Bomma 2, 32 - Bibeli do fee

Senakeribu í naa igũ si ilɛi Zudaa

¹ Ezekiasi í ce iyi í jɛ dee dee si wajui Ilaaɔ̃. Si anyiɛ, ŋɔi Senakeribu ilaalui Asiriu í naa igũ si ilu ku nɛ gbugbãi Zudaa ŋau ku ba ku gba ŋa.

² Iyi Ezekiasi í yɛ Senakeribu wa naa igũ si ilui Zeruzalɛmu

³ ŋɔi í tɔtɔɔ inɛ ngbo ŋa do inɛ ngboi sooge ŋau à busi njɛ ku ba a koo a dĩ isɔ̃ ŋa iyi à wa alalai iluu. Nɔ à jɛsi ideɛu.

⁴ Ŋɔi à tɔtɔɔ inɛ nkpɔ nkpɔ, nɔ à koo à dĩ isɔ̃ ŋau fei do cɔɔ iyi wa cã si aninii ilɛ nŋau. À ce bɛɛbɛi si na iyi í jɔ̀ a kù bi inɛi Asiri ŋa a to wa a na a ba inyi nkpɔ nkpɔ.

⁵ Ŋɔi Ezekiasi í ce kookaai í ma bindi iyi í lɛgɛu nɔ í ma ile kugboka ŋa si antaiɛ. Nɔ í ma bindi mmu do waduude. Nɔ í koo í kɔ̃ɔsi gbugbãi Miloo si ilui Davidiu, nɔ í ce sɔɔlui jĩnɛi igũ nkpɔ nkpɔ do tɛli ŋa.

⁶ Ŋɔi í cicaa zamaai iluu inɛ ngboi sooge ŋa. Nɔ í tɔtɔɔ inɛ fei si bantumai anu koofai iluu bi tɛɛ bɛ wa mu nŋa gbugbã. Í sɔ̃ ŋa í ni,

⁷ i dasi gbugbã nɔ i ce wɔɔkɔ ŋa. I maà jɔ̀ zigi nŋɛ ku da, nɔ i maà ce njoi ilaalui Asiriu do zamaa bututuɛu fei ŋa, domi awa à nɛ gbugbã à roo.

⁸ Gbugbã nŋa, ti arai. Tu wa, Aɔ̃ Lafɛ̃ɛ nwai á sobi wa nɔ ku ja nwa. Nɔ zamaau í dasi idei Ezekiasi ŋau naanɛ.

Ide iyi Senakeribu í bɛò inɛ ŋa Zeruzalɛmu

⁹ Si anyii nŋu, Senakeribu ilaalui Asiri do soogeɛ ŋa fei à bɔ igũ Lakisi. Hai bɛi í bɛ inɛ ŋa bi Ezekiasi do inɛi Zudaa ŋa iyi à wa Zeruzalɛmu fei a koo a sɔ̃ ŋa a ni,

¹⁰ Senakeribu ilaalui Asiriu í ni mii ì waa kaaba ŋa iyi ì waò Zeruzalɛmu iyi à bu koeu ŋa.

¹¹ Ezekiasi í ya maa ni Aɔ̃ Lafɛ̃ɛ nŋɛi á faaba ŋɛ hai si awɔi Senakeribu, amma wa lɛlɛ ŋɛi. Ari do agbɛi á kpa ŋɛ bɛ fei.

¹² Kù jɛ nŋu Ezekiasii í lɛgɛ bi kuweei Aɔ̃ Lafɛ̃ɛ ŋa iyi à wa si geete ŋau, nɔ í ni inɛi Zudaa do inɛi Zeruzalɛmu ŋau fei a ya bɔ inya akã a cea Aɔ̃ Lafɛ̃ɛ kuwee ŋa a maa tɔɔɛ?

¹³ I kù mà mii iyi Senakeribu do balaɛ ŋa à cea zamaai ilɛ mmu ŋau ŋa ba. Iwɛ̃i ilɛ ŋau bɛ à yɔkɔ à nya inɛ nŋa ŋa hai si awɔɛ ba.

¹⁴ Si inɔi iwɛ̃i ilɛ ŋa iyi balaɛ ŋa à ce nfe nŋau fei, yooma nŋai í yɔkɔ í faaba zamaaɛ. Bɛirei iŋɛ ì ce ì waa tamaa Aɔ̃ Lafɛ̃ɛ nŋɛ á yɔkɔ ku faaba ŋɛ hai si awɔɛ.

¹⁵ Na nŋu, i maà jɔ̀ Ezekiasi ku maa lɛlɛ ŋɛ, ku maa dĩ iju nŋɛ bɛɛbɛ. I maà naanɛɛ ŋa, domi iwɛ̃i ilɛ mmu kãma walakɔ ti bomma kãma kù yɔkɔ kù faaba zamaaɛ hai si awɔi Senakeribu do balaɛ ŋa. Do iwoi Aɔ̃ Lafɛ̃ɛ nŋɛ á too ku faaba ŋɛò.

¹⁶ Ŋɔi woo bɛi Senakeribu ŋau à wasi Aɔ̃ Lafɛ̃ɛ do Ezekiasi woo ce icɛɛ ku bu.

Senakeribu í bu Ilaaɔ̃

¹⁷ Ŋɔi Senakeribu í kɔ tia í bu Aɔ̃ Lafɛ̃ɛi inɛi Izirɛli ŋau í ni, iwɛ̃i inɛi ilɛ mmu ŋau à mɔngɔ ku faaba inɛ nŋa ŋa hai si awɔm. Bɛɛbɛ mɔi Aɔ̃ Lafɛ̃ɛi Ezekiasi kaa yɔkɔ ku faaba zamaaɛu hai si awɔm.

