Bomma 2, 27 - Bibeli do fee

Bomma ku jɛi Yotamu

¹ Adɔ̃ kaafɛtũi Yotamu í nɛ waati iyi í jɛ bomma. Nɔ í ce si bommau adɔ̃ maatũ do akã ilui Zeruzalɛmu. Iyeɛi à ya kpe Yerusa amai Sadɔku.

² Ŋɔi í ce iyi í tɛ si wajui Aɔ̃ Lafɛ̃ɛ. Í cei dee dee bɛi baaɛ Oziasi í ce. Kpasɛ̃i Aɔ̃ Lafɛ̃ɛu nŋu akã dei kù lɔ. Do nŋu fei, zamaau í kɔ̀ í wasi laalɔ ku ceɛ.

³ Yotamui í ma anui ile lelei kpasɛ̃i Aɔ̃ Lafɛ̃ɛu nɔ í ce kuma nkpɔ si bindii Ofɛli.

⁴ Í ma ilu nkpɔ si inyai iri kutai Zudaa ŋau, do ile ku nɛ gbugbã ŋa do ile kugboka ŋa si inɔ agbou.

⁵ Aŋaò ilaalui inɛi Amɔɔ ŋa à ce igũ. Nɔ í jɛ igũ si ŋa. Si adɔ̃ nŋu bɛ inɛi Amɔɔ ŋa à sãa isɔ fũfũ tɔnu mɛɛta do bilee tɔnu dubu mɛɛta (3.000) do ɔɔzu tɔnu dubu mɛɛta (3.000). Nɔ zaka bɛɛbɛi à ya sã hee adɔ̃ mɛɛta.

⁶ Yotamu í ba gbugbã si na iyi í jɔ̀ í na gbugbã si kpãai Aɔ̃ Lafɛ̃ɛɛ.

⁷ Faajii Yotamu ŋa do igũɛ ŋa fei do mii mmu ŋa iyi í ce fei à kɔ ŋa si tiai ilaalui Izirɛli do ti Zudaa ŋa.

⁸ Adɔ̃ kaafɛtũi í nɛ waati iyi í jɛ bommau. Nɔ í ce si adɔ̃ maatũ do akã ilui Zeruzalɛmu.

⁹ Yotamu í na í ku nɔ à suu ilui Davidi. Nɔ amaɛ Ahazi í jɛ bommau si agbɛɛ.