Bomma 2, 35 - Bibeli do fee

Zoasi wa jɛ jingaui Iku ku kua

¹ Ŋɔi Zoziasi í jɛ jingaui Iku ku kuau Zeruzalɛmu ku saabuò Aɔ̃ Lafɛ̃ɛ. Nɔ à saka mɛɛmu ŋa à ceò jingauu si ajɔ maatɛ̃ɛsiai cukpa sintei adɔ̃u.

² Ŋɔi í jilɛa woo wee ŋau icɛ nŋa ŋa, nɔ í mu nŋa gbugbã a ceò icɛi kpasɛ̃i Aɔ̃ Lafɛ̃ɛ.

³ Ŋɔi í sɔ̃ inɛi Levii ŋa iyi à ya maa kɔ inɛi Izirɛli ŋau fei, aŋa iyi à nya ikã a jɛ ti Aɔ̃ Lafɛ̃ɛu í ni, i jilɛ kpakoi akabuui Aɔ̃ Lafɛ̃ɛ si inɔ kpasɛ̃ iyi Salomɔɔ amai Davidi ilaalui Izirɛliu í mau ŋa. I kù nɛ i maa soo si kɔngɔ má ŋa. Bɛbɛi i cea Aɔ̃ Lafɛ̃ɛ nŋɛ do zamaaɛu icɛ ŋa.

⁴ I jɔ̀ i wɛɛò sɔɔlu ŋa kpasɛ̃ do kpasɛ̃ do si wuaa ikã ikã ŋa si bɛi Davidi do Salomɔɔ amaɛ à kɔ à jilɔɔ si tia.

⁵ I koo i leekĩ kpasɛ̃i Aɔ̃ Lafɛ̃ɛ wuaa do wuaa ku ba i sobi inɛi Izirɛli ŋa iyi aa naa kpasɛ̃ do kpasɛ̃.

⁶ I koo i ce bukii ara ku maajuu ŋa, nɔ i saka mɛɛmui Iku ku kua ŋau i ce sɔɔlui jingauu na kpaasi nŋɛ ŋau, i maa jirimaò idei Aɔ̃ Lafɛ̃ɛ ŋa iyi Moizi í fɔ ŋau.

⁷ Ŋɔi Zoziasi í nya angudã ŋa do iwo ŋa dubu kuntaa (30.000) do kɛtɛ dubu mɛɛta (3.000) hai si gaai nŋu takaɛ í na inɛ ŋa iyi à wa bɛ ku ba a jɛò jingaui Iku ku kuau.

⁸ Ŋɔi inɛ ngboɛ ŋau mɔ à cea zamaau do woo wee ŋau do inɛi Levii ŋau amua do inɔ akã. Ŋɔi Hilikiya do Zakari do Yehiɛli aŋa inɛ ngboi kpasɛ̃i Ilaaɔ̃ ŋau à na woo wee ŋau angudã do iwo dubu minji do cĩɔ mɛɛfa (2.600), do kɛtɛ cĩɔ mɛɛta (300) a jɛò jingaui Iku ku kuau.

⁹ Nɔ Konania do Semaya do Nataneɛli ifɔɛ ŋa do Hasabia do Yeiɛli do Yozabadi inɛ ngboi Levii ŋau à na inɛi Levii ŋa angudã do iwo dubu miiu (5.000) do kɛtɛ cĩɔ miiu (500) a jɛò jingaui Iku ku kuau.

¹⁰ Ŋɔi à ce sɔɔlui icɛu, nɔ woo wee ŋau à waa leekĩ agbɛ nŋa, nɔ inɛi Levii ŋau mɔ à waa leekĩ si wuaa ikã ikã ŋa bɛi ilaalu í fɔu.

¹¹ Ŋɔi à saka mɛɛmu ŋau. Nɔ woo wee ŋau à ya maa gba njɛi mɛɛmu ŋau hai bi inɛi Levii ŋau a maa fãsi bi ku ce kuweeu. Inɛi Levii ŋai à ya maa pũ mɛɛmu ŋau.

¹² Ŋɔi à nya mɛɛmu gɔ ŋa ikã iyi aa ya jo si ina fei sãa sãa na a na inɛ ŋa kpasɛ̃ do kpasɛ̃, ku ba a ceaò Aɔ̃ Lafɛ̃ɛ kuwee bɛi à kɔɔ si tiai Moiziu. Nɔ bɛɛbɛi à cea kɛtɛ ŋau mɔ.

¹³ À sɔ̃ iŋai jingaui Iku ku kuau bɛi wooda í fɔ, nɔ à se iŋa iyi à jilɛ ikã ku ba ku jɛ ti Aɔ̃ Lafɛ̃ɛ si caka nla ŋa. Nɔ à kpɛ̃a inɛ fei gbakã.

