Bomma 2, 36 - Bibeli do fee

Bomma ku jɛi Zoakazi do ti Zoakimu do ti Zoakɛ̃ɛ

¹ Ŋɔi zamaai ilɛu í so Zoakazi amai Zoziasi í biiɛ bomma si agbɛi baaɛ ilui Zeruzalɛmu bɛ.

² Zoakazi adɔ̃ kɔnfia do mɛɛtai í nɛ waati iyi í jɛ bomma. Nɔ í ce si bommau cukpa mɛɛta Zeruzalɛmu.

³ Ŋɔi ilaalui Ezibitiu í naa í nyaa hai si bommau Zeruzalɛmu bɛ. Nɔ í daa inɛi Zudaa ŋau isɔ fũfũ kiloo dubu mɛɛta (3.000) do wura kiloo kuntaa iyi aa ya sãa adɔ̃ fei.

⁴ Ŋɔi í so Eliakimu ifɔɛ Zoakazi ku jɛ ilaalui Zudaa do Zeruzalɛmu. Nɔ í kpaaa si iri Zoakimu. Ŋɔi Neko í mu igbãɛ Zoakazi í nɛò Ezibiti.

⁵ Adɔ̃ kaafɛtũi Zoakimu í nɛ waati iyi í jɛ bomma. Nɔ í ce si bommau adɔ̃ maatakã Zeruzalɛmu. Ŋɔi í ce mii iyi kù dɔ̃a Aɔ̃ Lafɛ̃ɛɛ si.

⁶ Ŋɔi Nebukanɛsaa ilaalui Babilɔniu í naa igũ siɛ. Nɔ í dũu do seseei isɔ nkpa ŋa í nɛòɛ Babilɔni.

⁷ Nɔ Nebukanɛsaa í ko jĩnɛi kpasɛ̃i Aɔ̃ Lafɛ̃ɛ ŋau í nɛò Babilɔni í koo í dasi ŋa inɔ kpasɛ̃ɛ.

⁸ Faajii Zoakimu ŋa do daa sãmiɛ ŋa do mii iyi í baa fei à kɔɔ si tiai ilaalui Izirɛli do Zudaa ŋa. Nɔ Zoakɛ̃ɛ amaɛ í jɛ bommau si agbɛɛ.

⁹ Adɔ̃ mɛɛwa do mɛɛjɔi Zoakɛ̃ɛ í nɛ waati iyi í jɛ bommau, nɔ í ce cukpa mɛɛta do ajɔ mɛɛwa si bommau ilui Zeruzalɛmu bɛ. Nɔ í ce mii iyi kù dɔ̃a Aɔ̃ Lafɛ̃ɛ si.

¹⁰ Iyi à lɔ si adɔ̃, ŋɔi ilaalu Nebukanɛsaa í jɔ̀ à mu à nɛòɛ Babilɔni do jĩnɛ jiidai kpasɛ̃i Aɔ̃ Lafɛ̃ɛ ŋau. Nɔ í jilɛ Sedesiasi ifɔi Zoakimu ilaalui Zudaa do Zeruzalɛmu.

Bomma ku jɛi Sedesiasi do kucukui Zeruzalɛmu

¹¹ Adɔ̃ kɔnfia do akãi Sedesiasi í nɛ waati iyi í jɛ bomma nɔ í ce si bommau adɔ̃ maatakã ilui Zeruzalɛmu.

¹² Ŋɔi í ce iyi kù dɔ̃a Aɔ̃ Lafɛ̃ɛɛ si, nɔ í kɔ̀ ku kaye araɛ si wajui walii Zeremi iyi wa sɔ̃ɔ ide iyi Aɔ̃ Lafɛ̃ɛ í fɔ.

¹³ Í lele idɔɛ mam mam, nɔ kù sinda ikpa bi Aɔ̃ Lafɛ̃ɛi inɛi Izirɛli ŋa. Í dedeò ide ku kɔ̀ si gãmɛi ilaalu Nebukanɛsaa mɔm nii, nŋu iyi í jɔ̀ í gbasi do irii Ilaaɔ̃ ku jɛ ilu naanɛ bi tɛɛ.

