Bomma 2, 20 - Bibeli do fee

À naa igũ si bommai Zudaa

¹ Si anyii nŋu, inɛi Moabu ŋa do inɛi Amɔɔ ŋa do inɛi Maɔ̃ɔ ŋa à naa igũ si Zozafati.

² Ŋɔi inɛ ŋa à naa à sɔ̃ Zozafati à ni, zamaa nla gɔ wa naa siɛ wa hai icei tenkuu, hai do ilɛi Siri wa. Nɔ à wa Hasasɔ̃ɔ-Tamaa iyi í jɛ Eni-Gediu.

³ Zigii Zozafati wa da, nɔ í lasabu nŋu ku dɛdɛ Aɔ̃ Lafɛ̃ɛ. Nɔ í jilɛ anu ku dĩ si dimii Zudaa fei.

⁴ Ŋɔi inɛ ŋa à naa hai si ilui Zudaa ŋau fei Aɔ̃ Lafɛ̃ɛ ku tɔɔ.

⁵ Ŋɔi Zozafati wa leekĩ si anini bii inɛi Zudaa ŋa do inɛi Zeruzalɛmu ŋa à tɔtɔɔ si inɔ kpasɛ̃i Aɔ̃ Lafɛ̃ɛ si wajui bantuma titɔ̃u.

⁶ Ŋɔi í ni, Aɔ̃ Lafɛ̃ɛi bala nwa ŋa, awɔ iyi ì waa mu bommai lele nɔ ì nɛ gbugbã si bommai ilɛ ŋa fei. Ì nɛ gbugbã nɔ inɛ kãma kaa kɔ̀ò araɛ si wajuɛ.

⁷ Aɔ̃ Lafɛ̃ɛ nwa, awɔi ì gba ilɛu ihɛ̃ hai si awɔi inɛ ŋa iyi à nɔɔ waati iyi awa zamaaɛ inɛi Izirɛli ŋau à to wa, nɔ ì na wa ku jɛ tu wa hee do ajɔ fei awa tɔkui Aburahamu kpaasiɛu.

⁸ Aŋai à buba si. Nɔ à ma si ile kumá iyi ì cica i wa siu à ni,

⁹ bii í na í jɛ laalɔ gɔ í naa si wa, walakɔ ijuukpã gɔi, walakɔ igũi walakɔ bɔ̃ɔi walakɔ arii, aa ka naa si inɔ ileu ihɛ̃ si wajuɛ, domi ihɛ̃i ì cica i wa si. Aa ka tɔɔɛi si inɔ kufɔ nwa hai inɔ ileu ihɛ̃, nɔ i jɛ nwa i faaba wa.

¹⁰ Nsɛi wee inɛi Amɔɔ ŋa do inɛi Moabu ŋa do inɛi Edɔmu ŋa à waa ba wa do ija. Waati iyi bala nwa ŋa à fita wa hai ilɛi Ezibiti, awɔi ì ganji ŋa ilɛi dimi ŋau bɛ ku lɔ si. Ŋɔi bala nwa ŋau à gbe nŋa a kù kpa ŋa.

¹¹ Inɛ ŋau wee nsɛi gbese iyi à yɔɔ iyi aŋa aa sã nwai í jɛ a naa a lele wa hai si ilɛ iyi ì na wa.

¹² Aɔ̃ Lafɛ̃ɛ nwa, i kaa kpã ŋa iju? Awa a kù nɛ gbugbã si wajui zamaa nla nla iyi wa naa si wau ihɛ̃. Nɔ a kù mà bɛi aa ka ce, awɔ akãi à waa cɔ.

¹³ Inɛi Zudaa ŋau fei à waa leekĩ si wajui Aɔ̃ Lafɛ̃ɛ bɛ, aŋa do nyaanze nŋa ŋa do abo nŋa ŋa do ama nŋa ŋa.

Aɔ̃ Lafɛ̃ɛ í jɔ̀ inɛi Zudaa ŋa à jɛ igũ

¹⁴ Ŋɔi hundei Aɔ̃ Lafɛ̃ɛ í lɔ si Yahaziɛli amai Zakari si inɔ zamaau. Zakariu amai Benayai, Benaya mɔ amai Yeiɛli. Yeiɛliu mɔ amai Matania inɛi Leviiui si amai Azafu ŋa.

