Bomma 2, 28 - Bibeli do fee

Sintei bomma ku jɛi Ahazi

¹ Adɔ̃ kɔnfiai Ahazi í nɛ waati iyi í jɛ bommau. Nɔ í mu bommau adɔ̃ maatũ do akã Zeruzalɛmu. Ŋɔi í ce iyi kù dɔ̃a Aɔ̃ Lafɛ̃ɛ si. Kù ce bɛi balaɛ Davidi í ce.

² Í tooi si kucei ilaalui Izirɛli ŋau hee mɔm í yɔ isɔ ŋa í ceò iwɛ̃ Baali ŋa.

³ Í koo í jo tuae ŋa si lɔɔmai amai Hinɔmu ŋa, nɔ í kpa amaɛ ŋa í ceò kuwee. Bɛɛbɛi í ce í tooò si kuce laalɔi inɛi ilɛ ŋa iyi Aɔ̃ Lafɛ̃ɛ í lele si wajui inɛi Izirɛli ŋau.

⁴ Í ya koo ce kuwee ŋa nɔ í ya jo tuae ŋa si antaii iri kuta ŋa do si geete ŋa do si abɛi jĩi tũtũ ŋa fei.

⁵ Ŋɔi Aɔ̃ Lafɛ̃ɛɛ í soo í daa ilaalui Siri si awɔ. Nɔ inɛi Siri ŋau à jɔɔ igũ nɔ à mu inɛ nkpɔ nkpɔ aru à nɛò Damasi. Si anyiɛ ŋɔi Aɔ̃ Lafɛ̃ɛ í soo í daa ilaalui Izirɛli mɔ si awɔ nɔ inɛi Izirɛli ŋau mɔ à jɔɔ igũ.

⁶ Si ajɔ akã, Peka amai Remalia ilaalui Izirɛliu í kpa sooge kaasãanɛ dubu cifa (120.000) si ilɛi Zudaa. Aɔ̃ Lafɛ̃ɛ í jɔ̀ mii ŋau bɛ fei í ba ŋa si na iyi í jɔ̀ à fũsi nŋu Aɔ̃ Lafɛ̃ɛi bala nŋa ŋau awɔ.

⁷ Zikiri sooge ilu wɔɔkɔi Efaraimu í kpa Maaseya amai ilaalu do Azurikamu inɛ ngboi kpasɛ̃i ilaaluu, do Elikana minjisiai ilaaluu.

⁸ Inɛi Izirɛli ŋa à mu inaabo do amu ŋa dubu cĩɔ minji (200.000) aru hai si inɛi Zudaa nyaanze nŋa ŋa, nɔ à gba mii nkpɔ nkpɔ à nɛò Samari.

⁹ Wee walii gɔ í wa si iluu bɛ à ya kpoo Odɛdi. Ŋɔi í koo í ko sooge ŋa iyi à waa baa Samariu nɔ í sɔ̃ ŋa í ni, idɔɔkɔ̃i Aɔ̃ Lafɛ̃ɛi bala nŋɛ ŋa í dede si inɛi Zudaa ŋau. Na nŋu, í so ŋa í da nŋɛ si awɔ. Nɔ iŋɛ ì kpa ŋa i kù ce araare nŋa ŋa hee anu ku dɔ̃ nŋɛ í to hee lelei Aɔ̃.

¹⁰ Nɔ nsɛi ì bi inɛi Zudaa do Zeruzalɛmu ŋau ihɛ̃ a jɛ aru nŋɛ ŋa. Iŋɛ taka nŋɛ i kù yɛ iyi dulum nii ì waa ce bi Aɔ̃ Lafɛ̃ɛ ŋa?

¹¹ Debɛi i gbɔ idem ŋa nɔ i jɔ̀ aru ŋau ihɛ̃ iyi ì mu wa hai inɔi nyaanze nŋɛ ŋau ŋa, domi idɔi Aɔ̃ Lafɛ̃ɛ í kɔ̃ si ŋɛ ntɔ ntɔ.

¹² Ŋɔi inɛ ngboi dimii Efaraimu gɔ ŋa à na à waa yɛ taalei woo baa hai igũ ŋau. Aŋai Azaria amai Yokanaa do Berekia amai Mɛsilemɔti do Ezekiasi amai Salumu do Amasa amai Hadulai.

¹³ Nɔ à sɔ̃ ŋa à waa ni, i maà lɔò aru ŋau bɛ wa ihɛ̃ ŋa. Mà ì bi Aɔ̃ Lafɛ̃ɛ ku yɛ taale nwa ŋa nɔ i kɔ̃ɔ nwa si dulum do kurara ŋai. À nɛ taale tã, nɔ idɔi Ilaaɔ̃ í kɔ̃ si awa inɛi Izirɛli ŋa ntɔ ntɔ.

