Bomma 2, 6 - Bibeli do fee

¹ Ŋɔi Salomɔɔ í ni, Aɔ̃ Lafɛ̃ɛ, si ilu kukui ì dasi idɔ i maa wa.

² Amma amu ǹ maɛ kpasɛ̃ jiida iyi á jɛ bi kuwaɛ, tengi bii aa maa wa hee do ajɔ fei.

Salomɔɔ í saabu Ilaaɔ̃

³ Ŋɔi ilaaluu í sinda si inɛi Izirɛli ŋau í wee nŋa. Zamaai Izirɛliu fei wa leekĩ.

⁴ Ŋɔi í ni, ǹ saabu Aɔ̃ Lafɛ̃ɛi inɛi Izirɛli ŋa, domi do gbugbã nlaɛ í kɔ̃ kuwã iyi í cea baam Davidi waati iyi í ni,

⁵ hai ajɔ iyi amu Aɔ̃ Lafɛ̃ɛ ǹ nya zamaam inɛi Izirɛli ŋa wa hai ilɛi Ezibiti, n kù cica ilu gɔ si dimii inɛi Izirɛli ŋa tengi bii aa maam kpasɛ̃ bii an maa n wa, nɔ n kù nɔ n kù cica inɛ kãma ku jɛ inɛ ngboi zamaam inɛi Izirɛli ŋau.

⁶ Amma Zeruzalɛmui ǹ cica ku ba n maa n wa bɛ. Nɔ ǹ cica Davidi ku jɛ ilaalui zamaam inɛi Izirɛli ŋau.

⁷ Baam Davidi í dasi idɔ nŋu ku ma kpasɛ̃ wo iyi á jɛ ti Aɔ̃ Lafɛ̃ɛi inɛi Izirɛli ŋa.

⁸ Amma Aɔ̃ Lafɛ̃ɛ í sɔ̃ɔ í ni si bɛi í lasabu ku maa nŋu kpasɛ̃u, lasabuɛu í sĩa.

⁹ Amma de kù jɛ nŋui á ma kpasɛ̃u, amaɛ iyi á na ku bíi á maa nŋu Aɔ̃ Lafɛ̃ɛ kpasɛ̃u.

¹⁰ Aɔ̃ Lafɛ̃ɛ í kɔ̃ kuwã iyi í ceu. Ǹ dede si agbɛi baam Davidi, nɔ ǹ buba si bommai Izirɛli bɛi Aɔ̃ Lafɛ̃ɛ í fɔu, nɔ ǹ ma kpasɛ̃ iyi í jɛ ti Aɔ̃ Lafɛ̃ɛi inɛi Izirɛli ŋa.

¹¹ Ǹ koo ǹ jilɛ kpakou bɛ, kpako si bii akabuui Aɔ̃ Lafɛ̃ɛu í wa, akabuu iyi aŋaò inɛi Izirɛli ŋau à dĩ.

Kutɔɔi Salomɔɔ

¹² Ŋɔi Salomɔɔ í leekĩ wajui bi kuweei Aɔ̃ Lafɛ̃ɛ si wajui zamaai Izirɛliu fei, nɔ í wu awɔ lele ku ba ku ce kutɔɔ.

¹³ Wee Salomɔɔ í jɔ̀ à ce bi ku gũ ku leekĩ si ku fɔò ide do isɔ nkpa gɔ nɔ í jilɔɔ si aninii bantumau. Kusɔɛ agbãawɔ miiui, kucĩɛ agbãawɔ miiu, kugbokaɛ agbãawɔ mɛɛta. Ŋɔi í gũ antaiɛ nɔ í gulɛ si wajui inɛi Izirɛli ŋau fei í wu awɔ lele í ce kutɔɔ.

¹⁴ Si kutɔɔɛu í ni, Aɔ̃ Lafɛ̃ɛi inɛi Izirɛli ŋa, inɛ kãma kù wa lele walakɔ ilɛ iyi í yɛ bɛi awɔ. Ì ya kɔ̃ akabuuɛ nɔ ì ya leekĩ dee dee bi woo ce icɛɛ ŋa iyi à waa jirimaɛ do idɔ nŋa fei.

¹⁵ Bɛɛbɛi ì cea baam Davidi kuwã, nɔ ideɛ iyi ì fɔ do gɛlɛɛ ì jɔ̀ í kɔ̃ nnyi do gbugbãɛ.

