Sadaaki, Mikaɛli mɔi í jɛ Mesaaki, Azaria mɔi í jɛ Abɛdi-Nego.

⁸ Ŋɔi Daniɛli í dasi idɔ nŋu ku maà riisi arai nŋu si gãmɛi sɔndai ilaaluu ku jɛ do atɛ̃ vɛ̃ɛɛ ku mɔ. Ŋɔi í tɔɔ inɛ ngboi akawe nla ŋau í ni ku maà tilasi nŋu si sɔnda ŋau ku jɛ ku ba nŋu ku maà na ku so riisi.

⁹ Ŋɔi Ilaaɔ̃ í jɔ̀ inɛ ngboi akawe nla ŋau í jɛsi kutɔɔi Daniɛliu do bɛɛrɛ do jiida ku jɛ.

¹⁰ Ŋɔi inɛɛu í sɔ̃ Daniɛli í ni, ǹ wa n ce njoi ilaalu lafɛ̃ɛm nŋu iyi í jilɛ sɔnda iyi ì nɛ i jɛ do mii iyi ì nɛ i mɔ ŋa. Bii í na í yɛ inɔ didɔ̃ɛ kù jɛ bɛi ti inɛmɔkɔ saaɛ ŋau, bɛirei á jɛaa. Á yɔkɔ ku jɛ na iri nŋɛ, ilaalu á na ku jɔ̀ a bu irim.

¹¹ Ŋɔi Daniɛli í sɔ̃ inɛ iyi í jɛ inɛ ngbo si icɛi kpasɛ̃i ilaaluu nŋu iyi inɛ ngboi akawe nla ŋau í so ku maa dasi Daniɛli do Hanania do Mikaɛli do Azaria ŋa ijuu í ni,

¹² awa woo ce icɛɛ ŋai. Mii iyi ǹ wa n tɔɔɛ i ce i cɔ wee. Jɔ̀ a ya na wa ifɔ ka maa jɛ, nɔ a ya na wa inyi ka maa mɔ zakai ajɔ mɛɛwa i cɔ.

¹³ Si anyii nŋu, nɔ i cɔ waju nwa do ti awaasũ ŋa iyi à waa jɛ sɔnda iyi í jɛ ti kpasɛ̃i ilaaluu. Waati bɛɛbɛ, mii iyi aa yɛ, nŋui á jɔ̀ i mà mii iyi aa ce nwa bɛbɛi.

¹⁴ Ŋɔi inɛɛu í jɛsi mii iyi à tɔɔɛu nɔ ku maa cɔ Daniɛli do kpaasiɛ ŋau zakai ajɔ mɛɛwa.

¹⁵ Waati iyi ajɔ mɛɛwau í to kɔɔ, wajui Daniɛli do ti kpaasiɛ ŋau í sĩa í re, nɔ à ce kaato à re awaasũ ŋa iyi à waa jɛ sɔnda iyi í jɛ ti kpasɛ̃i ilaaluu fei.

¹⁶ Hai waati bɛɛbɛi, inɛɛu í nya sɔnda do vɛ̃ɛ iyi à ya tako a maa na ŋau, nɔ í ya maa na ŋa ifɔ ŋa.

¹⁷ Ŋɔi Ilaaɔ̃ í muaa awaasũ mɛɛ ŋau kumà, nɔ í jɔ̀ à mà yaasei mii fei ku wũaa si gãmɛi tia ku kɔ do kukaɛ, nɔ í jɔ̀ à jɛ ilu laakai. Si antaii iyi bɛ ŋa, í jɔ̀ Daniɛli í mà yaasei kuyɛ ŋa do ala ŋa fei ku tusɛ.

¹⁸ Waati iyi ilaalu Nebukanɛsaa í da si bii aa naaò ŋa wau í naa í to. Ŋɔi inɛ ngboi akawe nla ŋau í gbã ŋa í kooò ŋa bi tɛɛ.

¹⁹ Nɔ í ba aŋa fei ide ku fɔ. Si inɔ nŋa, kãma nŋa kù yɛ bɛi Daniɛli do Hanania do Mikaɛli do Azaria. Na ŋɔi í jɔ̀ aŋa fei à koo à jɛ woo cea ilaaluu icɛ.

²⁰ Ŋɔi ilaaluu í lɔsi ide ŋa ku bee ŋa si gãmɛi ide ŋa iyi í bee inɛ ku jɛ ilu laakai nɔ ku jɛ ilu bisi, nɔ í ba wee ide ku jɛ nŋa í sĩa í re ti woo ce alisi ŋa do ti woo ce dobu dobu ŋa iyi à wa si bommaɛu ikɔ mɛɛwa.

²¹ Do yaase bɛɛbɛi Daniɛli í waò bɛ hee í koo í toò si adɔ̃ sintei bomma ku jɛi ilaalu Sirusi.