Bomma 2, 23 - Bibeli do fee

À jilɛ Zoasi ku jɛ ilaalu

¹ Si adɔ̃ mɛɛjesiau, ŋɔi Yehoyada í dede do wɔɔkɔ nɔ í dĩ akabuu do Azaria amai Yerohamu, do Isimaɛli amai Yohanaa, do Azaria amai Obɛdi, do Maaseya amai Adaya, do Elisafati amai Zikiri, aŋa iyi à jɛ inɛ ngboi sooge cĩɔ ŋau.

² Ŋɔi à dabii si ilɛi Zudaau nɔ à tɔtɔɔ inɛi Levii ŋau wa hai ilui Zudaa ŋau fei do inɛ ngboi kpasɛ̃i Izirɛli ŋau, nɔ à naa Zeruzalɛmu.

³ Ŋɔi inɛ ŋau fei à ce kutɔtɔɔ si inɔ kpasɛ̃i Ilaaɔ̃ bɛ, nɔ à dĩ akabuu do Zoasi. Nɔ Yehoyada í sɔ̃ ŋa í ni, Zoasi amai ilaaluui í nɛ ku jɛ bommau si bɛi Aɔ̃ Lafɛ̃ɛ í cea tɔkui Davidi ŋau kuwã.

⁴ Bɛi aa ce ŋa wee. Iŋɛ woo wee ŋa do inɛi Levii ŋau, aa kpɛ̃ njɛ ŋai wuaa mɛɛta. Wuaa sinteui á ya maa degbe anu koofai kpasɛ̃i Aɔ̃ Lafɛ̃ɛu si ajɔi kusĩmi.

⁵ Wuaa minjisiaui á maa degbe kpasɛ̃i ilaaluu. Nɔ wuaa mɛɛtasiau mɔ ku wa bi anu koofa iyi à ya kpe Yesodi, waatɔ icui ile. Nɔ zamaa iyi í gbeu fei ku maa leekĩ inɔ bantumai kpasɛ̃i Aɔ̃ Lafɛ̃ɛu ihɛ̃.

⁶ Inɛ kãma ku maà lɔ inɔ ilei Aɔ̃ Lafɛ̃ɛu bii kù jɛ woo wee ŋau do inɛi Levii ŋa iyi à waa ce icɛ bɛ. Aŋai aa yɔkɔ a lɔ bɛ, si na iyi í jɔ̀ à nya ŋa ikã. Nɔ zamaau fei ku jirima woodai Aɔ̃ Lafɛ̃ɛ iyi í ni a maà lɔ inɔ ileu.

⁷ Inɛi Levii ŋa aa kaako ilaaluui, inɛ fei do jĩnɛi igũɛ ŋa si awɔ. Bi ilaaluui aa ya wa ŋa, bii wa fita do bii wa lɔ wa. Nɔ inɛ mmu iyi wa bi ku lɔ bɛ do gbugbã fei aa kpaai.

⁸ Ŋɔi inɛi Levii ŋau do inɛi Zudaa ŋau fei à ce bɛi Yehoyada woo weeu í ni a ceu fei. Ŋɔi inɛ ngboi wuaa mɛɛta ŋau fei à gbã inɛi wuaa nŋa ŋa, hai inɛ ŋa iyi à waa so icɛ ajɔi kusĩmiu hee do inɛ ŋa iyi à waa kita fei. Yehoyada kù mua wuaa kãma kusĩmi.

⁹ Ŋɔi Yehoyada í na inɛ ngboi sooge cĩɔ ŋau kaka ŋa do tɛli keeke do tɛli nla ŋa. Jĩnɛ ŋau ilaalu Davidii í nɛ ŋa wo nɔ à jilɛ ŋai si inɔ kpasɛ̃i Aɔ̃ Lafɛ̃ɛu.

¹⁰ Ŋɔi í jɔ̀ à kaako ilaaluu inɛ fei do jĩnɛi igũɛ si awɔ. À waa leekĩi kɔkɔi bi kuweeu, hai ikpa awɔ njɛi ileu hee ku baa ikpa awɔ cangai ileu.

