Bomma 2, 17 - Bibeli do fee

Bomma ku jɛi Zozafati

¹ Si anyii ikui Azau, amaɛ Zozafatii í jɛ bomma si agbɛɛ. Ŋɔi í teese í kɔ̃ɔsi gbugbãi bommaɛ ku ba inɛi Izirɛli ŋa a maà naa a nɔ ŋa.

² Nɔ í jilɛ sooge ŋa si ilu ku nɛ gbugbãi Zudaa ŋau fei do woo mu ilu ŋa si ilɛi Zudaa do si ilui Efaraimu ŋa iyi baaɛ Aza í gbau.

³ Ŋɔi Aɔ̃ Lafɛ̃ɛ í wɛɛ do Zozafati si na iyi í jɔ̀ wa too si kucei Davidi balaɛ. Ci ya tɔɔ iwɛ̃ Baali.

⁴ Amma í ya tɔɔ Aɔ̃ Lafɛ̃ɛi balaɛui nɔ wa jirima woodaɛ ŋa. Kù too si kucei inɛi Izirɛli ŋau.

⁵ Aɔ̃ Lafɛ̃ɛ í jɔ̀ bommau í ba gbugbã si awɔɛ, nɔ inɛi Zudaa fei í ya maa naa amua ŋa wa, nɔ í ba amani nkpɔ nkpɔ do amboe nla nla.

⁶ Nɔ laakaiɛ í la si kpãai Aɔ̃ Lafɛ̃ɛ, nɔ í lɛgɛ bi kuweea iwɛ̃ si geete ŋau do jĩi iyi à lɔ na iwɛ̃ Asera ŋau hai si ilɛi Zudaa.

⁷ Si adɔ̃ mɛɛtasiai bomma ku jɛɛ, ŋɔi í bɛ akawe nlaɛ ŋa a koo a kɔ inɛ ŋa si cio si ilui Zudaa ŋa. Inɛ ŋau wee. Bɛni-Haili do Abudiasi do Zakari do Netaneɛli do Misee.

⁸ Í jɔ̀ inɛi Levii ŋa à si ŋa. Inɛ ŋau wee. Semaya do Netania do Zebadia do Azaɛli do Semiramɔti do Zonatãa do Adoniya do Tobiya do Tobu-Adoniya. Woo wee minji gɔ ŋa mɔ à wa si, Elisama do Yoramu.

⁹ Inɛ ŋau à waa mu tiai woodai Aɔ̃ Lafɛ̃ɛ nɔ à dabii si ilui Zudaa ŋau fei à waa kɔ zamaau si cio.

Gbugbãi Zozafati

¹⁰ Ŋɔi inɛi ilɛ ŋa iyi à kaako ilɛi Zudaa ŋau fei à waa ce njoi Aɔ̃ Lafɛ̃ɛ ntɔ ntɔ, nɔ a kù ba Zozafati igũ ku ce má.

¹¹ Ŋɔi inɛi Filisi ŋau à naa Zozafati amua ŋa wa do fiai adɔ̃ iyi à ya sãa do isɔ fũfũ. Nɔ inɛi Arabi ŋa mɔ à naaò angudã dubu mɛɛje do cĩɔ mɛɛje (7.700) do iwo kombo dubu mɛɛje do cĩɔ mɛɛje (7.700) wa.

¹² Ŋɔi gbugbãi Zozafati í bɔ lele wa kɔ̃ɔsi. Nɔ í ma ilu ku nɛ gbugbã ŋa do bii à ya jilɛ amaajɛ ŋa.

¹³ Ŋɔi í ce bi ku jilɛ amaajɛ ŋa nkpɔ nkpɔ si ilui Zudaa ŋau, nɔ í nɛ sooge kaasãanɛ ŋa ilui Zeruzalɛmu.

¹⁴ Bɛi à ka ŋa si kpasɛ̃i baa nŋa ŋa wee. Hai si dimii Zudaa inɛ ngboi sooge dubu ŋau, Adunai í jɛ inɛ ngboi sooge kaasãanɛ dubu cĩɔ mɛɛta ŋau (300.000).

¹⁵ Si anyiɛ Yohanaai í jɛ inɛ ngboi sooge dubu cĩɔ minji do cinɛ (280.000).

¹⁶ Nɔ Amasia amai Zikiri wa tɛkɛ siɛ. Nŋui í so araɛ í na Aɔ̃ Lafɛ̃ɛ, nɔ í jɛ inɛ ngboi sooge dubu cĩɔ minji (200.000).

¹⁷ Hai si dimii Bɛnzamɛɛ, Eliada ilu wɔɔkɔui wa jɛ inɛ ngboi sooge dubu cĩɔ minji (200.000). Aŋai à nɛ bioo do tɛli ŋa.

¹⁸ Nɔ Zozabadi wa tɛkɛ siɛ, nŋu mɔ do sooge dubu cĩɔ do cinɛ (180.000) iyi à nɛ jĩnɛ ku bɔ igũ.

¹⁹ Inɛ ŋau bɛi à jɛ woo ce icɛi ilaaluu, baka inɛ ŋa iyi í jilɛ si ilu ku nɛ gbugbãi Zudaa ŋau fei baasi.