Bomma 2, 31 - Bibeli do fee

Ezekiasi í teese í jilɛ icɛi kpasɛ̃i Aɔ̃ Lafɛ̃ɛ

¹ Waati iyi à jɛ jingauu à tã, ŋɔi inɛi Izirɛli ŋa iyi à wa bɛ ŋau fei à bɔ si ilui Zudaa ŋau fei, nɔ à koo à lɛgɛ kuta ŋa iyi à lɔa iwɛ̃ ŋau nɔ à da jĩi iyi à lɔa iwɛ̃ Asera ŋau. À kɛkɛ bi kuwee nŋa ŋa iyi à ma si geete ŋau si ilɛi Zudaa do Bɛnzamɛɛu fei. Si anyiɛ nɔ à koo à ce bɛɛbɛ si ilɛi Efaraimu do si ti Manasee má. Iyi à tã, ŋɔi inɛ fei í nyi ideɛ.

² Ŋɔi Ezekiasi í jɔ̀ woo wee ŋau do inɛi Levii ŋau à nyi si icɛ nŋa ŋa. Í kpɛ̃a wuaa fei icɛɛ iyi í nɛ ku ce ku ba a ce kuwee ŋa iyi à ya jo si ina fei sãa sãa do kuweei anu akã ŋa, nɔ a ya kɔ̃ irii a maa saabu Aɔ̃ Lafɛ̃ɛ si anu koofai kpasɛ̃ɛ.

³ Ŋɔi ilaaluu í na mbɔi amaniɛ ŋa a ya ceò kuweei alɛò daakɔ fei iyi à ya jo si ina fei sãa sãa do ti ajɔi kusĩmi ŋa do ti cukpa titɔ̃ ŋa do ti jingau ŋau, si bɛi à kɔɔ si woodai Aɔ̃ Lafɛ̃ɛ.

⁴ Nɔ í sɔ̃ inɛi Zeruzalɛmu ŋa í ni a na woo wee ŋau do inɛi Levii ŋau iyi í nɛ ku jɛ tu ŋa ku ba a yɔkɔ a na ara nŋa si woodai Aɔ̃ Lafɛ̃ɛ ku jirima.

⁵ Iyi ideu í fangaa ŋɔi inɛi Izirɛli ŋau à naaò amaajɛ sintei iko nŋa ŋa wa, hai bilee do atɛ̃ vɛ̃ɛ do ikpoi olivi do nyikɔ̃ hee do amaajɛ ŋa iyi à gbe fei. Nɔ à naaò akã wa si mɛɛwa fei bututu.

⁶ Nɔ inɛi ilui Zudaa ŋa fei, hai inɛi Zudaa ŋa taka nŋa hee do inɛi Izirɛli ŋa iyi à wa bɛ, à naaò akã si mɛɛwa feii kɛtɛ nŋa ŋa do angudã do iwo nŋa ŋa wa má. Nɔ à nya amua ŋa iyi à jilɛ ikã ku jɛ ti Aɔ̃ Lafɛ̃ɛ nŋa à naa à timbi ŋa ikɔ nkpɔ nkpɔ.

⁷ À sinti ku timbi ŋa ikɔ ikɔi hai si cukpa mɛɛtasia, nɔ à koo à tãa si cukpa mɛɛjesia.

⁸ Ŋɔi Ezekiasi do inɛ ngbo ŋau à naa à yɛ ikɔ ŋau, nɔ à saabu Aɔ̃ Lafɛ̃ɛ à weea zamaau.

⁹ Ŋɔi Ezekiasi í bee woo wee ŋau do inɛi Levii ŋau í ni, ikɔ yooma ŋai ihɛ̃.

¹⁰ Nɔ Azaria woo wee nlau si nyaanzei Sadɔku í jɛaa í ni, hai waati iyi inɛ ŋa à sinti amua ŋa ku naaò wa kpasɛ̃i Aɔ̃ Lafɛ̃ɛ ihɛ̃, sɔnda í ya maa wɛɛi ka jɛ ka yo, nɔ ku gbe má domi Aɔ̃ Lafɛ̃ɛ í weea inɛɛ ŋa. Nɔ nkpɔ nkpɔ iyi í gbeu mbɛ.