¹¹ Ŋɔi Yehoyada do amaɛ ŋa à gbã Zoasi à naaɛ wa bi zamaau, nɔ à daa si fulai ilaaluu nɔ Yehoyada í naa tiai wooda. Í biiɛ bomma nɔ í tontooa ikpo si iri. Ŋɔi zamaau í dɔ̃ anu í ni, hunde sisɔ kú jɛ ti ilaalu.

¹² Iyi Atali í gbɔ ibai zamaau bɛi wa sɛi wa bɔ bi bukii ile ku fitai ilaaluu, ŋɔi í bɔ bi tu ŋa kpasɛ̃i Aɔ̃ Lafɛ̃ɛ bɛ.

¹³ Ŋɔi í cɔ ilu, nɔ í ba wee ilaaluu wa leekĩ si geetei anu ileu. Nɔ inɛ ngbo ŋa do woo fã kãakãakĩ ŋa à wa kɔkɔɛ. Zamaau fei í wɛɛò inɔ didɔ̃ nɔ à waa fã kãakãakĩ ŋa, woo kɔ̃ iri ŋa do jĩnɛi ijo nŋa ŋa à wasi irii saabu ŋa ku kɔ̃. Ŋɔi Atali í ga ibɔɛ ŋa nɔ í dɔ̃ anu wa ni, à zambam nii à zambam nii.

¹⁴ Yehoyada kù bi a kpa Atali si inɔ kpasɛ̃i Aɔ̃ Lafɛ̃ɛ. Na ŋɔi í ce í jɔ̀ inɛ ŋa iyi à jɛ inɛ ngboi sooge cĩɔ cĩɔ ŋau à fita wa nɔ í sɔ̃ ŋa í ni a jɔ̀ Atali ku fita hai si inɔ nŋa. Nɔ í ni inɛ iyi wa tooɛ wa fei, a kpaa.

¹⁵ Ŋɔi à fitaɛ à waa bɔòɛ kpasɛ̃i ilaalu. Iyi à to anu koofai acĩ ŋau, tengi bɛi à kpaa.

¹⁶ Si anyiɛ, ŋɔi Yehoyada í dĩ akabuu do zamaau fei do ilaaluu ku ba a jɛ zamaai Aɔ̃ Lafɛ̃ɛ.

¹⁷ Ŋɔi zamaau fei í lɔ inɔ ilei iwɛ̃ Baaliu nɔ à lɛgɛɛ, nɔ à lɛgɛ bi kuweeu do kuta ŋa iyi à lɔau fei mam mam. Nɔ à kpa Matãa woo weei Baali si wajui bi kuwee ŋau bɛ.

¹⁸ Iyi à tã, ŋɔi Yehoyada í jilɛ inɛ ŋa iyi aa ya maa degbe kpasɛ̃i Aɔ̃ Lafɛ̃ɛu nɔ woo wee ŋau do inɛi Levii ŋaui aa ya cɔ icɛ nŋa. Hai tako wo, Davidi í kpɛ̃ inɛi Levii woo wee ŋaui wuaa ikã ikã ku ba a ya maa cea Aɔ̃ Lafɛ̃ɛ kuwee ŋa, bɛi à kɔɔ si woodai Moizi, nɔ a maa kɔ̃ iri do inɔ didɔ̃ nla nla a maa ceò icɛu si bɛi Davidi í jilɛ nŋa.

¹⁹ Ŋɔi Yehoyada í jilɛ woo degbe ŋa bi anu koofa ŋau ku ba ilu riisi kãma gɔ ku maà lɔ bɛ.

²⁰ Ŋɔi í tɔtɔɔ inɛ ngboi sooge cĩɔ ŋau wa do ilu jirima ŋa do inɛ ŋa iyi à nɛ gbugbã si zamaau, do zamaai ilɛu fei. Nɔ à fitaò ilaaluu wa hai kpasɛ̃i Aɔ̃ Lafɛ̃ɛu à lɔòɛ inɔ kpasɛ̃ɛ hai do anu koofa nlau, nɔ à jɔ̀ ilaaluu í buba si kitãi bommau.

²¹ Zamaai ilɛu fei í wɛɛò inɔ didɔ̃. Iluu í nɛ laakai ku sũ si na iyi í jɔ̀ à kpa Atali.