¹⁵ Nɔ Yahaziɛli í ni, i sotĩ i gbɔ ŋa iŋɛ inɛi Zeruzalɛmu do inɛi Zudaa ŋa fei do awɔ ilaalu Zozafati. Aɔ̃ Lafɛ̃ɛi wa sɔ̃ ŋɛ í ni i maà ce njo ŋa nɔ i maà jɔ̀ zigi nŋɛ ku da si wajui zamaa nla nlau ihɛ̃, domi kù jɛ iŋɛi aa ce igũu, nŋu Ilaaɔ̃i á coo.

¹⁶ Ala i koo si ŋa ŋa. Aa too wai do iri kutai Siti nɔ i ba ŋa si kɔɔi lɔɔmau ŋa, si wajui gbaai Yeruɛliu.

¹⁷ Iŋɛ i kù nɛ ija kãma ku ce si ideu bɛ ŋa. Iŋɛ de i koo nɔ i wa bɛ ŋa. Aa yɛ faaba iyi Aɔ̃ Lafɛ̃ɛ á naa nŋɛ wa. Inɛi Zudaa ŋa do ti Zeruzalɛmu ŋa, i maà ce njo ŋa nɔ i maà jɔ̀ zigi nŋɛ ku da. Ala i fita i kò ŋa ŋa. Aɔ̃ Lafɛ̃ɛ á wɛɛ do iŋɛ.

¹⁸ Ŋɔi Zozafati í sɛɛbata hee ilɛ, nɔ inɛi Zudaa ŋau fei do inɛi ilui Zeruzalɛmu ŋau à sɛɛbataa Aɔ̃ Lafɛ̃ɛ si wajuɛ bɛ.

¹⁹ Ŋɔi dimii Levii ŋa si tɔkui Kehati ŋa do si tɔkui Kore ŋau à dede ku ba a saabu Aɔ̃ Lafɛ̃ɛi Izirɛliu do anu ku dɔ̃ hee lele.

²⁰ Iyi iju í má daadaakɔu ŋɔi à dasi kpãai gbaai Tekoa. Iyi à waa bi a nɛ, ŋɔi Zozafati í naa bi tu ŋa nɔ í ni, i gbɔ idem ŋa, iŋɛ inɛi Zudaa do Zeruzalɛmu ŋa. I dasi Aɔ̃ Lafɛ̃ɛ nŋɛ naanɛ ŋa, aa ba gbugbã ŋa. I dasi waliiɛ ŋau naanɛ, aa jɛ igũ ŋa.

²¹ Ŋɔi aŋaò zamaa ŋau à ce anu akã à so woo kɔ̃ iri ŋa. À waa dasi jĩnɛ kumá ŋa à cuaa sooge ŋau, à cĩ Aɔ̃ Lafɛ̃ɛ à waa ni, i saabu Aɔ̃ Lafɛ̃ɛ ŋa, domi araareɛ í wɛɛi do ajɔ fei.

²² Waati iyi à so iriu à waa kɔ̃, ŋɔi Aɔ̃ Lafɛ̃ɛ í fɔtɔtɔi inɛi Amɔɔ ŋa do inɛi Moabu ŋa do inɛi iri kutai Seii ŋa iyi à waa naa ku ba inɛi Zudaa ŋa ku jau. Nɔ aŋa duusɔ̃ɔ à waa ce igũ do njɛ.

²³ Inɛi Amɔɔ ŋa do inɛi Moabu ŋai à koo à ba inɛi iri kutai Seii ŋau do ijau. Nɔ à kpa ŋa fei mam mam. Iyi à tã, nɔ aŋa taka nŋa à lɔsi ku kpa njɛ akã akã.

