Bomma 2, 18 - Bibeli do fee

Zozafati í dĩ akabuu do Akabu ilaalui Izirɛli

¹ Ŋɔi Zozafati í ba amani nkpɔ nkpɔ do amboe. Nɔ aŋaò Akabu à dĩ akabuu. Ilaalu Akabu í mua ama inɛmɔkɔi Zozafati ama inaaboɛ í gba abɔdɔ̃.

² Si anyii adɔ̃ nkpɔ, ŋɔi í bɔ bi Akabu ilui Samari. Nɔ Akabu í kpaa nŋu do zamaaɛu angudã ŋa do kɛtɛ ŋa nkpɔ nkpɔ. Nɔ í tɔɔ Zozafati í ni ku si nŋu igũ Ramɔti si ilɛi Galaadi.

³ Akabu ilaalui Izirɛliu í tɔɔɛ í ni, i kaa sim ilɛi Galaadi kaa jɛ ilui Ramɔti igũ? Ŋɔi Zozafati í jɛaa í ni, an koo, awaɛ akãi, zamaam titɛɛi. Aa ka siɛ igũu.

Walii ŋa à waa fɔ idei igũ ku jɛ

⁴ Ŋɔi Zozafati í ni, jɔ̀ i ce kubee bi Aɔ̃ Lafɛ̃ɛ titã.

⁵ Ŋɔi ilaalui Izirɛli í tɔtɔɔ walii ŋa zakai aŋa cĩɔ mɛɛ (400) nɔ í bee ŋa í ni, n bɔ igũ Ramɔti si ilɛi Galaadiu? Mà n jɔ̀ɔɛ. Ŋɔi à jɛaa à ni, koo, Ilaaɔ̃ á daɛ iluu si awɔ.

⁶ Amma Zozafati í bee í ni, waliii Aɔ̃ Lafɛ̃ɛ gɔ kù wa ihɛ̃ bii aa ka ce kubee má?

⁷ Ŋɔi ilaalui Izirɛliu í jɛaa í ni, inɛ gɔ í wɛɛ má bii aa ka ceò kubee bi Aɔ̃ Lafɛ̃ɛ. Amma n kù buu, domi ci ya yɛɛm ide jiida kãma gɔ, í gbe laalɔɛ. Nŋui í jɛ Misee amai Yimila. Nɔ Zozafati í ni, maà fɔ bɛɛbɛ.

⁸ Ŋɔi ilaaluu í kpe woo ce icɛɛ gɔ wa í ni koo kpe Misee amai Yimila wa ńya ńya.

⁹ Ilaalui Izirɛli do Zozafati ilaalui Zudaau à waa buba si kitãi bomma nŋa ŋa si bantumai anu koofai Samariu. Aŋa fei à waa dasi ibɔi ilaalu nŋa. Nɔ walii ŋau fei à wasi ku fɔ mii iyi á na ku ce si waju nŋa.

¹⁰ Inɛ akã nŋa Sedesiasi amai Kenaana í cea araɛ ngoi isɔ ŋa nɔ wa ni, Aɔ̃ Lafɛ̃ɛ í ni, do ngo ŋau ihɛ̃i aa kpaò inɛi Siri ŋa hee í tã ŋa.

¹¹ Nɔ walii ŋau fei à fɔ bɛɛbɛ, à ni, koo si Ramɔti si ilɛi Galaadiu, aa jɛ igũ. Aɔ̃ Lafɛ̃ɛ á daɛ iluu si awɔ.

Walii Misee í ni a kaa jɛ igũ

¹² Ŋɔi inɛ iyi í bɔ Misee ku kpe wau í sɔ̃ɔ í ni, walii ŋau fei wee à ce anu akã à waa yɛa ilaaluu jiida. Jɔ̀ ide ku fɔi awɔ mɔ ku jɛ bɛi tu ŋa. Fɔ jiidaɛ.

¹³ Ŋɔi Misee í jɛaa í ni, hee do irii Aɔ̃ Lafɛ̃ɛ fei, ide iyi Ilaaɔ̃ Lafɛ̃ɛm í sɔ̃m nii an fɔ.

¹⁴ Iyi í to wa ŋɔi ilaaluu í beeɛ í ni, Misee, ka bɔ igũ Ramɔti si ilɛi Galaadiu de, mà ka buba. Ŋɔi í jɛaa í ni, i koo ŋa, aa jɛ igũ ŋa. Aɔ̃ Lafɛ̃ɛ á da nŋɛ iluu si awɔ.

¹⁵ Ŋɔi ilaalu í ni má, fii fɛloi an jɔ̀ i gbasi do irii Aɔ̃ Lafɛ̃ɛ n ba n mà iyi ntɔi ì waa sɔ̃m.

¹⁶ Ŋɔi Misee í ni, ǹ yɛ inɛi Izirɛli ŋau fei à fangaa si iri kuta ŋau bɛi angudã ŋa iyi a kù nɛ woo degbe. Nɔ Aɔ̃ Lafɛ̃ɛ í ni, inɛ ŋau ihɛ̃ a kù nɛ inɛ ngbo. Inɛ fei ku sinda ku nyi ideɛ do laakai ku sũ.

¹⁷ Ŋɔi ilaalui Izirɛliu í sɔ̃ Zozafati í ni, n kù sɔ̃ɛ wo tã ba. Ci ya yɛɛm mii jiida kãma, í gbe laalɔ.

