Bomma 2, 33 - Bibeli do fee

Bomma ku mui Manasee

¹ Manasee í nɛi adɔ̃ maateeji waati iyi í jɛ bomma. Nɔ í ce si bommau adɔ̃ ciitaa do miiu ilui Zeruzalɛmu.

² Ŋɔi í ce mii iyi kù dɔ̃a Aɔ̃ Lafɛ̃ɛ si. Í too si kuce laalɔi dimi mmu ŋa iyi Aɔ̃ Lafɛ̃ɛ í lele si wajui inɛi Izirɛli ŋau.

³ Nŋui í teese í maa bi kuwee ŋa iyi baaɛ Ezekiasi í lɛgɛ si antaii geete ŋau. Nɔ í maa iwɛ̃ Baali ŋa bi kuwee ŋa, nɔ í gũa iwɛ̃ Asera jĩi ŋa. Nɔ í ya gulɛ ku maa tɔɔ cukpa do inunu do leleaɔ̃ ŋa fei.

⁴ Ŋɔi í maa iwɛ̃ ŋa bi kuwee ŋa si inɔ kpasɛ̃i Aɔ̃ Lafɛ̃ɛ, baa do iyi Aɔ̃ Lafɛ̃ɛ í fɔ wo í ni, ilui Zeruzalɛmui an ce bi kuwam hee do ajɔ fei.

⁵ Í ma bii à ya weea cukpa do inunu do leleaɔ̃ ŋa si inɔ bantuma minjii kpasɛ̃i Aɔ̃ Lafɛ̃ɛu.

⁶ Nɔ í so amaɛ ŋa í jo ŋa í ceò kuwee si lɔɔmai Hinɔmu. Í ya ce alisi nɔ í ce dobu dobu ŋa. Nɔ í jilɛ inɛ ŋa iyi à ya ba iku ŋa ide ku fɔ má nɔ à ya fɔ mii iyi á na ku ce. Í ce mii iyi kù dɔ̃a Aɔ̃ Lafɛ̃ɛ si í dedeò idɔɔkɔ̃ɛ.

⁷ Ŋɔi í so mii iyi í jɔ iwɛ̃ iyi í ceu í jilɔɔ si inɔ kpasɛ̃i Ilaaɔ̃u. Amma Ilaaɔ̃ í tako í sɔ̃ Davidi do amaɛ Salomɔɔ í ni, si dimii Izirɛli fei Zeruzalɛmui ǹ cica do kpasɛ̃u ihɛ̃ ǹ ce bi kuwam hee do ajɔ fei.

⁸ Bii inɛi Izirɛli ŋau à waa ceò ide iyi ǹ sɔ̃ ŋa fei icɛ, bii à waa jirima wooda do ikɔ iyi Moizi woo ce icɛm í na ŋa, n kaa n nya ŋa hai si ilɛ iyi ǹ jilɛa bala nŋa ŋau.

⁹ Amma Manaseei í jɔ̀ inɛi Zudaa do Zeruzalɛmu ŋa à yaa hai si kpãa jiida à waa ce laalɔ iyi í re baa ti inɛi ilɛ ŋa iyi Aɔ̃ Lafɛ̃ɛ í ce nfe nŋa si wajui inɛi Izirɛli ŋa.

¹⁰ Ŋɔi Aɔ̃ Lafɛ̃ɛ í ni Manasee do zamaaɛu a ce laakai, amma a kù gbɔ ideɛ.

¹¹ Ŋɔi Aɔ̃ Lafɛ̃ɛ í jɔ̀ inɛ ngboi soogei ilaalui Asiri ŋau à naa igũ si ŋa nɔ à mu Manasee à daa si isɔ si imɔ, nɔ à dũu do seseei isɔ nkpa ŋa à bɔɛò ilɛi Babilɔni.

¹² Waati iyi í wa si inɔ kufɔ, ŋɔi í tɔɔ Aɔ̃ Lafɛ̃ɛɛ, nɔ í kaye araɛ mam mam si wajui Aɔ̃ Lafɛ̃ɛi balaɛ ŋau.

