Bomma 2, 4 - Bibeli do fee

¹ Ŋɔi à ce bi kuweei isɔ nkpa. Kusɔɛ agbãawɔ kɔnfiai, kucĩɛ mɔ agbãawɔ kɔnfia, kugbokaɛ mɔ agbãawɔ mɛɛwa.

Dangala nla do jɛɛ nantaa ŋa

² Ŋɔi Salomɔɔ í jɔ̀ à yɔ isɔ nkpa à ceò dangala nla. Kucĩɛ agbãawɔ mɛɛwai hai itĩ akã ku bɔ si itĩi ikpa ihɔ̃. Kugbokaɛ agbãawɔ miiui nɔ bokotoɛ mɔ agbãawɔ kuntaa.

³ Do ilɛi itĩi dangalau, à ce si boodai kaale ŋa à kaakoɛò. Si agbãawɔ akã fei, booda ara mɛɛwai à ce si. Nɔ à cooi tuuba minji. À yɔ boodaui ajɔ do dangalau.

⁴ Dangalau wa lesii si antaii kɛtɛ maateeji ŋa iyi à ce do isɔ nkpa. Kɛtɛ mɛɛta wa cɔ awɔ njɛi kpãai inunu, mɛɛta mɔ awɔ cangai kpãai inunu, mɛɛta má nunui alɛ, mɛɛta má nunui daakɔ. Dangalau í wa antaii kɛtɛ ŋau, nɔ fiti nŋa fei í wa abɛɛ.

⁵ Sisimaɛ í to kucĩi ataawɔ, nɔ itĩɛu mɔ iyi í yɛ bɛi kɔɔfu, à cooi bɛi kokoi jĩi iyi í fũ anu. Á yɔkɔ ku gba zakai inyi liiti dubu cifa (120.000).

⁶ Ŋɔi à ce jɛɛ nantaa mɛɛwa. Nɔ à jilɛ miiu ikpa awɔ njɛ, miiu mɔ ikpa awɔ canga ku ba a ya ceò buki iyi á jɔ̀ a maaju. Si bɛi à ya wiɛ jĩnɛ ikã ikã ŋa iyi à ya ceò kuwee ŋa iyi à ya jo si ina fei sãa sãau. Inyii dangala nlaui woo wee ŋau à ya wiɛò awɔ nŋa ŋa do isɛ nŋa ŋa.

Irii mii ŋa iyi à ce do isɔ

⁷ Ŋɔi Salomɔɔ í jɔ̀ à ce bi ku lesi fitila mɛɛwa aŋa fei do wura si bɛi à sɔ̃ɔ. Nɔ à koo à jilɛ ŋa si inɔ ileu. Miiu do awɔ njɛ, miiu mɔ do awɔ canga.

⁸ Ŋɔi à ce taabu mɛɛwa, nɔ à jilɛ ŋa si inɔ ileu. Miiu do awɔ njɛ, miiu do awɔ canga. Nɔ à ce kɔɔfui wura ara cĩɔ à jilɛ ŋa bɛ.

⁹ Ŋɔi à ce bantumai woo wee ŋau do bantuma nlau do gamboɛ ŋa. Nɔ à bii ŋa do isɔ nkpa.

¹⁰ Ŋɔi à jilɛ dangala nlau do awɔ njɛi ileu si gontai bantuma iyi í wa do ikpa awɔ cangai kpãai inunu ikpa nunui daakɔ.

¹¹ Hurami í ce bi ku kosi ilúlu ŋau do pɛɛu ŋau do kɔɔfu ŋau. Nɔ í kpa irii icɛi kpasɛ̃i Ilaaɔ̃ iyi Salomɔɔ í dasiɛ ku ce.

¹² Mii ŋa iyi í ceu wee. Sɔbe minji ŋau do isɔ nkpa minji iyi à lesi antaii sɔbe ŋau, nɔ í dasi annya tuuba minji í biiò antaii sɔbeu.

¹³ Si annya tuuba minji iyi à biiò antaii sɔbe ŋaui à mási boodai gerenadi cĩɔ mɛɛ (400).

¹⁴ Nɔ í ce icu bi ku lesi mɛɛwa do jɛɛ nantaa mɛɛwa si antaii icu ŋau,

¹⁵ do dangala nlau do kɛtɛ maateeji ŋa iyi à wa abɛɛ,

¹⁶ do bi ku kosi ilúlu ŋau do pɛɛu ŋau do kaato cate cate ŋau. Jĩnɛ ŋau bɛ fei, ilaalu Salomɔɔ í jɔ̀ Hurami-Abi í cooi do isɔ nkpa iyi à yɔrɔ na kpasɛ̃i Aɔ̃ Lafɛ̃ɛu.

¹⁷ Ilaaluu í jɔ̀ à yɔ isɔ ŋau wai hai lɔɔmai idoi Zuudɛ̃ɛ, si ilɛi amà gɔ si afei Sukɔtu do Serada.

¹⁸ Nɔ í jɔ̀ à ce jĩnɛ ŋau nkpɔ nkpɔ hee í jɔ̀ a kù dɛ a mà kuwoi isɔ nkpa zaka bɛi à ceò ŋa.

¹⁹ Salomɔɔ í nyi í jɔ̀ à ce mii ŋa iyi kpasɛ̃i Ilaaɔ̃u í nɛ bukaataɛ má fei. Í jɔ̀ à ma bi kuwee do wura, do taabu ŋa bii à ya lesi pɛ̃ɛ iyi à ya jilɛa Ilaaɔ̃u,

²⁰ do bi ku lesi fitila ŋa iyi à ce do wura alalau. Nɔ à nɛ a ya má ŋai si bɛi à fɔ wa hai bi ile iyi í re do kumáu.

²¹ Nɔ à ce nŋa boodai kokoi jĩi ŋa. Nɔ à ce fitila ŋa do akpa ku kpa fitila ŋau. À ce ŋai do wura alala.

²² Nɔ à ce kasɛ ŋau do kɔɔfu ŋau do ama jɛɛ ŋau do ama caka ŋau fei do wura alala. Gambo minjii kpasɛ̃u do ti ile iyi í re do kumáu do gamboi ile kumáu, à ce ŋai do wura.