Bomma 2, 21 - Bibeli do fee

¹ Iyi Zozafati í ku nɔ à suu bi balɛi balaɛ ŋa si ilui Davidi. Ŋɔi amaɛ Yoramu í jɛ bomma si agbɛɛ.

Bomma ku jɛi Yoramu

² Yoramu í nɛ ifɔ mɛɛfa. Aŋai Azaria do Yehiɛli do Zakari do Azariahu do Mikaɛli do Sefatia, aŋa fei amai Zozafati ilaalui Izirɛliui.

³ Baa nŋau í ce nŋa amuai nkpɔ nkpɔ, hai isɔ fũfũ ŋa do wura ŋa do mii jiida ŋa do ilu ku nɛ gbugbãi Zudaa ŋa. Amma Yoramui í jɔ̀a bommau, si na iyi í jɔ̀ nŋui í jɛ igbã.

⁴ Iyi Yoramu í buba si bommai baaɛu nɔ í ba gbugbã, ŋɔi í jɔ̀ à kpa ifɔɛ ŋau fei do inɛ ngboi Izirɛli gɔ ŋa má.

⁵ Adɔ̃ kuntaa do minjii Yoramu í nɛ waati iyi í jɛ bommau. Nɔ í ce si bomma adɔ̃ mɛɛjɔ ilui Zeruzalɛmu.

⁶ Í ce mii iyi kù dɔ̃a Aɔ̃ Lafɛ̃ɛ si, amma í too si kucei ilaalui Izirɛli ŋau bɛi kpasɛ̃i Akabu í ceu wo, domi ama inaaboi Akabui í so í ce abo.

⁷ Do nŋu fei, Aɔ̃ Lafɛ̃ɛ kù bi ku ce nfei kpasɛ̃i Davidi na akabuu iyi aŋaò à dĩ do kuwã iyi í ceaa í ni nŋu á jɔ̀ dimiɛ ŋa a ya maa jɛ bomma hee do ajɔ fei.

⁸ Si waatiɛi inɛi Edɔmu ŋa à dedeò ide ku kɔ̀ si gãmɛi inɛi Zudaa ŋa iyi à waa ta nŋa gbugbã, nɔ à soa ara nŋa ilaalu.

⁹ Ŋɔi Yoramu í koo si ŋa do inɛ ngboi soogeɛ ŋa do sarɛti ku ja igũɛ ŋau fei. Idũ laja ŋɔi í dede í lɔ si igũu nɔ í kãmia inɛi Edɔmu ŋa iyi à kaakoɛu hee do inɛ ngboi woo mu sarɛtii igũ ŋau.

¹⁰ Hai waati bɛɛbɛi inɛi Edɔmu ŋa à kɔ̀ò ara nŋa hai bi inɛi Zudaa ŋa hee ku baa nnyi. Si waati akãu bɛi, inɛi Libuna ŋa mɔ à dedeò ide ku kɔ̀ si Yoramu nɔ à nya ara nŋa hai si bommaɛ. Aɔ̃ Lafɛ̃ɛi í jɔ̀ í ce bɛɛbɛ si na iyi í jɔ̀ Yoramu í kɔ̀si nŋu Aɔ̃ Lafɛ̃ɛi balaɛ ŋau.

¹¹ Nɔ mɔm Yoramu í ce bi kuweea iwɛ̃ ŋa si antaii iri kutai Zudaa ŋa. Ŋɔi í tale si inɛi Zeruzalɛmu ŋa do inɛi Zudaa ŋau fei iwɛ̃ ŋa ku tɔɔ.

¹² Ajɔ nŋu gɔ walii Elii í kɔ tia í sambaa wa í ni, Aɔ̃ Lafɛ̃ɛi balaɛ Davidi í ni, i kù too si kucei baaɛ Zozafati do si ti balaɛ Aza ilaalui Zudaa ŋau.

¹³ Kucei ilaalui Izirɛli ŋai ì too si, nɔ ì tale si inɛi Zudaa do inɛi Zeruzalɛmu ŋa iwɛ̃ ku tɔɔ bɛi kpasɛ̃i Akabu í tale si inɛi Izirɛli ŋau. Si antaiɛ ì kpa ifɔɛ ŋa iyi à tiaɛ mɔm si kpasɛ̃i baaɛ.

¹⁴ Na nŋu, Aɔ̃ Lafɛ̃ɛ á jɔ̀ wahala nla nla gɔ ku naa si ilɛɛu, do si amaɛ ŋa do si aboɛ ŋa do si mii iyi í jɛ titɛɛ fei.

¹⁵ Nɔ á dasi awɔ takaɛ bɔ̃ɔ kugaabu gɔ, bɔ̃ɔi inɔ iyi á maa kɔ̃ɔsi ajɔ do ajɔ hee koo fitaò amaafũɛ wa waduude.

¹⁶ Ŋɔi Aɔ̃ Lafɛ̃ɛ í tale si inɛi Filisi ŋa do inɛi Arabi ŋa iyi à wa kɔkɔi inɛi Etiopi ŋau à bɔ igũ si Yoramu.

¹⁷ Ŋɔi à fangaa si ilɛi Zudaau, à jɛ ŋa igũ nɔ à ko amani jiida ŋa iyi í wa kpasɛ̃i ilaaluu fei. Nɔ à mu aboɛ ŋa do amaɛ ŋa fei à nɛò ŋa, í gbe Zoakazi ifɔ kɔdaa nŋa nŋu akã.

¹⁸ Si anyii nŋu ŋau bɛ fei, Aɔ̃ Lafɛ̃ɛ í dasi Yoramu bɔ̃ɔi inɔ iyi kù nɛ iwɔ.

¹⁹ Ajɔ do ajɔ bɔ̃ɔu í ya maa kɔ̃ɔsii. Nɔ si kɔɔi adɔ̃ minjisia, amaafũɛ í fita waduude na bɔ̃ɔu. Ŋɔi í ku do wahala nla nla, nɔ inɛɛ ŋau a kù koaa ina bɛi à cea balaɛ ŋa.

²⁰ Adɔ̃ kuntaa do minjii í nɛ waati iyi í jɛ bommau. Nɔ í mu bommau adɔ̃ mɛɛjɔ ilui Zeruzalɛmu. Ikuɛ kù jɛa inɛ kãma inɔ kufɔ, nɔ à koo à suu si ilui Davidi, amma kù jɛ bi balɛi ilaalu ŋau.