¹⁸ Ŋɔi woo bɛi Senakeribu ŋau à dɔ̃ anu hee lele si inɛi Zeruzalɛmu ŋa iyi à wa antaii bindiu do feei inɛi Zudaa ŋau ku ba a da zigi nŋa nɔ a kãmia ŋa a gba iluu si ŋa.

¹⁹ Ŋɔi à wasi ku fɔ ide si gãmɛi Aɔ̃ Lafɛ̃ɛi Zeruzalɛmu bɛi à ya cea iwɛ̃i ilɛ mmu ŋa iyi amanɛ ŋa à gbe do awɔ nŋa.

Kusai inɛi Asiri ŋa do ikui Senakeribu

²⁰ Ŋɔi ilaalu Ezekiasi do walii Ezai amai Amɔɔsu à dɔ̃ anu hee lele à waa tɔɔ Ilaaɔ̃ faaba.

²¹ Ŋɔi Aɔ̃ Lafɛ̃ɛ í bɛ amaleka gɔ si asɔi inɛi Asiri ŋau, nɔ amalekau í kpa sooge ilu wɔɔkɔ ŋau do inɛ ngbo nŋa ŋau fei. Ŋɔi ilaalui Asiriu í nyi ilɛɛ do anyɔ nla nla. Ŋɔi ajɔ nŋu gɔ í koo í lɔ ilei iwɛ̃ɛu, nɔ amai nŋu takaɛ ŋa à kpaa bɛ.

²² Bɛɛbɛi Aɔ̃ Lafɛ̃ɛ í faabaò Ezekiasi do inɛi Zeruzalɛmu ŋa hai si awɔi Senakeribu ilaalui Asiri, do hai si awɔi inɛ fei. Nɔ í bii anyi nŋa si mbɛɛ ŋa iyi à waa kaako ŋa.

²³ Nɔ inɛ nkpɔi í ya naa Aɔ̃ Lafɛ̃ɛ amua ŋa wa Zeruzalɛmu. Bɛɛbɛ mɔi à ya naa Ezekiasi amuai mii ku nɛ fia ŋa wa nkpɔ nkpɔ. Hai waati bɛɛbɛi, í nya iri si ilɛ mmu ŋa fei.

Kɔɔi bomma ku mui Ezekiasi

²⁴ Waati bɛɛbɛ Ezekiasi í ce bɔ̃ɔ hee í maai iku. Ŋɔi í ce kutɔɔ, nɔ Aɔ̃ Lafɛ̃ɛ í jɛaa nɔ í nyisiɛ nyinda gɔ iyi á jɔ̀ ku mà iyi á ba iri.

²⁵ Amma Ezekiasi kù mà jiida iyi Aɔ̃ Lafɛ̃ɛ í ceaa, nɔ í lɔsi fufu ku tɔɔ. Ŋɔi idɔɔkɔ̃i Ilaaɔ̃ í dede siɛ do si inɛi Zudaa do Zeruzalɛmu ŋa.

²⁶ Ŋɔi Ezekiasi do inɛi Zeruzalɛmu ŋau à kaye ara nŋa à tɔɔ suuru na fufu ku tɔɔ nŋa, nɔ idɔɔkɔ̃i Ilaaɔ̃ kù naa si ŋa má si waatii kuwɛɛi Ezekiasi.

²⁷ Ezekiasi í ba amani nkpɔ nkpɔ nɔ í nɛ amboe. Nɔ í ce bi ku singa isɔ fũfũ do wura do kuta ku nɛ fia ŋa do tuae ku dɔ̃ inunu ŋa do tɛli ŋa do mii ku nɛ fia dimi ikã ikã fei,

²⁸ do ile bi ku jilɛ bilee ŋa do atɛ̃ vɛ̃ɛ do ikpoi olivi ŋa do aroi mɛɛmu dimi ikã ikã fei, do bi ku jɛi mɛɛmu gaa ŋau.

²⁹ Ezekiasi í ma ilu ŋa nɔ í nɛ mɛɛmu gaa ŋa nkpɔ nkpɔ, hai angudã ŋa do iwo ŋa do kɛtɛ ŋa. Ntɔ ntɔ Ilaaɔ̃ í muaa amanii nla nla.

³⁰ Nŋui í dĩ acãi inyii idoi Gihɔ̃ɔ í jɔ̀ inyiu í sinda wa bɔ ikpa nunui alɛ si ilui Davidiu. Mii ŋa iyi Ezekiasi wa ce fei í kooai.

³¹ Na ŋɔi í jɔ̀ waati iyi inɛ ngboi Babilɔni ŋau à bɛ inɛ ŋa siɛ a koo a beeɛ idei maamaake iyi í ce si ilɛu, Ilaaɔ̃ í jɔ̀ɔi titã ku ba ku cɔ laakaiɛ nɔ ku mà mii iyi í wa si idɔɛ fei.

³² Faajii Ezekiasi do icɛ ŋa iyi í ce dee dee si wajui Ilaaɔ̃, à kɔɔ si tiai ilaalui Zudaa do Izirɛli ŋau si kuyɛ iyi walii Ezai amai Amɔɔsu í ce.

³³ Ezekiasi í ku, nɔ à suu si geete tengi bii balɛi tɔkui Davidi ŋau à wa. Ŋɔi inɛi Zeruzalɛmu ŋau do inɛi Zudaa ŋau fei à naa à waa niaa tobaikala. Nɔ amaɛ Manasee í jɛ bomma si agbɛɛ.