¹⁶ Bɛbɛi, Aɔ̃ Lafɛ̃ɛi inɛi Izirɛli ŋa, kɔ̃ kuwã iyi ì nyi ì cea baam Davidi ì ni kaa kua inɛ iyi á tɛkɛ siɛ si bommai Izirɛli, bii amaɛ ŋa à waa mu ara nŋa dee dee si kuwɛɛ nŋa, nɔ à waa nɛ si woodaɛ ŋa bɛi nŋu Davidi mɔ í nɛ si wajuɛ.

¹⁷ Debɛi, Aɔ̃ Lafɛ̃ɛi inɛi Izirɛli ŋa, jɔ̀ kuwã iyi ì cea woo ce icɛɛ Davidi ku kɔ̃.

¹⁸ Amma do ntɔ, aa ba bi kuwa do amanɛ ŋa si ilɛ ihɛ̃? Ntɔ ntɔ lelei Aɔ̃ í la í caa nɔ í mɔngɔ ku gbaɛ. Bɛirei kpasɛ̃ iyi ǹ maɛu á ce ku toɛ.

¹⁹ Do nŋu fei, Aɔ̃ Lafɛ̃ɛm, sinda wa ikpa bi tom, gbɔ kutɔɔm, gbɔ anu iyi amu woo ce icɛɛ ǹ wa n dɔ̃ siɛ.

²⁰ Jɔ̀ iju jiidaɛ ku maa kãsi kpasɛ̃u ihɛ̃ dasãò idũ, domi tengi bɛi awɔ takaɛ ì ni aa wa. Gbɔ kutɔɔm iyi ǹ wa n ceu ihɛ̃.

²¹ Jɔ̀ i cea amu woo ce icɛɛ do inɛi Izirɛli inɛɛ ŋa mii iyi à waa tɔɔ waati iyi à naa tengi ihɛ̃. Jɔ̀ i ya gbɔ kutɔɔ nwa hai lelei Aɔ̃ tengi bii ì wa, nɔ i kpa idei dulum du wa.

²² Bii inɛ gɔ wa yɛ taalei inɛ mmu gɔ, aa tilasi inɛ iyi à waa yɛ taaleɛui a ni koo ce kugbasi do irii nŋu takaɛ. Bii í naa í ce kugbasiu si inɔ kpasɛ̃i awɔ Aɔ̃ Lafɛ̃ɛ si bi kuweeu,

²³ ǹ wa n tɔɔɛ, de siɛ itĩ hai lelei Aɔ̃, nɔ i kiiti nŋa. Bii lafɛ̃ɛ í ce laalɔ do ntɔi, sãa kuce laalɔɛ, bii í nɔ í nɛ ntɔ, náa ntɔɛ.

²⁴ Waati iyi inɛi Izirɛli inɛɛ ŋa à ce dulum bi tɛɛ nɔ mbɛɛ nŋa ŋa à kãmia ŋa, bii à nyi wa bi tɛɛ nɔ à tɔɔɛ suuru nɔ à waa saabuɛ, bii à waa ce kutɔɔ à waa cɔò ikpa bi kpasɛ̃u ihɛ̃,

²⁵ gbɔ kutɔɔ nŋa wa hai lelei Aɔ̃. Kpa idei dulum du ŋa, baaò ŋa wa si ilɛ iyi ì na aŋaò bala nŋa ŋa.

²⁶ Bii ijĩ kù waa wɔ nɔ agbɛ í mu na dulum iyi à ce, bii à sinda ikpa bi kpasɛ̃u ihɛ̃ à ce kutɔɔ nɔ à waa saabuɛ à tɔɔɛ suuru, nɔ à jɔ̀ dulum du ŋa si na iyi í jɔ̀ ì kpã ŋa iju,

²⁷ gbɔ kutɔɔi woo ce icɛɛ ŋa wa hai lelei Aɔ̃ nɔ i kpa idei dulum du ŋa. Nyisi ŋa kpãa jiida iyi aa maa nɛ si nɔ i jɔ̀ ijĩ ku wɔ si ilɛ iyi ì mu nŋa í jɛ tubu nŋau.

²⁸ Waati iyi ari á naa walakɔ patapoo, walakɔ ibũ tũtũ walakɔ bɔ̃ɔi amaajɛ mmu ŋa, walakɔ angocange do kɛtɛngbo ŋa, walakɔ bii mbɛɛ ŋa à na à tɛsi ilɛu, walakɔ wahala ŋa do bɔ̃ɔ dimi ikã ikã baa yooma fei,

²⁹ bii à ce kutɔɔ na irii zamaaɛ inɛi Izirɛli ŋa nɔ inɛ fei í nɛ inɔ kufɔ si kurara iyi í ce, nɔ à to awɔ nŋa wa ikpa bi kpasɛ̃u ihɛ̃,

³⁰ gbɔ kutɔɔ nŋa wa hai lelei Aɔ̃ bi kuwaɛ. Kpa idei dulum du ŋa, nɔ i cea inɛ fei bɛi daaɛ í yɛ, domi awɔ akãi ì mà idɔi amanɛ ŋa.

