Bomma 2, 29 - Bibeli do fee

Bomma ku jɛi Ezekiasi

¹ Adɔ̃ kaafɛtũi Ezekiasi í nɛ waati iyi í jɛ bomma. Nɔ í ce si bommau adɔ̃ kɔnfia do mɛɛsã ilui Zeruzalɛmu. Iyeɛi í jɛ Abiya amai Zakari.

² Ezekiasi í ce mii iyi í dɔ̃a Aɔ̃ Lafɛ̃ɛ si dee dee bɛi balaɛ Davidi í ceu.

³ Adɔ̃ sintei bomma ku jɛɛ si cukpa sinteu, ŋɔi í cĩ gamboi kpasɛ̃i Aɔ̃ Lafɛ̃ɛ ŋau í teese ŋa.

⁴ Ŋɔi í jɔ̀ à kpe woo wee ŋau do inɛi Levii ŋau wa, nɔ í tɔtɔɔ ŋa si bantumai nunui daakɔu.

⁵ Nɔ í sɔ̃ ŋa í ni, iŋɛ inɛi Levii ŋa, i sotĩ i gbɔ ŋa. I ce buki iyi aa nyaò ara nŋɛ ikã ŋa do iyi aa nyaò kpasɛ̃i Aɔ̃ Lafɛ̃ɛi bala nŋɛ ŋau mɔ ikã. I nya mii iyi kù maaju fei hai inɔ ile kumáu ŋa.

⁶ Bala nwa ŋa à ce dulum. À ce mii laalɔ si wajui Aɔ̃ Lafɛ̃ɛ nwa, à kɔ̀siɛ nɔ à toa nŋu do ile kumáɛu anyi.

⁷ À cĩmbo hee do gamboi ile kumá ŋau mɔm, nɔ à kpa fitila ŋau. A ci ya cea Aɔ̃ Lafɛ̃ɛi Izirɛliu kuweei tuae hee má jɛ iyi à ya jo si ina fei sãa sãa.

⁸ Na nŋu, idɔi Aɔ̃ Lafɛ̃ɛ í kɔ̃ si gãmɛi inɛi Zudaa do inɛi Zeruzalɛmu ŋa. Na ŋɔi í jɔ̀ inɛ ŋa iyi à yɛ ŋa à wɛɛò zigiida do biti do inɔ kufɔ bɛi ì waa yɔɔ do iju nŋɛ ŋa.

⁹ Na dulum du ŋau bɛi í jɔ̀ a kpa baa nwa ŋa si igũ, nɔ à mu abo nwa ŋa do ama nwa ŋa aru.

¹⁰ Amu de ǹ dasi idɔ n dĩ akabuu do Aɔ̃ Lafɛ̃ɛi Izirɛli ku ba idɔɔkɔ̃ nla nlaɛ iyi í dede si wau ku sũ.

¹¹ Nsɛi kpaasim ŋa, i jɔ̀ atafii ku ce ŋa, domi iŋɛi Aɔ̃ Lafɛ̃ɛ í cica i maa ceaa icɛ ŋa nɔ i maa cua inɛ ŋa si kutɔɔ ŋa nɔ i ya ceaa kuweei tuaeu ŋa.

¹² Inɛi Levii ŋa iyi à na ara nŋa si icɛu wee. Si tɔkui Kehati ŋa Mahati amai Amasai do Zoɛli amai Azaria, si tɔkui Merari ŋa Kisi amai Abudi do Azaria amai Yehaleleɛli, si tɔkui Gɛɛsɔ̃ɔ ŋa Yoa amai Zima do Edɛni amai Yoa,

¹³ si tɔkui Elisafãa ŋau Simuri do Yeuɛli, si tɔkui Azafu ŋa Zakari do Matania,

¹⁴ si tɔkui Hemaa ŋa Yehiɛli do Simei, si tɔkui Yedutunu ŋa Semaya do Uziɛli.

¹⁵ Ŋɔi à tɔtɔɔ nyaanze nŋa ŋa, nɔ à ce buki iyi á jɔ̀ a maaju. Si anyiɛ ŋɔi à bɔ kpasɛ̃i Aɔ̃ Lafɛ̃ɛu mɔ ku ba a cea nŋu mɔ buki iyi á jɔ̀ ku maaju si bɛi ilaalu í fɔu, do si bɛi idei Aɔ̃ Lafɛ̃ɛ í ni a ya ce.

