Bomma 2, 19 - Bibeli do fee

Zozafati í jilɛ woo kiiti ŋa si ilɛi Zudaa

¹ Zozafati ilaalui Zudaau í baa kpasɛ̃ɛ Zeruzalɛmu do laakai ku sũ.

² Ŋɔi walii Yehu amai Hananiu í fita í koo í kooò nɔ í sɔ̃ɔ í ni, inɛ laalɔi aa faaba, nɔ i bi inɛ ŋa iyi à cé Aɔ̃ Lafɛ̃ɛ? Na nŋu, idɔɔkɔ̃i Aɔ̃ Lafɛ̃ɛ í dede siɛ.

³ Amma do nŋu fei Aɔ̃ Lafɛ̃ɛ í yɛ mii jiida ŋa siɛ, domi ì lɛgɛ jĩi iyi à gũa iwɛ̃ Asera ŋa si ilɛu nɔ idɔɛ si Ilaaɔ̃ ku dɛdɛi í wa.

⁴ Zozafati í wa Zeruzalɛmu bɛ. Nɔ í dabii má si zamaau hai Bɛɛseba hee ku bɔ iri kutai Efaraimu ŋa. Nɔ í baaò inɛ ŋa wa si kpãai Aɔ̃ Lafɛ̃ɛi bala nŋa ŋau.

⁵ Ŋɔi í jilɛ woo kiiti ŋa si ilu ku nɛ gbugbãi ilɛi Zudaa ŋau fei si ilu ŋau akã akã.

⁶ Nɔ í sɔ̃ ŋa í ni, i ce laakai si mii iyi ì waa ce ŋa, domi kù jɛ na amanɛ ŋai aa ceò kiiti ŋa. Ti Aɔ̃ Lafɛ̃ɛi, nŋu iyi á wɛɛ do iŋɛ bii ì waa kiiti ŋa.

⁷ Na nŋu i jirima Aɔ̃ Lafɛ̃ɛ ŋa. I wɔ̀ njoo si kuce nŋɛ ŋa, domi Aɔ̃ Lafɛ̃ɛ nwa kù bi inɛ iyi ci ya too ntɔ, do inɛ iyi í ya cica inɛ ŋa si na iyi í jɔ̀ à re njɛ do bɛɛrɛ do woo gba amua hai jɛ dee dee.

⁸ Nɔ Zeruzalɛmu bɛ má, Zozafati í jilɛ inɛi Levii ŋa do woo wee ŋa do inɛ ngboi kpasɛ̃ ŋa a jɛ woo kiiti ŋa nɔ a ya wũa idei njɛ hai gbɔai inɛi ilui Zeruzalɛmu ŋa.

⁹ Ŋɔi í sɔ̃ ŋa í ni, iyi ì nɛ ku ce ŋa, nŋui í jɛ i jirima Aɔ̃ Lafɛ̃ɛ ŋa do dee dee ku jɛ do idɔ kumá.

¹⁰ Waati kãma iyi kpaasi nŋɛ ŋau aa dede wa hai ilu nŋa ŋa a naaò taale iyi à ce nŋa wa si gãmɛi inɛ ku kpa, walakɔ si wooda gɔ, walakɔ si ide gɔ iyi à jilɛ, do si iyi à nɛ ku too si, do si iyi à ni a ce, i ya sisi nŋa yaaseɛ mam mam ŋa, ku ba a maà nɛ taale bi Aɔ̃ Lafɛ̃ɛ hee idɔɔkɔ̃ɛ ku dede si ŋa do iŋɛ taka nŋɛ. Bɛɛbɛi aa ya ce ŋa, nɔ i kaa nɛ taale ŋa.

¹¹ Amaria woo wee nlaui í jɛ iri nŋɛ si ide ŋa iyi à jɛ ti Aɔ̃ Lafɛ̃ɛ fei, nɔ Zebadia amai Isimaɛli inɛ ngboi dimii Zudaai í jɛ irii ide ŋa iyi à jɛ ti ilaalu fei. Inɛi Levii ŋai à jɛ woo kɔ tia nŋɛ ŋa. I dasi gbugbã i ceò icɛ ŋa. Nɔ Aɔ̃ Lafɛ̃ɛ ku wɛɛ do inɛ iyi á ce jiida.