²⁴ Iyi inɛi Zudaa ŋa à to geete hai bii inɛ í ya hɔ̃nnɛ gbaau, ŋɔi à cɔ do cingaa hai bii zamaa nlau wa faataò wa, nɔ à ba wee iku ŋai à waa sũ ilɛ bɛ fei. Nɔ inɛ kãma kù fita si.

²⁵ Ŋɔi Zozafati do zamaaɛ à bɔ ku wusɛ ŋa. Ŋɔi à ba amani nla nla si iku ŋau do mii jiida. Ŋɔi à ko mii ŋau hee à mɔngɔ fei ndɛɛ ku nɛò. Ajɔ mɛɛtai à ce à wasi mii ndu ŋa ŋau ku ko, domi í kpɔ í caa.

²⁶ Ajɔ mɛɛsiau ŋɔi à tɔtɔɔ si lɔɔmai Beraka bii à saabu Aɔ̃ Lafɛ̃ɛu. Na ŋɔi í ce à sɔ inyau lɔɔmai Beraka waatɔ ku saabu. Nɔ iri iyi à ya kpoo do mbɛ hee ku ba nnyi.

²⁷ Ŋɔi inɛi Zudaa ŋau do inɛi Zeruzalɛmu ŋau fei, Zozafati í cua nŋa à dasi kpãa do inɔ didɔ̃ à waa baa Zeruzalɛmu. Aɔ̃ Lafɛ̃ɛ í jɔ̀ à nɛ inɔ didɔ̃ si na iyi í jɔ̀ í faaba ŋa hai si awɔi mbɛɛ nŋa ŋau.

²⁸ Ŋɔi à lɔ inɔ ilu Zeruzalɛmu wa à waa bɔ hee inɔ kpasɛ̃i Aɔ̃ Lafɛ̃ɛu do ibai kitigbo ŋa do ti mɔɔlɔ ŋa do kãakãakĩ ŋa.

²⁹ Ŋɔi zigii inɛi bommai ilɛ mmu ŋau fei í da si Ilaaɔ̃ do bɛi à gbɔ iyi Aɔ̃ Lafɛ̃ɛ í ja do mbɛɛi inɛi Izirɛli ŋau.

³⁰ Nɔ bommai Zozafati í wɛɛò laakai ku sũ. Nɔ Aɔ̃ Lafɛ̃ɛɛ í muaa kusĩmi bii feiò bii fei.

Kɔɔi bomma ku mui Zozafati

³¹ Zozafati í jɛ bommai Zudaa waati iyi í nɛ adɔ̃ kuntaa do miiu. Nɔ í ce si bommau adɔ̃ kaafɛtũ ilui Zeruzalɛmu. Iyeɛi à ya kpe Azuba amai Sili.

³² Ŋɔi í too si kucei baaɛ Azau fei, nɔ kù yaa bii kãma, wa ceò mii iyi í dɔ̃a Aɔ̃ Lafɛ̃ɛ si.

³³ Nŋu de, kù lɛgɛ bi kuweea iwɛ̃ ŋa si geete ŋau. Idɔi zamaau kù sinda si Aɔ̃ Lafɛ̃ɛi bala nŋa ŋau fei mam mam titã.

³⁴ Faajii icɛ mmui Zozafati ŋau hai sinte nŋa hee ku bɔ kɔɔɛ à kɔɔ si faajii Yehu amai Anani nɔ í wa si tiai ilaalui Izirɛli ŋau.

³⁵ Si anyii nŋu, Zozafati ilaalui Zudaau í dĩ akabuu do Ahazia ilaalui Izirɛli iyi kuceɛ kù sĩau.

³⁶ Aŋaò à ce anu akã à ce akɔi inyi ŋa a ya bɔ Taasi. À koo à ce akɔi inyi ŋaui Ɛsiɔ̃-Gebɛɛ.

³⁷ Ŋɔi Eliezɛɛ amai Dodava inɛi Maresa í ce walii si Zozafati í ni, si na iyi í jɔ̀ í dĩ akabuu do Ahazia, Aɔ̃ Lafɛ̃ɛ á bɛjɛ icɛɛ. Nɔ akɔi inyi ŋau à lɛgɛ, a kù yɔkɔ a kù bɔ Taasi má.