Bomma 2, 24 - Bibeli do fee

Zoasi í jɔ̀ à teese kpasɛ̃i Aɔ̃ Lafɛ̃ɛ

¹ Adɔ̃ mɛɛjei Zoasi í nɛ waati iyi í jɛ bomma. Nɔ í ce si bommau adɔ̃ ciiji ilui Zeruzalɛmu. Iyeɛi à ya kpe Sibiya inɛi Bɛɛseba.

² Ŋɔi Zoasi í ce mii iyi í dɔ̃a Aɔ̃ Lafɛ̃ɛ si si kuwɛɛi Yehoyada fei.

³ Yehoyada í dɛdɛa abo minji, nɔ í bí inɛmɔkɔ do inaabo ŋa.

⁴ Si anyii nŋu Zoasi í lasabu nŋu ku teese kpasɛ̃i Aɔ̃ Lafɛ̃ɛu.

⁵ Ŋɔi í tɔtɔɔ woo wee ŋau do inɛi Levii ŋa, nɔ í sɔ̃ ŋa í ni, i bɔ si ilui Zudaa ŋau fei nɔ i gba fia wa si inɛi Izirɛli ŋau fei adɔ̃ fei ŋa ku ba a teese kpasɛ̃i Aɔ̃ Lafɛ̃ɛ nŋɛu. Nɔ i mante ŋa si ideu ŋa. Amma inɛi Levii ŋau à tũ si.

⁶ Ŋɔi ilaaluu í kpe Yehoyada woo wee nlau nɔ í sɔ̃ɔ í ni, bɛirei í ce i kù tilasi inɛi Levii ŋau a naaɛ fiai lɛmpoo nŋa ŋa wa hai Zudaa do Zeruzalɛmu si bɛi Moizi woo ce icɛi Aɔ̃ Lafɛ̃ɛ do inɛi Izirɛli ŋau à jilɔɔ na icɛi kpasɛ̃i Aɔ̃ Lafɛ̃ɛu.

⁷ Ntɔ ntɔ, Atali abo laalɔu do amaɛ ŋa à bɛjɛ kpasɛ̃i Ilaaɔ̃u nɔ à so mii ŋa iyi à nya ikã a jɛ ti Aɔ̃ Lafɛ̃ɛu fei à ceaò iwɛ̃ Baali icɛ.

⁸ Ŋɔi ilaaluu í ni a ce kpako nɔ a jilɔɔ anu koofai kpasɛ̃i Aɔ̃ Lafɛ̃ɛu do waduude.

⁹ Ŋɔi à cã kɛsɛɛdɛ si ilɛu à ni inɛ fei ku naa Aɔ̃ Lafɛ̃ɛ lɛmpoo iyi Moizi woo ce icɛi Ilaaɔ̃u í jilɛa inɛi Izirɛli ŋa waati iyi à wa si gbaau wa.

¹⁰ Ŋɔi í dɔ̃a inɛ ngbo ŋau do zamaau fei si. Nɔ inɛ ŋa à naa à dasi iyi à nɛ ku sã fei si inɔ kpakou hee í kɔ̃.

¹¹ Bii waati í to inɛi Levii ŋaui à ya naa a so kpakou a bɔò bi inɛ ŋa iyi ilaaluu í cica. À ya cɔɔi tengi bɛ titã. Bii à ba wee kpakou í kɔ̃, woo kɔ tiai ilaaluu do woo ce icɛi woo wee nlau à ya wa fiaui nɔ a nyiò kpakou agbɛɛ. Ajɔ fei bɛɛbɛi à ya maa ce nɔ a ba fia nkpɔ nkpɔ.

¹² Ilaaluu do Yehoyada à ya so fiaui a koo a na inɛ ŋa iyi à daa icɛu si awɔui. Nɔ aŋa mɔ à so woo gbe kuta ŋa do woo gbe jĩi ŋa do woo ce icɛi isɔ, do isɔ nkpa ŋa à waa sã nŋa fia ku ba a teese kpasɛ̃i Aɔ̃ Lafɛ̃ɛu.

¹³ Inɛ ŋa iyi à daa icɛu si awɔ, à lɔsi icɛu ku ce. Nɔ na saabui kumà nŋa, icɛi kpasɛ̃u ku teese í mɔsi wa koo nɔ í ba gbugbã má bɛi tako.

¹⁴ Iyi à ce icɛu à tã ŋɔi à naaò fia iyi í gbeu wa bi ilaaluu do Yehoyada. Nɔ à ceò jĩnɛ ikã ikã ŋa iyi aa jɛ ti kpasɛ̃i Aɔ̃ Lafɛ̃ɛu, hai jĩnɛ ti kuwee ŋa, hee do kɔɔfu ŋa do jĩnɛ gɔ ŋa iyi à ce do wura do ti isɔ fũfũ gɔ ŋa. Nɔ si kuwɛɛi Yehoyada fei à ya naa a ce kuwee iyi à ya jo si ina fei sãa sãai si kpasɛ̃i Aɔ̃ Lafɛ̃ɛu.

