Bomma 2, 8 - Bibeli do fee

Icɛ ikã ikãi Salomɔɔ

¹ Adɔ̃ kɔnfiai Salomɔɔ í ce í bɛi í ma kpasɛ̃i Aɔ̃ Lafɛ̃ɛ do titɛɛu í tã.

² Ŋɔi í teese í ma ilu ŋa iyi Hiramu í muau, nɔ í jilɛ jilɛ inɛi Izirɛli ŋa si.

³ Si anyiɛ nɔ í bɔ igũ ilui Amati ikpa Soba. Nɔ í gbaa.

⁴ Ŋɔi í ma Tadimɔɔ si gbaau do ilu ŋa iyi à jɛ bi ku jilɛ ijɛi ilɛi Amati ŋau fei.

⁵ Ŋɔi í ma Bɛti-Horɔ̃ɔ leleu do ti ilɛ ilɛu. Ilu ku nɛ gbugbã ŋai iyi à nɛ bindi ŋa do gambo ŋa iyi à nɛ isɔ ku kendi ŋa.

⁶ Nɔ Salomɔɔ í nyi í ma ilui Baalati má do ilu bii à ya jilɛ ijɛ nŋa ŋa fei, do ilu bi ku jilɛ sarɛtii igũ ŋau do bi kuwai acĩɛ ŋau do mii iyi í dasi idɔ ku ce si ilui Zeruzalɛmu do si ilɛi Libãa do si ilɛ ŋa bii wa jɛ ilaalu fei í cooi.

⁷ Andi zamaai inɛi Hɛti ŋa iyi à gbe do inɛi Amɔre ŋa do inɛi Ferɛzi ŋa do inɛi Hɛvi ŋa do inɛi Zebusi ŋa aŋa iyi a kù jɛ inɛi Izirɛli ŋau,

⁸ hai tɔku nŋa ŋa iyi à gbe si ilɛu iyi inɛi Izirɛli ŋau a kù kpa ŋau fei, Salomɔɔ í so ŋa si icɛi tilasi ŋa, nɔ iyi bɛi í jɛ icɛ nŋa hee ku baa nnyi.

⁹ Amma Salomɔɔ kù dasi inɛi Izirɛli ŋa icɛi aru ku ce. Aŋai í so a jɛ soogeɛ ŋa, do inɛ ngboi soogeɛ ŋa do woo mu sarɛtii igũɛ ŋa do masaɛ ŋa.

¹⁰ Inɛ ngbo ŋa iyi ilaalu Salomɔɔ í so a jɛ irii zamaau a maa cɔɔu, aŋa cĩɔ minji do ciitaai (250).

¹¹ Ŋɔi Salomɔɔ í jɔ̀ à tekĩò ama inaaboi Faraɔ̃u hai si ilui Davidi à bɔòɛ si inɔ ile iyi í maau. Nɔ í ni, abom kaa wa si ilui Davidi ilaalui Izirɛliu si na iyi í jɔ̀ inya ŋa bii à lɔò kpakoi akabuui Aɔ̃ Lafɛ̃ɛu à má.

¹² Ŋɔi Salomɔɔ í cea Aɔ̃ Lafɛ̃ɛ kuwee ŋa si antaii bi kuwee iyi í maau do wajui ile kumáu.

¹³ Í ya cooi dee dee si bɛi Moizi í jilɛa ajɔ akã fei. Í ya ce kuwee ŋaui si ajɔi kusĩmi do si cukpa titɔ̃ do si jingau mɛɛta nla ŋa iyi à ya ce si adɔ̃ akã feiu. Si jingaui Pɛ̃ɛ hai nɛ levɛ̃ɛu do ti Azuma ŋa do ti Kusu ŋau.

¹⁴ Ŋɔi í jilɛ woo wee ŋau si icɛ nŋa ŋa si bɛi Davidi baaɛ í kpɛ̃ nŋau. Inɛi Levii ŋai à nɛ a maa cĩ Ilaaɔ̃, nɔ à ya maa coo ajɔ fei. Woo degbe anu koofa ŋau mɔ aa ya wa bi gambo ŋaui si yaase bɛi à kpɛ̃ ŋa. Bɛɛbɛi Davidi inɛi Ilaaɔ̃u í jilɔɔ.

¹⁵ Nɔ a kù fita hai si woodai ilaaluu si gãmɛi woo wee ŋau do inɛi Levii ŋau hee má jɛ si amani ŋau.

¹⁶ Do yaase bɛi icɛi Salomɔɔu fei í nɛ mbɛ, hai ajɔ iyi à sinti kpasɛ̃i Aɔ̃ Lafɛ̃ɛu wa hee ku naa si ajɔi iri ku kpaɛ. Nɔ icɛi kpasɛ̃u fei í tã.

¹⁷ Ŋɔi Salomɔɔ í dede wa bɔ Ɛsiɔ̃-Gebɛɛ do Elɔti. Ilu ŋau à wai si itĩ tenku si ilɛi Edɔmu.

¹⁸ Nɔ Hiramu í jɔ̀ woo ce icɛɛ ŋa iyi à mà yaasei tenku à kooa Salomɔɔ akɔi inyi ŋa. Ŋɔi aŋaò woo ce icɛi Salomɔɔ ŋau à bɔ Ɔfii, à koo à so wura iyi í re tɔnu maatɛta wa à baa Salomɔɔ wa.