¹⁴ Ŋɔi sooge ŋau à fũsi aru ŋau awɔ do mii ŋa iyi à so wau si wajui inɛ ngbo ŋau do zamaau fei.

¹⁵ Ŋɔi inɛ ngboi dimii Efaraimu ŋa iyi à kpe iri nŋa ŋau bɛ à dede à koo à gbã aru ŋau wa. Nɔ à so mii ŋa iyi à gba wau fei à daa inɛ ŋa iyi à wɛɛ basĩ ŋau fei si. Nɔ à na ŋa ibɔ ŋa do baata ŋa. Nɔ à jɔ̀ à jɛ à mɔ à jɔ nŋa si ikpo si kumɛɛ nŋa ŋa, nɔ à so inɛ ŋa iyi à gbɛɛji fei si antaii gbankɛlɛ ŋa, nɔ à bɔò ŋa Zeriko ilui kpakpa ŋau bi kpaasi nŋa ŋa, à bɛi à baa Samari.

Ahazi wa tɔɔ sobi wa hai Asiri

¹⁶ Waati nŋu bɛ, Ahazi í bɛ inɛ ŋa a koo a tɔɔ sobi wa hai bi ilaalui Asiri,

¹⁷ si na iyi í jɔ̀ inɛi Edɔmu ŋau à naa à jɛ inɛi Zudaa ŋau igũ má, nɔ à mu aru ŋa à nɛò.

¹⁸ Si waati akãu bɛ inɛi Filisi ŋa mɔ à naa igũ si ilui ilɛ ilɛ ŋau do ilu ŋa iyi à wa awɔ cangai kpãai inunui Zudaa ŋau. Nɔ à gba ilui Bɛti-Semɛsi do Ayalɔ̃ɔ do Gederɔti do Soko do ilɛɛkoɛ ŋa, do Timuna do ilɛɛkoɛ ŋa, do Gimuzo do ilɛɛkoɛ ŋa. Nɔ à buba si à ce ide.

¹⁹ Do yaase bɛɛbɛi Aɔ̃ Lafɛ̃ɛ í dasi inɛi Zudaa ŋa anyɔ na Ahazi ilaalu nŋa, si na iyi í jɔ̀ í naaò kuce hai nɛ yaase wa si ilɛi Zudaa, nɔ í ce dulum bi Aɔ̃ Lafɛ̃ɛ.

²⁰ Ŋɔi Tigilati-Pilenezɛɛ ilaalui Asiriu í kɔ̀ ku sobiɛ, amma í coo mbɛɛ nɔ í naa siɛ igũ.

²¹ Ahazi í ko mii iyi í wa kpasɛ̃i Aɔ̃ Lafɛ̃ɛu fei do ti nŋu takaɛ do ti inɛ ngbo ŋau í koo í mua ilaalui Asiriu. Do nŋu fei kãmaɛ gɔ kù sobiɛ.

²² Baa do iyi Ahazi í wa si wahala ŋau bɛ fei, í kɔ̀ í wasi dulum ku ce bi Aɔ̃ Lafɛ̃ɛ.

²³ Í cea iwɛ̃i Damasi ŋa iyi à jɔɔ igũ ŋau kuwee. Nɔ í fɔ si inɔɛ wa ni, si bɛi iwɛ̃i ilaalui Siri ŋa à ya sobi ŋa, amu mɔ an ce nŋa kuweei ku ba a naa a sobim. Amma iwɛ̃ ŋa ku tɔɔui í jɔ̀ nŋu do inɛi Zudaa ŋau fei à ce nfe.

²⁴ Ŋɔi Ahazi í tɔtɔɔ jĩnɛi kpasɛ̃i Aɔ̃ Lafɛ̃ɛ ŋau nɔ í lɛgɛ ŋa. Ŋɔi í cĩmbo gambo ŋau, nɔ í ce bi kuwee ŋa si kpãa kokoi Zeruzalɛmu ŋau fei.

²⁵ Nɔ si ilui Zudaa ŋau fei í ce kuweei iwɛ̃ ŋa si geete ŋa. Bɛɛbɛi í dedeò idɔɔkɔ̃i Aɔ̃ Lafɛ̃ɛi balaɛ ŋau.

²⁶ Faajii icɛɛ ŋa do mii mmu ŋa iyi í ce fei hai sinte nŋa hee ku bɔ kɔɔɛ à kɔ ŋa si tiai ilaalui Zudaa do ti Izirɛli ŋa.

²⁷ Ahazi í ku, nɔ à suu ilui Zeruzalɛmu, amma a kù dasiɛ inɔ balɛ ŋa iyi à jɛ ti ilaalui Izirɛli ŋau. Nɔ amaɛ Ezekiasi í jɛ bomma si agbɛɛ.