¹⁴ Si anyiɛ nɔ à se tu ŋa do ti woo wee ŋau, domi tɔkui Arɔ̃ɔ woo wee ŋau à ce icɛi hee idũ í koo í dũò. À waa joa Ilaaɔ̃ ikpoi iŋa ŋa nɔ à waa ce kuwee iyi à ya jo si ina fei sãa sãa. Na ŋɔi í ce inɛi Levii ŋau à se nŋa iŋa.

¹⁵ Tɔkui Azafu ŋa iyi à jɛ woo kɔ̃ iri ŋau à wa agbɛ nŋa si bɛi Davidi do Azafu do Hemaa ŋa à jilɛ aŋaò Yedutunu woo yɛi ilaaluu. Nɔ woo degbe anu koofa ŋau à wa anu koofa ŋau fei. A kù nɛ a tɛkɛɛ hai agbɛ nŋa, domi kpaasi nŋa inɛi Levii ŋau à waa se nŋa iyi í jɛ tu ŋa wa.

¹⁶ Bɛɛbɛi à jilɛ icɛi ajɔ nŋu bɛ, hai jingaui Iku ku kua hee do kuwee ŋa iyi à ce si bi kuweei Aɔ̃ Lafɛ̃ɛu fei. À ce fei ndɛɛi si bɛi ilaalu Zoziasi í jilɔɔ siu.

¹⁷ Inɛi Izirɛli ŋa iyi à wa bɛ à jɛ jingaui Iku ku kuau ajɔ nŋu, nɔ à jɛ jingaui Pɛ̃ɛ hai nɛ levɛ̃ɛ ajɔ mɛɛje.

¹⁸ Hai waatii walii Samuɛli wa, a kù jɛ jingaui Iku ku kua iyi í to bɛɛbɛ titã si ilɛi Izirɛli. Nɔ ilaalui Izirɛli kãma kù jɛ jingau bɛi Zoziasi do woo wee ŋau do inɛi Levii ŋau do inɛi Zudaa ŋa do inɛi Izirɛli ŋa iyi à wa bɛ fei do inɛi Zeruzalɛmu ŋa à waa jɔ́ɔu.

¹⁹ Si adɔ̃ mɛɛwa do mɛɛjɔsiai bomma ku jɛi Zoziasii à jɛ jingaui Iku ku kuau.

Kɔɔi bomma ku jɛi Zoziasi

²⁰ Si anyii nŋu ŋau bɛ fei, do si anyii iyi Zoziasi í teese kpasɛ̃i Aɔ̃ Lafɛ̃ɛu í tã, ŋɔi Neko ilaalui Ezibiti í dede wa bɔ igũ ilui Kaakemisi si idoi Efaratau. Ŋɔi Zoziasi í dede wa koo siɛ.

²¹ Nɔ Neko í bɛ inɛ ŋa wa a na a sɔ̃ɔ a ni, ilaalu Neko í ni, awɔ ilaalui Zudaa, mii í wa si gãmɛ nwa. Kù jɛ bi tɛɛi ǹ wa n naa igũ nnyi, ilɛ mmu gɔi ǹ wa n koo si. Ilaaɔ̃ í wɛɛ do amu nɔ í ni n kanju n koo. Na nŋu, maà ba Ilaaɔ̃ ku ja ku ba ku maà ce nfeɛ.

²² Amma Zoziasi í kɔ̀ ku jɔ̀ɔ, kù de si idei Nekou itĩ baa do iyi ideu hai bi Ilaaɔ̃i wa naa. Í kpaasi araɛ nɔ í bɔ lɔɔmai Mɛgido wa kooò siɛ igũu.

²³ Ŋɔi ilu bioo ŋa à ta ilaalu Zoziasi, nɔ í sɔ̃ woo ce icɛɛ ŋa í ni, i nɛɛm hai ihɛ̃ ŋa domi ǹ ba kumɛɛ nla nla.

²⁴ Ŋɔi woo ce icɛɛ ŋau à nyaa wa hai si sarɛtii igũɛ à na à dasiɛ si sarɛti mmuɛ gɔ à baaɛ wa Zeruzalɛmu. Ŋɔi í ku nɔ à suu si balɛi balaɛ ŋa. Ŋɔi inɛi Zudaa ŋa do inɛi Zeruzalɛmu ŋa fei à kpataa.

²⁵ Ŋɔi Zeremi í nya irii akũ gɔ si ikui Zoziasiu. Hai waati nŋu bɛ hee ku baa nnyi, inɛmɔkɔ do inaabo woo kɔ̃ iri ŋau fei à ya maa kɔ̃ò Zoziasi irii, nɔ à baa a jilɔɔ si kucei inɛi Izirɛli ŋai. Iri ŋau à kɔ ŋa si tiai irii akũ.

^26-27 Faajii icɛi Zoziasi ŋa hai sinte nŋa hee ku bɔ kɔɔɛ à kɔɔ si tiai ilaalui Izirɛli do Zudaa ŋa. À kɔ bɛi í ya jirima ide iyi à kɔ si woodai Aɔ̃ Lafɛ̃ɛ dee dee.