¹³ Í tɔɔ Aɔ̃ Lafɛ̃ɛ má, nɔ Aɔ̃ Lafɛ̃ɛ í gbɔ kutɔɔɛ, nɔ í baaɛ wa Zeruzalɛmu si bommaɛu má. Ŋɔi Manasee í mà iyi Aɔ̃ Lafɛ̃ɛ nŋu akãi í jɛ ntɔ.

¹⁴ Si anyiɛ í ma bindi kugboka gɔ do anyii ilui Davidi waatɔ Zeruzalɛmu do nunui alɛi idoi Gihɔ̃ɔ. Bindiu í sinti hai lɔɔmai Sedorɔ̃ɔ nɔ í kaako mbɔi iluu iyi à ya kpe Ofɛli í bɔ hee anu koofai Cɛ̃ɛ ŋau. Ŋɔi í jilɛ inɛ ngboi sooge ŋa má si ilu ku nɛ gbugbãi Zudaa ŋau fei.

¹⁵ Ŋɔi í nya iwɛ̃ ŋa iyi à wa inɔ kpasɛ̃i Aɔ̃ Lafɛ̃ɛu hee do iwɛ̃ iyi nŋu takaɛ í gbeu. Nɔ í lɛgɛ bi kuweei iwɛ̃ ŋa iyi í ma si geetei kpasɛ̃i Aɔ̃ Lafɛ̃ɛ ŋau do si ilui Zeruzalɛmu fei. Nɔ í koo í nyɔ ŋa do alalai iluu.

¹⁶ Ŋɔi í teese bi kuweei Aɔ̃ Lafɛ̃ɛu nɔ í ce si kuweei anu akã ŋa do ti saabu ŋa nɔ í ni inɛi Zudaa ŋau a tɔɔ Aɔ̃ Lafɛ̃ɛi inɛi Izirɛli ŋau nŋu akã.

¹⁷ Zamaau de í ya maa ce kuwee ŋa má si bi kuweei geete ŋau, amma Aɔ̃ Lafɛ̃ɛ nŋai à ya maa cea.

¹⁸ Faajii Manasee ŋa do kutɔɔ iyi í ce do ide ŋa iyi walii ŋau à sɔ̃ɔ do irii Aɔ̃ Lafɛ̃ɛi inɛi Izirɛli ŋa à kɔɔ si tiai icɛi ilaalui Izirɛli ŋa.

¹⁹ Hai kutɔɔɛ do yaase bɛi Ilaaɔ̃ í jɛaa do dulum ŋa iyi í ce do dee dee hai jɛɛ do si inya ŋa bii í ce bi kuweea iwɛ̃ si geete ŋau do bii í gũa iwɛ̃ Asera jĩi ŋa do kuta ŋa hee ku maa kaye araɛu à kɔ ŋa si tiai Hozai.

²⁰ Manasee í na í ku nɔ à suu kpasɛ̃ɛ. Ŋɔi amaɛ Amɔɔ í jɛ bomma si agbɛɛ.

Bomma ku jɛi Amɔɔ

²¹ Amɔɔ í nɛi adɔ̃ kɔnfia do minji waati iyi í jɛ bomma. Nɔ í ce si bommau adɔ̃ minji Zeruzalɛmu.

²² Nɔ í ce mii iyi kù dɔ̃a Aɔ̃ Lafɛ̃ɛ si bɛi baaɛ Manasee í ceu. Wa cea iwɛ̃ ŋa iyi Manasee í gbe ŋau fei kuwee nɔ wa tɔɔ ŋa.

²³ Ŋɔi í kɔ̀ ku kaye araɛ si wajui Aɔ̃ Lafɛ̃ɛ bɛi baaɛ Manasee í ceu, amma í kɔ̃ɔsi kuraraɛ wa kooi.

²⁴ Ŋɔi akaweɛ ŋau à na à dĩa anu tɔɔsii zamba, nɔ à koo à kpaa inɔ kpasɛ̃ɛ.

²⁵ Amma zamaai ilɛu í kpa inɛ ŋa iyi à dĩa tɔɔsiu fei. Nɔ à so amaɛ Zoziasi í jɛ ilaalu si agbɛɛ.