Bomma 2, 3 - Bibeli do fee

Kpasɛ̃i Aɔ̃ Lafɛ̃ɛ ku ma

¹ Ŋɔi Salomɔɔ í sinti kpasɛ̃i Aɔ̃ Lafɛ̃ɛu ku ma ilui Zeruzalɛmu si iri kutai Mɔriya tengi bii Aɔ̃ Lafɛ̃ɛ í naa si Davidi baaɛu wo. Davidi í ce sɔɔlui inyaui si bantuma bii Ɔɔnaa inɛi Zebusiu í ya kpokpo bileeɛ.

² Í sinti ku maui si ajɔ minjisiai cukpa minjisia si adɔ̃ mɛɛsiai bomma ku jɛɛ.

³ Bɛi Salomɔɔ í wã ileu wa maa wee. Gonta sisɔu í wɛɛi agbãawɔ kita. Gonta kandaau mɔ agbãawɔ kɔnfia.

⁴ Kusɔi anu koofai wajuu í nɛ agbãawɔ kɔnfia nɔ í mungaò gonta kandaai ileu. Nɔ kugbokaɛ í nɛ agbãawɔ cifa (120). Nɔ Salomɔɔ í jɔ̀ à bii idĩi inɔu do wura alala.

⁵ Ŋɔi í jɔ̀ à bii idĩi ile nlau do jĩi ndii sipɛrɛɛsi nɔ à biiɛ má do wura alala. Nɔ í jɔ̀ à ce si boodai amaawɔi jĩi ndii kpakpa ŋa do sesee wɛwɛɛ ŋa.

⁶ Ŋɔi à bii ileu do kuta kusĩa ŋa, nɔ wurai Paavaimu ŋai à ceò.

⁷ Do wurai à bii ileu do jĩi ndɛɛ ŋau do andɛ ile ŋau do idĩ ŋau do gambo ŋau, nɔ à ce boodai amaleka iyi à ya kpe serubɛ̃ɛ ŋa si idĩ ŋau.

⁸ Ŋɔi Salomɔɔ í jɔ̀ à ma ile iyi í re do kumáu. Kusɔɛ agbãawɔ kɔnfiai nɔ í mungaò gonta kandaai ileu. Gonta kandaau agbãawɔ kɔnfiai. Ŋɔi à biiɛ do wura alala iyi kuwoɛ í to tɔnu kɔnfia.

⁹ Nɔ wura iyi à biiò pɔ̃ɔti ŋau kuwoɛ í to bubui kiloo akã. Nɔ à bii ilaawai lele ŋau mɔ do wura.

¹⁰ Ŋɔi í jɔ̀ à ce serubɛ̃ɛ minji à dasi ŋa si inɔ ile iyi í re do kumáu. Nɔ à bii ŋa do wura.

¹¹ Kusɔi ikpai serubɛ̃ɛ ŋau agbãawɔ kɔnfiai. Serubɛ̃ɛ sinteu kusɔi ikpa akãɛ fei agbãawɔ miiui. Ikpa akã wa lu idĩi ileu, nɔ akã mɔ wa lu ikpai serubɛ̃ɛ minjisia.

¹² Serubɛ̃ɛ minjisiau mɔ kusɔi ikpa akãɛ fei agbãawɔ miiui. Nɔ ikpa akã wa lu idĩi ileu, ikpa iyi ihɔ̃ mɔ wa lu ti serubɛ̃ɛ sinteu.

¹³ Si bɛi ikpai serubɛ̃ɛ ŋau wa fũu, kusɔ nŋa í wɛɛi agbãawɔ kɔnfia. Serubɛ̃ɛ ŋau à waa leekĩ si isɛ nŋa ŋa nɔ à waa cɔ andɛi ileu.

¹⁴ Ŋɔi Salomɔɔ í jɔ̀ à ce acɔi ileu do ikũ ku nɛ gbugbã nɔ í muu do ila boogu, do nkpa, do boogu ku yɔgɛɛò nkpa do acɔ fɛlɛ fɛlɛ nkpa. Nɔ à ce si boodai serubɛ̃ɛ ŋa.

Sɔbei isɔ nkpa ŋau do bi kuwee

¹⁵ Ŋɔi Salomɔɔ í jɔ̀ à ce sɔbe minji do wajui ileu. Kugboka nŋa í wɛɛi agbãawɔ kuntaa do miiu, do booda si antai nŋa, agbãawɔ miiu.

¹⁶ Ŋɔi à ce ama sesee ŋa bɛi iyi í wa ile kumáu. Ŋɔi à lesi ŋa si antaii sɔbe ŋau, nɔ à ce boodai gerenadi ŋa ara cĩɔ à dasi ama sesee ŋau.

¹⁷ Ŋɔi à gũ sɔbe minji ŋau si wajui ileu, akã do awɔ njɛ, akã mɔ do awɔ canga. Ŋɔi Salomɔɔ í sɔ ti awɔ njɛu iri Yakɛ̃ɛ, waatɔ Ilaaɔ̃ í ya mua inɛ gbugbã, ti awɔ cangau mɔ Boazi, waatɔ gbugbã í wa si Ilaaɔ̃.