¹⁶ Ŋɔi woo wee ŋau à lɔ inɔi kpasɛ̃i Aɔ̃ Lafɛ̃ɛu ku ba a cea buki iyi á jɔ̀ ku maajuu. Ŋɔi à nya mii riisi iyi í wa bɛu fei wa, nɔ à naa à jilɔɔ si bantumai kpasɛ̃u. Inɛi Levii ŋai à so ŋa à bɔò waduude hee bi acãi inyii Sedorɔ̃ɔu.

¹⁷ À sinti buki kumaajuu ajɔ sintei cukpa sinte. Ŋɔi si ajɔ mɛɛjɔsiai cukpau, à lɔ inɔ ile kumái Aɔ̃ Lafɛ̃ɛu, nɔ à wasi bukiu ku ce si kpasɛ̃i Aɔ̃ Lafɛ̃ɛu ajɔ mɛɛjɔ má. Nɔ si ajɔ mɛɛwa do mɛɛfasiai cukpau à tã.

¹⁸ Si anyiɛ nɔ à bɔ bi ilaalu Ezekiasi nɔ à sɔ̃ɔ à ni, à jɔ̀ kpasɛ̃i Aɔ̃ Lafɛ̃ɛu fei í maaju do bi ku ce kuwee iyi à ya jo si ina fei sãa sãau do jĩnɛɛ ŋau fei do taabu bi ku lesi pɛ̃ɛ ŋau do jĩnɛɛ ŋau fei.

¹⁹ Jĩnɛ ŋa iyi ilaalu Ahazi í bɛjɛ í jɔ̀ à so riisi fei waati iyi í jɛ bomma, à teese ŋa nɔ à jɔ̀ à maaju. À jilɛ ŋa fei si wajui bi kuweei Aɔ̃ Lafɛ̃ɛu.

Ezekiasi í teese í jilɛ Aɔ̃ Lafɛ̃ɛ ku tɔɔu do kuwee ŋa

²⁰ Ŋɔi ilaalu Ezekiasi í dede amɛɛjuumá í tɔtɔɔ inɛ ngboi ilu ŋau nɔ í bɔ inɔ kpasɛ̃i Aɔ̃ Lafɛ̃ɛu.

²¹ Ŋɔi à naaò kɛtɛ kombo mɛɛje do angudã kombo mɛɛje do ama angudã kɔ̃ɔtã mɛɛje do iwo kombo mɛɛje wa ku ba a ceò kuwee iyi à ya kpaò idei dulum. Ŋɔi ilaaluu í ni tɔkui Arɔ̃ɔ ŋa iyi à jɛ woo wee ŋau a ceò kuwee si antaii bi kuweei Aɔ̃ Lafɛ̃ɛ na nyaanzei nŋu takaɛ do kpasɛ̃i Aɔ̃ Lafɛ̃ɛ do inɛi Zudaa ŋa.

²² Ŋɔi woo wee ŋau à saka kɛtɛ ŋau nɔ à gba njɛ nŋa ŋa à fã si bi kuweeu. Nɔ à saka angudã ŋau nɔ à gba njɛ nŋa ŋa à fã si bi kuweeu. Bɛɛbɛi mɔi à saka ama angudã kɔ̃ɔtã ŋau nɔ à gba njɛ nŋa ŋa mɔ à fã si bi kuweeu.

²³ Si anyiɛ, nɔ à bɔò iwo kombo ŋa iyi aa kpaò idei dulum nɔu si wajui ilaaluu do si wajui zamaau fei. Nɔ aŋa fei à lesi ŋa awɔ.

²⁴ Ŋɔi woo wee ŋau à saka ŋa, nɔ à dikã njɛ nŋa ŋau si bi kuweeu à kpaò dulum dii inɛi Izirɛli ŋau fei, domi na irii inɛi Izirɛli feii ilaaluu í ni a ce kuwee iyi à ya jo si ina fei sãa sãa do kuwee iyi à ya kpaò dulum nɔu.

