Bomma 2, 25 - Bibeli do fee

Bomma ku jɛi Amasia

¹ Adɔ̃ kɔnfia do miiui Amasia í nɛ waati iyi í jɛ bommau. Nɔ í mu bommau adɔ̃ kɔnfia do mɛɛsã Zeruzalɛmu. Iyeɛi à ya kpe Yoadãa, inɛi Zeruzalɛmui.

² Í ce iyi í dɔ̃a Aɔ̃ Lafɛ̃ɛ si, amma kù jɛ do inɔ akã.

³ Waati iyi bommaɛ í ce gbugbã, ŋɔi í kpa akawe ŋa iyi à tako à kpa baaɛu.

⁴ Amma kù kpa ama nŋa ŋa, domi wa cei bɛi à kɔɔ si wooda si tiai Moizi tengi bii Aɔ̃ Lafɛ̃ɛ í ni, a kaa kpa baa ŋa na kurarai ama nŋa ŋa, nɔ a kaa kpa amu ŋa na kurarai baa nŋa ŋa, amma aa kpa inɛ feii na dulum dɛɛ.

⁵ Ŋɔi Amasia í tɔtɔɔ inɛi Zudaa ŋau nɔ í jilɛ ŋa kpasɛ̃i baa do baa, do inɛ ngboi sooge dubu ŋau do ti cĩɔ ŋau si ilɛi Zudaa do Bɛnzamɛɛu fei. Nɔ í ce kuka nŋa hai inɛ iyi í nɛ adɔ̃ kɔnfia walakɔ do ku lesi, nɔ inɛmɔkɔ kaasãanɛ iyi í to ku so jĩnɛ ku bɔ igũ ŋa à dede aŋa dubu cĩɔ mɛɛta (300.000) iyi à mà kaka do tɛli ku jaò.

⁶ Ŋɔi í ra sooge kaasãanɛ ŋa wa má hai si inɔi inɛi Izirɛli ŋau, aŋa dubu cĩɔ (100.000) iyi í sãa isɔ fũfũ tɔnu mɛɛta.

⁷ Amma walii gɔ í naa í sɔ̃ɔ í ni, ilaalu, maà jɔ̀ soogei Izirɛli ŋau ihɛ̃ a maa tooɛ, domi Aɔ̃ Lafɛ̃ɛ kù wɛɛ do aŋa inɛi Efaraimu ŋau.

⁸ Bii iŋɛò ŋa ì koo, baa bii í jɛ ì waa ce igũ do gbugbã fei, Ilaaɔ̃ á jɔ̀ mbɛɛ ŋa a jɛɛ igũi domi Ilaaɔ̃ njɛi í nɛ gbugbã ku sobi inɛ walakɔ ku kɛkɛɛ.

⁹ Ŋɔi Amasia í beeɛ í ni, nɔ bɛirei an ce do isɔ fũfũ tɔnu mɛɛta iyi ǹ na soogei Izirɛli ŋau. Nɔ waliiu í jɛaa í ni, Aɔ̃ Lafɛ̃ɛ á yɔkɔ ku naɛ iyi í re bɛɛbɛ.

¹⁰ Ŋɔi Amasia í nya sooge ŋa iyi à naa hai ilɛi Efaraimu ku ba a nyi ide nŋa. Amma idɔ nŋa í kɔ̃ si inɛi Zudaa ŋau, nɔ à bɔ ide do idɔɔkɔ̃ nla nla.

¹¹ Ŋɔi Amasia í dasi wɔɔkɔ nɔ wa gbã soogeɛ ŋa. Ŋɔi í bɔ si Lɔɔma ku da Imuu, nɔ í kpa inɛi Seii ŋa aŋa dubu mɛɛwa (10.000).

¹² Nɔ inɛi Zudaa ŋau à mu amanɛ dubu mɛɛwa (10.000) njaawɛ à bɔò ŋa antaii iri kuta gɔ à koo à tale ŋa wa. Nɔ aŋa fei à na à cuku à ku.

¹³ Waati nŋu, sooge ŋa iyi Amasia í lele ku ba a maà tooɛ igũu, à fangaa si ilui Zudaa ŋau hai Samari hee ku bɔ Bɛti-Horɔ̃ɔ. Ŋɔi à kpa amanɛ dubu mɛɛta (3.000) nɔ à so mii nkpɔ à nɛò.

Zoasi ilaalui Izirɛliu í jɛ Amasia igũ

¹⁴ Iyi Amasia í jɛ inɛi Edɔmu ŋau igũ í baa, ŋɔi í jɔ̀ à so iwɛ̃i inɛi Edɔmu ŋau wa, nɔ í ce ŋa iwɛ̃ɛ ŋa. Ŋɔi í ya maa gulɛ nŋa nɔ ku maa jo nŋa tuae ŋa.

