Bomma 2, 7 - Bibeli do fee

Kuwee ŋa iyi à cea Aɔ̃ Lafɛ̃ɛ

¹ Iyi Salomɔɔ í ce kutɔɔu í tã, ŋɔi ina í naa hai lele í jo kuwee iyi à ya jo si ina fei sãa sãa do kuwee mmuɛ ŋa. Nɔ amboei Aɔ̃ Lafɛ̃ɛ í kɔ̃ inɔ kpasɛ̃u.

² Woo wee ŋau a kù yɔkɔ a kù lɔ baa inɔ kpasɛ̃i Aɔ̃ Lafɛ̃ɛu domi amboeɛu í kɔ̃ bɛ.

³ Inɛi Izirɛli ŋau fei à yɛ ina wa kita wa hai lelei Aɔ̃ nɔ amboei Aɔ̃ Lafɛ̃ɛ í má inya si inɔ kpasɛ̃u. Ŋɔi à gulɛ ilɛ si bantumau nɔ à sɛɛbata à saabu Aɔ̃ Lafɛ̃ɛ à waa ni, í jɛ jiida, nɔ araareɛ í ya wɛɛi hee do ajɔ fei.

⁴ Ŋɔi ilaaluu do inɛi Izirɛli ŋau fei à cea Aɔ̃ Lafɛ̃ɛ kuwee ŋa.

⁵ Ilaalu Salomɔɔ í jɔ̀ à kpa kɛtɛ kombo dubu kɔnfia do minji (22.000), do angudã ŋa do iwo ŋa dubu cifa (120.000). Bɛɛbɛi Salomɔɔ do zamaau fei à jɛò jingaui kpasɛ̃i Ilaaɔ̃u ku cĩ.

⁶ Woo wee ŋau à wa agbɛ nŋa ŋa, nɔ inɛi Levii ŋau mɔ à wa bɛ do jĩnɛ ŋa iyi Davidi í jɔ̀ à ce ku ba a ya maa saabuò Aɔ̃ Lafɛ̃ɛ do iri ku kɔ̃ ŋau. Inɛ ŋa à ya kɔ̃ irii a maa cĩ Aɔ̃ Lafɛ̃ɛ a maa ni, kubiɛ kù nɛ kɔɔ, si yaase bɛi iri ku kɔ̃ iyi Davidi í kɔ ŋa siu wa ni. Woo wee ŋau à waa fã kãakãakĩ ŋa si waju nŋa, nɔ inɛi Izirɛli ŋau fei à waa leekĩ bɛ.

⁷ Ŋɔi Salomɔɔ í ce kuwee ku ba aninii bantumau ku jɛ ti Aɔ̃ Lafɛ̃ɛ má, si na iyi í jɔ̀ bi kuweei isɔ nkpa iyi í wa wajui kpasɛ̃i Aɔ̃ Lafɛ̃ɛu í kere, nɔ kù yɔkɔ kù gba kuwee ŋau fei. Tengi bɛi à ce kuwee iyi à ya jo si ina fei sãa sãa do ti anu akã do ti amaajɛ ŋa.

⁸ Si waati akãu bɛ, Salomɔɔ í ce jingaui Kusu ŋa ajɔ mɛɛje aŋaò inɛi Izirɛli ŋau fei. Zamaa nla nlai í naa hai Lebo-Amati ikpa awɔ njɛi kpãai inunu hee ku bɔ acãi inyii Ezibiti ikpa awɔ cangai kpãai inunu.

⁹ Si ajɔ mɛɛjɔsiau, ŋɔi zamaa í tɔtɔɔ má jiida jiida, domi à ce jingaui bi kuwee ku cĩui ajɔ mɛɛje, ti Kusu ŋau mɔ ajɔ mɛɛje.

¹⁰ Si ajɔ kɔnfia do mɛɛtasiai cukpa mɛɛjesiaui Salomɔɔ í jɔ̀ zamaau fei í nɛ ideɛ do inɔ didɔ̃ na mii jiida iyi Aɔ̃ Lafɛ̃ɛ í cea Davidi do Salomɔɔ do inɛi Izirɛli zamaaɛ ŋau.

