Bomma 2, 5 - Bibeli do fee

¹ Bɛɛbɛi icɛi kpasɛ̃i Aɔ̃ Lafɛ̃ɛ iyi Salomɔɔ wa ceu fei í kpa iri. Ŋɔi í so isɔ fũfũ do wura ŋa do mii ŋa iyi Davidi baaɛ í jilɛa Aɔ̃ Lafɛ̃ɛ nɔ í naa í dasi bi ku jilɛ amanii kpasɛ̃i Aɔ̃ Lafɛ̃ɛu.

À jilɛ kpakoi akabuuu kpasɛ̃i Ilaaɔ̃

² Ŋɔi Salomɔɔ í tɔtɔɔ inɛ ngboi Izirɛli ŋau Zeruzalɛmu do inɛ ngboi dimi ŋau fei do inɛ ngboi kpasɛ̃ nŋa ŋa ku ba a koo a so kpakoi akabuui Aɔ̃ Lafɛ̃ɛu wa hai ilui Davidi iyi í jɛ Siɔ̃ɔ.

³ Ŋɔi inɛi Izirɛli ŋau fei à tɔtɔɔ bi ilaaluu na jingau iyi aa ce si cukpa mɛɛjesiau.

⁴ Iyi inɛ ngboi Izirɛli ŋau fei à to wa, ŋɔi inɛi Levii ŋau à so kpakou.

⁵ Inɛi Levii woo wee ŋaui à so kpakou do ilei acɔ bi kukou do jĩnɛi kuwee ŋa iyi à wa inɔi ilei acɔu fei à nɛò.

⁶ Ŋɔi ilaalu Salomɔɔ do inɛi Izirɛli ŋau fei à tɔtɔɔ si wajui kpakou. Nɔ à ce kuwee do angudã ŋa do kɛtɛ ŋa iyi a kaa yɔkɔ a mà jia nŋa na kukpɔ nŋa.

⁷ Ŋɔi woo wee ŋau à naaò kpakoi akabuui Aɔ̃ Lafɛ̃ɛu wa agbɛɛ inɔ kpasɛ̃i Aɔ̃ Lafɛ̃ɛu hee si ile iyi í má í reu si abɛi ikpai serubɛ̃ɛ ŋau.

⁸ Ikpai serubɛ̃ɛ ŋau í fũi si tengi bii kpakou í wa ku ba ku biiɛ nɔ ku bii hee do jĩi ŋa iyi à ya soò kpakou takaɛ fei.

⁹ Kusɔi jĩi ŋau í jɔ̀ à ya maa yɛ ŋa wa hai ile kumá iyi í wa wajui ile iyi í má í reu. Amma a kaa yɔɔ wa hai waduude. Nɔ à wa bɛ hee ku baa nnyi.

¹⁰ Nkãma kù wa inɔ kpakou í gbe kuta minji ŋa iyi Moizi í dasi hai Ɔrɛbu waati iyi Aɔ̃ Lafɛ̃ɛ í dĩ akabuuɛ do inɛi Izirɛli ŋa waati iyi à fita hai ilɛi Ezibitiu.

¹¹ Woo wee ŋau à ce bukii ara ku maaju. Amma a kù coo si wuaa ikã ikã bɛi wooda í ni a coo. Nɔ aŋa fei à fita wa hai inɔi ile kumáu.

¹² Nɔ dimii Levii ŋa iyi à jɛ woo kɔ̃ iri ŋau, do Azafu do Hemaa do Yedutunu, do ama nŋa ŋa do nyaanze nŋa ŋa à dasi ibɔ iyi à ce do ikũ ku nɛ gbugbã. Nɔ à waa leekĩ do nunui daakɔi bi kuweeu, à waa mu sɛmbali ŋa do kundigi ŋa do mɔɔlɔ ŋa. Nɔ woo wee cifa (120) í wa kɔkɔ nŋa bɛ à waa fã kãakãakĩ ŋa.

¹³ Ŋɔi woo fã kãakãakĩ ŋau do woo kɔ̃ iri ŋau à tɔtɔɔ à waa cĩ Aɔ̃ Lafɛ̃ɛ nɔ à waa saabuɛ ajɔ. Inɛ ŋau à waa fã kãakãakĩ ŋau nɔ à cã sɛmbali ŋa do jĩnɛ mmu ŋa iyi à gbeu nɔ à cĩ Aɔ̃ Lafɛ̃ɛ à waa ni, í jɛ jiida, domi kubiɛ í ya maa wɛɛi hee do ajɔ fei. Waati bɛɛbɛ, ŋɔi kudũi ijĩ í naa í bii inɔ kpasɛ̃i Aɔ̃ Lafɛ̃ɛu.

¹⁴ Woo wee ŋau à mɔngɔ ku leekĩ a ce icɛ nŋa na kudũi ijĩu, domi amboei Aɔ̃ Lafɛ̃ɛ í kɔ̃ kpasɛ̃ɛu.