Bomma 2, 30 - Bibeli do fee

Sɔɔlui jingaui Iku ku kua

^1-5 Adɔ̃ fei si cukpa sintei adɔ̃i à nɛ a jɛ jingaui Iku ku kua, amma adɔ̃ nkpɔ nkpɔi í lɔ iyi a kù coo. Ŋɔi ilaalu Ezekiasi do inɛ ngbo ŋau do inɛi Zeruzalɛmu ŋa fei à dasi idɔ aŋa a jɛ jingauu, amma jingauu kaa yɔkɔ ku ce si cukpa sintei adɔ̃u si na iyi í jɔ̀ woo wee ŋau nkpɔ nŋa kù ce buki iyi á jɔ̀ a maaju waati bɛɛbɛu, nɔ zamaau kù tɔtɔɔ Zeruzalɛmu. Ŋɔi ilaaluu do zamaau fei à gbɔsi njɛ à ni jingauu ku ce si cukpa minjisia. Ŋɔi à kɔ tia à sambaɛ si ilɛi Izirɛli fei hai Bɛɛseba hee ku bɔ Dãa ku ba inɛ ŋa a naa kpasɛ̃i Aɔ̃ Lafɛ̃ɛ Zeruzalɛmu bɛ a naa a jɛ jingauu. Ilaalu Ezekiasi takaɛ í kɔa dimii Efaraimu ŋa do dimii Manasee ŋa iyi à wa ikpa awɔ njɛi kpãai inunu tia í kpe ŋa a naa a jɛ jingauu.

⁶ Ŋɔi amaabɛ ŋau à kooò tiai ilaalu ŋau si ilɛi Izirɛli do Zudaa fei. Nɔ si bɛi í jilɛ nŋau, à wasi ku ni, inɛi Izirɛli ŋa, iŋɛ iyi ì ba ì fita hai si awɔi ilaalui Asiri ŋau ŋa, i nyi wa bi Aɔ̃ Lafɛ̃ɛi Aburahamu do Izaaki do Izirɛli ŋa, ku ba nŋu mɔ ku nyi wa bi tu ŋɛ.

⁷ I maà yɛ bɛi baa nŋɛ ŋau ŋa do bɛi kpaasi nŋɛ ŋau iyi à ce dulum bi Aɔ̃ Lafɛ̃ɛi bala nŋa ŋa. Dulum du ŋa í jɔ̀ Aɔ̃ Lafɛ̃ɛ í ce nfe nŋa bɛi ì waa yɔɔ ŋa.

⁸ I maà jɔ̀ itĩ nŋɛ ku yika bɛi bala nŋɛ ŋau. I sũa Aɔ̃ Lafɛ̃ɛ nŋɛ iri ilɛ ŋa mam mam, nɔ i nyi wa i naa i tɔɔɛ ŋa si kpasɛ̃ iyi í cica í jɛ tɛɛ hee do ajɔ fei, ku ba idɔɔkɔ̃ nla nlaɛ ku sũ.

⁹ Bii ì nyi wa bi Aɔ̃ Lafɛ̃ɛ ŋa, inɛ ŋa iyi à mu kpaasi nŋɛ ŋa do nyaanze nŋɛ ŋa aru à nɛòu, aa ce araare nŋa nɔ a jɔ̀ ŋa a baa wa si ilɛu ihɛ̃. Ntɔ ntɔ, Aɔ̃ Lafɛ̃ɛ nŋɛ í nɛ suuru, nɔ araareɛ í la. Bii ì nyi wa bi tɛɛ ŋa, kaa sinda ku to nŋɛ anyi.

¹⁰ Bɛɛbɛi amaabɛ ŋau à too ilu do ilu si ilɛi Efaraimu do ti Manasee hee ku bɔ ilɛi Zabulɔ̃ɔ. Amma inɛ ŋa à waa nyaanyi ŋa nɔ à waa yaako ŋa.

¹¹ Do nŋu fei de inɛi Azɛɛ gɔ ŋa do inɛi Manasee gɔ ŋa do inɛi Zabulɔ̃ɔ gɔ ŋa à kaye ara nŋa nɔ à naa Zeruzalɛmuu.

¹² Nɔ Ilaaɔ̃ í jɔ̀ idɔi inɛi Zudaa ŋa í jɛ akã nɔ à jɛsi a jirima ide iyi ilaaluu do inɛ ngbo ŋau à sɔ̃ ŋa.

Jingaui Iku ku kua

¹³ Ŋɔi zamaa nla nla gɔ í tɔtɔɔ wa Zeruzalɛmu si cukpa minjisiai adɔ̃u ku ba a jɛ jingaui Pɛ̃ɛ hai nɛ levɛ̃ɛu.