Zoasi í toa Ilaaɔ̃ anyi

¹⁵ Yehoyada í gbo ntɔ ntɔ. Adɔ̃ cifa do mɛɛwai (130) í ba í bɛi í ku.

¹⁶ Ŋɔi à suu si ilui Davidi bi balɛi ilaalu ŋau, si na iyi í jɔ̀ í ce jiida si ilɛi Izirɛli, do si gãmɛi Ilaaɔ̃ do kpasɛ̃ɛ.

¹⁷ Si anyii ikui Yehoyada, ŋɔi inɛ ngboi Zudaa ŋau à naa à sɛɛbata à sɔ̃ ilaaluu ide ŋa. Ŋɔi í gbɔ ide nŋa.

¹⁸ Nɔ à fũsi kpasɛ̃i Aɔ̃ Lafɛ̃ɛi bala nŋa ŋau awɔ, à koo à waa cea Asera do iwɛ̃ mmu ŋa icɛ. Ŋɔi idɔɔkɔ̃i Ilaaɔ̃ í naa si Zudaa do Zeruzalɛmu na kurara nŋau.

¹⁹ Nɔ Aɔ̃ Lafɛ̃ɛ í bɛ walii ŋa si ŋa a koo a baaò ŋa wa bi tɛɛ. Amma a kù gbɔ ide ŋa iyi à sɔ̃ ŋau pai.

²⁰ Ŋɔi hundei Ilaaɔ̃ í naa si Zakari amai Yehoyada woo weeu. Nɔ í bɔ si wajui zamaa í sɔ̃ ŋa í ni, Ilaaɔ̃ í ni, na mii í ce ì kua woodam ŋa. I kaa bɔ waju ŋa pai, domi ì kɔ̀sim ŋa, nɔ amu mɔ an kɔ̀si ŋɛ.

²¹ Ŋɔi à dĩ anu tɔɔsii zamba si gãmɛi Zakari, nɔ ilaaluu í na wooda í ni à taa kuta à kpaa inɔ bantumai kpasɛ̃i Aɔ̃ Lafɛ̃ɛ bɛ.

²² Ilaalu Zoasi í gbɛjɛ jiida ŋa iyi Yehoyada baai Zakariu í cea nŋu, nɔ í kpa amaɛ. Iyi Zakari wa ku, ŋɔi í fɔ í ni, Ilaaɔ̃ wa yɔɔ, nɔ á kiiti ŋɛ.

Kɔɔi bommai Zoasi

²³ Iyi adɔ̃ í ka, ŋɔi soogei Siri ŋa à naa igũ si Zoasi. Ŋɔi à naa si bommai Zudaau fei do si ilui Zeruzalɛmu. Ŋɔi à kpa inɛ ngbo ŋau fei si zamaau. Nɔ à kooa ilaalui Damasi mii ndu ŋa ŋa iyi à gba fei.

²⁴ Sooge ŋa iyi inɛi Siri ŋa à naaò wa igũu a kù kpɔ baa keeke, nɔ do nŋu fei Aɔ̃ Lafɛ̃ɛ í so zamaa nla nlai soogei Zudaa ŋau í da nŋa si awɔ si na iyi í jɔ̀ à kɔ̀si nŋu Aɔ̃ Lafɛ̃ɛi bala nŋa ŋa. Nɔ inɛi Siri ŋau à dasi Zoasi ijuukpã.

²⁵ Ŋɔi à nɛ à jɔ̀ɔ do kumɛɛ nla nla, nɔ akaweɛ ŋa à dĩa anu tɔɔsii ku kpaɛ wa na ikui amai Yehoyada ŋa woo weeu. Nɔ à koo à kpaa si antaii daayiɛ. Ŋɔi à koo à suu ilui Davidi, amma kù jɛ bi balɛi ilaalu ŋa.

²⁶ Inɛ ŋa iyi à kpaau wee. Zabadi amai Simea inaaboi Amɔɔ, do Zozabadi amai Simuri inaaboi Moabuu.

²⁷ Si gãmɛi amaɛ ŋa, do si walii nkpɔ nkpɔ iyi à ce à yɛò taaleɛ, do kpasɛ̃i Ilaaɔ̃ iyi í teeseu fei à kɔɔ si tiai faajii ilaalu ŋau. Nɔ amaɛ Amasia í jɛ bomma si agbɛɛ.