¹⁸ Ŋɔi Misee í ni, i sotĩ i gbɔ ide iyi Aɔ̃ Lafɛ̃ɛ wa fɔ ŋa. Ǹ yɛ Aɔ̃ Lafɛ̃ɛ wa buba si kitãi bommaɛ nɔ soogei lelei Aɔ̃ ŋau fei à wa kɔkɔɛ canga do njɛɛ.

¹⁹ Nɔ Aɔ̃ Lafɛ̃ɛ í bee ŋa í ni, yooi á koo lɛlɛ Akabu ilaalui Izirɛliu ku tale siɛ ku bɔ Ramɔti si ilɛi Galaadi igũ ku ce ku ba ku ce nfe. Nɔ aŋa fei à jɛ do yaase ikã ikã.

²⁰ Ŋɔi inɛi inɔɔko gɔ í naa í leekĩ si wajui Aɔ̃ Lafɛ̃ɛ nɔ í ni, amu an koo n lɛlɛɛ. Ŋɔi Aɔ̃ Lafɛ̃ɛ í beeɛ í ni, do yaase bɛire.

²¹ Ŋɔi í ni, an koo nɔ n tale si waliiɛ ŋau fei ibo ku sɔ. Nɔ Aɔ̃ Lafɛ̃ɛ í ni, awɔi aa yɔkɔ i lɛlɛɛ hee i toò kɔɔ. Koo nɔ i ce bɛɛbɛ.

²² Wee nsɛi bɛbɛi Aɔ̃ Lafɛ̃ɛ í jɔ̀ inɛi inɔɔko gɔ í lɔ si waliiɛ ŋau fei ku ba a maa sɔɛ ibo. Amma ntɔ ntɔ, laalɔi Aɔ̃ Lafɛ̃ɛ í dasi idɔ ku jɔ̀ ku baɛ.

²³ Ŋɔi Sedesiasi amai Kenaana í naa í sambala Misee, nɔ í ni, hai do iwoi hundei Aɔ̃ Lafɛ̃ɛ í fita hai bi tom nɔ í naa í sɔ̃ɛ ide.

²⁴ Ŋɔi Misee í jɛaa í ni, aa na i yɔɔ waati iyi aa na i sa i koo i maa manji ilaawa do ilaawa.

²⁵ Ŋɔi ilaalui Izirɛliu í sɔ̃ woo ce icɛɛ gɔ í ni, mu Misee i bɔòɛ bi Amɔɔ inɛ ngboi iluu do bi amam Zoasi.

²⁶ Nɔ i sɔ̃ ŋa i ni ǹ ni a dasi mɔkɔu ihɛ̃ ile piisɔ̃ɔ nɔ a ya maa naa pɛ̃ɛ keeke do inyi keeke hee n koo n baaò wa do laakai ku sũ hai si igũu.

²⁷ Ŋɔi Misee í sɔ̃ɔ í ni, bii ì baa do laakai ku sũ, kù jɛ Aɔ̃ Lafɛ̃ɛi í ni n fɔ ideu. Nɔ Misee í ni má zamaa fei ku gbɔ ideu.

À kpa ilaalu Akabu si igũ

²⁸ Ŋɔi ilaalui Izirɛliu do Zozafati ilaalui Zudaau à bɔ igũ Ramɔti si ilɛi Galaadiu.

²⁹ Ŋɔi ilaalui Izirɛliu í sɔ̃ Zozafati í ni, an kpaasi aram n bɔ igũu. Amma awɔ, so jĩnɛi ilaalu ku jɛɛ i dasi. Do yaase bɛɛbɛi ilaalui Izirɛliu í kpaasi araɛ bɛi a kaa màa à bɛi à bɔò igũu.

³⁰ Nɔ wee ilaalui Siri í sɔ̃ inɛ ngboi woo mu sarɛtii igũɛ ŋau tã í ni, i maà dɛdɛ inɛ mmu kãma ŋa, bii kù jɛ ilaalui Izirɛliu nŋu akã.

³¹ Iyi inɛ ngbo ŋau à hɔ̃nnɛ Zozafati ŋɔi à ni, kãm kãm á jɛ ilaalui Izirɛliu mbɛ. Ŋɔi à kaakoɛ ku ba a kpaa. Ŋɔi Zozafati í dɔ̃ anu í tɔɔ faaba nɔ Aɔ̃ Lafɛ̃ɛ í faabaɛ í fangaa ŋa hai bi tɛɛ.

³² Iyi à yɛ kù jɛ ilaalui Izirɛliu bɛ, ŋɔi à jɔ̀ɔ.

³³ Ŋɔi soogei Siri gɔ í ta afa wa, kù wã inɛ kãma mɔm, nɔ afau í koo í mu ilaalui Izirɛliu si afei akonkoi ibɔ iyi wa dasiu. Ŋɔi í sɔ̃ inɛ iyi wa mu sarɛtii igũɛu í ni, sinda i fitaòm hai inɔi igũu domi ǹ ba kumɛɛ mbɛ.

³⁴ Ajɔ nŋu bɛ igũu wa gbãai ntɔ ntɔ. Nɔ inɛ gɔ wa mu ilaalui Izirɛliu wa leekĩɛ si inɔ sarɛtii igũɛ bɛ si igũi aŋaò inɛi Siri ŋau hee alɛ í koo wa lɛò. Nɔ waati iyi inunu wa bɔ ku lɔ í ku.