¹⁴ Nɔ inɛ ŋau à dede à koo à lɛgɛ bi kuweea iwɛ̃ ŋa iyi à wa Zeruzalɛmu ŋau do si bii à ya jo tuae ŋau. Nɔ à ko fei ndɛɛ à koo à dasi ŋa si lɔɔmai acãi inyii Sedorɔ̃ɔ.

¹⁵ Ŋɔi anyɔ í mu woo wee ŋau do inɛi Levii ŋau, nɔ à koo à ce buki iyi á jɔ̀ a maajuu. Si ajɔ maatɛ̃ɛsiai cukpau nɔ à bɔ kpasɛ̃i Aɔ̃ Lafɛ̃ɛ à saka angudãi Iku ku kua ŋa nɔ à ce kuwee ŋa iyi à ya jo si ina fei sãa sãa.

¹⁶ Ŋɔi inɛ fei í wa agbɛɛ dee dee si bɛi woodai Moizi inɛi Ilaaɔ̃u wa fɔu. Ŋɔi woo wee ŋau à waa gba njɛu hai bi inɛi Levii ŋau à waa fãsi bi kuweeu.

¹⁷ Si inɔi zamaau, inɛ nkpɔi kù ce buki iyi á jɔ̀ a maajuu, nɔ a kù nɛ kpãa a saka angudãi Iku ku kua. Na nŋu, inɛi Levii ŋau à waa saka nŋa mɛɛmu ŋa iyi aa ceaò Aɔ̃ Lafɛ̃ɛ kuweeu.

¹⁸ Inɛi Efaraimu ŋa do inɛi Manasee ŋa do inɛi Isakaa ŋa do inɛi Zabulɔ̃ɔ ŋai a kù ce buki iyi á jɔ̀ a maajuu. Do nŋu fei, à jɛ jingaui Iku ku kua baa do iyi woodai Ilaaɔ̃ wa ganji ŋa. Na nŋu, Ezekiasi í ce nŋa kutɔɔ í ni, Aɔ̃ Lafɛ̃ɛ, awɔ inɛ jiidai.

¹⁹ Cea inɛ ŋau suuru, domi à na ara nŋa do idɔ nŋa fei à waa dɛdɛɛ, awɔ Aɔ̃ Lafɛ̃ɛi bala nŋa ŋau, baa do iyi a kù ce bukii ara ku maajuu.

²⁰ Ŋɔi Aɔ̃ Lafɛ̃ɛ í gba kutɔɔi Ezekiasiu, nɔ í cea zamaau suuru.

²¹ Bɛɛbɛi inɛi Izirɛli ŋa iyi à wa Zeruzalɛmuu à jɛ jingaui Pɛ̃ɛ hai nɛ levɛ̃ɛu ajɔ mɛɛje do inɔ didɔ̃ nla nla, nɔ ajɔ fei inɛi Levii ŋau do woo wee ŋau à ya wasi ku saabu Aɔ̃ Lafɛ̃ɛi do gbugbãi jĩnɛi iri ku kɔ̃ nŋa ŋa fei.

²² Ŋɔi Ezekiasi í saabu inɛi Levii ŋau fei na icɛ iyi à cea Aɔ̃ Lafɛ̃ɛ. Si azumau bɛ fei, ijɛi jingaui à waa jɛ, à waa ceò kuweei anu akã ŋa, nɔ à ya kɔ̃ iri a maa saabuò Aɔ̃ Lafɛ̃ɛi bala nŋa ŋau.

²³ Ŋɔi zamaau fei í jɛsi jingau ku mɔsi zakai ajɔ mɛɛje má. Nɔ à jɛ nŋu mɔ má do inɔ didɔ̃.

²⁴ Ezekiasi ilaalui Zudaau í na zamaau kɛtɛ dubu (1.000) do angudã do iwo dubu mɛɛje (7.000). Nɔ inɛ ngbo ŋau à na kɛtɛ dubu (1.000) do angudã do iwo dubu mɛɛwa (10.000). Nɔ woo wee ŋa à ce buki iyi á jɔ̀ a maajuu aŋa nkpɔ nkpɔ.

²⁵ Inɛi Zudaa ŋau fei, hai woo wee ŋa do inɛi Levii ŋa hee do inɛ ŋa iyi à naa hai ilɛi Izirɛli do inɛ njoo ŋa iyi à wa ilɛi Izirɛli do ilɛi Zudaau, aŋa fei à wɛɛò inɔ didɔ̃.

²⁶ Inɔ didɔ̃ nla nlai í wa Zeruzalɛmu. Nɔ hai waatii Salomɔɔ amai Davidiu wa, jingau nkãma kù ce iyi í to bɛɛbɛ titã si ilui Zeruzalɛmu.

²⁷ Ŋɔi woo wee ŋau do inɛi Levii ŋau à dede nɔ à weea zamaau. Nɔ Aɔ̃ Lafɛ̃ɛ í gbɔ kutɔɔ nŋa, domi kutɔɔu í to siɛ hee lele bi kuwa kumáɛu.