Bomma 2, 22 - Bibeli do fee

Bomma ku jɛi Ahazia

¹ Inɛi ilui Zeruzalɛmu ŋau Ahazia ama kɔdaai Yoramui à so í jɛ ilaalu si agbɛɛ, domi soogei inɛi Arabi ŋa iyi à naa igũ si asɔi inɛi Zudaa ŋau à kpa igbãɛ ŋau fei. Do yaase bɛɛbɛi Ahazia amai Yoramu í jɛò bomma si ilɛi Zudaa.

² Adɔ̃ kɔnfia do minjii Ahazia í nɛ waati iyi í jɛ bommau. Nɔ í ce adɔ̃ akã si bommau Zeruzalɛmu. Iyeɛi à ya kpe Atali tɔkui Ɔmuri.

³ Nɔ í too si kucei inɛi kpasɛ̃i Akabu ŋau, domi iyeɛ í kɔɔ si laalɔ.

⁴ Ŋɔi í ce mii iyi kù dɔ̃a Aɔ̃ Lafɛ̃ɛ si, bɛi kpasɛ̃i Akabu í ceu. Si anyii ikui baaɛu, inɛi kpasɛ̃i Akabu ŋai à jɛ woo kɔɛ ŋa iyi à naa nfe ku ce wa.

⁵ Si bɛi wa too si ikɔ nŋa, ŋɔi í si Yoramu amai Akabu ilaalui Izirɛliu igũ bi Hazaɛli ilaalui Siri si ilui Ramɔti si ilɛi Galaadi. Nɔ inɛi Siri ŋau à mɛɛ Yoramu wa.

⁶ Ŋɔi Yoramu í sinda í nyi Yizireɛli koo cea kumɛɛ ŋau iwɔ. Ŋɔi Ahazia ilaalui Zudaa í dede í bɔ ku cɔɔ Yizireɛli bɛ si bɛi kumɛɛu wa kpãa iju ntɔ ntɔ.

⁷ Ilaaɔ̃ í jɔ̀ Ahazia í bɔ bi Yoramui si na iyi í jɔ̀ wa bi ku ce nfeɛ. Iyi í to bi tɛɛ gbakã, ŋɔi aŋaò à bɔ igũ bi Yehu tɔkui Nimusi. Wee Yehui Aɔ̃ Lafɛ̃ɛ í cica ku ceò nfei kpasɛ̃i Akabu fei mam mam.

⁸ Nɔ si bɛi Yehu wa kpa inɛi kpasɛ̃i Akabu ŋau, ŋɔi í ba inɛ ngboi Zudaa ŋa do amai igbãi Ahazia ŋa iyi à waa cea Ahazia icɛ à wa bɛ. Ŋɔi í kpa ŋa.

⁹ Ŋɔi í jɔ̀ à koo à dɛdɛ Ahazia mɔ wa, nɔ à koo à muu wa hai Samari bii í koo wa manji. Ŋɔi à naaɛ wa bi Yehu, nɔ à kpaa. Ŋɔi à koo à suu, domi à ni, tɔkui Zozafati iyi wa dɛ Aɔ̃ Lafɛ̃ɛ do idɔɛ feiui. Nɔ inɛ kãma kù gbe si kpasɛ̃i Ahazia iyi á yɔkɔ ku jɛ bommau má.

Atali í jɛ bommau

¹⁰ Iyi Atali iyei Ahazia í yɛ amai nŋu í ku ŋɔi í dede wa kpa dimii woo jɛ bommai Zudaa ŋau fei.

¹¹ Amma Yoseba ama inaaboi ilaaluu í so Zoasi amai wecĩɛ Ahazia si asii hai inɔi amai ilaalu ŋau waati iyi à waa kpa ŋa. Ŋɔi í koo í singaɛ ilaawa bi ku sũ, nŋu do abo iyi á maa woo. Bɛɛbɛi Yoseba aboi woo wee Yehoyada, ama inaaboi Yoramu ilaalui Zudaa, wecĩi Ahaziau í ce ku ba Atali ku maà ba ku kpa Zoasi.

¹² Ŋɔi à singaɛ bi tu ŋa adɔ̃ mɛɛfa si inɔ kpasɛ̃i Ilaaɔ̃u. Waati bɛɛbɛ Atalii wa jɛ ilaalu inaabo si ilɛu.