Aɔ̃ Lafɛ̃ɛ í naa si Salomɔɔ isɛ gbeejisia

¹¹ Iyi Salomɔɔ í ma kpasɛ̃i Aɔ̃ Lafɛ̃ɛu do ti nŋu takaɛ, nɔ mii iyi wa bi ku ce si ile ŋau fei í ba í coo,

¹² ŋɔi Aɔ̃ Lafɛ̃ɛ í naa siɛ idũ nɔ í sɔ̃ɔ í ni, ǹ gba kutɔɔɛ, nɔ ǹ cica inyau ihɛ̃i ku jɛ kpasɛ̃ bii aa ya ceem kuwee ŋau.

¹³ Waati iyi an cĩmbo leleu, nɔ agbɛ ku mu, nɔ n ni angocange ŋa a ce nfei amaajɛi ilɛu fei, walakɔ bii ǹ jɔ̀ patapoo í naa si zamaam nɔu,

¹⁴ nɔ zamaam iyi à waa kpe do irim nɔu í kaye araɛ wa ce kutɔɔ, nɔ wa dɛdɛɛm, nɔ í sinda wa hai si kpãa laalɔɛ ŋau, an jɛaa wa hai lele. An ceaa suurui dulum dɛɛu, nɔ n jɔ̀ ilɛɛu ku ba iri.

¹⁵ An cĩ ijum hai nnyi nɔ n ya n sotĩ n gbɔ si kutɔɔ iyi à waa ce si inyau ihɛ̃.

¹⁶ Bɛbɛi, ǹ so kpasɛ̃u ihɛ̃ ǹ jilɔɔ ikãi ku ba a ya maa kpe irim bɛ hee do ajɔ fei. Nɔ bɛi ijum do idɔm aa ya wa waati kãma fei.

¹⁷ Nɔ bii awɔ mɔ ì waa nɛ do amu bɛi Davidi baaɛ í nɛ wa ceò iyi ǹ dasiɛ ku ce fei, bii ì waa jirima woodam ŋa do ide ŋa iyi ǹ jilɛɛ,

¹⁸ an jɔ̀ bommaɛ ku ba gbugbã bɛi ǹ cea Davidi baaɛ kuwãɛu wo ǹ ni kaa kua atɛkɛsi si bommai Izirɛli ajɔ kãma.

¹⁹ Amma bii awɔ do zamaaɛ do tɔku nŋɛ ŋa ì sinda hai bi tom ŋa, nɔ ì fũsi woodam ŋa do ide ŋa iyi ǹ jilɛ nŋɛ awɔ, nɔ ì na ì koo ì waa tɔɔ iwɛ̃ ŋa ì waa sɛɛbata si waju nŋa ŋa,

²⁰ an nya ŋɛi hai si ilɛm iyi ǹ na ŋɛu. An nyɔ kpasɛ̃u ihɛ̃ iyi ǹ cicaa irim nɔu ku jĩim nɔ n jɔ̀ ku baa ku jɛ dɔ̃anyii dimi mmu ŋa fei do mii ku yaako nŋa.

²¹ Nɔ kpasɛ̃u baa do iyi í baò bɛɛrɛ nla nla fei, inɛ iyi wa lɔ kɔkɔɛ fei á ya bitii nɔ ku maa ni, bɛirei í ce Aɔ̃ Lafɛ̃ɛ í cea ilɛu ihɛ̃ do kpasɛ̃u ihɛ̃ bɛ ihɛ̃.

²² Nɔ aa ya jɛaa a ni, si na iyi í jɔ̀ inɛi Izirɛli ŋa à kɔ̀si Aɔ̃ Lafɛ̃ɛi bala nŋa ŋa iyi í nya ŋa wa hai ilɛi Ezibitiui, nɔ à koo à sinda si iwɛ̃ ŋa, à waa gulɛ nŋa nɔ à waa tɔɔ ŋa. Na ŋɔi í ce Aɔ̃ Lafɛ̃ɛ í jɔ̀ laalɔu bɛ fei í ba ŋa.