¹⁴ Nɔ inɛ ngboi woo wee ŋau fei do inɛi Zudaa ŋa iyi à gbe fei à ce laalɔ à waa kɔ̃ɔsi. À na ara nŋa si kuce laalɔi dimi mmu ŋa. Nɔ à riisi kpasɛ̃i Aɔ̃ Lafɛ̃ɛ iyi í nya ikã í jɛ titɛɛ Zeruzalɛmuu.

¹⁵ Aɔ̃ Lafɛ̃ɛi bala nŋa ŋa í bi ku faaba inɛɛ ŋa do bi kuwaɛu. Na ŋɔi í jɔ̀ kù gbɛɛjiò waliiɛ ŋa ku bɛ wa isɛ fɛɛfɛlo a naa a sɔ̃ ŋa a ce laakai.

¹⁶ Amma a kù saalu woo bɛi Ilaaɔ̃ ŋau. À donda waliiɛ ŋau nɔ à ce atafii si ideɛ ŋau. Ŋɔi idɔɔkɔ̃i Aɔ̃ Lafɛ̃ɛ í dede si inɛɛ ŋau hee a kaa yɔkɔ a fita si.

¹⁷ Ŋɔi Aɔ̃ Lafɛ̃ɛ í jɔ̀ Nebukanɛsaa ilaalui inɛi Kaladee ŋau í naa si ŋa igũ, nɔ í lɔ hee inɔ kpasɛ̃i Aɔ̃ Lafɛ̃ɛ í kpa awaasũ ŋa bɛ. Kù jɔ̀ inɛ kãma, hai awaasũ ŋa do mudɛ̃ɛ ŋa hee do mɔkɔ ngbo ŋa do inɛ ŋa iyi ntoi iri nŋa í fũuta fei. Aɔ̃ Lafɛ̃ɛ í so aŋa fei í daa si awɔ.

¹⁸ Ŋɔi Nebukanɛsaa í ko mii ndii kpasɛ̃i Ilaaɔ̃ ŋau fei, hai keekeò nlaɛ ŋa, do amani iyi í wa bɛ, hee do amanii ilaalu do ti akaweɛ ŋa í nɛò ŋa Babilɔni.

¹⁹ Nɔ inɛi Babilɔni ŋa à jo kpasɛ̃i Ilaaɔ̃, à lɛgɛ bindii Zeruzalɛmu ŋau, à jo kpasɛ̃ jiidaɛ ŋau nɔ à bɛjɛ jĩnɛ jiida ŋau fei.

²⁰ Ŋɔi Nebukanɛsaa í mu inɛ ŋa iyi a kù kpa si igũu í nɛò ŋa Babilɔni. Nɔ à jɛ arui nŋu do amaɛ ŋa hee í koo í toò si waati iyi inɛi Pɛɛsi ŋa à kãmia ŋa.

²¹ Bɛɛbɛi idei Aɔ̃ Lafɛ̃ɛ iyi Zeremi í fɔu í kɔ̃, iyi í ni, aa mu inɛi Zudaa ŋa aru adɔ̃ kita do mɛɛwa ku ba ilɛu ku sĩmi bɛi Ilaaɔ̃ í sɔ̃ ŋa wo nɔ a kù saaluɛu.

Sirusi í jɛsi a teese a ma kpasɛ̃i Ilaaɔ̃

²² Si adɔ̃ sintei bomma ku jɛi Sirusi ilaalui Pɛɛsi, Aɔ̃ Lafɛ̃ɛ í dasi idɔ nŋu ku jɔ̀ ide iyi nŋu í tako í jɔ̀ walii Zeremi í fɔu ku ce. Na ŋɔi í ce í jɔ̀ Sirusi í dasi idɔ í fɔ ideɛ si bommaɛ fei nɔ í kɔ tia má í ni,

²³ Aɔ̃ Lafɛ̃ɛi lele í daam bommai ilɛ ŋau fei si awɔ amu Sirusi ilaalui Pɛɛsi, nɔ í cicam n teese n maa nŋu kpasɛ̃ ilui Zeruzalɛmu si ilɛi Zudaa. Si inɔ nŋɛ, iŋɛ iyi ì jɛ inɛɛ ŋa fei, à waa kpe ŋɛ i nyi Zeruzalɛmu ŋa. Nɔ Aɔ̃ Lafɛ̃ɛ nŋɛ ku wɛɛ do iŋɛ.