²⁵ Ŋɔi í jɔ̀ inɛi Levii ŋau à waa leekĩ si bantumai kpasɛ̃i Aɔ̃ Lafɛ̃ɛ si yaase bɛi Aɔ̃ Lafɛ̃ɛ í jɔ̀ Davidi do Gadi woo yɛi ilaaluu do Natãa waliiu à na wooda. Inɛi Levii ŋau à waa mu sɛmbali ŋa do kundigi ŋa do mɔɔlɔ ŋa

²⁶ iyi Davidi í tako í ce, nɔ woo wee ŋau à waa mu kãakãakĩ ŋa.

²⁷ Ŋɔi Ezekiasi í ni a ce kuwee iyi à ya jo si ina fei sãa sãa si bi kuweeu. Nɔ waati iyi à sinti kuweeu gbakã nɔ à fã kãakãakĩ ŋau nɔ à sinti iri ku kɔ̃ ku saabu Aɔ̃ Lafɛ̃ɛ do jĩnɛi Davidi ŋau.

²⁸ À waa kɔ̃ iriu, nɔ à waa fã kãakãakĩ ŋau, nɔ zamaau fei í sɛɛbata hee kuweeu í koo í tãò.

²⁹ Iyi à ce kuweeu à tã, ŋɔi ilaaluu do inɛ ŋa iyi à wa bi tɛɛu fei à sɛɛbata má à waa tɔɔ Aɔ̃ Lafɛ̃ɛ.

³⁰ Ŋɔi ilaalu Ezekiasi do inɛ ngbo ŋau à ni inɛi Levii ŋau a kɔ̃ irii Davidi do ti walii Azafu a cĩò Aɔ̃ Lafɛ̃ɛ. Ŋɔi à kɔ̃ iri ŋau à cũu do inɔ didɔ̃ nɔ à sɛɛbata.

³¹ Ŋɔi Ezekiasi í ni, bɛbɛi wee ì sisi ì na Aɔ̃ Lafɛ̃ɛ ara nŋɛ, nɔ ì má ŋa. Na nŋu, i sɛkɛɛ wa i naa i ce kuweei anu akã ŋa do kuwee mmu ŋau wa kpasɛ̃i Aɔ̃ Lafɛ̃ɛ. Ŋɔi inɛ ŋa à naaò kuweei anu akã ŋa do kuwee mmu ŋau bɛ. Nɔ inɛ iyi í bi fei í nyi í ce ti iyi à ya jo si ina fei sãa sãau má.

³² Nɔ inɛ ŋau à naaò kɛtɛ kombo kita do mɛɛwa wa do angudã kombo cĩɔ do ama angudã cĩɔ minji à ceaò Aɔ̃ Lafɛ̃ɛ kuwee iyi à ya jo si ina fei sãa sãa.

³³ Si anyiɛ nɔ à nyi à naaò kɛtɛ cĩɔ mɛɛfa (600) wa do angudã do iwo dubu mɛɛta (3.000) à ceò kuwee má.

³⁴ Amma woo wee ŋa iyi à wa bɛ ŋau a kù kpɔ bɛi aa yɔkɔ a pũ mɛɛmu ŋa iyi aa ceò kuwee ŋa iyi à ya jo si ina fei sãa sãau. Na ŋɔi í jɔ̀ inɛi Levii inɛ nŋa ŋau à sobi ŋa hee icɛu í koo í tãò. À ce bɛɛbɛi à waa degbeò hee a nya woo wee mmuɛ ŋa ikã. Ntɔ ntɔ, inɛi Levii ŋa à na ara nŋa si ara ku nya ikãu í re woo wee ŋau.

³⁵ Ajɔ nŋu bɛ, kuwee iyi à ya jo si ina fei sãa sãau í kpɔ. Kuwee ŋau fei à ce ŋai do atɛ̃ vɛ̃ɛ. Nɔ à jo ikpoi iŋai kuweei anu akã ŋau. Do yaase bɛɛbɛi à teese à jilɛò icɛi kpasɛ̃i Aɔ̃ Lafɛ̃ɛu.

³⁶ Ŋɔi Ezekiasi do zamaau fei à wɛɛò inɔ didɔ̃ do mii ŋa iyi Ilaaɔ̃ í cea zamaau fei sɔɔluɛ, domi fei ndɛɛ í cei anu akã.