¹⁵ Ŋɔi idɔɔkɔ̃i Aɔ̃ Lafɛ̃ɛ í dede siɛ, nɔ í bɛ walii gɔ wa í naa í beeɛ í ni, na mii í jɔ̀ ì so iwɛ̃i inɛ ŋau bɛ, aŋa iyi à mɔngɔ ku faaba inɛ nŋa ŋa hai si awɔɛ.

¹⁶ Ŋɔi Amasia í da ideu si gɛlɛɛ nɔ í beeɛ í ni, awɔi à so ì jɛ woo kɔ ilaalu? Tɛkɛɛ hai bɛ. Mà ì nɔ ì bi a cãɛi? Waliiu ku bɛi ku coko, í sɔ̃ɔ í ni, ǹ mà iyi Ilaaɔ̃ í dasi idɔ ku ce nfeɛi si na iyi í jɔ̀ ì ce bɛɛbɛ nɔ i kù gbɔ ikɔm.

¹⁷ Si anyiɛ, Amasia do woo kɔɛ ŋa à busi njɛ, nɔ í bɛ inɛ ŋa bi Zoasi ilaalui Izirɛliu a koo a sɔ̃ɔ a ni ku naa wa aŋa a ce igũ. Zoasiu amai Zoakazii nɔ wa jɛ tɔkui Yehu.

¹⁸ Ŋɔi Zoasi í ni a koo a sɔ̃ Amasia a ni, agũi Libãa í ni a koo a sɔ̃ jĩi ndii sɛɛdii Libãa ku mua ama inɛmɔkɔi nŋu mudɛ̃ɛɛ. Ŋɔi mɛɛmui sako gɔ iyi í wa Libãa í koo í tɛɛsɛ agũu í kpaa.

¹⁹ Ì ni ì jɛ inɛi Edɔmu ŋa igũ, nɔ inɔɛ í dɔ̃ ì waa tɔɔò fufu. Bɛbɛi gbeò ndɛɛ ideɛ bɛ. Na mii í ce ì waa bi i ce igũ iyi á ce nfei awɔ do inɛi Zudaa ŋau.

²⁰ Amma Amasia kù gbɔ ideɛu, domi Ilaaɔ̃ í jilɛ si nŋu ku so inɛi Zudaa ŋau ku daa mbɛɛ ŋa si awɔ, si na iyi í jɔ̀ à koo à tɔɔ iwɛ̃i Edɔmu ŋa.

²¹ Nɔ Zoasi ilaalui Izirɛliu í dede í koo, nɔ aŋaò à ce igũ Bɛti-Semɛsi si ilɛi Zudaa.

²² Nɔ inɛi Izirɛli ŋau à kãmia inɛi Zudaa ŋau, ŋɔi inɛi Zudaa ŋau aŋa fei à sa à nɛ ide nŋa.

²³ Nɔ Zoasi ilaalui Izirɛli í mu Amasia ilaalui Zudaa Bɛti-Semɛsi bɛ. Nɔ í bɔòɛ Zeruzalɛmu í koo í lɛgɛ bindii iluu agbãawɔ cĩɔ mɛɛ (400) hai bi gamboi Efaraimuu hee ku bɔ si gamboi gontau.

²⁴ Ŋɔi í so wura do isɔ fũfũ do jɛɛ ŋa iyi à wa si kpasɛ̃i Ilaaɔ̃u bi Obɛdi-Edɔmuu fei do amanii kpasɛ̃i ilaaluu. Nɔ í mu aru ŋa mɔ í bɛi í sinda í nyi Samari.

Kɔɔi bomma ku jɛi Amasia

²⁵ Si anyii ikui Zoasi, Amasia í nyi í ce adɔ̃ maatũ má.

²⁶ Faajii Amasia do mii mmu ŋa iyi í ce fei hai sinte nŋa hee ku bɔ kɔɔɛ à kɔɔ si tiai ilaalui Zudaa ŋa do ti Izirɛli ŋau.

²⁷ Hai waati iyi Amasia í fũsi Aɔ̃ Lafɛ̃ɛ awɔ gbakã ŋɔi à dĩaa anu tɔɔsi ku ba a kpaa Zeruzalɛmu bɛ. Amma í sa í bɔ Lakisi, nɔ à tooɛ nɔ à koo à kpaa bɛ.

²⁸ Ŋɔi à so ikuɛ wa si sarɛti iyi acĩ ŋa à waa fa à na à suu bi balaɛ ŋa si ilui Davidi.