³¹ Do yaase bɛɛbɛ, aa maa jirimaɛi nɔ a maa nɛ si kpãaɛ ŋau si kuwɛɛ nŋa fei si ilɛ iyi ì mua bala nwa ŋa.

³² Waati iyi aa maa fɔ idei kulai iriɛ do bɛi ì waa ce icɛ do gbugbã nla nla, inɛi ilɛ mmu ŋa do inɛ njoo gɔ ŋa iyi a kù jɛ inɛi Izirɛli zamaaɛ, aa gbɔ nɔ a naa a tɔɔɛ si inɔ kpasɛ̃u ihɛ̃.

³³ Jɔ̀ i gbɔ kutɔɔ nŋa wa hai lelei Aɔ̃ bi kuwaɛ, nɔ i muu nŋa mii iyi à tɔɔɛ fei ku ba inɛi andunya fei ku gbɔ iriɛ nɔ a jirimaɛ bɛi inɛi Izirɛli zamaaɛ ŋa. Nɔ aŋa fei a mà iyi iriɛi à ya kpe si kpasɛ̃ iyi ǹ ma ǹ nyaa ikãu ihɛ̃.

³⁴ Waati iyi zamaaɛ á na ku fita ku bɔ igũ si mbɛɛɛ ŋa si bɛi awɔ takaɛ ì jilɛ nŋa, bii à tɔɔɛ à waa cɔò ilu iyi ì cicau do kpasɛ̃ iyi ǹ ma do iriɛu ihɛ̃ wa,

³⁵ jɔ̀ i gbɔ kutɔɔ nŋa wa hai lelei Aɔ̃ nɔ i sobi ŋa a jɛ igũ.

³⁶ Ntɔ ntɔ inɛ kãma kù wɛɛ iyi ci ya ce dulum. Waati iyi aa na a ce dulum bi tɛɛ, bii idɔɔkɔ̃ɛ í dede si ŋa nɔ ì dasi ŋa si awɔi mbɛɛ ŋa à mu ŋa aru à nɛò ŋa ilɛ mmu jĩijĩ walakɔ amɛɛ,

³⁷ bii à kpaasi idɔ nɔ à sinda wa bi tɛɛ nɔ à waa tɔɔɛ suuru hai ilɛi inɛ ŋa iyi à mu ŋa aruu à waa ni, à ce kurara, à ce dulum nɔ à ce laalɔ ŋa,

³⁸ bii à nyi wa bi tɛɛ do idɔ nŋa fei do lasabu nŋa fei, bii à waa tɔɔɛ hai ilɛ bii à waa mu ŋa aruu à waa cɔò ikpa ilɛ iyi ì mua bala nŋa ŋa do ilu iyi ì cica do kpasɛ̃ iyi ǹ ma do iriɛu,

³⁹ jɔ̀ i gbɔ kutɔɔ nŋa wa hai lelei Aɔ̃ bi kuwaɛ, nɔ i sobi ŋa. Kpa idei dulum dii zamaaɛ ŋau do kurara iyi à ceɛ fei.

⁴⁰ Bɛbɛi, Aɔ̃ Lafɛ̃ɛm, jɔ̀ i cĩ ijuɛ ŋa nɔ i gbɔ kutɔɔ iyi ǹ wa n ce si inyau ihɛ̃ fei.

⁴¹ Nsɛi Aɔ̃ Lafɛ̃ɛ, dede i naa si inya bi kusĩmiɛu awɔ do kpakoi akabuuɛu, kpako si bii gbugbãɛ í wau. Aɔ̃ Lafɛ̃ɛ, jɔ̀ faabau ku jɛ ibɔi woo weeɛ ŋau nɔ inɛ ŋa iyi naanɛ nŋa í wa siɛ, a gbɔ ididɔ̃.

⁴² Aɔ̃ Lafɛ̃ɛ, maà kɔ̀si inɛ iyi ì nya ikã ì tontooa ikpo si iriu. I ya ye gigii jiida ŋa iyi ì cea Davidi woo ce icɛɛ.