Bomma 2, 2 - Bibeli do fee

¹ Ŋɔi í ka inɛmɔkɔ dubu kitaò fɛɛwa (70.000) a jɛ woo so aso ŋa. Nɔ í so inɛ dubu cinɛ (80.000) má a jɛ woo gbe kuta ŋa si iri kuta ŋau. Nɔ í so inɛ ngbo dubu mɛɛta do cĩɔ mɛɛfa (3.600) iyi aa maa cɔ ŋa.

² Ŋɔi Salomɔɔ í bɛ inɛ ŋa a koo a sɔ̃ Hiramu ilaalui Tiiu a ni, cea amu mɔ bɛi ì cea baam Davidi iyi ì sambaa jĩi ndii sɛɛdi ŋa wa ku maò kpasɛ̃ɛu.

³ Wee ǹ wa n bi n ma kpasɛ̃i Aɔ̃ Lafɛ̃ɛm. An nyaa ikãi ku jɛ titɛɛ bii aa ya jo tuae ku dɔ̃ inunu ŋa ku ba a ya maa jilɛa pɛ̃ɛ waati kãma fei, ku ba a ya ce kuwee iyi à ya jo si ina fei sãa sãa daakɔ do alɛ, do ti ajɔi kusĩmi ŋau do ti cukpa titɔ̃ ŋau do ti jingaui Aɔ̃ Lafɛ̃ɛ nwa ŋau a maa tooò si woodau hee do ajɔ fei.

⁴ Kpasɛ̃ iyi an mau á bɛi ku la, domi Aɔ̃ Lafɛ̃ɛ nwau í la í re iwɛ̃ fei.

⁵ Ntɔ ntɔ lele í cĩ nɔ í la hee í caa, amma kù too. To, yooi á yɔkɔ ku maa kpasɛ̃. Baa amu takam n kaa n yɔkɔ n maa kpasɛ̃ bii kù jɛ tengi bii aa ya tɔɔɛ nɔ a ya cea kuwee ŋa.

⁶ Debɛi bɛɛm inɛ akã gɔ wa iyi í mà icɛi wura do isɔ fũfũ do isɔ nkpa do isɔ ku ce. Nɔ ku mà acɔ ku mù do ila nkpa do boogu do boogu ku yɔgɛɛò nkpa, nɔ lafɛ̃ɛ ku mà booda ŋa ku ce si idĩ ku ba ku ce icɛ aŋaò goni ŋa iyi Davidi í cica à wa Zudaa do Zeruzalɛmu bi tom ihɛ̃.

⁷ Sambaam jĩi ndii sɛɛdi ŋa do ti sipɛrɛɛsi ŋa do ti santali ŋa wa hai ilɛi Libãa, domi ǹ mà iyi woo ce icɛɛ ŋa à mà jĩi ku bu. Nɔ wee woo ce icɛm ŋau aa sobi titɛɛ ŋau.

⁸ Jɔ̀ a dɛɛm jĩi nɔu wa ku kpɔ domi ile iyi ǹ bi ku mau á la nɔ á sĩa.

⁹ An na woo ce icɛɛ ŋa iyi à da jĩi ŋau iyafũi bilee tɔnu dubu mɛɛfa (6.000) do ɔɔzu tɔnu dubu (1.000), do atɛ̃ vɛ̃ɛ liiti dubu cĩɔ mɛɛjɔ (800.000) do ikpoi olivi liiti dubu cĩɔ mɛɛjɔ (800.000).

¹⁰ Ŋɔi Hiramu ilaalui Tiiu í kɔ í jɛaa Salomɔɔ wa si tia í ni, si na iyi í jɔ̀ Aɔ̃ Lafɛ̃ɛ í bi zamaaɛui í jɔ̀ í soɛ i jɛ ilaalu nŋa.

¹¹ Nɔ Hiramu í ni má, ǹ saabu si Aɔ̃ Lafɛ̃ɛi inɛi Izirɛli ŋa iyi í ce lele do ilɛ nɔ í mua Davidi awɔ ama kurɔ iyi ì nɛ bisi do laakai. Awɔi aa maa Aɔ̃ Lafɛ̃ɛ kpasɛ̃, do kpasɛ̃i ilaalu iyi á jɛ titɛɛ.

¹² De, nsɛi, an jɔ̀ inɛmɔkɔ goni gɔ ku naa bi tɛɛ bɛ. Í mà icɛ ntɔ ntɔ. Iriɛi Hurami-Abi.

¹³ Baaɛ inɛi Tiii amma iyeɛ inɛi dimii Dãai. Inɛɛu í jɛ gonii si icɛ dimi ikã ikã fei, hai icɛi wura do isɔ fũfũ do isɔ nkpa do isɔ, í mà icɛi kuta do ti jĩi do ti acɔ ku mù do ila nkpa do boogu do boogu ku yɔgɛɛò nkpa do acɔ fɛlɛ fɛlɛ nkpa do si icɛi booda ŋa ku ce si idĩ do icɛi awɔ dimi iyi aa ni ku ce fei. Aŋaò goniɛ ŋaui aa ce icɛ do titom ŋau do ti Davidi baaɛu.

¹⁴ Nsɛi, lafɛ̃ɛm ku sambaa woo ce icɛɛ ŋau iyafũi bilee do ɔɔzu do ikpoi olivi do vɛ̃ɛ iyi ì fɔ ideɛu wa.

¹⁵ Nɔ inɛm ŋa, aa bɔ si iri kutai Libãa ŋa a daɛ jĩi ŋa wa zaka bɛi aa bi fei. Nɔ a jɔ̀ ku cã wa si antaii tenkuu hee ku to wa Zopee. Hai bɛ, nɔ i jɔ̀ a naa a ko ŋa a toò wa Zeruzalɛmu.

¹⁶ Ŋɔi Salomɔɔ í ka inɛ njoo ŋa iyi à wa ilɛi Izirɛliu fei si bɛi Davidi í ka ŋau wo. Ŋɔi à dede aŋa dubu cĩɔ do ciitaa do mɛɛta do cĩɔ mɛɛfa (153.600).

¹⁷ Ŋɔi í nya woo so aso dubu kitaò fɛɛwa (70.000) do woo gbe kuta dubu cinɛ (80.000) do inɛ ngbo dubu mɛɛta do cĩɔ mɛɛfa ŋa (3.600) iyi aa maa cɔ bɛi icɛu wa nɛ nɔ à ya maa kpɛ̃a zamaau icɛ ŋau.