¹¹ Ŋɔi Ezekiasi í ni a teese ile ŋa si kpasɛ̃i Aɔ̃ Lafɛ̃ɛ. Nɔ à teese ŋa.

¹² Ŋɔi à ko amaajɛ sinte ŋau do akã si mɛɛwa ŋau do amua ŋa iyi à jilɛa Aɔ̃ Lafɛ̃ɛu à dasi inɔ ile ŋau. Ŋɔi à so inɛi Levii gɔ iyi à ya kpe Konania wa jɛ inɛ ngboi amaajɛ ŋa iyi à naaò wau, nɔ ifɔɛ Simei wa jɛ minjisiaɛ.

¹³ Ilaalu Ezekiasi do inɛ ngboi kpasɛ̃i Ilaaɔ̃u Azaria woo wee nlau à so Yehiɛli do Azazia do Nahati do Asaɛli do Yerimɔti do Yozabadi do Eliɛli do Isimakia do Mahati do Benaya ku ba a maa sobi Konania do Simei si icɛu.

¹⁴ Nɔ à so Kore amai Imuna inɛ ngboi amua iyi à naa Ilaaɔ̃ wa. Koreu inɛi Leviii, nŋui í jɛ woo degbe anu koofa iyi í wa do ikpa nunui daakɔi kpasɛ̃i Aɔ̃ Lafɛ̃ɛ. Nŋui í nɛ ku so amua ŋa iyi inɛ ŋa à ya na do idɔɔbi nŋa hee do iyi à jilɛa Ilaaɔ̃ ku kpɛ̃a

¹⁵ inɛi Levii kpaasiɛ ŋa, hai ama keeke do inɛ ngbo fei wuaa do wuaa. Nɔ à so Edɛni do Miniamɛɛ do Zozue do Semaya do Amaria do Sekania à jilɛ ŋa si ilui woo wee ŋau a ya maa sobiɛ si icɛu.

¹⁶ À cea inɛi Levii ŋa iyi à kɔ iri nŋa si tia fei ikpɛ̃, hai inɛmɔkɔ iyi í nɛ adɔ̃ mɛɛta hee do ku lesi fei, hee do inɛ ŋa iyi aa ya naa wuaa do wuaa a maa ce icɛ ajɔ do ajɔ si kpasɛ̃i Aɔ̃ Lafɛ̃ɛ.

¹⁷ À kɔ irii woo wee ŋau nyaanze do nyaanze, nɔ à kɔ irii inɛi Levii ŋau mɔ hai aŋa iyi à nɛ adɔ̃ kɔnfia walakɔ do ku lesi si bɛi à jilɛ ŋa wuaa do wuaa si icɛu.

¹⁸ À kɔ iri nŋa ŋa hee do nyaanze nŋa ŋa fei, hai irii abo nŋa ŋa do irii ama inɛmɔkɔ do ama inaabo nŋa ŋa. Bɛɛbɛi à cea woo wee ŋa do inɛi Levii ŋau fei, si na iyi í jɔ̀ à na ara nŋa si icɛi Aɔ̃ Lafɛ̃ɛu dee dee.

¹⁹ Nɔ si ilui woo wee ŋau à cica inɛ gɔ ŋa iyi aa koo a kpɛ̃a tɔkui Arɔ̃ɔ woo wee ŋa iyi à wa si ilɛɛko nŋa ŋa ikpɛ̃i sɔnda nŋa hee do inɛi Levii ŋa iyi à kɔ iri nŋa fei.

²⁰ Bɛɛbɛi Ezekiasi í ce si ilɛi Zudaau fei. Nɔ í ce iyi í sĩa do iyi í dee dee do iyi í jɛ ntɔ si wajui Aɔ̃ Lafɛ̃ɛɛ.

²¹ Icɛ iyi í ce fei ku ba inɛ ŋa a maa tɔɔ Ilaaɔ̃ nɔ a maa jirima woodaɛ ŋa í cooi do idɔɛ fei wa dɛdɛò Aɔ̃ Lafɛ̃ɛɛ. Nɔ mii iyi wa ce fei wa kooa.